السلام عليكم و رحمة اللّٰه و بركاته
حابه اسأل سؤال محيرني منذ فترة..
هل غلط إن الإنسان يترك بيئة معينه و يترك تعامل مع أشخاص معينة لإنه خايف على نفسه من الفتن؟
و لإن هو عارف إن لو وقع محدش هيلحقه و و لن ينصحوه لإن هو بس الي بينصح.. أو في نظر بعضهم هو بس اللي متشدد في بعض الأمور الدينية..
مع العلم الشخص ده بينصح كتير جداً و بيحاول معاهم ، وبيبقا في تقبُّل للنصيحة من الأشخاص دول مع الوقت..
بس برغم تقبلهم بعد فترة ليست بقليلة ولا بكثيرة بيحس إنه مُرهق و تعب من النصيحة
بيبقا محتاج حد في حياته الواقعية يأمره بالمعروف و ينهاه عن المُنكر ذي مهو بيعمل..
بيخاف ف لحظات الضعف خاصةً إن هو شايف نفسه مش قوي كفاية إنه يقف قدام الفئة دي لوحده
طبعاً بيبقا واثق إن ربنا مش هيسيبه لو وقع بس مش بيبقا واثق في نفسه الأمارة بالسوء ،، بيخجل من الذنوب الي بيرتكبها غصب عنه في لحظات ضعفه
بيبقا محتاج حد يبقا في لحظات الضعف دي يفوقه بسرعة إنه يتوب ، لإن لما بيرجع للتوبه بعد فترة بيبقا خاجل جداً من معصية الله خاصةً لو فترة الإنتكاسة دي طولت ..لإن ربنا بيُنعم عليه بحاجات كتيرة أوي أوي ف بيبقا صعب عليه يسامح نفسه على الذنب ده
بيبقا نادم جداً و مش عارف يطلع نفسه من الندم ده حتى بعد التوبة
بيبقا عارف إن طالما هو مُنكسر و ندمان ف ربنا هيغفرله بس بردو بيحس ب ندم باقي عُمره إن أذنب ذنب فظيع ذي كدا في مرة و عصى ربنا
الموضوع بيرهقه من جوا و في نفس الوقت هو عايز للي حواليه إن يتحسنوا و إن يفوقوا من الذنوب ف بينصحهم و بيبقا في تقبُّل بس بيبقا بعد استنفاذ طاقة من الناصح..
إزاي الإنسان يحدد إن ده الصح ولا ده من الشيطان
هل الشيطان بيحاول يقنعه إن هو ضعيف عشان يوقف ينصح؟
ولا هو فعلاً ضعيف و محتاج بيئة تناسبه لحد ميصبح أقوى؟
أفكار كتيره بتيجي في دماغه و هو مش عارف يحدد الصح هل يكمل و ينصح في الناس دي عشان يفتكرو ربنا.... ولا يبحث عن بيئة تساعده على الطاعة أكثر و يترك الناس دي لشخص تاني أكثر قوة منه يرشدهم للطاعه و يتركهم للّٰه إنه يهديهم؟
و إستنزاف طاقتة مش بيبقا بس في الأمر بالمعروف..
بل ف إنه بيسمع مشاكلهم و يساعدهم و هو بيبقا غصب عنه طبيعته كتوم بعض الشيء مش بيبقا عارف يعبَّر صح لو مدايق و عنده مشكلة ، برغم إن الناس دي هتقف جنبه و تساعده ذي مساعدهم لو حكى مشكلته بشكل واضح.. بس بيحس إن تعبيره بشكل غلط بيؤدي لرد هو مش محتاجة من الأساس..
