السلام عليكم
انا حرفيا مهما اقول شعوري بس انا بجد مدمرة انا بنت في تانيه كلية مشكلتي اني بجد مليش اي حد عندي دائرة صحاب 5 كدا بس مفيش ولا واحده فيهم بتهتم تسمعني
انا دائما بسمعهم وبحل كل مشاكلهم اقسم بالله العظيم تكلمني طول يوم مش بتعمل حاجه غير أنها بتحكيلي عن مشاكلها انا لما اكون تعبانه تقول لي معلش لو زعلانه أو فيا حاجه ولا بيهتموا المهم هما وبس
تعبت من الوحدة كلهم نفس طبع امي وكأنهم نسخه منها مش قادره أبعد بحبهم بس هما مش صحابي انا بس اللي صاحبتهم ،
انا هعمل عمليه بعد بكره محدش قالي آجي معاكي ولا اي حاجه حتى بالكذب قاعدين يتكلموا عن علاقتهم ويقولوا نعمل ايه وكدا مفيش حد مهتم بيا ولا بمشاعري
فكره الانتحار مش بتفارقني حياتي مدمره، نفسي الاقي شخص واحد بس يحبني
انا عارفه المفروض انا احب نفسي وانا والله بحب نفسي بس انا تعبت من اني صاحبتهم وبس تعبت من الوحده وقدام الناس عندي صحاب
اما امي بقا فدي قصه تانيه انا اصلا كل اختياري في البشر وكل الناس اللي بتدخل حياتي زيها امي نرجسية وصعبه جدا مفيش ذرة رحمة حتى وانا داخله العمليات بردو بتشتمني وهتزقني كنت في مره مركبه محلول وتعبانه جدا
قعدت تقولي اني حقوده جوايا غل وهزقتني وسابتني ومشيت اقسم بالله بتقول الحاجات اللي هي بتعملها وتجببها فيها هي حرفيا بتسقط اللي فيها عليا كانت دايما تقولي انتي فاكره نفسك اى و اني عمري ما ينجح في اي حاجه في حياتي وكلام كتير وتغير مني ومن شكليبس انا عارفه أن مفيش حل
بقيت تتجنبها وخلاص بعد سنين من الشكوك العيب في مين سلمت امري لربنا منها بس انا فعلا مشكلتي الكبيرة أن مفيش مخلوق جمبي هدخل عمليات لوحدي محدش مهتم !
امي اه هتكون موجوده بس وجودها سيء ومنظره وبس اقسم بالله بتكرهني جدا ، حتى الوقتي وربنا وانا بكتب عاملين يرنوا عليا بس علشان بردو مشاكلهم طيب وانا ؟ بقولهم انا تعبانه وكدا وهعمل عمليه وانا مخنوقه ومشاكل مع امي قالولي معلش هتبقي كويسة ودخلوا في موضوعهم
اقسم بالله تعبت انا بقيت احس اني مريضه نفسيا خلاص جبت آخري بفكر كتير في الانتحار وبدعي ع نفسي مع اني والله بصلي وعارفه ربنا بس تعبت ومفيش معايا طبعا فلوس اروح لدكتور نفسي ،
انا اقسم بالله لو شفت حد بيحبني أو قرب مني بقول لي بيحبني اكيد في حاجه وصلت لمرحله صعبه وموضوع عمليتي دا عرفني قد اى انا وحيدة وبصراحه خلاني حساسه اوي انا تعبت اوي وعيني دبلت وجبت آخري اي الحل هفضل كدا مليش حد ؟
