السلام عليكم، هل التشخيص بالاكتئاب كان تشخيص من طبيب مختص ولا أنتِ شخصتِ نفسك باختبارات الانترنت؟ لو كان تشخيص من مختص فعلا فضروري تتابعي معه لأن ممكن الأعراض دي بسبب الاكتئاب. *** كمان لو ضغطتِ نفسك بأهداف أو مسؤوليات كتيرة قبل كده فممكن تكوني وصلتِ لفترة احتراق نفسي مسببة لك انعدام طاقة وعدم قدرة على إنجاز أي شيء، جسمك ونفسك بيكونوا محتاجين فترة يفصلوا فيها ويعيدوا شحن طاقة. ** ومهم برضه تستبعدي أي أسباب صحية، مثلا نقص فيتامين دال بيسبب خمول وانعدام طاقة وتقلبات مزاجية ومعظم الأعراض اللي عندك، وبرضه الأنيميا ونقص العناصر المهمة في الجسمز *** الحكاية مش إنك بتدلعي أو مش عندك إرادة، إذا مش قادرة تحددي السبب الرئيسي وتعالجيه ومكتفية بمحاولة معالجة الأعراض زي إنك تاخدي فاصل من الكلية أو تقسمي تاسكات صغيرة فمش هتقدري تواصلي لأن السبب الرئيسي لسه موجود ولازم التعامل معه وتلقائيا الأعراض هتقل لحد ما تختفي. ** طبعا مش بقول وقفي الخطوات اللي بتاخديها حتى لو صغيرة، لأ، استمري عليها مع المتابعة مع مختصة تساعدك في تحليل جذور المشكلة وعلاجها بخطة عملية. *** نقطة مهمة، انتبهي للأفكار اللي بتردديها على عقلك الباطن، بلاش مش عندي إرادة أو مفيش فائدة أو كل الطرق هتؤدي للفشل. كل دي أفكار غلط لو ترسخت جواك عقلك الباطن هيساعدك تحوليها فعلا لحقيقة على أرض الواقع فبلاش بلاش أفكار سلبية ومعتقدات خاطئة أنتِ كده بتعقدي المشكلة. *** تفاءلي خيرا وتمسكي بالأفكار الإيجابية حتى لو بالأول مش مقتنعة بها لحد ما تصبح حقيقة راسخة جواكِ، والأهم طبعا إنك تستعيني بالله ورددي كتير ذكر "لا حول ولا قوة إلا بالله العلي العظيم) وإن شاء الله ربنا يمدك بالقوة للتغيير ويبدل حالك للأفضل. بالتوفيق. 💚💚
العفو يا قمر🥰، آمين يا رب، أنتِ وأنا إن شاء الله.❤️
تم النشر السبت، ٧ نوفمبر ٢٠٢٦
هحاول بجد تسلميلي ❤️ شكرا بجد ربنا يجازيكي كل خير ويخفف عنك الحياة ❤️
تم النشر السبت، ٧ نوفمبر ٢٠٢٦
ربنا يحفظك. بصي، الناس ساعات بيستخدموا الأسلوب ده كنوع من المواساة والتخفيف، اللي هو مش أنت لوحدك اللي كده وناس كتير في ابتلاءات وفيه اللي أصعب من حالك وهكذا... هو مش صح وبيحسس صاحب المشكلة إنه اللي قدامه بيستخف بألمه أو مش مهتم، حتى كلمة معلش نفسها يا بتكون مواساة يا إحساس بالعجز عن تقديم العون أو الإفادة المرجوة، فمتفكريش في الموضوع أو الكلام من زاوية سلبية. بالنسبة للكتمان، فمش بعيد هو اللي عمل التراكمات دي ووصلك لحالة احتراق نفسي... لو مش هتقدري تحكي لبشر فعلى الأقل كل فترة فرغي مشاعرك سواء بالكتابة أو الوسائل التانية... المهم متكتميش ولا تستسلمي للأفكار دي. وبجد، حاولي تنتظمي على الرقية حتى لو فيه صعوبة بالأول... عارفة الموضوع مش سهل بس نفسك تستحق، وما دام ربنا خلقك ومد في عمرك يبقى لك لازمة وأهمية على الأرض فمتستسلميش لليأس ووساوس الشيطان. ربنا معك ويهديك لكل خير ويصلح أحوالك كلها.💚
تم النشر السبت، ٧ نوفمبر ٢٠٢٦
صعب عليا اويي اطلب ده من حد يمكن الموت اريحلي من طلب المساعدة بالمناسبة هما عارفين اني عندي اكتئاب وبدرجة شديدة ومش بيكلموني غير كل فترة ولا حتى بيتطمنو عليا حتى بعضهم لما بتكلم واقول اني مش كويسة بيقلب الموضوع بإنهم هما كمان مش كويسين وبتاع ( انا مش بلومهم كل واحد ليه مشكالة وحياته) وعلشان كده رافضة المساعدة + انا اتربيت على اني محكيش اي مشكلة لأي حد ولو حد من البيت سمع اني حكيت حاجه كان ليها عقاب شديد ف اتربيت على الكتمان + الرقية مش منتظمة ولا القرآن للاسف بحاول بس م بانتظام مع اني برضو مكنتش كده
تم النشر السبت، ٧ نوفمبر ٢٠٢٦
بصي حتى لو كل العالم يئس منك المهم أنتِ متيئسيش من نفسك، ده الأساس. وطلب المساعدة مش عيب ولا هينتقص منك وحتى يا ستي لو بعد ما طلبتِ رد الفعل مكنش زي ما تمنيتِ فده برضه مش هيخسرك حاجة، هتكوني عملتِ واجبك تجاه نفسك وبحثتِ عن طوق النجاة اللي محتاجاه. وبلاش تستبقي وتتوقعي الأسوأ، ممكن إحساسك بالرفض نابع من نظرتك الحالية للواقع والعالم، ساعات ده بينعكس على استقبالنا وترجمتنا لأفكار وكلمات الآخرين. ممكن ميكونوش يقصدوا حاجة بكلمة قالوها أو تصرف ما وأنتِ تفسريه على إنه عدم تقبل منهم، ممكن تكون حيرة من ناحيتهم أو عدم فهم مش لازم رفض وعدم تقبل. *** جربتي تمشي على رقية شرعية؟ حاولي ترقي نفسك كده واسمعيها كل يوم واقرئي سورة البقرة يوميا. وربنا يسهل.
