السلام عليكم ورحمه الله وبركاته
أنا بنت عندى ١٨ سنة بدرس فى مجال الفنون كان حلمى انى ادخل ثانوى عام ولاكن فى فترة تالتة إعدادى أنا كنت مش ملتزمة خالص بالدراسة و بسبب كدة للاسف جبت درجة وحشة جداً و مدخلتيش الثانوى العام أنا ندمانه انى أهملت فى دراستى و مر ٣ سنين وانا لسه موضوع الثانوى العام ده فى دماغى و من فتره قررت انى هدخل ثانوى عام منازل و حلمى انى اجيب الدرجة المطلوبة لكلية الطب بجد أنا عندى شغف و حماس كبير جداً للموضوع و قولت انى ههتم بالدراسة في الثانوي العام و مش ههمل فى الدراسة زى ما كنت بعمل فى إعدادى و كفاية كده ضاع من عمرى ٣ سنين و أنا واقفه مكانى متحركتيش و بدرس مجال أنا اصلا مش حابة بجد أنا ندمت و عايزه ابدأ مستقبل جديد و أطور من نفسى واكون دكتوره ناجحة بإذن الله بس عندى مشكله و هى انو أنا بدرس فنون و بشتغل علشان اقدر اصرف على تعليمى و الثانويه العامة محتاجه فلوس و مجهود و وقت كبير للدراسة اعمل اى أنا لو سبت الشغل مش هعرف اجيب فلوس الثانوى العام و لو مسبتيش الشغل مش هعرف الاقى وقت للدراسة اعمل اى من فضلكم انصحونى بالصح أنا فعلاً عايزه حل للمشكلة دى
السلام عليكم ورحمه الله وبركاته دكتوره مي جزاها الله خيرا أضافت التساؤلات المهمه جدا جدا اللي لازم انت تقفي عندها قبل ما تقرري ايه الطريق اللي انتي هتبدأي تبذلي فيه مجهود مختلف عن طريقك الحالي انت ليه عاوزه تدرسي طب ليه عاوزه تكوني دكتور علشان فعلا بس يبقى يتقال ان انت بقيتي دكتور فقط لا غير ولا انت فعلا عندك هدف شخصي انك تكوني طبيبه في مجال معين او انت بتحبي المجال ده وبتحبي المجال العلمي عموما يعني. ده مهم جدا جدا جدا متبدأيش طريق ولا تبدئي هدف وهو مش مبني على اساسات قويه والا هترجعي بعد فتره تلاقي نفسك في حيره مره اخرى ومحتاجه تعيدي ترتيب حساباتك مره اخرى فبلاش نعمل ده وخلينا نعمله من دلوقتي ونكون متاكدين من اللي احنا عاوزينه ان شاء الله. اسالي نفسك انت ليه عاوزه ده اسالي نفسك لما هتوصلي هتعملي بيه ايه هترتبي حياتك وقتها ازاي هل هيكون عندك استعداد تتخلي عنه من أجل اهداف اخرى ولا لا اسالي نفسك الاسئله دي علشان تكوني متاكده كويس جدا ده اولا ثانيا ايا كان المجال اللي انت عاوزه تفرغي له وقت والدراسه وشكلها يعني انت هتفرغي لها وقت ثانوي عام او او غيره. هتحتاجي انك توظفي الشغل اللي انت بتشتغليه مع مذاكرتك ومع الجهد اللي انت محتاجاه فلو انت حاليا بتشتغلي شغل مثلا الشغل ده بياخد 12 ساعه هتحتاجي تشوفي شغل ثاني غيره ما بياخدش 12 ساعه وبياخد مثلا بس ثمان ساعات في اليوم وبرده يكون بيوفر لك دخل تقدري تكفي مصاريفك او على الاقل يغطي مصاريفك الاساسيه اللي هي هتحتاجيها هتبقي مركزه فيها مصاريفك بقى وفي مصاريف الدراسه والدروس والكلام ده ان انت مش ضروري تاخدي حاجه تكون الدرس