السلام عليكم، أهلا بكِ يا جنى، الإيجابي في تفاصيل مشكلتك إنك بقيتِ فاهمة شوية طبيعة شخصيتك وأبعاد المشكلة وأول خطوة لحل مشكلة هي معرفة المشكلة وتشخيصها. أنتِ شخصيتك حساسة وبتركزي في التفاصيل ودماغك بتفكر وتحلل كتير فطبيعي تفصصي في كل موقف ومشاعرك تتأثر حسب تحليل عقلك للمواقف. الموضوع مش مستحيل عامة بس محتاج تدريب، أي فكرة سلبية هتبدليها بفكرة إيجابية على طول... وجدتِ إن عقلك مصمم على الفكرة السلبية اسأليه على طول فين الدليل على فكرتك واطرحي أنتِ البديل العكسي. يعني نفسك تقول لك صاحبتك مش بتحبك اسألي على طول فين دليل ده وقدمي الدليل المادي قدامك زي اللي ذكرتِه في كلامك. لقيتِ فيه تصميم من الفكرة السلبية على طول فكري إن دي وسوسة شيطان عشان يوقع بينكم أو يحزنك إو يهز ثقتك بنفسك. مرة مع مرة عقلك الباطن بيستوعب اللي بتقوليه ويصدقه وبدل ما هي مجرد ردود إيجابية بديلة هتكون حقائق مترسخة في ذهنك. **** تركيزك كمان إن يكون فيه إنجاز يومي في حياتك ولو خطوات صغيرة هيفرق معك، لما تلاقي إنك بتعملي حاجات وبتتطوري ويومك دايما مشغول ومنتج هتستمدي قيمتك من نفسك وهيقل احتياجك واعتمادك على الآخرين وبالتالي هيقل تركيزك على تفاصيل معاملتهم، وهيقل تعلقك بهم وهتبقى علاقتك بهم متوازنة. *** محتاجة تقللي جلد ذات لنفسك الأول وتتفهمي طبيعة شخصيتك وتشتغلي بالتدريج، لا تحاولي تحققي إيجابية بنسبة ١٠٠٪ من أول مرة، ركزي تمشي خطوة بخطوة، تتخلصي من ولو على الأقل فكرة سلبية واحدة. *** مارسي عادة الامتنان كل يوم، ده تدريب لنفسك وعقلك إنه يشوف الإيجابي فعلا ويلمسه ويصدق وجوده في حياتك مش مجرد إنك لاحظتِه وخلاص. وطبعا ركزي على علاقتك بربنا وخليها أفضل كل يوم وكل الخطوات اللي بعد كده هتبقى أسهل. وبالتوفيق.💚💚
لعرض الإجابة في فدني اضغط هنا