السلام عليكم @Esmat Ali
انا ثانويه عامه وفاضل شهر تقريبا على امتحاناتي ومش عارفه اعمل ايه انا مراكمه حاجات كتير فى كل المواد ومش قادره ألم حاجه حاسه اني مغيبه تماما عن كل حاجه انا نفسيتي حرفيا متدمره ومش قادره اركز فى حاجه وطول الوقت تعبانه
انا شوفت ردود حضرتك لطلبه هنا وحاسه إنك ممكن تساعدني مش عارفه يمكن كلامي متلغبط اوي بس والله غصب عني كل ما اجي ابدا صوت جوايا معقوله تلحقي او تتساوي حتي باللى بدأو من الاول وقريبين من ربنا اكتر منهم وحلوا اكتر منك بدل الكتاب اتنين وانتي ولا حاجه من دول صعب اوي التفكير مش سايبني
مع العلم برضو انا روحت لدكتوره نفسيه وحولتني لدكتوره تاني قالتلى لازم تاخدي علاج وهى مش بتدي وبما سألت عن الدكتوره التانيه لقيت الكشف غالى جدا عليا ومقدرش اقول لبابا كفايه المصاريف اللي صرفها الدكتوره قالتلى ان لازم العلاج لأن كيمياء المخ مش متظبطه أبدأ بسبب الاكتئاب هو انا حتى لو بدأت ممكن اجيب مجموع عالى فى الفتره دي
كمان مش قادره انتظم فى حاجه ولا حتي الصلاه بصلي بالعافيه وببقي مش قادره اكمل خالص اتمني حضرتك تكون فاهمني ولو هتسألنى على حاجه عادي واسفه لو كنت هضايقك
بصي يا بطلة اهدي خالص وارمي ورا ضهرك كل اللي فات ده لسه بدري والوقت فيه بركة للي بيستعين بالله ومفيش حاجة ضاعت عليكي صدقيني بس انتي شيلتني نفسك فوق طاقتك ومقارنة بغيرك وده اللي موقف حالك ابدأي دلوقتي حالا بالحاجة اللي تحسيها سهلة عشان تسخَّني وتفتحي نفسك وانسي موضوع الكتب الكتير ده خالص ركزي في الخلاصة وفي المهم وربنا هيفتحها في وشك وموضوع التعب النفسي ده حاولي تريحي بالك ومتحمليش بابا فوق طاقته لو الظروف صعبة واستعوضي ربنا في تعبك وهو اللي هيجبر بخاطرك ويظبطلك كيميا دماغك بكلمة منه وقربي منه باللي تقدري عليه حتى لو لو الصلاه المفروضة بالعافيه هما دول اللي هيسنودكي في الأيام دي وقومي كدة انفضي الغبار ده وانتي قدها وهتعدي وتفرحي وهتفتكري الأيام دي وتعرفي إن ربنا كان شايلك الأحسن دايما بس انتي استعيني بالله وقولي يا رب وصدقيني لسه فيها أمل كبير... هل في حد ممكن يساعدك يتابع معاكي من اهلك ؟... وحضرتك مخلصه المواد بنسبه كام واي المواد اللي مخلصاها بنسبه كبيره ..؟؟
تم النشر الأحد، ١٠ مايو ٢٠٢٦
لعرض السؤال في فدني اضغط هنا