وعليكم السلام ورحمة الله وبركاته ، الف سلامة عليكى اولا ، للأسف الشديد مشكلتك دى معظمنا بيعانى منها حتى انا بمر بتجربة مشابها جدا أنا رجليا مكسورة ومجبسها وقاعد فى البيت بقالى اسبوعين وداخل فى التالت إن حد يجى يزورنى من صحابى ولا اخوالى محصلش مع انهم بيزعلوا جدا لو أنا طولت ومرحتلهمش ، بس أنا والحمد لله عرفت الحل والحل هو التجاهل مش تجاهلهم لا تجاهل مشاعرى ليهم كأصدقاء أو كأنهم اخوالى او كده بعاملهم عادى بس هم زى اى حد مش فارقين معايا فمش كان فارق معايا هما جم ولا لا مكنش فارق معايا جيتهم اصلا ، فإنتى متاخديش الموضوع بحرقة اوى علشان محدش هينضر غيرك طنشيهم الصاحب اللى يأذى صاحبو هو دا يبقى صاحب اصلا؟ ، كلميهم بس اسمعى من ودانك اليمين وطلع من الشمال ، أما موضوع الأم حاجه تانية اولا أنا طالب ثانوية أزهرية والدتى متوفية من سنتين وشهرين وايام ، الحمد لله على كل حال ، فأنتى مجرد إن مامتك بتشوفيها كل يوم دى بالنسبالى عندى بالدنيا ، حتى لو بتعاملك وحش حتى لو فيها عيوب الدنيا ، انتى ممكن تجمليها يفهمك لمامتك ، من الآخر ريحيها وبريها ولو قالتلك كلام سلبى ارميه وراكى وكملى ، سمعت مرة حلقة للشيخ سمير مصطفى بيقول الطريق بتاعك امشيه لوحدك والله جه حد خير وبركة مجاش فأنا كده كده مكمل ،والف سلامة عليكى وإن شاء الله تكونى بخير وتعمل عمليتك بخير ،وترجعى تشكى تانى 😂 فرفشى كده محدش واخد منها حاجه ،اهم حاجه رضا الله مش مهم مين يزعل مين يتفلق طبعا دا لو هم اللى غلطانين المهم احنا ماشين صح وبما يرضى الله ، وكل عام وانتى بخير 🤎🍂وربنا يكتب لينا صحاب كده ايه ياخدوا بإدنا إلى الجنة كده إن شاء الله ،الطريق امشيه لوحدك 🫵،حتى العملية ادخليها لوحدك 😂
تم النشر الأحد، ٢٢ فبراير ٢٠٢٦
السلام عليكم يا حبيبتي، أول حاجة، أنا هنا معاكِ دلوقتي، وقلبي معاكِ في اللي بتمرِي بيه. الوحدة دي مؤلمة أوي، خاصة قبل عملية زي دي، وأنا فاهمة تمامًا إحساسك إنكِ "صاحبة الجميع بس محدش صاحبك". أنتِ مش مجنونة ولا مريضة، ده شعور طبيعي لما الناس حواليكِ نرجسيين زي أمكِ وصحابكِ دول – هما بياخدوا بس مش بيدو. بس خليني أقولكِ: أنتِ مش وحدك أبدًا، ربنا سبحانه وتعالى معاكِ، وهو الرفيق اللي مش هيخذلكِ أبدًا . قال تعالى: "وَهُوَ مَعَكُمْ أَيْنَ مَا كُنْتُمْ". سلّمي أمركِ ليه، وادعي قبل العملية: "اللهم إني أسألكِ العافية والمعافاة، واجعلها خيرًا لي". خطوات عملية دلوقتي عشان تتحركِي: قبل العملية بكرة : ركزي على نفسكِ بس. نامي كويس، كُلِي حاجة خفيفة مغذية، وكرري "لا إله إلا الله" كتير – ده هيهدّي قلبكِ. أمكِ هتكون موجودة، بس عامليها زي "منظر" زي ما قلتِ، متديش الكلام حاجة، وادعي ربنا يلين قلبها أو يبعد الضرر. للوحدة والصحاب : أنتِ صح، دول مش صحاب حقيقيين. ابدئي دلوقتي تبني دائرتكِ الجديدة في Fedni! ابحثي عن أسئلة مشابهة زي "الوحدة في الكلية" أو "تعامل مع أم نرجسية"، هتلاقي بنات زيكِ بيردوا ويشاركوا. كمان، روحي