Mariam .

السلام عليكم اولا كلامك جميل واختيارك ميقللش منك ابدا بالعكس يرفعك اكتر ولو انتي متاكده من اختيارك ف اشجعك انك اكيد تكملي فيه ولكني عندي رأي مختلف شويه الصراحه انا شايفه انه فكرة التعليم مفيده كتجربه ف حد ذاتها يمكن متشتغليش بالكليه ولعل وعسى ربنا يكرمك وتبقي معلمة علوم شرعيه او قرآن يوما ما ولكن انا في وجهة نظري البسيطه انه الكليه بتدي بعد جديد للانسان وده عن تجربتي وبعدها يمكن تعرفي اكتر انتي عايزه ايه او هتحققيه ازاي بطريقه اوضح ومش شرط فيها اختلاط ممكن عادي تدخلي كلية البنات وحتى لو دخلتي كليه مختلطه تقدري تحافظي على نفسك بسهوله الموضوع مش صعب بس كونك تخوضي التجربه وتفهمي الدنيا ماشيه ازاي ده هيعلمك اكتر هتفهمي حاجات اكتر وهتتحطي في مواقف صعبه وتحت ضغط في رأيي ده مهم عشان هدفك الاساسي انتي عايزه تبني بيت مسلم وتربي اولاد على اساس صحيح ودي حاجه عظيمه بس في رأيي الانسان محتاج قدر لا بأس به من الخبره والتجارب الشخصيه عشان حتى لو انتي عارفه الصح صعب توصليه للي قدامك من غير ما يكون عندك خبره وفي حاجات ولادك هتلاقيهم بيمرو بيها انتي متعرفيش عنها اي حاجه تفتكري وقتها لو هما بيمرو بمواقف وانتي مش عارفه تساعديهم فيها او معندكيش الخبره الكافيه هيكون اي شعورك؟ طبعا كده كده مفيش حد يعرف يبقى عنده خبره في كل حاجه بس قصدي كاساسيات حياه يعني فهو الموضوع في نظري مجرد خبره وده ميمنعش الطريق اللي عايزاه بالعكس حساهم بيكملو بعض ف فكري تاني وراجعي نفسك وبرده لو مش حابه تكملي ومتاكده وعارفه انتي عايزه ايه بالظبط وعارفه ازاي هتحققي اللي عايزاه وازاي هتبني خبره شخصيه ف طبعا ربنا يوفقك وخليكي في اللي يريحك بس ده كان مجرد رأي من زاويه آخرى للموضوع

اولا متيأسيش كل حاجه وليها حل ومخرج وطالما من جواكي نفسك ترجعي لربنا وندامانه يبقى اكيد هيعينك، ثانيا كان في حد قبل كده مرشح دكتور عماد رشاد عثمان هو عامل سلسلة اسمها سلسلة التعافي على اليوتيوب واظن بيتكلم فيها ازاي الواحد يتعافى من ادمان اي عاده او اي حاجه عامة انا الصراحه مسمعتش السلسله ولكن كذا حد اشاد بالسلسله دي وسمعت كذا فيديو للدكتور واسلوبه جميل وبحسه بيعرف يوصل للي قدامه مش مجرد كلام نظري وخلاص واظن ممكن يساعدك كتير ف جربي كده تسمعيه لعل وعسى ربنا يجعله سبب انك تبعدي عن كل ده وبالنسبه لباقي المشاكل اظن انها هتتحل من هنا انك تبطلي الاول اكتر حاجه تعباكي وبتكرهيها ومن ثم ان شاء الله الباقي هيجي واحده واحده وحاولي شوفي حاجات تملي بيها حياتك على قد ما تقدري اجبري نفسك واشغليها كل يوم ولو بحاجه بسيطه واصرفي ذهنك شويه عن كل ده، وطبعا حاولي ارجعي انزلي الكليه من تاني ده برده هيشغل وقتك اكتر وهيساعدك واعتبريها رحله ازعلي على اللي فات بس مش لدرجه تخليكي تيأسي او تكرهي نفسك وخافي من دلوقتي بس مش لدرجه تجمدك مكانك وزي ما كنتي زمان كويسه وملتزمة بإذن الله قدام شويه تبقى احسن كمان واقوى اما ربنا يقدرك وتخرجي من كل ده بس انوي وابدأي ومهما تقعي ارجعي كملي لحد ما هتيجي في مره هتظبط بإذن الله

