انا مش كويسه خالص بعد تالته ثانوى بحاول أنسى اللى حصل فى الامتحانات مش قادره خايفه اجيب درجه وحشه الموضوع يتحول لعقده خاصه ان كل امتحان له صعوبه معايا وله حكايه من اصعبهم امتحان التطبيقيه والكمياء اللى من شده حبي ليهم كنت بدعى ربنا افضل اتعلمهم للأبد امتحان الكمياء تعبت وما عرفتش احل كويس والتطبيقيه ما عرفتش احل خالص عماله احل واعمل خطوات النواتج مش بتطلع هبدت الامتحان وخرجت مهمومه وأولياء الأمور كلهم معاهم ورد ومبسوطين وانا ماشيه وسطهم بهمومى وعقلي فاضي روحت قاعده على السلم واعيط لحد دلوقتى مش قادره أواجه نفسي بانى ازاى اهبد وأخرج بالطريقه دى
السلام عليكم، بصي حبيبتي، القلق والخوف وكل اللي أنتِ معيشة نفسك فيه دلوقتي مش هيغير أو يبدل حاجة مكتوبة فأنتِ مش بتعملي حاجة غير إنك بتتعبي أعصابك وبتتوقعي الشر بأفكارك السلبية. اللي اتعمل اتعمل خلاص، وأنتِ في أمر واقع، ومش هتقدري ترجعي للماضي تغيريه فاستهدي بالله وركزي على الدعاء والتفكير بإيجابية. أنتِ لو لا قدر الله مكتوب لك تجيبي درجة وحشة زي ما بتقولي فأنتِ بتضاعفي الفترة السيئة على نفسك. غير أصلا محدش عارف مكتوب إيه والخير فين، فتفاءلي خيرا وثقي بربنا. *** على فكرة حصل معايا في الثانوية وامتحانات الكلية إني كنت بخرج حاسة إني عكيت جدا في الامتحان رغم إني كنت مذاكرة والحمد لله ربنا كان بيسترها. *** وبالنسبة للهبد في الامتحان فعادي، أنا ياما هبدت في امتحانات الكلية في الأسئلة اللي مش مذاكراها 😅😅.. تقريبا معظمنا كطلاب كنا بنهبد عادي. فصالحي نفسك على الهبد. ****** وأنتِ على فكرة اللي بيدك تحولي نتيجة الثانوية لعقدة، ناس كتير قصرت في الثانوية أو اجتهدوا ومع ذلك نزلوا في المجموع لكن مسمحوش لده يتحول لعقدة في حياتهم وتفوقوا في الكليات اللي دخلوها. وناس تانية كانت متفوقة وفرقت معهم على كم درجة ومدخلوش الكلية اللي عاوزينها أو دخلوها بس مجموع غير اللي كانوا عاوزينه وحولوا الموضوع ده جواهم لعقدة نفسية، فأنتِ اللي تقدري تخلي ده عقدة نفسية أو لأ. *** بالنسبة لدراسة الكيمياء والتطبيقية عشان حبك لهم، فدلوقتي النت متاح فيه كل حاجة وممكن تكملي تعلم عليه والدراسة مش متوقفة على الدراسة الحكومية ولا حتى على درجتك فيهم بالثانوية. يعني لو نقصتِ فيهم لا قدر الله، إيه المانع إنك تكملي تعلمهم مع نفسك بعد كده؟ **** فكري إن ربنا إن شاء الله هيختار لك اللي فيه الخير، كلنا لنا مسار في الحياة وطرق هنمشيها وتجارب هنعيشيها فممكن تكون كلية معينة في مكان معين هي اللي مكتوب لك عشان تمشي في المسار ده وربنا بيكتب لنا اللي فيه خير لينا. ركزي على أنك تبرمجي أفكارك كده وإن شاء الله كله هيبقى تمام. بالتوفيق.💚💚
تم النشر الثلاثاء، ٢٨ يوليو ٢٠٢٦
أنا آسفة جدًا إنك بتمري بهذه اللحظات الصعبة، وأقدر تمامًا كم الضغط والخوف اللي بتحسي بيهم دلوقتي. امتحانات تالتة ثانوي بتكون تجربة مرهقة جدًا، ومن الطبيعي إن النتايج والأخطاء تتحول لعقدة مؤقتة، خاصة لما تكوني بتحبي المواد زي التطبيقية والكيميا وبتدعي ربنا إنك تتقنيهم. اللي حصل مش فشل شخصي، ده جزء من ضغط الامتحانات اللي بيأثر على أي حد، ومش هيحدد قيمتك أو مستقبلك. حاولي دلوقتي تتعاملي مع نفسك بلطف أكتر. اجلسي مع مشاعرك بدون لوم، واكتبي اللي حصل في ورقة عشان تخرجيه من دماغك، ثم ركزي على الخطوات الجاية زي معرفة النتيجة أو التفكير في بدائل الجامعات اللي تناسبك. ربنا بيقول "إن مع العسر يسرا"، وكتير من اللي مروا بنفس الضغط ده لقوا طرق أفضل بعد كده، فمتخليش الخوف يسيطر. لو النوبات دي بتتكرر، ممكن تبحثي عن أسئلة مشابهة على فدني عشان تشوفي تجارب تانية وتاخدي أفكار إضافية. أنتِ قوية، وهتعدي المرحلة دي خطوة بخطوة. خدي وقتك في الراحة والدعاء، وربنا هيسهل الأمور. لو عايزة تتكلمي أكتر عن أي حاجة، أنا هنا.
تم النشر الثلاثاء، ٢٨ يوليو ٢٠٢٦
ربنا يوفقك يا رب و يجبر بخاطرك أنتِ و كل حد ف الثانويه اجتهد و تعب 🤍
تم النشر الثلاثاء، ٢٨ يوليو ٢٠٢٦
خايفه مستنيه النتيجه وعماله اعيط
تم النشر الثلاثاء، ٢٨ يوليو ٢٠٢٦
خلاص يا حبيبيتي الي حصل حصل كفايه جلد ذات انا حاسه بيكي وقد ايه الشعور ده وحش بس ربنا عمره ماهيضيعلك تعب مش يمكن تجيبي مجموع كويس والله مش بعيده فكرتني مره كنت طالعه من امتحان التاريخ كنت مذاكره بس الامتحان كان صعب موت فا حرفيا هبت الامتحان كله وطالعه قايله اني شايله ملحق وفصلت اسبوعين مهمومه ذيك كده ومش عارفه اعيش ذي البنادمين يوم النتيجه والله نقصت نص درجه بس انتي متخيله سببها علي ربنا وان شاء الله خير
تم النشر الثلاثاء، ٢٨ يوليو ٢٠٢٦
لعرض السؤال في فدني اضغط هنا