يكون في مجموعات صغيره مثلا وتهتمي تكوني في المجموعات اللي بتكون في السنتر عشان خاطر ما تحركيش تكون التكلفه عليك عاليه فترجعي تاني وتخفي نفس اللفه وتلاقي انه شغلك الحالي مش مكفي وهكذا هتحتاجي طبعا تعملي تغييرات وهتحتاجي تعملي تنازلات المساله مش مسأله تنظيم وقت بس المساله مش مساله الاقي جهد زياده منين كده بشكل خرافي لا طالما هنغير طريقنا فهنعمل تغييرات اخرى تغييرات في اختياراتنا في الحياه تغييرات في اولوياتنا الحاجات اللي كنت بتجيبيها ممكن تبطلي تجيبيها لو كنت بتجيبي مثلا كريم اللي بشرتك فاكره من بشرتك ده كنت بتجيبي نوع تدفعي فيه 200 جنيه لا فانت دلوقتي محتاجه مصاريف للدراسه عشان ده حلمك عشان ده هدفك فتقولي لا خلاص انا مش هجيب النوع ده هجيب نوع ثاني برده هيكون مناسب لبشرتي ولكن هتبقى تكلفه تكلفته اقل علشان يسمح لي بإني ادبر مصاريفي موضوع محتاج حاجه احنا بنسميها إعاده هيكله فالاول اسالني نفسك الاسئله اللي قلنا عليها دي واللي ما شاء الله يعني دكتوره مي كتبتها بشكل جميل جدا في اجابتها اقرئيها بشكل متكرر علشان تبقي فاهماها كويس واضحه بالنسبه لك وبعدها ابدئي قرري قرارك حددي هدفك اعملي اعاده الهيكله على حسب اللي انت قررتيه وربنا يوفقك ان شاء الله.
تم النشر الخميس، ١٢ يونيو ٢٠٢٥
وعليكم السلام... مبدأيا كده قبل ما اتكلم خليكي واثقه في ربنا انه هيحققلك الي عايزاه ومتنسيش ان ربنا معاكي وواقف مستنيكي تدعيله عشان يحققلك الي بتتمنيه... ثانيا: انا طبعا مش هكلمك زي بعض الناس كده واقولك من الصبح للضهر اعملي كذا ومن الساعه كذا للساعه كذا اعملي كذا لان في الاخر انتي مش روبوت.... ده حتى الروبوت هيدعي على الي اخترعه لو نظم وقته كده 😅 المهم انا ممكن اقولك طرق تفيدك 1-وانتي في الشغل (باذن الله ربنا هيعينك) لو بتقعدي كتير من غير ما تعملي حاجه ممكن تحددي لنفسك حاجه تحفظيها او تسمعي محاضره لحد بيفهم حلو الموضوع بيبقى لذيذ لو بتبقي في الشغل مش بتشتغلي طول الوقت لكن لو في فراغ صغير ممكن مثلا لو حاحه محتاجه حفظ تحفظي حاجه واحده بس... 2-حاولي تبدأي من الصعب في منهجك للسهل زي ما الباشا برايان تريسي بيقول "لو قدامك ضفدعين ولازم تاكل واحد منهم ابدأ بالكبير وريح دماغك عشان لو بدأت بالصغير هتحس ان الكبير حاجه تقيله عليك وهتتراكم معاك بالايام" (عارف التشبيه مقرف بس الراجل بيحب ياكل الضفادع ملناش دعوه 👀) 3-ثالثا حاولي تنظمي وقتك في بيتك زي ما تاجلي كل حاجه عشان المذاكره او متعمليش حاجه عشان بتذاكري ومتسمعيش كلام حد بيقولك اعملي من كذا لكذا واطلعي اعملي من كذا لكذا حضرتك زي ما قولتلك فوق انتي مش روبوت -طيب كده يعني انظم وقتي في البيت ازاي؟ =هقولك... صلي بينا كده على النبي... حاولي تحددي لنفسك في اليوم مثلا انا هذاكر 5 ساعات مثلا تمام؟ ال5 ساعات دول ممكن تقسميهم على 5 مرات وكل مره ساعه مش لازم الخمسه كلها مره واحده... الا لو بتحبي ان الضغط النفسي والعصبي بيتخانقو مين هيضغط عليكي الاول احنا بنحاول نخدع مخك ان الخمسه مش حاجه بانك تقسميهم لفترات... ومثلا ممكن تسمعي محاضره وانتي بتاكلي وانتي بتشتغلي في بيتك ولله ممكن وانتي ماشيه في الشارع ليه لا... مخك بيحب يسمع كتير الاه بقى لو الي بيشرح ده بيشرح حلو ودمه خفيف... تحسي ان المعلومه بتطير جوا دماغك مش هتخرج... عموما حاولت اجاوبك على قد ما اقدر ودي نصايحي ليكي والباقي في ايدك فالسلام عليكم 😁✌🏻
تم النشر الخميس، ١٢ يونيو ٢٠٢٥
السلام عليكم، هو أكيد مش مستحيل إن الواحد ينجح في التوفيق بين دراسة وشغل زي ما في حالتك لكن أكيد هيكون صعب. بس الصعب بيهون مع الاستمرارية على الهدف وكمان التخطيط الكويس. السؤال هنا اللي لازم تلاقي إجابة له أولًا، ليه عاوزة طب؟ هل بتحبي الطب فعلا وعندك الإمكانية لبذل كل الجهد عشان تشتغلي طبيبة وتعالجي الناس؟ ولا عاوزاه من الأصل عشان الشكل المجتمعي أو كلام الأهل والناس أو لأن كليات القمة دي في نظر المجتمع هي الوحيدة اللي بتقول إذا كان الواحد مننا ناجح أو لأ؟ الطب رحلة مش سهلة خالص (وقت ومذاكرة ومجهود كبير مش بس أثناء الكلية، ده بعد الكلية والشغل ورحلة الدراسات العليا) فقرري مع نفسك الأول أسباب رغبتك في الطب وهل مستعدة للرحلة دي وقادرة تبذلي عشانها كل اللي عندك؟ ** حددي نظرتك الأول وبعد كده تيجي مرحلة التخطيط للمذاكرة. حددي النية من مذاكرتك ونيتك لدخول الطب واستعيني بالله سبحانه وتعالى. ** أنا مش عارفة بتشتغلي في إيه والشغل بياخد قد إيه من وقتك بس انتِ عامة بتقولي ثانوي منازل.. يعني هتوفري وقت المدرسة وإذا فيه إمكانية كمان تاخدي دروس أونلاين بدل الدروس العادية هتوفري أكيد وقت إضافي وفلوس. تعرفي تذاكري لوحدك أونلاين ومن غير إشراف مدرس مباشر؟ ** حددي الإمكانيات المتاحة لكِ واشتغلي على أساسها. راقبي نظام يومك ووقتك بتستهلكيه في إيه وإيه ممكن تتنازلي عنه عشان توفري وقت للمذاكرة. (يعني مثلا فيه وقت بيضيع على السوشيال ميديا في كلام فارغ... نقلله أو نحذفه خالص لو نقدر) لو شغلك يسمح لك إنك تلاقي دقائق ما بين الشغل تستغليها، هتفرق الدقائق دي في المذاكرة. لو بتروحي مواصلات ممكن تستغلي الوقت ده في سماع دروس على النت أو القراءة في كتاب لمادة ما. دوري على النت عن (ذاكر أقل ذاكر بذكاء) هتلاقي طرق كتير للمذاكرة تمكنك تذاكري أكبر قدر بأكبر تركيز وأقل وقت. هنا على التطبيق هتلاقي نصائح كتيرة عن المذاكرة وتنظيم الوقت شوفيها وخدي اللي يناسبك منها وطبقيه. ** زي ما قلت الموضوع صعب لكن مش مستحيل، أهم شيء الاستعانة بالله بصدق ويقين وعدم التقصير في عباداتك عشان الدراسة بالإضافة إن يكون هدفك طوال الوقت قُدام عينيك. بالتوفيق إن شاء الله.