طيب انتي يومك في انشطه او حاجه بتحبي تعمليها؟ او اي حاجه بتندمجي فيها عامة، لأنه حاسه من كلامك انك عندك وقت فراغ مش بتستغليه صح + انك ممكن تكوني بتهربي من الواقع بالطريقه دي فلو فعلا بتهربي من الواقع يبقى ضيفي عليه حاجات تخليه مقبول اكتر بالنسبالك يعني شوفي اي اللي مضايقك من الواقع وحاولي تحليه او تهونيه على نفسك بأي طريقه بتحبيها بس غير دي يعني تكون حاجه واقعيه ملموسه و اجبري نفسك تذاكري وتخلصي اللي وراكي بعدين اعملي السيناريوهات اللي تحبيها بس غالبا لو عملتي دول مش هتلاقي وقت تعملي سيناريوهات اصلا + كل ما الواقع يتحسن كل ما احتياجنا للعيشه جوا خيالاتنا بتقل بشكل كبير

بصي في رأيي الحياه الوردي مش سهله بس زي ما دكتور عبد الرحمن ذاكر كان بيقول انك تختاري ألمك بنفسك + التقبل لأقدار ربنا بالنسبالي المعادله دي ببساطه تخلي حياتك ورديه وجميله ومش شايفه ان ده خيال، جربي تعيشي حياتك بطريقتك انتي وباللي يريحك طالما ده في اطار الحلال والصح وهتلاقي الدنيا مختلفه هتحبيها بحلوها ومرها ويمكن وقتها تقدري اصلا قيمة التحديات اللي فيها وتعرفي انه من غيرها مكنش هيكون ليها طعم ولا هدف

ربنا يربط على قلبك ويقويكي، حضرتك انا مقدره اللي بتحكيه وعارفه ان مش سهل حد يعمل الصح ويحاول وهو في وقت صعب عليه زي ده، ولكن اظن انه يفضل تمسحي الفيسبوك اصلا تماما لفتره لحد ما تبقي كويسه من تاني، هو لو عايز يظهر هيظهر كده كده بس ده شخص عنده بيت واولاد حاليا وحضرتك زي ما بتقولي مستحيل تبدأي او تكوني سبب في اذية حد ولكن الانسان بيضعف ولازم يحترم ضعفه لحد ما يبقى اقوى ف ده رأيي وبالنسبه لحضرتك دلوقتي ارجعي لنفسك حبيها واعملي كل حاجه مكنتيش بتعمليها ليها الفتره اللي فاتت انتي لسه ٣٣ سنه يعني صغيره وقدامك كتير ولعل وعسى ربنا يعوضك بالاحسن كتير ولكن في رأيي ادي لنفسك الفرصه انك تفوقي وتتحسني وتقفي على رجلك عشان اما ربنا يبعتلك الفرصه تكوني جاهزه لده واولادك ربنا يحفظهملك كفايه انهم معاكي وتقومي بدورك تجاههم وعلى الرغم اني معرفش اي تفاصيل عن زواجك ومقدرش احكم إلا انه بقول لعل وعسى طليقك يرجع ويحاول يكون احسن ويمكن انفصالكم فتره عشان تتعلمو وتصلحو وترجعو اقوى وطبعا لو محصلش او حضرتك مش حابه فعادي ربنا قادر يرزقك حد كويس ويعوضك خير، بس الغلط غلط واللي يظهر بالطريقه دي فهو بصراحه امره مشكوك فيه وفي ناس اوقات ممكن تتعمد تظهرلنا وقت ضعفنا وتضغط علينا حتى لو بمجرد انهم يخلقو جوانا اسئله او فضول ملوش اخر ومعرفش الشخص التاني ده برده فمقدرش احكم عليه بس اظن كل حد فينا بيتمنى حياه اوضح واسهل من كده مع ناس واضحه وعلاقات جاده وربنا يقويكي ويعينك

