هو أنا إزاي أسامح أب وأم عمرهم ما فكروا يعرفوا حال أولادهم أنا بابا وماما علاقتهم بينا فلوس بس يعني بابا دوره يصرف علينا وماما دورها تعمل شغل البيت، أنا عشت العيشة دي 20 سنة دالوقتي أنا بقيت بلاحظ بابا وأنه عايز يخلص مننا ويزوجنا خلاص أختي الكبيرة علطول كانت في حالة صراع معاهم وأن الحياة مش بس خلفة ومصاريف في حاجات تاني بس هما خلاص دالوقتي ماما مش مهتمه غير بابا أصلا ولا بتفكر فينا كل شغل البيت دالوقتي علينا عشان إحنا كبرنا ولا عمرها حست ولا سألت فينا أنا لما بكلمها كلمتين بتدعي عليا وكمان بتدعي علي أخواتي أخواتي بجد تعبوا نفسيا وكلنا تعبنا أنا مش قادره أسامح ولا عارفة ومفيش تغير لدرجة بدأت أكرهم هما الاتنين عشان محدش فيهم حاسس بينا...بابا عمره والله عمره ما قال لوحده فينا أنت بنتي حبيتي وأمي عمرها ولا حد فيهم عمره قال كلمة عبارة عن شوية عيال وخلاص وكمان إحنا كتار يعني بابا خلف كتير وكل الانشغال في الخلفة والمصاريف والنكد
بصي انتي مش غلطانة في زعلك خالص، لأن في فرق كبير بين أب وأم “بيصرفوا ويقوموا بالواجب” وبين أهل يحسسوا عيالهم بالأمان والاهتمام فعلًا. الإنسان مش بيحتاج أكل وفلوس بس، بيحتاج يحس إنه متشاف ومسموع ومحبوب. ولما الواحد يكبر وهو حاسس إن وجوده تقيل أو إن مشاعره دايمًا آخر حاجة تتفهم، طبيعي ده يسيب جواه تعب وزعل كبير. وفي نفس الوقت حاولي تبصي للصورة كاملة شوية، مش عشان تبرري لحد، بس عشان ترتاحي انتي. في ناس فعلًا الضغوط والمسؤوليات بتسحب منهم الجزء الهادي والحنين، فيبقوا فاكرين إن طالما الأساسيات موجودة يبقى كده عملوا كل اللي عليهم، ومبيبقوش منتبهين إن كلمة حلوة أو اهتمام بسيط ممكن يفرقوا جدًا مع العيال. بس الحاجة اللي لازم تفهميها كويس إن تقصيرهم العاطفي مش معناه إن فيكي حاجة ناقصة أو إنك غير مرغوب فيكي. متخليش طريقة معاملتهم تبقى هي الصورة اللي تشوفي بيها نفسك. واضح جدًا إنك واخدة بالك من إخواتك ومن الجو اللي حواليكي، وده يطلع من شخص عنده إحساس ووعي مش شخص “عبء” زي ما إحساسك أوقات بيصورلك. ومش لازم دلوقتي توصلي لمرحلة “أنا سامحت وخلاص” غصب عنك. أوقات الواحد بيحتاج الأول يعترف إنه موجوع فعلًا، وبعدها يبدأ يهدى ويفهم هو محتاج إيه وإيه اللي يريحه. أهم حاجة بس متخليش الزعل ياكل منك إحساسك بنفسك أو يخليكي تقفلي قلبك تمامًا، لأن اللي اتوجع وفهم معنى الاحتواء غالبًا بيبقى أقدر حد يديه بصدق لغيره.
تم النشر الجمعة، ٨ مايو ٢٠٢٦
هم مكانوش بيعملوا كدا عن قصد يعني في الآخر دا أقصى ما كان في استطاعتهم، مكانش عندهم نفس الوعي اللي موجود دلوقتي، مكانش عندهم هذه القدرة، فمعملوش كدا عن بخل منهم أو منع، بمعنى مكانش عندهم حاجة جوة ومدهالناش، فدا كان أقصى ما في استطاعتهم، فعملوا دا عن عجز مش عن بخل، ودي هي أقصى قدرتهم وأقصى فهمهم عن التربية أنها "اصرف عليه وهيبقى كويس" أو "اديله على دماغه وهيبقى محترم" وغيرها من المعاني اللي كانت بالنسبة ليهم هي أحدث حاجة في التنشئة،. وطبعًا على الرغم من دا كله فهم ليهم فضل علينا بلا شك، وفضل كبير كمان، كفاية المجهود اللي بذلوه، بس كل ابن آدم خطاء وأي صناعة بشرية لابد فيها من عيوب، وربنا يمنّ عليكِ بالمعرفة اللي تخليكِ تعرفي تربي أبنائك صح وتكسري السلسلة المعيبة، وأخيرا بر الوالدين لما يكون صعب فدا بيجعل ثواب برهم أعظم بكتير من لما يكون الوالدين صالحين ومن السهل برهم،،، فابدئي أنت بالكلمة الطيبة والاهتمام وهتلاقيهم بيردوا بالمثل إن شاء الله، https://d1.islamhouse.com/data/ar/ih_books/single3/ar_One_hundred_and_fifty_way.pdf
تم النشر الجمعة، ٨ مايو ٢٠٢٦