صفحة الخبراء https://www.fedni.net/experts وابحثي عن متخصص نفسي أو مدرب حياة – فيه استشارات رخيصة أو مجانية أحيانًا، وهما هيسمعوكِ بجد. للانتحار ده : يا بنتي، ده الشيطان بيهمس، متسمَعيش له! حياتكِ ثمينة عند ربنا، وقال الرسول ﷺ: "مَنْ قَتَلَ نَفْسَهُ بِشَيْءٍ فِي الدُّنْيَا عُذِّبَ بِهِ فِي النَّارِ". أنتِ في تانية كلية، قدامكِ مستقبل كبير – هتتخرجِي، هتنجحِي، وهتلاقي ناس تستاهلكِ. حبّي نفسكِ أكتر: اكتبي 3 حاجات حلوة فيكِ كل يوم (زي إنكِ تسمعي الآخرين، ده دليل قلبكِ كبير). أنتِ قوية أوي، وده اللي خلّاكِ تكتبي هنا – خطوة أولى للتغيير. هتعدّي، وهتلاقي اللي يحبّكِ بجد (ربنا أولًا). ربنا يشفيكِ ويفرح قلبكِ، آمين. 💕
تم النشر السبت، ٢١ فبراير ٢٠٢٦
السلام عليكم، أولا، ألف سلامة عليكِ، شفاك الله وعفاكِ. ثانيا يا جميلة، ليه تعب القلب ده كله، وليه التفكير في الانتحار؟... مفيش حاجة أيًا كانت تستاهل أبدًا تخسري عشانها دنياك وآخرتك. بالنسبة لصحباتك، إيه يجبرك تكملي في ده؟ إيه يجبرك تسمعي لمشاكلهم طول الوقت ما دام وصلتِ لمرحلة التعب والانفجار؟ فكري في نفسك الأول. لو دربتِ نفسك تقولي لأ ومتتكسفيش هتوقفي كل الدائرة دي وتكسريها. صحابك هيزعلوا؟ عادي... على أساس إن زعلك فرق معهم، فليه يفرق زعلهم معك؟ خليكِ قوية وقولي لأ. تعبانة متسمعيش، مش فاضية قولي مش فاضية لكم. أنتِ بس محتاجة تقوي قلبك. ** وعلى فكرة، طالما بتجذبي نفس الأشخاص اللي شبه مامتك. معنى ده إنك عاوزة تعالجي مشكلتها جواك. لازم تظبطي مشاعرك ناحيتها وأفكارك.. لأن طالما علاقتك بها سلبية وشاغلة كل تفكيرك ومش متصالحة مع الوضع، هتفضلي تجذبي نفس الأشخاص اللي بشخصيتها. ** ممكن تحتاجي مساعدة أخصائية نفسية تساعدك بخطوات عملية إذا تعالجي مشكلة علاقتك بها، بس ممكن أنصحك تلجأي حاليا للكتابة، فرغي مشاعرك على الورق واكتبي كل الحاجات اللي مزعلاكِ وكل اللي نفسك يتغير والوضع اللي عاوزة حياتك تبقى عليه. تفريغ أفكارك ومشاعرك هيفضي شوية من الدوشة والفوضى اللي جواكِ. طول ما جواك دوشة ومشاعر سلبية متراكمة هتفضلي تعبانة ومش قادرة تصفي أو تفكري بطريقة صح وتلاقي المخرج. **** استغلي أيام رمضان وادعي بخشوع وقت الفطار وفي الفجر. حددي قائمة بالدعوات اللي عاوزة ربنا يحققها لك وادعي بها كل يوم لحد آخر رمضان، وعن تجربة ده فرق معي ومع ناس كتير. بس ادعي بيقين وإلحاح. ونصيحة أخيرة، التزمي ذكر (لا حول ولا قوة إلا بالله) و(حسبي الله ونعم الوكيل) ردديهم كتير الأيام الجاية بيقين ومن قلبك. وربنا يوفقك.
تم النشر السبت، ٢١ فبراير ٢٠٢٦
يشرفني اكون صحبتك ♥️
تم النشر الأحد، ٢٢ فبراير ٢٠٢٦
لعرض السؤال في فدني اضغط هنا