تم النشر السبت، ٧ نوفمبر ٢٠٢٦
انا حاسة أن كل اللي حواليا يأس مني ..معلمة القرٱن مبقتش تكلمني تقولي ليه مش مستمرة .. دكتور التغذية بتاعتي ..امي واخواتي احيانا ..بحس بعدم تقبل غريب منهم ليا اوقات بحس اني مليش مكان وسطهم وحتى صحابي معنتش متقبلة حد فيهم حاسة اني عاوزة ابعد عنهم كلهم حاسة محدش بيساعدني ولا بيمسك بإيدي كإني بغرق وكلهم بيضحكو ومش واخدين بالهم وانا رافضة المساعدة منهم كلهم مش عاوزة اقول أحد ساعدني أو اني بجد محتاجة مساعدة ..خايفة انتحر بفكر ف أفكار غريبة معظم الوقت زي اني أءذي نفسي او اقطع جلدي ..والحقيقة اني ولا عاوزة اعيش ولا عاوزة اموت لدرجة اني احيانا بتمنى ابقى ف غيبوبة علشان مش عاوزة اكون عايشة تاني ... انا حتى نفسي الحقيقية مبقتش عارفاها مبقتش فاهمه مين انا ف كل دول...
تم النشر السبت، ٧ نوفمبر ٢٠٢٦
هل عشان زهقت بس ولا شايفة فعلا إنها مش عارفة تساعدك وعلاجها مش جايب أي نتيجة.. لأن خدي بالك ممكن العلاج بيمشي ببطء لكن أي تغيير ولو بسيط يحتسب فبلاش تيأسي من نفسك. تابعي معها واطلبي تقييم للوضع والخطة العلاجية ومدى استجابتك لها وعرفيها كل المستجدات عشان تقيّم الوضع الحالي وإذا العلاج محتاج أي تعديل ولا نغير لخطة تانية أفضل، وإذا لقيت إنها مش مساعداك مفيش مانع تستعيني بحد أفضل. المهم، أنت مش محتاجة تجبري نفسك ترجعي بسرعة للنسخة الفديمة اللي كانت ملتزمة وبتذاكر بالساعات، ركزي داوقتي على التعافي حتى لو ببطء وكل حاجة هترجع تلقائيا زي ما كانت وأفضل إن شاء الله، متستسلميش لليأس، الخوف من الفشل مفهوم لكن لو فضلت منتظرة يختفي تماما مش هتتحركي، والاستسلام وإنك متبدئيش أصلا هو الفشل بعينه فاستغيني بالله وابدئي مهما كان الخوف جواك واقعي واقفي تاني مفيش مشكلة، المهم إنك بترجعي تقفي ومش بتستسلمي.
تم النشر الثلاثاء، ٣ نوفمبر ٢٠٢٦
متشخصة من مختصة بس انا حاسة اني زهقت كل شوية بقع انا بقيت اخاف ابدأ من جديد افشل .. وانا توهت مني انا بجد نسيت انا مين مبقتش عارفة انا مين ولا بعمل ايه وهل مفيش اللي بعملة ولا لا واسئلة كتير ف دماغي ملهاش إجابة بجد حاسة اني تايهه ماشية ف طريق مجهول ولا عارفة انا ليه ماشية ولا عارفة ليه مكملة ولا عارفة عاوزة اوصل لايه ...حاسة أن فعليا مفيش حد حقيقي فاهمني ويمكن انا مش فاهمه نفسي ..مش عارفة الغلط فين وهل في حاجه غلط فعلا!!
تم النشر الثلاثاء، ٣ نوفمبر ٢٠٢٦
لعرض الإجابة في فدني اضغط هنا