rina ♥

إنك بتقول إنك حاولت كتير تزود ثقتك في نفسك ومعرفتش ده مش معناه إنك فشلت… ده معناه إنك بتحارب حاجة جواك بصدق ودي لوحدها قوة الناس فاكرة إن الثقة بالنفس حاجة بتتعمل في يوم وليلة… أو إنك تصحى الصبح تقول لنفسك: أنا قوي وخلاص بس الحقيقة الثقة مش كلمة… الثقة نتيجة تراكم حاجات صغيرة جدا أنت بتعملها كل يوم حتى لو محدش شايفها. الثقة مش إنك ماتخافش… الثقة إنك تكون خايف وبرضه تتحرك مش لازم تبقى أقوى واحد ولا أكتر واحد جريء بس تكون الشخص اللي رغم خوفه… بيحاول مرة تانية. جرب تبدأ بـ: حاجة صغيرة بتحبها وتنجح فيها حتى لو بسيطة جدا. النجاح بيجيب ثقة مش العكس. تكلم نفسك باحترام متبقاش أنت أول حد يقلل منك ماتقارنش بدايتك بنص طريق غيرك ولما تقع… ماتحولهاش لهجوم على نفسك خليها خطوة في رحلة. اللي شخصيته قوية مش هو اللي عمره ما وقع… لكن هو اللي كل مرة يقع يقوم حتى لو ببطء خد وقتك… الثقة مش زرار دي عادة ومع كل محاولة حتي لو صغيرة إنت بتقرب ومافيش محاولة راحت هدر طول ما قلبك لسه بيحاول

اللي إنتي فيه مش غلط ومش نقص إنك نفسك في أصحاب حقيقيين مش معناها إنك ضعيفة معناها إن قلبك عايز أمان مش مجرد ناس حواليه. أوقات اللي مش بيعرف يكون عنده أصحاب كتير… هو نفس الشخص اللي لما يحب حد كصديق يحبه بجد مشكلتنا إننا بنقارن نفسنا بالناس اللي عندهم شلل كبيرة ونسينا إن الصداقة الحقيقية مش عدد… ده عمق فكرة إنك خايفة صاحبتك الوحيدة تسيبك؟ ده طبيعي لأنك شايفة إنها أغلى حاجة عندك… بس اللي يحبك بجد مش بيسيبك أول محطة ولو حد مشي ربنا بيعوض حتى لو بعد وقت وإحساسك إنها أحسن منك ده مش معناه فعلا إنها أحسن… ده معناه إنك قليلة في حق نفسك مش في حقها طب نعمل إيه؟ مش محتاجة تبقي اجتماعية أوي ولا تبقي شخصية مختلفة ابدأي بحاجات صغيرة: كلمة لطيفة مشاركة بسيطة في الحوار تبيني إنك مهتمة مش لازم تبقي مبهرة اللي بيحب الصداقة الحقيقية مش بيدور على أحسن شخصية… بيدور على أكتر شخصية صافية وخدي بالك ...... يمكن مشكلتك مش إنك مش عارفة تكوني أصحاب يمكن مشكلتك إنك مش شايفة نفسك تستاهلي تتحبي وهي دي أول حاجة محتاجة تتغير… إنك تبدأي تقولي لنفسك: أنا أستاهل يكون في حياتي حد يحبني بصدق زي ما أنا

عارفة أكتر جملة وجعتني في كلامك؟ إنك بتقولي طول عمرك بتضحي… وبتستحمل… وبتقولي يمكن بكرة ييجي بس البكرة بيتأخر. والحقيقة؟ اللي إنتي حاساه مش ضعف ده تعب روح… تعب واحده كانت طول الوقت بتحاول تمسك نفسها، لحد ما بقت مش عارفه تمسك نفسها أكتر بس اسمعيني في اللي انا هقوله … اللي بيدي كتير، عنده قلب كبير… لكن اللي بيكمل من غير ما يلاقي قلبه بيتعب وده طبيعي ربنا عمره ما خلق حد في الدنيا علشان يبقى مجرد وسادة لوجع الناس وبس إنتي مش اتخلقتي علشان تعيشي في دور التضحية للأبد. البلاء مش نهاية القصة… فيه أمل بعدها، فيه تعويض… بس كمان فيه حق لنفسك إنك تتشاف وتتضمي مش بس تتحملي الوجع اللي جواكي مش معناه إنك ضعيفة… معناه إنك فضلتي الأمل حتى وإنتي مكسورة. وآه الإنسان ليه طاقة ولما طاقتك توصل للنهاية مش معناها إنك قلتي خلاص… يمكن معناها إنك محتاجة تبدأي تحبي نفسك زي ما حبيتي غيرك. هل هييجي اليوم اللي تفرحي فيه؟ أيوه… بس مش لما تقعدي تستني الفرح هييجي لما تبدأي تعملي لنفسك مساحة تحطي حدود تقولي لا من غير ما تحسي بذنب… وتطلبي من ربنا مش بس الصبر… لكن الفرج. أحيانا ربنا ميغيرش ظروفنا بسرعة… لأنه مستني إحنا اللي نوقف ونقول: أنا أستاهل أعيش مش أستاهل أتحمل وبس صدقيني… الخير جاي.

