انا عندي 18 سنه كنت 3 ثانوي ازهر السنه الي فاتت قسمت السنه أثناء الامتحانات
فجبت السنه الاولي 85% وفضل معايا مادتين لو قفلت فيهم مجموعي هيبقي88% المشكله مش هنا المشكله انا كنت ميته علي كليه الطب انا مش بحبها عشان البرستيج ولا التكليف ولا غيره انا بحب العلم ده بشكل ربنا وحده يعلم بيه لدرجه انا قلت خلاص هدخل علوم بايو كيمستري أقرب تخصص للعلوم الطبيه رغم ان مجموعي ممكن يدخلني هندسه وحاسبات
بس يوميا بيجيلي نوبه اكتئاب فظيعه بيبقي هاين عليا اموت نفسي قلت كتير اني عاوزه اروح ثيرابيست بس محدش راضي
انا الدراسه كانت كل شخصيتي حاسه اني خلاص معدش ليا قيمه انا عايشه ليه انا اتكسرت جامد اوي لدرجه مش عارفه اطلع من اوضتي واشوف حد واهو مر تقريبا شهرين ومفيش فايده والمفروض ارجع اذاكر بس مش عارفه بزق نفسي كل يوم اذاكر شويه عشان ما لايدرك كله لا يترك كله بس بلقى نوبه الاكتئاب رجعتلي وبكره نفسي اكتر
غير طبعا موضوع الجامعات الخاصه بنت خالتي كانت جايبه نفس مجموعي بس ابوها غني فدخلها طب خاص وصحبتي دخلت صيدله خاصه وانا ظروفي الماديه متسمحش حاسه طيب هو ليه يارب ليه بجد تعبت اوي نفسي اطلع من الي انا فيه اعمل ايه
السلام عليكم، أولا ربنا يعينك وييسر كل أمورك. المشكلة دلوقتي مش المذاكرة وازاي ترجعي لها ومش محتاجة حد يقول لك شدي حيلك وذاكري، المشكلة في صحتك النفسية والأفكار اللي بتراودك... محتاجة تتعاملي معها جديا وتتواصلي مع مختص، لو أهلك رافضين اتكلمي معهم بجدية، متقوليش عندي مشكلة مع الدراسة لأن ممكن مش يشوفوا ده سبب حقيقي، اوصفي لهم اللي بيحصل معك وأفكار الموت اللي بتراودك، وصلي لهم حالتك قد إيه صعبة. لو بعد كل ده مصممين على رأيهم، تواصلي أنتِ بنفسك عبر الإنترنت مع وسائل الدعم النفسي، عندك الخط الساخن للأمانة العامة للصحة النفسية 16328 وعندك على التطبيق هنا خبيرات كتير في قائمة الخبراء تقدري تتواصلي مع واحدة منهم تتكلمي معها. ****** واللي محتاجاه بجد، إنك تسلمي أمرك لله وتنسي خالص أي توقعات أو احتمالات لبكرة ومتفكريش كتير في إيه المجال اللي ممكن طريقك يوديكِ له، ومتضغطيش على نفسك تحلي مشكلة المذاكرة كلها في التو، فكري في النهاردة وامشي خطوات صغيرة حتى لو بسرعة السلحفاة. بدل ما تفكري في احتمالات بكرة برمجي عقلك وقلبك ووجهي كل مشاعرك لليقين إن ربنا هيكتب لك اللي فيه الخير. احنا نظرنا قاصر ومش عارفين الخير بيكون في أي اختيار أو طريق، ممكن أنتِ بتحبي المجال الطبي لكن متعرفيش لو دخلتِ هيكون الخير فيه ولا هياخدك لطريق فيه أذى كبير لك. **** مش بقول لك خالص انسي الحلم ده أو متزعليش على اللي حصل معك، قصدي بس سلمي أمورك كلها لربنا واسأليه يكتب لك الخير. ممكن عادي تقدري تجيبي علوم طبية وتشبعي شغفك، ممكن مع التنسيق تتفتح لك مسارات ملامسة للمجال الطبي عادي، وممكن أصلا تشبعي الشغف ده بطريق تاني، مش لازم ممارسة المهنة نفسها عشان تكوني بتشبعي شغفك. ممكن بعد كده تاخدي دورات إسعافية وتنزلي تتطوعي في حملات، أو تتعلمي عن الأمراض والأدوية وتقرأي من مصادر معتمدة وتزودي مداركك ومعلوماتك الطبية ولو حد قريب منك تعب تبقي عارفة تتصرفي وتواجهي الموقف صح. **** والمهم، متفكريش في مسارك الدراسي واختياره وأنتِ في حالة اكتئاب ونفسية متأثرة، تعافي الأول