في رأيي تاخدي شوية وقت بعيد فهميه انك محتاجه وقت لوحدك لحد ما تعرفي تتجاوزي الموضوع الاولاني خصوصا انك لو كلمتي كده ممكن تخسريه خالص وترجعي تتعافي من التجربتين سوا ف ليه كل ده + معرفش علاقتكم بمعرفة الاهل ولا بس الطبيعي انه بلاش علاقات محرمه بتستهلك الانسان وتحرمه من الامان بجد اما تكوني كويسه والشخص ده لسه موجود يبقى يتقدم والموضوع يبقى رسمي ووقتها ان شاء الله يكون في امان اكتر، بس انتي اكيد فاهمه انك لازم تاخدي وقت بعيد تتعافي من اللي حصل وتتقبليه عشان تقدري تدخلي علاقات تانيه بشكل صحيح

اكبر مشاكلي كانت اني مكنتش بعرف ارتاح فكنت اضغط على نفسي لحد ما مخي يفصل وميقدرش يذاكر خالص، وجيت في الاخر في المراجعات كده كان جسمي مرهق جدا جدا لدرجة بصحى اروح الدروس بالعافيه، بس حاولت ارتاح عامة خصوصا ايام الامتحانات مكنتش وقتها محتاجه اذاكر الحمد لله فكنت بنام كويس ع الاقل ٥ او ٦ ساعات قبل الامتحان اثر الرحله عليا انه للاسف في اولى كليه مكنتش قادره استحمل اي ضغط او مذاكره ف بلاش حد يضغط على نفسه للدرجه دي بالنسبه للكليه فانا مكنش عندي كليه معينه بس الحمد لله جبت مجموع عالي وصح في ايام كنت بضيعها اه انا فاكره تقريبا من اواخر شهر ١٢ ل شهر ٣ كنت بعك بس كنت بحاول يعني مش راميه الدنيا لأنه وقتها مكنش في نت عندنا في البيت ولا عندي سوشيال فكنت اخري اتفرج شويه ع التلفزيون يعني فمكنتش بذاكر زي الاول بس احضر واركز في الدروس واحاول افتح كل يوم اي حاجه كده، بس انا كنت نظام قديم ف معرفش بصراحه اي الدنيا دلوقتي

بصراحه مش عايزه افتي بس اللي فهمته انك غالبا فتحت مع نفسك مواضيع ومشاعر كتير اوي واوقات في حاجات جوانا لو فتحناها لوحدنا بتتبعتر في كل حته ونحس انها مسيطره علينا خصوصا لو انت بقالك كتير بتعمل ده وزي ما بتقول كل شويه تكتشف حاجه جديده، حاول تتكلم مع حد مش لازم عن كل حاجه يعني بس ع الاقل تسمع صوت غير دماغك لانه على كلامك بقالك كتير مع نفسك اوي او حتى تصاحب ناس جديده حتى لو معرفه سطحيه في الاول بحيث بس متكنش لوحدك اغلب الوقت و تخلي حياتك ماشيه برده بالتوازي متوقفهاش على قد ما تقدر لأن الحركه مهمه و لو الموضوع صعب اوي روح لدكتور لو تقدر

هو كل الناس هنا ما شاء الله كلامهم جميل وقالو نصايح احسن من اللي ممكن اقولها بس حابه برده اقولك ان كلامك يدل على انسانه ناجحه ولا متاخره ولا اي حاجه بجد، وكل انسان ليه رحله مختلفه في الحياه صدقيني مش كل اللي يبان ناجح قدامك يبقى انجح منك المقارنات فعلا اسوء شئ ممكن حد يعمله في نفسه انتي متعرفيش كل واحد في حياته ماشي ازاي ممكن حد ناجح جدا مهنيا بس فاشل في حياته الشخصيه و احتمالات بقى تانيه كتير لا نهائيه فانتي حددي فعلا اولوياتك واعرفي انتي عايزه اي بالظبط وقسميهم عشان متحسيش ان الدنيا كبيره عليكي خلي عندك زي اهداف صغيره توصلك للهدف الكبير وده هيحسسك بالانجاز والنظام وهيهدي الدنيا شويه وعارفه انك مش مقتنعه بس العمر فعلا مجرد رقم😅 الانسان بيعيش يحجم نفسه بحاجات ناس زيه اللي حددوها مع ان في ناس كبيره وبتقرر تبني حاجات وبتنجح جدا + ده مش معناه انهم ضيعو عمرهم في انجازات كتير لا يعلمها الا الله كفايه ان الانسان يتقي الله و يكون سوي نفسيا، ف سيبك من العالم اللي بيجري حوالينا عشان متتعبيش وتحملي نفسك فوق طاقتها خليكي فيكي انتي طول ما بتصحي من النوم وانتي بتحاولي فانتي هتوصلي وتستحقي تعاملي نفسك على انك حد كويس وناجح وربنا يوفقك وتحققي كل اللي بتتمنيه💖

