السلام عليكم، أنتِ عملتِ اللي عليكِ ونصحتِ وهو شاب كبير وناضج يقرر يعمل إيه ويتحمل النتائج. وده تعمليه معه أو مع غيره... ما عليكِ إلا البلاغ، واللي نصحتِهم سواء عملوا أو معملوش دي حاجة ترجع لهم وهيتحملوا الذنب أو النتيجة. لكن مهم قوي تاخدي بالك، بلاش تكوني بتوجهي النصيحة لأخوكِ بطريقة صعبة أو مثلا زي ما قلتِ في كلامك بالسؤال (مش قادرة أسكت عن القرف ده) أولًا النصيحة لازم تكون بأسلوب غير منفر، ثانيًا هو أخوكِ الكبير فصعب يتقبل إنك تحسسيه إنه وحش أو بيعمل قرف أو قد إيه هو مقصر وربنا مش راضي عنه أو يحس منك بشيء من الفوقية أو الأفضلية. الشخص المخطئ أو اللي بيعمل ذنب لو حد وجه له نصيحة بطريقة تحسسه إنه قد إيه وحش وإن اللي بينصحه ده قد إيه أنا أفضل منك هينفر وهيرفض يسمع من اللي بينصحه وممكن يهاجم ويقلب الطاولة عليه. فلو هتكرري النصح خليه بكلام المحب الخائف على مصلحته مش المصحح اللي بيحاول يقوّمه ويعدل وراه. رأيي بلاش تقولي لمامتك عشان بعد كده مش هيشاركك أسراره ولو هي بعدت البنت دي هي كمان ممكن يحملك الذنب. تحياتي.
لعرض الإجابة في فدني اضغط هنا