تم النشر الخميس، ١٢ يونيو ٢٠٢٥
وعليكم السلام ورحمة الله وبركاته، يا عزيزتي، أشعر بطموحك وحماسك الكبير وهذا بالفعل هو أول وأهم خطوة نحو تحقيق أحلامك بإذن الله. لا تقلقي من السنوات التي مضت، الحياة مليانة فرص جديدة دائمًا، وأنت الآن على أعتاب بداية رحلة جديدة بإرادتك وعزيمتك. دعيني أساعدك بتقسيم المشكلة التي ذكرتِها إلى نقاط وأقدم لك بعض الأفكار العملية: التوازن بين الدراسة والعمل: من الطبيعي أن العمل يحتاج وقتًا وجهدًا، والدراسة تحتاج تركيزًا ووقتًا أيضًا. جربي تنظيم جدول يومي أو أسبوعي تقسمي فيه وقتك بشكل دقيق، مثلاً: ساعات معينة للعمل لا تتجاوزينها. ساعات ثابتة للدراسة تكون في أوقات تكوني فيها في أفضل تركيز مثل الصباح أو المساء. حتى لو كان العمل بمرات محدودة في الأسبوع بدلًا من كل الأيام، سيساعدك على تخصيص وقت أكبر للدراسة. تقليل أعباء العمل المالية: حاولي أن تضعي ميزانية واضحة لمصروفاتك لتعرفي بالضبط كم تحتاجين من العمل لضبط أمورك المالية. ربما يمكن البحث عن عمل جزئي بمرونة أكثر أو عمل عبر الإنترنت يتيح لكِ وقتاً مرناً. طرق دراسة أكثر فاعلية: استخدام أساليب دراسة مكثفة وفعالة كالمراجعة المتكررة، المذاكرة مع زميلات مجتهدات، أو الاستعانة بمصادر تعليمية مساعدة (فيديوهات، ملخصات). الاستفادة من دورات تعليمية أونلاين موثوقة تدعمك في الثانوية العامة وتوفر لك وقتًا وجهدًا. الدعم المعنوي والنفسي: تذكري أن الاستمرارية والإصرار أهم من الكمال، حددي أهداف صغيرة يومية وشهريّة تحققيها وتشعري معها بالتقدم. كوني لطيفة مع نفسك، ولا تحمليها فوق طاقتها، التوازن النفسي أساسي. حلمي بإذن الله لا يعوقه شيء، ورفع الحاجة لله دائمًا باتخاذ الأسباب والاعتماد عليه. إن لم تتمكني من وضع خطة محددة أو تحتاجين دعمًا مفصلًا لمساعدتك في تنظيم وقتك ودراستك، أنصحك بالاستعانة بأحد الخبراء في تنظيم الوقت أو مدرب حياة عبر صفحة الخبراء في فدني رابط الخبراء ، هم يستطيعون تقديم لك جلسات مخصصة تساعدك على تحديد أولوياتك والتوازن بين عملك ودراستك. وأخيرًا، لا تقلقي من الأخطاء الماضية، فأنت الآن تملكين الإرادة لتصححي مسارك. وكمية الحماس التي تملكينها هي وقودك للنجاح إن شاء الله. أنا هنا معك، وإذا احتجتي مساعدة أو دعم متواصل، يمكنك دائمًا العودة وسأسعد جدًا بمساعدتك. هل تحبين أن أساعدك في وضع خطة زمنية بسيطة لجدول الدراسة والعمل معًا؟
تم النشر الأربعاء، ١١ يونيو ٢٠٢٥
لعرض السؤال في فدني اضغط هنا