اولا ربنا يعينك ويقويكي ويصبرك لحد ما تلاقي عوض ربنا ليكي على كل حاجه ثانيا حوار الارتباط ده نصيب ويمكن ربنا شايلك حاجه احسن بكتير بس بما يرضيه وانتي اصلا لسه صغيره ساعات اللي نفسنا فيه بيتأخر لحد ما نبقى انضج واوعى عشان نبقى جاهزين نبني حاجه كويسه بدل ما نهرب من واقع لواقع اسوء، فكملي خدي شهادتك وانزلي شغل وشوفي حياتك لسه قدامك كتير اوي تعمليه وتشوفيه لسه في حاجات حلوه كتير اوي وحافظي على نفسك وادعي كتير واكيد ربنا شايلك الاحسن مما كنتي تتخيلي كمان

علاقتنا بربنا ثم بنفسنا وبعد كده الواحد بيقدر يلاقي مكانه مش عارفه اوصفلك اوي لأن دي يعتبر رحله كل واحد بيمشيها بطريقته بس كل اللي اقدر اقولهولك دخلي نفسك في اي حاجه بتحبيها وحاولي تلاقي ناس بيشاركوكي الحاجه دي ده بيفرق كتير وفي حاجه هي تبان غريبه بس حاولي تتعلمي حاجه جديده وتقرأي اكتر عن اي حاجه عندك اشكال فيها او حاسه انها علامة استفهام عندك، لانه بطريقة ما العلم بيفتح اجزاء جديده جوانا مكناش نعرف انها موجوده ومعرفش ازاي برده بس بحسه بيساعد في نقطة عدم الانتماء دي لانه في الغالب دي مشاعر جواكي وممكن تكون بسبب حاجات مش مفهومه عندك فكل ما تعرفي اكتر خصوصا لو المعرفه دي ساعدتك تعرفي نفسك اكتر ف تلقائي الاحساس ده بيقل مع المعرفه دي

