السلام عليكم ورحمة الله
انا طالبة بالصف الثالث الثانوي انا مقصرة جدا في المذاكرة بذاكر وبحل بس بحس دايما بتقصير هدفي او حلمي هو تمريض او علاج طبيعي بس انا دايما شايفة ان مستوايا وحش رغم ان كل المدرسين بيقولوا لو شديت شوية هتجيبي طب مستريح بس انا مش عارفة ابذل مجهود زيادة اليوم بيعدي بسرعة جدا كدا مش بلحق اخلص حاجة وكل مادة باخذها غالبا غ ٦ ساعات محاضرة شرح وبحل بس انا بجد مش عارفة حاسة ان فيه ناس كتير اوي اشطر مني وانا مش هحقق حاجة بضيع وقت كتير اوي اوي اوي حاولت الف مرة اظبط وقتي معرفتش قافلة كل وسائل السوشيال مبديا ومع ذلك بضيع وقت وتايهه في كل حاجة
انا كمان بعاني من المشكله دي بس قدرت لحد ما اظبط الدنيا ، اولا بالنسبه لحوار تنظيم الوقت فاليوتيوب مليان ناس بيتكلموا عن الموضوع والصحيان بدري وافضل وقت وطريقه وكل الكلام الحلو دا ، بس اللي لاحظته انه اكتر حاجه بتضيع وقت ان كل مدرس بيفضل يتكلم كتير ويضيع وقت ملوش لازمه فا اوقات بعمل سكيب لفيديوهات ملهاش لازمه او بزود سرعة الفيديو ، تاني حاجه انك ممكن تكوني بتاخدي وقت زياده عن اللزوم في حاجه بسيطه ودا هيعطلك ويخليكي مش فاهمه فا احسن حاجه انك تخلصي مذاكرة الماده وتحلي عليها في اي وقت في اليوم بس لازم نفس اليوم وقبل متحلي تحاولي تلخصي اللي كنتي فكراه بورقه جمبك ، اخر حاجه هي عقليتك مينفعش تبقي مقتنعه انك فاشله او انك طالما متأخره شويه فا مش هتلحقي لأ ، شوفي نفسك انك بتحاولي وتقدري وقدري المجهود اللي بتبذليه ، دا حل عام لو عندك اسئله فموضوع معين اكتبي .
تم النشر الثلاثاء، ١٦ ديسمبر ٢٠٢٥
أكبر غلطه عملتيها في حق نفسك انك بتقارني نفسك بزمايلك... احساس المقارنه ده كفيل يبوظ أي plan.... بصي يافندم لنتدارك الموقف سريعاً كده.... انتي مش متأخره ولا سابقه انتي في مكانك المظبوط الي ربنا عايزه مفيش داعي للتفكير المفرط وجلد الذات عشان مجرد إحساس بالتقصير... أحب أقولك لو ذاكرتي ٢٥ ساعه في اليوم وزميلتك جاوبت سؤال انتي معرفتيش تجاوبيه هتحسي نفس الاحساس... هل ده معناه تقصير؟؟! إطلاقاً... هنفترض حصل تقصير فعلا بس لسه بدري على الامتحانات تقدري تبدأي من الصفر وتوصلي وده حقيقي على فكره... المختصر المفيد حسيت اني قصرت هقول الحمدلله على الي ذاكرته وبكره هحاول أزود شويه... وقاعده بسيطه.. العلم رزق والفهم رزق وبركة الوقت رزق...( ولإن شكرتم لأزيدنكم).... أظن الرساله وصلت كوباية شاي وهنفرتك المنهج 😁... بالتوفيق
تم النشر الثلاثاء، ١٦ ديسمبر ٢٠٢٥
اتوكلي على الله انا برضو زيك كدا وتالته ثانوي برضو بس صدقيني متشديش اعصابك مش هيعدي الا الهادي الراسي عشان متتعبيش ف الاخر عايزه اقولك اني حلمي اخش صيدله وكذا حد دمرهولي ونا اصلا تايهه ومش عارفه اعمل اي بس صدقيني اللي هقدر أقوله لك هو اتوكلي على الله نتي بتعملي اللي عليكي والنتيجه بتاع ربنا
تم النشر الخميس، ١٨ ديسمبر ٢٠٢٥
السلام عليكم، أولا لسه بدري وقدامك وقت تنجزي فيه وتذاكري وتتفوقي بإذن الله بس المهم تتوكلي على ربنا وتبدئي وتبطلي تملأي عقلك بأفكار سلبية زي، إن مستواك وحش أو مش هحقق حاجة أو بضيع وقت كتير... غير مقارنتك لنفسك بالآخرين. تضييع الوقت سببه افكارك السلبية ومخاوفك اللي بتخليكِ تلجئي للتسويف وعدم التركيز أثناء المذاكرة فتلاقي الوقت بيمر من غير ما تنجزي. والدراسة عامة مش بالمجهود الزيادة. ابحثي على فيديوهات (ذاكر أقل ذاكر بذكاء) هتلاقي طرق تفيدك إن شاء الله وهتفهمي إن الفكرة مش في زيادة مجهود أو وقت وإنك ممكن تنجزي في وقت قصير لو اعتمدتِ على طرق ذكية وصحيحة. مش عارفة نظامك في المذاكرة إيه، يعني بتسمعي الدروس إزاي وهل بتكوني مركزة ولا بتسرحي فبتضطري تعيدي الشرح وتوقفي وترجعي كل شوية؟ راجعي كده تفاصيل مذاكرتك وهتعرفي وقتك بيضيع في إيه. ** راجعي كمان أوقات نشاطك وطاقتك... يعني أكتر وقت بتكوني مركزة ونشطة فيه وتخليه للمواد المهمة اللي محتاجة تركيز عالي والأوقات الأقل نشاطا تخليها للمواد الأسهل. اهتمي بنومك جدا عشان تكوني مركزة وقت المذاكرة، ممكن تقرأي الدرس الأول قراءة سريعة وتحاولي تشوفي فهمتِ إيه وبعد كده مثلا تسمعي الشرح على يوتيوب (ممكن تتحكمي في سرعة الشرح) تقدري تسمعي الشرح بسرعة الأول وبعد كده مرة تانية بسرعة أقل سنة مع كتابة ملاحظات والتركيز على النقاط اللي مفهمتيهاش من قراءتك الأولى والسماع الأول. ** طرق المذاكرة والمراجعة كتير فشوفي منها اللي ينفعك أنتِ ووقفي مقارنة نفسك وطريقتك بزملائك. أنتِ مش أقل من حد بس كلنا مختلفين عن بعض... كل اللي محتاجاه تشوفي نقاط قوتك وضعفك وأنسب الطرق لك. وقفي قلق وأفكار سلبية وابدئي، وإن شاء الله ربنا يوفقك.
تم النشر الثلاثاء، ١٦ ديسمبر ٢٠٢٥
اللي يشوف بلاوي الناس تهون عليه بلوتو لو شفتي حالي تبوسي ايدك وش وضهر
تم النشر الخميس، ١٨ ديسمبر ٢٠٢٥
دا طبيعي جداً كل الي في تالته زيك لكن بلاش التوتر الزياده دا هيخلق عدم تركيز و فقدان شغف الاحسن انك تعملي على الهدف احسن من الي مش بيعمل و يأجل
تم النشر الأربعاء، ١٧ ديسمبر ٢٠٢٥
لعرض السؤال في فدني اضغط هنا