وبعدين اعملي اللي عليكِ ولما تبقي أهدى وفي نفسية افضل فكري في الاختيارات اللي قدامك. **** كمان مهم تغرسي في نفسك فكرة مهمة، أنتِ هويتك أكبر من اقتصارها على مجال واحد أو على الدراسة فلما متحققيش ده يبقى أنتِ خسرتِ نفسك، أنتِ أكبر من كده فمتختصريش نفسك وتحاصريها في خيار واحد وتحسي بالفشل واليأس منها لو ده محصلش. *** نقطة كمان، تركيزك ومقارنتك لنفسك بالناس التانية أكبر غلط ومن الأسباب اللي بتخليكِ تضغطي نفسك وتبقي مهمومة فتتكرر معك نوبة الاكتئاب. مش معنى إن حد معه فلوس يدخل كلية معينة إنه يستحقها وإنك عشان مش معك يبقى لا تستحقي وربنا مانعك عن اللي بتحبيه. زي ما قلت محدش عارف الخير فين ومش كل حد تخرج من كلية استحق شهادته أو حقق نجاح فيها فركزي على نفسك ومسارك ورحلتك أنتِ. *** امشي خطوة بخطوة، تواصلي مع مختصة نفسية لو تقدري، واكسري الاكتئاب برجوعك للمذاكرة ولو نصف ساعة بس متفرقة خلال اليوم أو حتى خروجك من غرفتك وكلامك مع حد كبير أو مقرب أو نزولك من البيت تتمشي في مكان قريب وتغيري جو. الخطوات الصغيرة بتفرق. *** استعيني بالله وكرري كتير من ذكر (لا حول ولا قوة إلا بالله العلي العظيم) ويا ريت لو تسمعي الرقية الشرعية أو تقري سورة البقرة يوميا، وإن شاء الله ربنا يرزقك البركة في دراستك وحياتك كلها.💚💚
تم النشر الاثنين، ٥ أكتوبر ٢٠٢٦
أنا آسفة جدًا للي بتمرّي بيه، وأقدر إنك حاسة بالكسر ده كله، خاصة وأنتِ بتحبي العلم الطبي بكل قلبك ومش عشان أي حاجة تانية. الاكتئاب اللي بيجي لك يوميًا ويخلّيكِ تحسّي إنكِ مش ليكِ قيمة ده ثقيل جدًا، وإنكِ بتحاولي تذاكري شوية كل يوم رغم كده بيظهر قوتك الحقيقية. ربنا شايف تعبكِ وصبركِ، ودي فترة اختبار صعبة لكنها مش نهاية الطريق. أول حاجة عملية: ركّزي دلوقتي على المادتين اللي فاضلين، حتى لو بمجهود بسيط يوميًا. حطي هدف صغير زي مراجعة جزء محدد كل يوم، وده هيساعدكِ تبني إحساس بالإنجاز تدريجيًا ويقلل من الضغط. مجموعكِ 88% ممكن يفتحلكِ أبواب في كليات علمية زي البيوكيميستري أو مجالات قريبة من العلوم الطبية في الجامعات الحكومية، ودي فرصة حقيقية تقربكِ من شغفكِ بدون ما تحتاجي خاص. ابحثي عن التنسيق المتاح للسنة دي وشوفي الخيارات اللي تناسب درجاتكِ، عشان تحسي إنكِ بتتحكمي في الخطوة الجاية. بالنسبة للشعور باليأس والمقارنة مع بنت خالتكِ وصاحبتكِ، ده طبيعي في الظروف دي، لكن قيمتكِ مش مرتبطة بالكلية أو الجامعة الخاصة. ربنا بيختار لكِ الطريق اللي فيه خير، وإنكِ عايشة عشان هدف أكبر من كده. حاولي تكتبي كل يوم حاجة صغيرة بتحبيها في نفسكِ أو في العلم، وادعي ربنا بالتيسير والشفاء، فالصلاة والقرآن بيدوا راحة داخلية كبيرة في أوقات زي دي. لو قدرتِ تتكلمي مع حد من العيلة عن رغبتكِ في مساعدة متخصصة بطريقة هادية، جربي، وإلا استمري في الخطوات الصغيرة دي عشان تطلعي من الغرفة تدريجيًا. أنتِ مش لوحدكِ في الرحلة دي، وهتقدري تتجاوزيها خطوة بخطوة. استمري في الدفع الخفيف لنفسكِ، وربنا هيفتحلكِ أبواب ما تتخيليهاش. لو عايزة تتكلمي أكتر عن خطة دراسية أو أي حاجة، أنا هنا. (يرجى ملاحظة أن هذه إجابة آلية بواسطة الذكاء الصناعي ولا تغني عن زيارة الطبيب في الأمور الصحية)
تم النشر الاثنين، ٥ أكتوبر ٢٠٢٦
لعرض السؤال في فدني اضغط هنا