بيبقا تايه بعض الشيء هل هو محتاج حد فقط يهون عليه و يطمنه عشان يبقا كويس؟ ولا هو عايز حل واضح للمشكلة؟
أفكار كتيره بتشوش العقل،مش عارفه الاقي إجابة ليها.. بعتذر عن الإطالة و جزاكم الله خيراً جميعاً
السلام عليكم، "يأتي على الناس زمان الصابر فيهم على دينه، كالقابض على الجمر" وفي حديث آخر عن آخر الزمان وتكالب الفتن (يوشِكُ أن يَكونَ خيرُ مالِ المسلِمِ غنمًا يتبعُ بِها شَعَفَ الجبالِ ومواقعَ القطرِ يفرُّ بدينِهِ منَ الفتنِ) *** الأمر أكيد صعب وخاصة كل ما بتلاقي البيئة حولك غير مشجعة ومع ضعف الإنسان بتزيد احتمالية انجذابه للفتن لكن هل خيار الاعتزال أو الهرب من البيئة متاح في كل الأحوال؟ أحيانا بيكون مستحيل، زي مثلا أنتِ كبنت لو لسه صغيرة في السن وفي رعاية أهلك، والبيئة اللي عاوزة تهربي منها هي وسطك الاجتماعي... هتقدري تعتزليهم إزاي؟ هل هتتركي البيت خالص؟ تندفعي لزواج متسرع مثلا؟ ولا هتاخدي جنب منهم وتعتزليهم حتى في البيت؟ لو واحدة متزوجة والوسط اللي هي فيه برضه صعب، هل هتقدر تعتزل المحيط ده؟ أكيد صعب جدا. *** أما لو البيئة دي مثلا أصحاب أو أقارب بعيدين فممكن في الحالة دي الاعتزال بكل بساطة في حالة لقينا إن مفيش فائدة من النصح وإن تأثيرهم علينا أكبر واستمرارنا معهم هيضعفنا. *** بالنسبة للأمر بالمعروف والنهي عن المنكر، أيوه مطلوب مننا لكن له قواعد وأصول وإزاي وامتى ولمين توجهي النصيحة. وعامة، طالما نصحتِ ووجهتِ مرة واتنين وتلاتة لكن اللي قدامك مستجبش يبقى خلاص عملتِ اللي عليكِ، فاكتفي بالدعاء لهم وركزي في تحسين نفسك وتثبيتها على الحق. وكتير الأفعال أبلغ وأقوى من الأقوال، خليكِ أنتِ دايما الصورة والمثال اللي يكون أقوى من أي كلام أو نصح هتوجهيه وفي الآخر كل واحد عنده عقله ومسؤول عن مساره في الحياة واختياراته. والله حد تأثر وقرر يستقيم فالحمد لله، حد تاني تعامى واصر على الطريق فـ(لست عليهم بمسيطر) ***** العزلة وتغيير البيئة خيار ونجاة أكيد لكن لما يكون صعب الحصول عليه يبقى البديل قدامنا هو الصبر والثبات والدعاء لأنفسنا وللآخرين. حتى لو لوحدك استمري وجاهدي وافتكري، (أنت الجماعة ولو كنت وحدك) وقوله تعالى "والذين جاهدوا فينا لنهدينهم سبلنا" ** ربنا يهدينا جميعا للحق ويثبتنا عليه.
تم النشر الأحد، ٢٣ نوفمبر ٢٠٢٥
كمل في النصيحة... الأمر بالمعروف والنهي عن المنكر ليس من شرطه العصمة من الذنوب... لكن من شرطه ان يتوب من الذنوب كل ما يوقع فيها... من اكثر طرق الهداية هي الامر بالمعروف والنهي عن المنكر
تم النشر الأحد، ٢٣ نوفمبر ٢٠٢٥
وعليكم السلام ورحمه الله وبركاته كنت زيك فى يوم من الايام لحد ما فضلت انى ابعد مش عشان غلط لا عشان الناس نفسهم غلط وانا روحى تستنفز ومش لاقية نتيجة لحد ما حاولت بس مع حد تانى وإذ فجأة تبعدنا المسافات واعرف بالصدفة أنها بدأت تتغير للأفضل ف حاولى مع ناس تانية متركزيش على حد معين وخصوصا لو مش مستقبل وبالذات لو يرهقك لان ساعتها هتكونى الوحيدة الخسرانة ادعى حبيبك الله سبحانه وتعالى وادعي لي معاكى إن ربنا يثبتنا وكل واحد بيدخلو دخلة مختلفة عن التانى فى ناس نقرب من الله عشان هى خايفة من عذاب النار ومش عايزة دة وفى ناس تانية خالص تقرب عشان عايزة الجنة وفى ناس تقرب عشان عايزة الراحة وفى ناس وفى ناس كل الناس مش زى بعض صدقيني في يوم من الايام هتعرفى ناس بجد مكنتيش تتخيلى انك تكونى مصاحباهم أو حتى يكون صحبتك بالجمال دة ادعى ربنا فى القيام فى الصلاة كل سجود فى كل صلاة وربنا يوفقك ويسعدك ويجعل حياتك كلها راحه وسعادة وفرح وتوفيق وفلاح والسلام عليكم ورحمه الله وبركاته
تم النشر الأربعاء، ٢٦ نوفمبر ٢٠٢٥
بالعكس غلط ليه ده لو في فرصة انك تسيب المكان ده و ميكونش في مشكلة لازم تعمل كده ، لأن في ناس في أماكن زي كده بس متقدرش تسببها
تم النشر الثلاثاء، ٢٥ نوفمبر ٢٠٢٥
@محمود علاء ، @Hafsa . @نور .. ، شكراً لإجابة حضراتكم ، جزاكم الله كل خير
تم النشر الخميس، ٢٧ نوفمبر ٢٠٢٥
لعرض السؤال في فدني اضغط هنا