عارف إيه أكتر حاجة شدتني في كلامك؟ إنك مش بتشتكي لمجرد الشكوى… إنت بتحاول تفهم نفسك وده في حد ذاته قوة مش ضعف اللي بتحسه في الشغل لما حد يطلب منك حاجة كنت هتعملها… ده مش كسل ولا عناد، ده جزء منك بيقول: سيبوني أكون أنا.. من غير ما حد يسوقني وإحساسك إن الناس بتبص عليك أو بتضحك عليك… ده نتيجته مش إنك مجنون بالعكس… ده لأنك شايف وواخد بالك قوي زيادة عن اللزوم يمكن بس ده معناه إنك مش بارد ومش ميت من جواك زي ناس كتير بس المشكلة مش في الإحساس… المشكلة إن الإحساس بقى ماسكك من إيدك وبيمشيك وإنت عايز العكس… إنك تحس بس ماتبقاش عبد للي بتحسه اللامبالاة مش معناها تبطل تحس… اللامبالاة الحقيقية إنك تحس وتختار هتعمل إيه رغم الإحساس ده. فـ جرب تبدأ بحاجات صغيرة: حد قالك اعمل حاجة؟ قول ماشي جواك، وكمل كأنك بتعملها لنفسك مش علشانه دماغك قالت: دول بيتريقوا عليك رد عليها: طيب… ولو؟ إيه أسوأ حاجة ممكن تحصل؟ صحيت مش عايز تروح الشغل؟ قول: تمام أنا مش عايز… بس هروح علشاني أنا وصدقني… كل الناس تقريبا عندها نفس الحوارات دي جوا دماغها الفرق الوحيد إنك قلتها بصوت عالي وغيرك ساكت وبيتقطع جوا نفسه إنت مش محتاج تبقى شخص تاني… إنت محتاج بس تتعلم تمسك الدفة بدل ما الحياة هي اللي بتسوقك.

أنت مش قليل ولا المشكلة في طريقك… المشكلة إنهم مش قادرين يشوفوا اللي جواك الناس ساعات لما متفهمكش بتسهل عليها تحطك في خانة أصغر منها… مش علشان أنت قليل لكن علشان هما مش واثقين غير في المقاييس اللي حافظينها: وظيفة أكبر فلوس أكتر منصب أعلى. بس عمر القيمة الحقيقية اتقاست بالمرتب أو بالكارير تايتل أنت دلوقتي في مرحلة مش ضعف… دي مرحلة بناء صامت اللي بيبان فيها إنك موظف عادي بس اللي ميبانش إنك بتحارب جواك كل يوم إحساس عدم التقدير وإنك لسه واقف ولسه بتحاول ولسه بتحافظ على إنك تكون إنسان محترم رغم كل ده عارف الحتة اللي بتجلد فيها نفسك؟ جرب بدل ما تقول: أنا أقل منهم تقول: أنا مختلف عنهم ماشي في سكة لوحدي ومش لازم حد يفهمها غيري أوقات كتير اللي يبني نفسه ببطء… بيطلع أصدق وأقوى من اللي اتولد في النص وهو فوق أنت مش محتاج تغير طريقتك علشان ترضي حد… أنت محتاج تفضل تبني نفسك لحد ما ترضي نفسك أنت ومش مطلوب تثبت لهم حاجة المطلوب تثبت لنفسك إنك مكمل… حتى لو الدنيا بقت تقيلة. لو محدش سامعك… فده مش معناه إن صوتك مالوش قيمة. ده معناه إنك لسه موصلتش للناس الصح. وهتوصل بس كمل.

بس الاصعب انك بعد ما تتصحبي علي حد و تثقي فيه يخذلك و يبعد عندك و يطنعك

اصعب حاجه هي الوحده بجد