بصي يا بنت الناس انتي مش عندك رهاب اجتماعي إنتي ببساطة مدلعاها شوية وبتسمي الخوف الطبيعي رهاب عشان تلاقي مبرر لهروبك الخوف ده غريزة ربنا حطها فينا عشان تحمينا مش عشان تشلنا وتخلينا نجري من المعرككة إنتي عندك خوف من الأحكام والناس وتقييمهم ليكي ودي مشكله في تقديرك لذاتك واهتزاز في ثقتك بنفسك لما تسيبي الشغل من أول يوم عشان لقيتيهم مراهقين مش أطفال فده هروب والهروب بيكبر الوحش اللي جواكي لحد ما ياكلك ولما كنتي بتهربي من بريزنتيشن الكلية فإنتي كنتي بتسقفي لخوفك وبتقوليله برافو إنت انتصرت عليا ودلوقتي واقفة قدام الماجستير وخايفة من الدكاترة والمشرفين ليه خايفة هما بشر زيك بالظبط ولا هما اللي بيملكوا ليكي النفع والضر ربنا وحده هو الرزاق وهو المعين إنتي قيمتك مش بكلام الدكاترة ولا بنظرة المراهقين ليكي قيمتك طالعه من جوه من كونك إنسانة مكرمة عند ربنا لازم تقفي على رجليكي وتواجهي ومفيش حاجة اسمها جسمي بيتلج وبموت دي أعراض فسيولوجية طبيعية جداً بتحصل لأجدع خطيب في العالم أول ما بيقف قدام الناس بس الفرق بينك وبينه إنه بياخد نفس عميق ويثبت في مكانه ويواجه وانتي بتاخدي بعضك وتجري الخوف ده عامل زي الكلب طول ما بتجري منه هيجري وراكي ويعضك أول ما تقفي وتوصي في عينه وتواجهي هيلف ديله ويمشي انزلي وتدربي واغلطي واتأتئي واقفي قدام المراية واتكلمي وروحي لمشرفينك وانتي راسك مرفوعة ومستعدة للنقاش ومستعدة للغلط ومستعدة للتعلم الحياة مش هبطبط عليكي طول ما إنتي مستخبية ورا شاشة الموبايل وخايفة من الهوا انشفي كدا واعرفي إن المواجهة هي أول طريق الشفاء والرجولة في مواجهة الحياة مش في الهروب منها متخليش الوهم يضيع مستقبلك ويقعدك في البيت وانتي لسه في أول عمرك.. وجد والله ربنا يحفظك ويوفقك..... اسمعي بودكاست ياسر الحزيمي.. العلاقات ..... او اي حاجه لعبد الرحمن ذاكر الهاشمي.. عن العلاقات برضو ... وان شاء الله خير وهتبقي احلى استاذه والله بس متكسليش ...
طيب الحمد لله ربنا يوفقك ويكرمك... وتبقي احسن مدرسه ... اهم حاجه نصيحه من اخوكي الصغير ...اهتمي بلبسك ومتبينش الساعد لا انا اغلب المدرسين بيشمرو ايدهم هم وبيشرحو ..... وحطي نيه لوجه الله العلم ده .. عشان تاخدي اجر .. ومتنسيش يوم عرفه وفضله والايام دي .... العفو ربنا يحفظك ويسعدك 🌷
تم النشر الأحد، ٢٤ مايو ٢٠٢٦
عايزه اقول لحضرتك اني الحمدلله بفضل توفيق ربنا النهارده كان اول يوم شغل وقبلت اني اشرح للطلاب الكبار والحمدلله نجحت وطلعت فاهمين واولياء الامور اتعرفو عليا الحمدلله شكرا لحضرتك 🤍🤍
تم النشر الأحد، ٢٤ مايو ٢٠٢٦
لعرض الإجابة في فدني اضغط هنا