السلام عليكم ورحمة الله وبركاته
معنديش ثقة فى الله خالص وايمانى معدوم بيه انا مسلمة بالاسم فقط هو اصلا مين ربنا أستغفر الله عندى لامبالاة وفضاوة شديدة أنا واحدة امتحاناتها بكرة وعمالة بكتب مشكلة
قعدت أضحك على نفسي وقلت هغش وندمت على تفكيري ده تفكير ميرضيش ربنا أبدا وكمان كان عندى لامبالة قولى ٤٠ بالمية الدكتور الله ياخده عشان يعالج القلق اللى عندى خلى عندى لامبالاة ٩٥ بالمية لأنك طبعا عارفة ان أدوية الاكتئاب بتخلي عند الواحد لامبالاة
مستقبلى اتدمر ولا قادرة أفهم ولا أستوعب نفسي أعيد السنة تانى ذكريات كلها حزينه أمى وأخواتى ٢ ماتوا بحادث 💔 أنا مش قادرة أحس بنفسي وباجى أذاكر نفسي بتتسد لأنى مفيش حاجة بتخش دماغى بسبب نفسيتي المحطمة أنا مش قادة أحس بنفسي فلن أعجب إذا لم تشعرى بى 💔 مستقبل ضاع لا خيار لى سوى اليأس
عليكم السلام ورحمة الله وبركاته أنا حاسة بك جدًا وكل كلمة كتبتيها بتدل انك موجوعة ومحتاجة مساحة أمان واحتواء مش بس من الناس، لكن كمان من جواك! دي أعراض نوبة اكتئاب مش انعدام إيمان بالله وخليني أسألك لو هو انعدام إيمان بالله منك؟ طب ازاي بتراقبيه في أفعالك ومش عايزة تغشي؟ كلمة أنا مش قادرة اللي كررتيها استغاثة واضحة انك وصلتي لأقصى طاقتك ودا يخليني اقولك تتواصلي بسرعة مع أخصائي نفسي! قلتي لي روحتي لدكتور؟ العلاج الدوائي مهم جدا ولكنه جزء من العلاج مش كل العلاج ارجعي لدكتورك وتابعي معاه لو بتاخدي جلسات علاج نفسي، لو معتمد على الدواء فقط اطلبي منه يحولك لأخصائي أو اتركيه وروحي لغيره! ادي نفسك مساحة آمنة تعيشي مشاعرك بدون جلد ذات، عادي نضعف وقت ونقوى وقت تاني، وقت ننجح ووقت نكون مش قادرين! ومش لازم تكوني قوية دلوقتي، كفاية إنك بتحاولي ودا أصلا قوة 💪 جربي تغيري روتينك اليومي وقسمي وقت المذاكرة لساعات قليلة بينها فواصل واعملي ملخصات لما تذاكري هتساعدك في تثبيت المعلومة! في يوم هتفتكري اللحظة دي! وتفخري إنك ماستسلمتيش، حتى لو كل حاجة جواكي كانت بتقولك تسيبي الدنيا، انت اخترتي تبقي، وده أكبر إنجاز ممكن تعمليه دلوقتي. قلبي معاك، وربنا معاك في كل نفس وكل دمعة وكل خطوة🫂
تم النشر الاثنين، ١٦ يونيو ٢٠٢٥
لعرض السؤال في فدني اضغط هنا