السلام عليكم
مشكلتي هيا بس انا مش عايزه اي كلام محبط مبدئيا انا مشكلتي كلها في اهلي
انا هبدا ب ماما يعني ماما انا عمري في حياتي م شيلت معاها سر معندهاش اي مشكله انها تخلي سيرتي وصورتي وحشه عند اهلها يعني جدتي وأخواتها وكده في حين ان عندي ولاد خالي وخالتي وكلهم عموما مامتهم ظاهراهم بأحسن صوره معندهاش اي مشكله انها تعايرني باسوأ حاجه
في اكتر وقت بكون محتاجاها ومحتاجه دعاها بتدعي عليا وبتعدي عليا أشد الدعا يعني زي ربنا يخليكي اقل زمايلك وهكذا دايما في خلافات مع بابا ودا بيبقى سبب مشاكل كتيره اوي ف حياتنا من صغري ماما بتكرهي ف بابا بس هيا مش بتاخد بالها من يعني هيا بتشكي عادي انا بقا الي كرهته غصب عني
وأما كبرت شويا وبدأت اركز مع بابا لاقيته انسان غلط انا عارفه اني حرام ومينفعش اني اقول كده بس خليني احكي بابا مبدأيا مش بيصلي دايما شايف انو صح والباقي كلو مش فاهم حاجه ومش عارفه اي معندوش اي ادني مشكله في انو يرفع صوته وهوا بيزعق لماما او بيزعق لأي حد ف البيت حتى استعماله للفون غلط بينزل بوستات ع الفيس وكلو هيا مينفعش عموما مش بيكتب حجات غلط هوا بيكتب عن حجات الغلط بيحذر منها فاهمين حته محتوي التلفون والي بيظهرلوا سئ جداا
والي كرهني فيه زياده حصلت مشكلتين الفتره الي فاتت وهوا ضربني لدرجه ان جارنا ف المرتين جم وخبطوا ع الباب عشان يلحقوا
المشكله كرهت نفسي وحياتي وكرهتها خصوصا ان ماما حتى م بتواسي ومليش حد احكيلوا خصوصا كمان الي بيحصل دا ميتحكيش وهوا بيهزق تهزيق وحش اوووي والفاظ مينفعش تتقال بصوت عالي وقدام الناس ولا ف اي احراج من اي حاجه وحته هوا مقصر ف مصاريف البيت واقول مش هكلموا تاني الاقيه شال ايدوا من المسؤوليات الي عليه
واجي انصحه مش بيقبل النصيحه شايف نفسه هوا الي صح ولا خايف ع سمعتنا واحنا بنات حته احنا ملناش اخ ولد كنا نقول ان المشاكل فيه واهو ولد عادي يعني سمعتوا مش هتفرق اوي بس احنا بنات دا مينفعش انا بجد كرهته اوي لأبعد الحدود وبقيت بارده كميه برود معاه وحش اوي والله غصب عني انا برد عليه عشان ربنا وان دا مينفعش بابايا برضوا وحرام وكده بس انا مبقتش عارفه اتعامل ازاي ولا عارفه اقولو او اتكلم ف اي معاه
بس للاسف مينفعش اتمني يموت عشان هوا السند الوحيد بس برضوا وجوده مخسرنا كتير اوي والله بجد بقيت شايفه نفسي اقل من اي حد لما بلاقي زمايلي ف المدرسه بيقولو بنسمع صوتكم بتزعقوا بحس بكميه احراج وبكرهوا اكتر انا والله م لاقيه حل وتعبت اوي واعصابي تعبت اوي والله خصوصا اني داخله ع ثانويه عامه وم عايزه كل الشتت دا عشان بتعب اوي م كتر التفكير وهما م بيقدروا اي حاجه مستحيل اصلا يقدروا بالعكس لو قولت لماما عندي ثانويه م عايزه صوت وم عارفه اي هتقولي هتنفي اوي يارب وتقعد تدعي انا اسفه طولت عليكم٠
السلام عليكم، بصي، مفيش حد بيختار أهله وممكن يكون الابتلاء فيهم عادي، وأحيانا بتكون تربيتهم غلط وبتنعكس على تربيتهم لأولادهم أو مفيش تواصل صح فالأولاد يشوفوا الأهل ظالمين والأهل يشوفوا الأبناء عاقين ومش بيسمعوا الكلام. عامة أنتِ حاليا في وضع ممكن تكوني مش قادرة تغيريه، يعني مش هتقدري تغيري تصرفات أهلك لكن ده مش معناه إنك تسمحي للوضع ده يفضل مؤثر عليكِ بالسلب. عارفة الكلام سهل، وأكيد البيئة اللي احنا فيها بتؤثر على النفسية بس حاولي كل جهدك إنك تركزي على نفسك والمطلوب منك. حاولي تتجاهلي الحاجات السلبية ومتركزيش على صفاتهم السيئة، اقعدي مع نفسك وفكري، مش بعيد تلاقي حاجات إيجابية بتحصل في حياتك ولو صغيرة، ممكن تاخدي بالك إن فيه صفات كويسة فيهم وتركيزك على السلبيات عاميكِ عنها. بصي على نصف الكوب المليان زي ما بيقولوا. تركيزك على الوحش بس هيخليكِ حاسة إن الدنيا سواد ومفيش أمل لحياتك. حتى لو مش لاقية حلو شوفي الحلو اللي في نفسك أنت واشتغلي يكون فيه إيجابيات في حياتك، زي إنك تنجحي في دراستك، زي إنك تطوري مهارة عشان تشتغلي بعد كده ويبقى لك مصدر دخل يخليكِ عندك استقلال مادي وتحكم في حياتك. ونصيحة أخيرة، اوعي أبدا أبدا تاخدي قرار الزواج مستقبلا عشان تهربي من حياتك مع أهلك لأن ده للأسف هيخليكِ تجذبي نوعيات رجال نفس شخصية والدك وتروح لبيئة شبه بيتك أو أسوا. والأهم من كل اللي فات، استعيني بالله وقربي منه وادعيه على طول بصلاح الحال. بالتوفيق.