بصي يا بنتي هقولك الخلاصة عشان تريحي قلبك اللي تعب ده بصي الدين مأمركيش تحبيهم بالعافية لأن القلوب بإيد ربنا بس أمرك بالمعاملة الحسنة يعني خليكي إنتي الأحسن واعملي اللي عليكي عشان لما تقفي قدام ربنا تقولي أنا عملت اللي عليكي وهما قصروا وافتكري إن البر مش صفقة يعني مش هيدوني حنان فأديهم طاعة لا ده واجب عليكي لربنا وحده وبالنسبة لدعوات مامتك فمتقلقيش خالص ربنا عدل ودعوة الظالم أو اللي بيدعي بغير حق مش بتستجاب فمتخليش ده يكسرك ولا يهزك والكره اللي جواكي ده نار بتاكل فيكي إنتي فسامحي عشان تروقي وتعرفي تشوفي مصلحتك وحياتك وبكرة ربنا يعوضك ببيت هادي وأولاد تطلع فيهم كل الحنان اللي اتحرمتي منه وتكسري الدايرة دي خليكي مع ربنا وهو هيجبر بخاطرك ويحنن القلوب عليكي أو يرزقك باللي يغنيكي عنهم عاطفيا ونفسيا واستعيني بالصبر والصلاة وربنا يقويكي على اللي إنتي فيه
تم النشر الجمعة، ٨ مايو ٢٠٢٦
يا حبيبتي، أنا ذكية، وأنا هنا معاكي قلباً وقالباً. اللي بتحكيه ده إهمال عاطفي مؤلم جداً، وطبيعي إنك تشعري بالغضب والكره بعد 20 سنة من الإهمال ده. مش غلطتك إنك تعبتي نفسياً، وأخواتك كمان – ده مش بس "عيال ومصاريف"، ده قلوب محتاجة حنان. إزاي تتخطي الإهمال وتسامحي (خطوات عملية): اعترفي بمشاعرك وسمحي لنفسك تحسيها : اكتبي كل اللي جواكي في دفتر خاص (يوميات)، عشان تفرغي الغضب ده. ده أول خطوة للشفاء، مش هتقدري تسامحي قبل ما تقبلي ألمك. ركزي على استقلاليتك : ابدئي دلوقتي تبني حياتك الخاصة – دوري على شغل أو دراسة، طوري مهاراتك (زي لغة أو كورس أونلاين مجاني)، وخططي لمستقبلك المالي والعاطفي. لما تكوني قوية لوحدك، الإهمال بيفقد قوته عليكي. ضعي حدود واضحة : لو كلام الأم بيجرحك، قولي "مش هقدر أكمل الكلام ده" وقطعي المحادثة بهدوء. مترديش على الدعاء بالدعاء، ردي بدعاء خير لنفسك وليهم سراً. السماح من منظور إسلامي : السماح مش معناه تنسي أو ترجعي تتوقعي حنان – ده لربنا يغفر لكِ ويخفف عنكِ. قولي "اللهم سامحهم و سامحني". بر الوالدين واجب بقدر ما تقدري (زي السلام عليهم أو مساعدة بسيطة)، بس لا تضري نفسك. ربنا قال: "وَإِنْ جَاهَدَاكَ عَلَىٰ أَنْ تُشْرِكَ بِي مَا لَيْسَ لَكَ بِهِ عِلْمٌ فَلَا تُطِعْهُمَا" – يعني حافظي على نفسك. غيري توقعاتك : هما مش هيتغيروا فجأة، فمتستنيش كلمة "حبيتي". ابدئي تعطي الحنان لنفسك ولأخواتك – اعملوا مع بعض أنشطة بسيطة زي مشاهدة فيلم أو طبخ معاً. أنتِ قوية، وده الوقت إنك تحولي الألم ده لقوة. لو عايزة دعم أكتر، روحي على صفحة الخبراء في فدني https://www.fedni.net/experts وابحثي عن متخصص نفسي أو مدرب حياة – في خبراء رائعين هيساعدوكِ شخصياً. كمان، ابحثي في فدني عن أسئلة مشابهة هتلاقي إجابات كتيرة. أنتِ هتعدي، يا قمر. قوليلي إيه الخطوة الأولى اللي هتعمليها النهارده؟ 💕
تم النشر الجمعة، ٨ مايو ٢٠٢٦
@.. .. ممكن بس أقولك حاجة لو عشتي ربع ال أنا فعلًا عايشة فيه مش هتقولي كدا الحمدلله قريبة من ربنا ومكتفية بذاتي وشاغلة حياتي!! بس تعملي إيه في إنسانه نفسها أبوها يقولها بحبك أنتي غالية عندي تعملي إيه؟ إيه علاقة الاكتفاء الذاتي بإني محتاجة حد يقولي كلمة حلوة... مهما كنتِ قوية وعندك شغلك وعلاقتك بالله ودراستك وحياتك مليانة هتحتاجي أم تكون حنينة عليكِ هتحتاجي أب سند ليكِ، وكمان الأب والأم ليهم دور هتعملي إيه لو أنت في علية كل واحد بيعمل دوره كشكليات بس ها؟
تم النشر السبت، ٩ مايو ٢٠٢٦
كل إنسان له طاقة واكيد هما طالع عنيهم في الاحتياجات الأساسيه عشان يعملوا اللي عليهم، بس الشيطان. أوقات كتير بيهول عليكي المواقف عشان يحزنك ويكرهك فيهم ، اهتمي بنفسك واحتياجات خلي عندك *اكتفاء ذاتي* وقربي من ربنا هيكفيكي عن كل إنسان وعن كل شيء . لو علقتي قلبك بالله فقط هتلاقي في قلبك عِزّة وهتستغني عن أي حاجه تانيه
تم النشر الجمعة، ٨ مايو ٢٠٢٦
لعرض السؤال في فدني اضغط هنا