هحاول ارد ع نقطه نقطه بس ممكن اطول شويه بالنسبه لمستقبلك متخافش منه لأنه حقيقي في كمية فرص بتيجي للانسان مش طبيعيه بس لازم تبقى كويس نفسيا وهادي على نفسك عشان تقدر تستغل الفرص دي بدل ما تبقى طول الوقت مستنزف ومرهق ومتقدرش حتى تساعد نفسك فاللي اقدر اقولك عليه انه المستقبل لو كمجهول ميخوفش لأنه زي مافي وحش في حلو وكتير اوي انما اللي عليك انك تسعى وانت دلوقتي بتقول مش قادر تفتح كتاب يبقى لو ذاكرت في اليوم ساعه يبقى انت كده بتسعى ومره ع مره هتلاقيك بتزود لوحدك المهم الاستمراريه وبالنسبه لخوفك من انك تطول في الكليه ف الخوف هيخليك تقف مكانك وتطول فعلا + اعرف ناس طولت في الكليه ويمكن اتخرجو بعدي بكام سنه وعادي يمكن انجح مني في كذا جانب من جوانب حياتهم وعايشين وعايزه اقولك اني كنت زيك كنت حد ناجح جدا ودرجات عاليه في ثانويه عامه وجيت في الكليه توهت جدا وكنت بفكر انا اللي اقسم المواد واطول سنين الكليه من كتر ما يأست اني انجح عادي زي الناس ونزلت في السمر تقريبا تلت سنين ورا بعض بس جيت في الاخر قررت اقوم عشان نفسي ولا عشان اهلي ولا عشان خايفه من كلام حد كنت بس عايزه اخلص من ده وفي الاخر اتخرجت في معادي وبتقدير جيد جدا الحمد لله لمجرد اني بس اتخلصت من القيود الخارجيه وركزت انا عايزه ايه وهنا ده يودينا لمشكلة والدك وهو خايف عليك بس مفيش حياه من غير فشل ومش عايزه اكون بحكم وانا معرفش تفاصيل حياتك بس مظنش اللي انت فيه ده ابتلاء زي ما بتقول اظن انه ربنا بيعلمك انك عادي تفشل انت حرفيا بتجلد نفسك وبتفكر في مليون حاجه سوا لمجرد انك شلت مواد لأول مره وانا فاهمه ومقدره ان اسلوب اهلك معاك مخليك بتفكر كده بس صدقني مفيش حد مبيفشلش واللي مفكر النجاح دايما بالشغل وكل ده بيبقى فاشل في جوانب تانيه من حياته عادي جدا ف تقبل ده المهم تقوم على رجلك حاول تنزل السمر وتنجح في المواد بتقدير كويس وحاول تتعامل مع نفسك صح يعني لو مش قادر تذاكر ع الاقل متضيعش محاضره او سكشن عشان يبقى عندك خلفيه، حط نفسك وسط صحاب وناس كويسه براحه هيجروك معاهم في الطريق الصح، واعمل لنفسك حاجه ليك انت سواء خروجه لمكان معين او تنزل جيم اي حاجه انت عارف انها هتفصلك وتخليك كويس وتبعدك شويه عن الافكار الكتير اللي في دماغك وده اسلوب ناجح جدا عن تجربه ويمكن دي اهم نقطه في نظري وبالنسبه للانجليزي فده عادي سيب نفسك مع الوقت هتتعود ومش هتعرف تذاكر بالعربي اصلا تاني😅 بس المهم ترجع تذاكر واتمنى انك تقدر تهون الدنيا على نفسك انت مش مثالي ومش مطلوب منك تكون كده وحتى لو بتخاف من والدك احترمه بس بدون ما تخلي قيود وهميه تمسكك وتوقفك خصوصا انه من كلامك باين انه بيحبك وبيخاف عليك مش مجرد سيطره او تحكم ف ده ميتخافش منه ده يتفهم قصده ويتحب بس نتعلم ازاي نفصل نفسنا عن كل ده عشان اما تكون بتحاول تقوم لنفسك هتقدر وهتعرف و صدقني كام سنه هتكبر وتعرف انك مسؤول عن حياتك لوحدك سواء فشلت او نجحت فده ليك انت وانك تفشل كذا مره بس النتيجه انك تكون انضج وفاهم اكتر احسن من نجاح بيخبي فشل داخلي او مشاكل وخوف مش عارف تتعامل معاهم واخر حاجه حاول متربطش كل حاجه ببعض بطريقه تتعبك يعني لو مقصر في علاقتك مع ربنا حاول طبعا ترجع واكيد اللي قريب من ربنا سهل ينجح واصلا ده النجاح الحقيقي بس بلاش بقى فكرة انه ربنا ابتلاني عشان كذا وده حصل عشان كذا وكل الكلام ده بيلغبط الدنيا اكتر فانت اعمل اللي عليك براحه وفي حدود امكانياتك ومن غير ما تزود الدوشه على نفسك واسفه اني طولت برده
شكرا لحضرتك 🤍
تم النشر الثلاثاء، ٢٤ مارس ٢٠٢٦
طبعا كل حاجه ليها سبب انا قصدي بس تقلل تفكير شويه لكن مش بنفي الموضوع كله، بالنسبه للانجليزي فمعرفش الصراحه مجالك ممكن تاخدله كورسات ايه ممكن حد تاني يقدر يساعدك بس صدقني هو مش محتاج كورس والله كلنا كنا كده الموضوع محتاج صبر وتكرار وربنا يوفقك
تم النشر الثلاثاء، ٢٤ مارس ٢٠٢٦
انا مش بحاول اربط المواقف ببعض ولا بقول ربنا ابتلاني انتي عندك حق في كده ويمكن عجزني التعبير بس اي حاجه في الحياه بتبقا سبب لحاجة لتانيه ودي تدابير ربنا ومش هقولك اني والدي مشكله هو والدي قصه طويله وزي ما انتي قولتي انتي متعرفيش حياتك فيها ايه عندك حق بس كلمه بلاء بالنسبة ليا انا بقصد بيها كذه مشكله وكذه حاجه غير عادية في حياتي تعباني اتكلمت فيها قبل كده هنا مختصر لقصه حياتي وناس ردت عليا واستفدت والحمدلله ، بالنسبة للمذاكرة بالانجليزي واني هتعود مع الوقت والله كله قالي كده حرام بجد 🙂 انا عاوز حل جذري عشان الانجليزي هحتاجه جامد في مجالي اصلا عشان كده عاوز حل كورس أو طريقة تعلم مفردات أو الانجليزي الخاص بمنهجي مش عاوز استني لتعود عاوز أطور نفس فيه ،وجزاكي الله خيرا كلامك استفدت منه وشكرا لحضرتك
تم النشر الثلاثاء، ٢٤ مارس ٢٠٢٦
لعرض الإجابة في فدني اضغط هنا