تم النشر الأحد، ٣١ مايو ٢٠٢٦
بصي يا بنت الحلال لازم تفهمي إن عيوب أهلك وطريقتهم دي تخصهم هما ومش ذنبك إنتي ولا هتقلل من قيمتك في حاجة فمتخليش كلامهم يهز ثقتك بنفسك واشتري دماغك على قد ما تقدري وبلاش تصادم أو عتاب مع والدك لأنه مش هيقتنع وهتجيبي لنفسك مشاكل أكتر فخليكي في حالك واتعاملي بأدب ومن بره لبره وماتحكيش لولدتك أسرارك طالما بتطلعها بره وحطي كل طاقتك وزعلك وغضبك ده في مذاكرتك لأن الثانوية العامة دي هي طريقك الوحيد عشان تبني مستقبلك وتوصلي للمكانة والاستقلال اللي بتحلمي بيه ولما تلاقي البيت مقلوب وزعيق حطي السماعات في ودنك وافصلي نفسك عنهم تماما وانزلي ذاكري في أي مكان هادي بره البيت ومتأنيش ضميرك على مشاعرك ربنا عالم باللي في قلبك وبالظلم اللي بتشوفيه ركزي في مصلحتك وبس وفكري نفسك دايماً إن الوضع ده مؤقت وبكرة تنجحي وتعملي لنفسك حياة تانية أحسن بكتير...وجد والله ربنا يحفظك ويسعدك ويوفقك لما يحب ويرضى
تم النشر الأحد، ٣١ مايو ٢٠٢٦
وعليكم السلام ورحمة الله. أنا آسفة جدًا للي بتمرّي بيه، واضح إنك تعبانة نفسيًا وجسديًا، وده طبيعي في ظروف زي دي. مشاعرك مفهومة ومش غلط، بس لازم نحاول نحمي صحتك وتركيزك في الثانوية العامة. نقاط عملية سريعة: ركزي دلوقتي على دراستك قدر الإمكان، حتى لو البيت مش هادي. حاولي تلاقي مكان هادي بره البيت (مكتبة، حديقة، بيت قريبة موثوقة) للمذاكرة. لو تعرضتِ للضرب تاني، لازم تطلبي مساعدة فورية من جيران أو أقارب موثوقين، أو حتى الاتصال بالخط الساخن للطفل والمرأة (١٦٠٠٠). حاولي تقللي الاحتكاك مع باباكِ قدر الإمكان، وردي عليه بأدب مختصر عشان خاطر ربنا، بدون ما تدخلي في نقاشات. ادعي لنفسك ولأهلك بالهداية، واستعيني بالله كتير. الموضوع ده محتاج دعم متخصص. أنصحك تشوفي خبراء الأسرة والصحة النفسية على فدني: https://www.fedni.net/experts ابحثي كمان عن أسئلة مشابهة في فدني عشان تلاقي تجارب ونصائح إضافية. أنتِ مش لوحدك، وربنا معاكِ. لو عايزة تتكلمي أكتر، أنا هنا.
تم النشر السبت، ٣٠ مايو ٢٠٢٦
ربنا يوفقك ي حببتي وتطلعي م 3 ثانوي مجبوره الخاطر وتحققي كل الي بتتمنيه ويعوضك عن كل دا ركزي الفتره دي ف دراستك ع قد م تقدري ومتهتميش ليهم حاولي
تم النشر الأحد، ٣١ مايو ٢٠٢٦
انتي قولتي كل اللي جوايا حرفيا انا مبقتش مستحمله كلمه زياده من حد وانا للأسف ثانويه عامه السنه دي وفاضل اقل من شهر علي امتحاناتي
تم النشر الأحد، ٣١ مايو ٢٠٢٦
لعرض السؤال في فدني اضغط هنا