هحاول ارد ع نقطه نقطه بس ممكن اطول شويه بالنسبه لمستقبلك متخافش منه لأنه حقيقي في كمية فرص بتيجي للانسان مش طبيعيه بس لازم تبقى كويس نفسيا وهادي على نفسك عشان تقدر تستغل الفرص دي بدل ما تبقى طول الوقت مستنزف ومرهق ومتقدرش حتى تساعد نفسك فاللي اقدر اقولك عليه انه المستقبل لو كمجهول ميخوفش لأنه زي مافي وحش في حلو وكتير اوي انما اللي عليك انك تسعى وانت دلوقتي بتقول مش قادر تفتح كتاب يبقى لو ذاكرت في اليوم ساعه يبقى انت كده بتسعى ومره ع مره هتلاقيك بتزود لوحدك المهم الاستمراريه وبالنسبه لخوفك من انك تطول في الكليه ف الخوف هيخليك تقف مكانك وتطول فعلا + اعرف ناس طولت في الكليه ويمكن اتخرجو بعدي بكام سنه وعادي يمكن انجح مني في كذا جانب من جوانب حياتهم وعايشين وعايزه اقولك اني كنت زيك كنت حد ناجح جدا ودرجات عاليه في ثانويه عامه وجيت في الكليه توهت جدا وكنت بفكر انا اللي اقسم المواد واطول سنين الكليه من كتر ما يأست اني انجح عادي زي الناس ونزلت في السمر تقريبا تلت سنين ورا بعض بس جيت في الاخر قررت اقوم عشان نفسي ولا عشان اهلي ولا عشان خايفه من كلام حد كنت بس عايزه اخلص من ده وفي الاخر اتخرجت في معادي وبتقدير جيد جدا الحمد لله لمجرد اني بس اتخلصت من القيود الخارجيه وركزت انا عايزه ايه وهنا ده يودينا لمشكلة والدك وهو خايف عليك بس مفيش حياه من غير فشل ومش عايزه اكون بحكم وانا معرفش تفاصيل حياتك بس مظنش اللي انت فيه ده ابتلاء زي ما بتقول اظن انه ربنا بيعلمك انك عادي تفشل انت حرفيا بتجلد نفسك وبتفكر في مليون حاجه سوا لمجرد انك شلت مواد لأول مره وانا فاهمه ومقدره ان اسلوب اهلك معاك مخليك بتفكر كده بس صدقني مفيش حد مبيفشلش واللي مفكر النجاح دايما بالشغل وكل ده بيبقى فاشل في جوانب تانيه من حياته عادي جدا ف تقبل ده المهم تقوم على رجلك حاول تنزل السمر وتنجح في المواد بتقدير كويس وحاول تتعامل مع نفسك صح يعني لو مش قادر تذاكر ع الاقل متضيعش محاضره او سكشن عشان يبقى عندك خلفيه، حط نفسك وسط صحاب وناس كويسه براحه هيجروك معاهم في الطريق الصح، واعمل لنفسك حاجه ليك انت سواء خروجه لمكان معين او تنزل جيم اي حاجه انت عارف انها هتفصلك وتخليك كويس وتبعدك شويه عن الافكار الكتير اللي في دماغك وده اسلوب ناجح جدا عن تجربه ويمكن دي اهم نقطه في نظري وبالنسبه للانجليزي فده عادي سيب نفسك مع الوقت هتتعود ومش هتعرف تذاكر بالعربي اصلا تاني😅 بس المهم ترجع تذاكر واتمنى انك تقدر تهون الدنيا على نفسك انت مش مثالي ومش مطلوب منك تكون كده وحتى لو بتخاف من والدك احترمه بس بدون ما تخلي قيود وهميه تمسكك وتوقفك خصوصا انه من كلامك باين انه بيحبك وبيخاف عليك مش مجرد سيطره او تحكم ف ده ميتخافش منه ده يتفهم قصده ويتحب بس نتعلم ازاي نفصل نفسنا عن كل ده عشان اما تكون بتحاول تقوم لنفسك هتقدر وهتعرف و صدقني كام سنه هتكبر وتعرف انك مسؤول عن حياتك لوحدك سواء فشلت او نجحت فده ليك انت وانك تفشل كذا مره بس النتيجه انك تكون انضج وفاهم اكتر احسن من نجاح بيخبي فشل داخلي او مشاكل وخوف مش عارف تتعامل معاهم واخر حاجه حاول متربطش كل حاجه ببعض بطريقه تتعبك يعني لو مقصر في علاقتك مع ربنا حاول طبعا ترجع واكيد اللي قريب من ربنا سهل ينجح واصلا ده النجاح الحقيقي بس بلاش بقى فكرة انه ربنا ابتلاني عشان كذا وده حصل عشان كذا وكل الكلام ده بيلغبط الدنيا اكتر فانت اعمل اللي عليك براحه وفي حدود امكانياتك ومن غير ما تزود الدوشه على نفسك واسفه اني طولت برده

في رأيي اطلب منها على الاقل تاخد شوية وقت تهدى اكتر حتى لو مرجعتش دلوقتي بس ع الاقل تصبر وتشوف يمكن اما تهدى وتشوف تغير حقيقي وصادق منك توافق تدي فرصه تانيه وحاول تقلل جلد ذات لأن التوبه ومحاولات الاصلاح اللي بتعملها كويسين ف بلاش جلد ذات عشان متتعبش مع الوقت وحاول تبدله بانك تظبط شغلك وحياتك لوجه الله ولنفسك لعل وعسى التغيير اللي يحصل ونجاحك يرجعولها الامان وترضى ترجع من تاني وربنا يكتبلكم كل الخير

