انا في تالته ثانوي ومراكمه حاجات كتير وتايهه ومش عارفه أبدأ منين والامتحانات بتقرب وانا مش عارفه انام من كتر التفكير ومش عارفه الم اي ماده وكل شوية تيجي في بالي فكره حتى لو بدأت مش هوصل زي اللي بدأوا من اول السنه والتراكمات بتزيد عليا وكل اما اروح دروسي أشوف زمايلي متقدمين عني فأياس اكتر واحس اني مش عارفه عايزه ايه من السنه دي ومش عارفه هدفي منها ايه ونفسيتي مدمره لاني لو مجبتش مجموع اهلي هيزعلو مني وهيشوفوا اني مكنتش استحق تعبهم
انا كمان ثانويه عامه وفعلا من اول النماذج الاسترشاديه م نزلت وانا حاسه اني مش تمام بس بحاول كتير اركز اتعلم من اخطائي بحاول مكنش شخص غبي او اعمي واتغاضي عن اخطائي واقول عادي لا انا برجع افكر فيها مش عشان اجلد نفس تؤتؤ عشان افهم انا محتاجه اي دلوقتي ف اقعدي مع نفسك خدي قراراك وتوكلي علي الله وخليكي متيقنه ان اللي زرع حلم جواكي قادر بكرمه يحققه♥
تم النشر الجمعة، ٦ مارس ٢٠٢٦
بصى انا تالته ثانوى زيك وبرضو مراكمه لدرجه مش عاوزه انزل دروس ولا ازاكر بس فيه حاجه الرسول بيقول اذا قامت الساعه وفى يد احدكم فسيله فليغرسها لو فكرنا ان يعنى خلاص الساعه هتقوم والارض هتهلك خلاص ومش هيبقى فيه حد عايش عليها طب لازمتها ايه يعنى بس شوفت شيخ بيقول احنا مسؤلين عن الفعل مش النتيجه يعنى ربنا يكرمك او لا او حتى يساويكى باللى بدا اول السنه ولا لا دى عند ربنا احنا ملناش دعوه ما فى يد الله لا يوزع بقوانين الناس يعنى حتى لو زاكرتى وحاولتى ممكن ربنا ميكرمكيش وممكن بدعوه بسيطه كده ربنا يفتحها ف وشك ويكرمك وحاولى تبدأى باى حاجه وباذن الله ربنا شايف تعبك ولو انتى ادبى انا معاكى ف اى وقت لو حابه نزاكر سوا وربنا معانا كلنا💓
تم النشر الخميس، ٥ مارس ٢٠٢٦
بصي بطلي مقارنة نفسك باللي بدأوا من أول السنة هي أكبر فخ بيسرق وقتك وطاقتك. ربنا مش بيحاسبنا بالنتيجة، ربنا بيحاسبنا على السعي. ابدئي النهاردة، وبلاش تشغلي بالك هلحق ولا مش هلحق، لأن البركة بتيجي مع أول خطوة. ربنا بيقول في كتابه {لَا يُكَلِّفُ اللَّهُ نَفْسًا إِلَّا وُسْعَهَا}. ربنا عارف إنك تقدري، وعارف تعبك. وركعتين قيام ليل احكي فيهم لربنا كل اللي واجعك، اطلبي منه الفتح في المذاكرة. الدعاء ده خليه على لسانك ..اللهم إني أبرأ من حولي وقوتي إلى حولك وقوتك. وإنتي فاكرة إنهم هيزعلوا عشان المجموع؟ هما ممكن يزعلوا عشانك ، لكن حبهم ليكي غير مشروط. اعملي اللي عليكي عشان تراضيهم بسعيِك مش بنتيجتِك، والنتيجة دي رزق من عند ربنا وتوزيع أرزاق. و بطلي تبصي للمنهج كله، بصي لدرس واحد بس خلصيه النهاردة. ساعة وساعة ذاكري 50 دقيقة وافصلي 10 دقايق، بلاش ضغط الانفجار. وافتكرِي من ترك شيئاً لله عوضه الله خيراً منه.. سيبي الخوف والقلق لربنا، وهو هيجبر بخاطرك جبر يتعجب له أهل الأرض. بعتذر عن الإطالة 😊 وجد ربنا يحفظك ويوفقك
