مساء الخير
عندي مشكله بعاني منها من حوالي ٣ سنين وهي أهلي
أهلي دايما بينهم مشاكل مع بعض او معايا لسبب او بدون وحياتي دايما كئيبه ومفهاش جو اسري خالص بس طبعا قدام الناس هم بيبينو قد اي بيحبوني عشان المجتمع
انا الاخ الكبير والحفيد الاكبر للعيله فانا محطوط طول الوقت في مقارنه مع كل افراد العيله رغم ان اكبر حد فيهم اصلا اصغر مني بفرق ٣ سنين ف الدراسه ولكن بتقارن بردو بيهم
وانا الي المفروض ابقى اللي بيستحملهم وبياخد بالو منهم دايما لان بكل بساطه انا الكبير
روحت مستشفى قبل كدا وكشفت نفسيه من سنه وكتبتلي على مضاد اكتئاب وكنت باخدو من وراهم لحد م عرفو ومنعوه مني وطبعا قضيت اصعب فتره انسحاب للدوا دا لانها كانت امتحانات ٣ اعدادي وضغط منهم ومعايره بأصغر الاشياء حتى الاكل والشرب ودايما كدا
وحاليا انا خايف من اللي جاي لان عندي سنتين شهاده والتزام وعندي أحلام عاوز أحققها ومش قادر وانا ف التشتت ده كلو لان كل م احاول اعمل حاجه تتهاجم وتتمنع ويتقالي انت تجيب مجموع وتدخل طب او هندسه عشان تشرف العيله وتشرفنا
وكرهت كل حاجه حتى هندسه الميكانيكا الي كنت عاوز ادخلها كارهها وماشي ف طريقها بهدف بس اني اكمل تعليمي برا مصر عشان مبقاش معاهم وميكونش في كميه الظلم الي بتعرض له ده وامبارح كان عندي مشكله ف اعصابي وروحت كشفت
والدكتور كتبلي على ادويه مضادات اكتئاب ورفضو يخلوني اخدها ولكن دي ممكن اخدها من وراهم زي ما عملت قبل كدا ولكن انا مش عارف اعمل اي مع الوضع ده لان مش بعرف اركز ولا اتعامل مع حياتي العمليه بشكل طبيعي زي اي حد ومعنديش حاليا مصدر دخل يخليني اعيش لوحدي ولو لفتره مؤقته
فهماك نوعا ما لاني الكبيره ودايما لو حد غلط او عمل حاجه يبقى بيقلدني وانا المسؤوله عنهم ، وبتيجي فبالي دايما فكرة انه مش ذنبي اني جيت الاول🤷🏻♀️بس دايما سُلطة الاهل اكبر من كلمه مننا . حط هدف واتنين وتلاته وعيش عليهم حاول تسمع وتسكت عارفه انه ده صعب بس حكم القوي ع الضعيف اصل هنعمل اي🤷🏻♀️. اممم مش حابه انك تفهم من كلامي الي هقوله اني مش مقدره ان عندك اكتئاب بالعكس صدقني انا فهماك جدا بحكم اني مريت بنفس التجربه النفسيه السيئه دي بس خرجت منها بفضل الله واني التزمت بالاستغفار والصلاه على سيدنا محمد🤍 انا بحكيلك عن واقع تجربه وافتكر دايما سورة الحجر والايات الي بتقول اعوذ بالله من الشيطان الرجيم ( ولقد نعلم أنك يضيق صدرك بما يقولون ) بعدها جه الحل من سبحانه وتعالى وقال ( فسبح بحمد ربك وكن من الساجدين / واعبد ربك حتى يأتيك اليقين ) صبر جميل والله المستعان🤍
تم النشر الجمعة، ١٤ أغسطس ٢٠٢٦
*"مَا يُصِيبُ الْمُسْلِمَ مِنْ نَصَبٍ وَلَا وَصَبٍ وَلَا هَمٍّ وَلَا حَزَنٍ وَلَا أَذًى وَلَا غَمٍّ حَتَّى الشَّوْكَةُ يُشَاكُهَا إِلَّا كَفَّرَ اللَّهُ بِهَا مِنْ خَطَايَاهُ"* رواه البخاري ومسلم بخصوص تعبك ربنا يخفف من عليك يارب وايامك كلها تكون جميله ولينه على قلبك كل حاجه اجرها محسوب عند ربنا تعبك وظروفك ال بتمر بيها ونفسيتك وافتكر كلها اجرها عند ربنا ف متيأسش فَإِنَّ مَعَ الْعُسْرِ يُسْرًا * إِنَّ مَعَ الْعُسْرِ يُسْرًا" هنا ربنا كررها مرتين فى سوره الشرح يعني مهما كان العسر كان كبير اليسرين الى بعده اكبر
تم النشر الأحد، ١٦ أغسطس ٢٠٢٦
ربنا معاك ويهون عليك الأيام يارب كل ال تقدر تعمله تاخد الواقع ال عايش فيه وتستخدمه لصالحك وتحدي لنفسك عارفه موضوع صعب عليك بس الحل الى هينفع تسمع وتحاول تسايسهم وتصلح عللاقتك بأهلك بأقل حاجه قولهم كلمه حلوه حاول تقرب من حد منهم عشان الامور تمشي وتعبر عن مشاعرك ليهم يمكن هما مش فاهمينك او بحكم السن والمكان ال اتربوا فيه مكنش فيه ده عشان كده هما مش فاهمينك فبالتالى. مش هيقدروا. ركز ع هدفك وخد ال عايشه حافز ليك وارجع تاني فكر ف حلمك وابسط نفسك باقل الامكانيات تجبلك اكله كويسه تتمشى ف مكان بتحبه كل ده ممكن يساعدك ويغير مودك شويه وعلاقتك بربنا خليها على صله دايما وقويها واعرف ان اي حاجه بتحصل او بنمر بيها (لا يكلف الله نفسا إلا وسعها) والى بنمر بيه اختبار من ربنا ويشوف صبرك وتحملك وهتعدي والله وربنا يجبر بخاطرك لان كل الى بيحصل ومكتوب لينا خير لينا وعلينا السعي
تم النشر الأحد، ١٦ أغسطس ٢٠٢٦
لعرض السؤال في فدني اضغط هنا