وعليكم السلام متحاوليش تنسيه انتي بس بلاش تتابعيه بلاش تشوفي اي حاجه تخصه على الشوشيال وبلاش حتى في الحقيقه، الموضوع بسيط ومع الوقت هتلاقيكي اصلا مبقتيش مهتمه بيه واشغلي نفسك ادخلي نشاطات اعرفي ناس جديده وكوني صحاب كويسين لأن في ناس كتير في الجامعه بيكون كل شغلهم الشاغل الارتباط والمشاكل المترتبه عليه وكل ده فانتي ابعدي عن الناس دي وشوفي ناس شاطره كده وانشطه وحاجات جديده هتلاقيكي بتتغيري وطريقة تفكيرك اصلا بتتغير مع الوقت ويمكن بعد شويه يبقى هو نفسه مش محل اعجاب خالص بالنسبالك وتستغربي ازاي كنتي كده اصلا بس متعمليش الموضوع حاجه كبيره جوا دماغك طالما مش بتعملي حاجه حرام وباعده نفسك عن سكك الارتباط وكل ده فالموضوع هين وهيبقى سهل تنسي اي حد بإذن الله هو بس متبقيش متابعاه في كل حته وعارفه عنه كل الاخبار وكل ده عشان طبيعي حتى لو هتنسيه بالطريقه دي مش هتعرفي وربنا يرزقك الشخص المناسب ليكي ويبقى كل حاجه بينكم متبادله بإذن الله

وعليكم السلام لا ده مش توحد ولا حاجه ده طبيعي التواصل مهاره بنكتسبها ممكن عشان تساعد نفسك دخل نفسك في انشطه او وسط ناس بيعملو حاجه بتحبها او عندك فضول تتعلمها لما تلاقو مواضيع مشتركه هيبقى اسهل عليك تتعرف على ناس وتفتح كلام ومع الوقت هيبقى ليك صحاب بإذن الله وكل حاجه بتيجي بالتدريج يعني المهم تكون منفتح انك تنزل وتقابل ناس وتجرب معاهم حاجات جديده وهكذا وتكون واثق في نفسك دي حاجه مهمه جدا وربنا يوفقك

انا معرفش حوار انك تقسمي السنه ده لازم يبقى في اجراءات من قبلها بشويه ولا عادي قبل الامتحانات علطول بس في رأيي لو ينفع تصبري وتبدأي مذاكره كانك هتدخلي امتحان كل المواد عادي جدا وان شاء الله مجرد ما تبدأي اصلا هتلاقي الدنيا مشيت معاكي كويس اوي هي الفكره بس انك تبطلي تفكري في القرار وتبدأي شغل علطول وتقدري تسالي كل مدرس ازاي تلمي كل ماده او اي اهم حاجه تحليها وهكذا لأنه بجد السنه الجايه مش مضمونه والواحد بيبقى مفكر انه قدام هيبقى عنده وقت اكتر ف حين انه ميعرفش اي هيحصل + فكري انك لسه عندك الوقت وتقدري تخلصي من كل ده بدل ما تفضلي سنه كامله كمان في الضغط ده، وبالنسبه للخوف والتوتر اللي انتي فيه فانا مقدراه وممكن تطمني نفسك انك هتحاولي ولو مقدرتيش تخلصي عادي مش هتضيعي وهيبقى عندك اوبشن انك تأجلي وقتها بس على الاقل هتكوني حاولتي وده هيديكي مساحه انك تحاولي وتجتهدي والتوتر والخوف اللي غالبا موقفينك اخف واقل طبعا ده في حالة انه ينفع تأجلي قرارك ده ولو مينفعش ولازم تاخدي قرار حاليا فكل اللي اقدر اقولهولك متخافيش ادعي واستخيري وانوي انك تشيلي مسؤولية قرارك ايا كان واللي ربنا ييسره ليكي اعمليه ومتحطيش في اعتبارك الناس المهم انتي هتقدري تستحملي ايه واي لا وصدقيني الشخص الصادق ربنا بيكرمه بس خليكي ناويه تعملي اللي عليكي في كل الاحوال وربنا يوفقك