تم النشر الخميس، ٥ مارس ٢٠٢٦
يا حبيبتي، أنا ذكية هنا معاكي، وأنا فاهمة تمامًا اللي بتمرّي بيه.. الثانوية العامة دي زي الجبل اللي كلنا بنحاول نطلعه، والإرهاق ده طبيعي لما التراكم يزيد والضغط من الأهل والزملاء يحاصرك. بس أنتِ مش لوحدك، وده مش نهاية الدنيا – بالعكس، ده بداية قوية لو بدأتِ صح. خطة عملية خطوة بخطوة عشان تبدئي دلوقتي: حددي هدف صغير وواضح : متفكريش في "اللي بدأوا من الأول"، دول مش معيارك. قولي لنفسك: "هدفي النهارده أخلص فصل واحد من مادة الرياضة (مثلاً)". اختاري مادة واحدة بس اللي تحبيها أو أسهلها، وابدئي بـ30 دقيقة يوميًا. هتزيد الثقة تدريجيًا. جدول يومي بسيط (مش معقد) : صباحًا: ساعة دراسة بعد الفطار. مساءً: ساعتين مقسمين (ساعة دراسة + 10 دقايق راحة). قبل النوم بساعتين: اقفلي التليفون، اقري قرآن أو ادعي ربنا ييسرلك (زي "اللهم يسر ولا تعسر")، ونامي بدري عشان تصحي نشيطة. النوم ده وقودك الأساسي. تعاملي مع المقارنة واليأس : لما تشوفي زميلاتك متقدمات، قولي "الحمد لله إن ربنا عطاني وقت ألحق". المقارنة دي سم، ركزي على تقدمك أنتِ. وبالنسبة للأهل، هما بيحبوكِ أكتر من أي مجموع – قوليلهم "أنا بعمل اللي أقدر عليه، ادعولي". نفسيتك : خدي دقيقتين كل يوم واكتبي 3 حاجات شاكرة عليها (زي صحتك أو دعم أهلك). ده هيغيّر نظرتك، وتذكّري قول الله تعالى: "وَمَنْ يَتَّقِ اللَّهَ يَجْعَلْ لَهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ". أنتِ قوية وقادرة، يا قمر – خطوة صغيرة النهارده هتغيّر كل حاجة. لو عايزة جدول مفصّل أكتر، قوليلي تفاصيل موادك. وابحثي في فدني عن "تراكم ثانوية عامة" هتلاقي إجابات كتير زي حالتك، أو شوفي الخبراء هنا: https://www.fedni.net/experts – في مدربين حياة ونفسيين هيساعدوكِ. توكّلي على الله، هتنجحي إن شاء الله! 💪❤️
تم النشر الخميس، ٥ مارس ٢٠٢٦
استعن بالله ولا تعجز كلنا زيك وفي فترة انتكاسة ومراكمين بس لازم نقوم ونشد حيلنا علشان مستقبلنا واحلامنا واحلام اهلنا وادعي وقولي يا رب @Hana Emad
تم النشر الجمعة، ٦ مارس ٢٠٢٦
في مراجعة انجلش تحفة لمستر محمود رضوان بتاع انجلشاوي علي اليوتيوب مع اني مش باخد معاه بس لما راكمت واتزنقت زنقة الكلاب لقيته في وشي وطلع الشرح جميل واليونت كلها في ساعتين بس وشرح مفصل وطريقته في تحفيظ الكلمات كمان
تم النشر الجمعة، ٦ مارس ٢٠٢٦
زيي زيك بالذات انا ازهر وكل ما اقول هبدأ اشوف كميه المواد ايأس تاني ربنا ينجحنا يابنتي وخلاص اهم حاجه نفسيتنا ، والله نفسي التلت شهور دول يعدوا بأسرع وقت لاني معتش مستحمله يوم كمان ف السنه دي .
تم النشر الجمعة، ٦ مارس ٢٠٢٦
لعرض السؤال في فدني اضغط هنا