انا عندى مشكلة صغيرة اما اجي اقول لحد ع حاجه دى حرام يقول ان الله غفور رحيم
ف بيبقا ردى ان الله شديد العقاب
يقولو ربنا اللي هيحاسبنا
ف مش ببقا عارفه ردي يبقا عليهم اي @محمود علاء
السلام عليكم ورحمه الله وبركاته. المسألة دي اسمها الأمر بالمعروف والنهي عن المنكر والأمر بالمعروف والنهي عن المنكر والمعاملة مع الناس، الباب ده بالذات محتاج فقه عالي شوية عشان الأمر بالمعروف ميقلبش لمنكر وإنكار المنكر مينكرش بمنكر أعلى منه. فلو فيه شيء موجود ممكن حضرتك ترجعي الحرام والحلال لمؤسسة الناس مقتنعة بها ده الأفضل طبعًا، يعني مثلا هتقولي حرام قولي والله فتوى الأزهر بتقول كذا مجمع البحوث بيقول كذا والله لجنة الفتوى بتقول كذا أنا قرأت فيها كده بتمرري الكلام ولكن أول ما تقولي للناس إن ده حرام فورًا هينسوا كلمة حرام ويتصدموا بحضرتك لا سيما لو يعني لو حضرتك مثلا صغيرة في السن أو فيه فروقات اجتماعية الكلام ده يعني فدايما لما تكوني هتقولي لحد حاجة هيكون بطريقة كويسة وحاولي تسنديها لمؤسسة تكون مشهورة يقتنعوا بها يعني فإن قالوا بقى إن الله غفور رحيم قولي لهم بقى ماشي خلاص يعني ربنا غفور رحيم ولكن هتقولي شديد العقاب برضه في نفس السياق هتكملي طبعا وتقولي غفور رحيم وشديد العقاب بس فيه حرام وحلال وفيه حدود يعني بس ده محتاج تتعلمي يعني.
تم النشر الاثنين، ١٩ مايو ٢٠٢٥
السلام عليكم ورحمه الله وبركاته جزاه الله خيرا استاذ محمود فعلا قال انه الموضوع ده بيحتاج يعني هي مهاره كده في في الجدال مع الاشخاص اللي هي بتبقى بتتكلم بالطريقه دي بس خليني يعني اقول كده حاجه بسيطه في في الموضوع ده لما الاشخاص يقفوا عند نقطه إن الله غفور رحيم واحنا نقول اه بس احنا محتاجين برده نشوف بقيت صفات ربنا ان الله شديد العقاب وهم يوقفونا عند حته ان ربنا اللي هيحاسبنا احنا كمان في الاغلب هنكون محتاجين هنا نشوف ان هم بيوقفونا بنقطه انه ربنا هو اللي هيحاسبنا ونقول لهم نتمنى إنه انا وانتوا نستحمل الحساب اللي هو يكون على الصغيره وعلى الكبيره وربنا يهدينا ويهديكم دي بتكون مهمه جدا لما نتكلم مع الاخرين لانه هم ما بيتقبلوش الكلام لان هم بيحسوا ان احنا بنكلمهم وكاننا اعلى منهم فلما نحسسهم ان احنا معاهم في نفس الدائره يعني لما اللي قدامي يقول إن الله غفور رحيم اقول له ياه فعلا والله عندك حق بس يعني يا رب يا رب ندخل في دايره المغفره والرحمه من ربنا وما نبقاش من الناس اللي ما يطولهمش رحمه ربنا ده الواحد طول الوقت بيسعى وعمال يحاول يستغفر او يعمل حسنات او اي حاجه اي حاجه علشان خايف لاحسن ما ما يلحقش يدخل في دايره المعفره والرحمه فربنا يبلغنا واياكم دي بتكون مهمه علشان يبقى الموضوع نقاش مش جدال وفي حده يعني اتمنى ان انا اكون افدت بالتفصيل الصغيره دي.
تم النشر الاثنين، ١٩ مايو ٢٠٢٥
وإنه شديد العقاب وعد الله عز وجل المستغفرين بالمغفرة والمُصِّرين علي الذنب بالعذاب الأليم وإلا لما خلقت النار ...هدانا الله وأياهم
تم النشر الأربعاء، ٢١ مايو ٢٠٢٥
قوليلو ربنا يهديك
تم النشر الأربعاء، ٢١ مايو ٢٠٢٥
لعرض السؤال في فدني اضغط هنا