في رأيي لو المشكله في الكلام الحلو بس وهو اكيد مهم بس مش دلوقتي لأنه يمكن بيتقي الله وبيحاول يخلي حدود لحد ما تتجوزو ان شاء الله ودي حاجه تحترم جدا وتحسسك بالأمان انما لو المشكله في التواصل نفسه فدي حاجه تانيه يعني لو حابه تتكلمي معاه مثلا عن مشكله او تاخدي رأيه في حاجه وهو مش مهتم او مش بتتشاركو حياتكم فدي مشكله وممكن تتكلمي معاه وتفهمي ليه ده وتحاولو تتواصلو احسن، لكن في رأيي لو انتي شايفه تصرفاته معاكي كويسه وبيعرف يقف جنبك وأفعاله بتدل على محبه حتى لو كلامه مفيهوش كلام حلو ف دي حاجه تحترم جدا لأنه نادرا حد يكون محترم في الزمان ده وبيحافظ على نفسه واللي قدامه بالطريقه دي، بس انتي اللي تقدري تحددي اذا كان ده احترام ولكنه بيوصلك الحب بأفعاله ولا هو عنده مشكله في التواصل فعلا

بصي اولا التوتر والنفسيه مهمين خصوصا لو انتي حد بيقلق ويتوتر كتير او عندك مثلا مشكله مسببالك ضغط نفسي ده كله بيفرق ف حاولي تبقي اهدى وتتعاملي مع ده ثانيا بقى الاكل لو بتاكلي اكل مش صحي او اكل من برا كتير بلاش وبدليه بأكل صحي خصوصا الخضار يعني فتره مش كبيره و هتلاقي الموضوع فرق معاكي في جسمك كله عامة مش بشرتك بس واخيرا حاولي يكون عندك روتين مناسب لبشرتك وتلتزمي بيه وان شاء الله هتلاقي نتيجه كويسه بس النفسيه والاكل اهم حاجتين في نظري

بصي اولا ربنا يعينك على الفتره دي لحد ما تعدي منها بسلام كل اللي اقدر انصحك بيه انك تشغلي نفسك قدر الإمكان وحاولي اتعرفي على ناس جديده صحاب او ناس ليهم نفس اهتماماتك ومعرفش ده هيفيدك ولا بس ممكن تجربي تقعدي مع نفسك وتسجلي لنفسك ريكوردات او تكتبي زي ما تحبي وتحاولي تكوني صادقه مع نفسك وكأنك بتفصصي الذكريات وكل اللي حصل وجمعيهم ببعض وابدأي شوفي اللي كتبتيه كأنك حد تاني واسالي نفسك هل انتي شايفه ان تصرفاته دي تدل على حد بيحبك اصلا؟ وهل دي العلاقه اللي كنتي بتحلمي بيها او ده الشخص المناسب ليكي؟ انتي بتقولي بقالكم تقريبا سنتين ف طبيعي كل حاجه جت بالتدريج وممكن تكوني اتعلقتي بيه بس مش شرط ده يكون حب حاولي ترجعي لقبل كده من قبل ما تعرفيه لو كنتي تعرفي انه هيعمل كل ده هل كنتي هترضي تدخلي العلاقه دي من الاول؟ ولو هو بيحبك طيب ليه مخدش ولا خطوه فعليه ليه عايزك موجوده بشكل معين مفيد ليه بس في حين ده هيستنزفك ويأذيكي جدا ف صدقيني الحياه فيها ناس احسن بكتير وكونك حد مش قابل الغلط وبعدتي عنه وخدتي الخطوه دي فانتي حد شجاع وكويس من جواه بلاش تخسري كل الحلو اللي جواكي عشان حد مهما كان لأنك تستاهلي حد اصلا يتعب ويحاول عشان يعرف يوصلك ويكون جنبك بالحلال ويحافظ على الحلو اللي عندك مش يستنزفه وفكري في نفسك وشخصيتك انتي لأنه مهما كنا بنحب حد فاللي نقدر نكمل معاه حد يخلينا احسن ونحب نفسنا اكتر مع الوقت مش العكس وطبعا انا معرفش حالتك دلوقتي بس لو الموضوع متفاقم اوي عندك وحاسه انك تشغلي نفسك مش كفايه فلو تقدري شوفي دكتور او اي حد قريب منك تتكلمي معاه وتحاولي بس تطلعي اللي جواكي وصدقيني مع الوقت هتبقي اقوى بس حاولي تشوفي الصوره على حقيقتها مش من خلال مشاعرك لانها في الغالب هتضعفك كتير وتخليكي يمكن تحسي انك خسرتي وربنا يوفقك ويعوضك خير