Abdullah

السلام عليكم ، أنا اخوكى عبدالله ، بصراحة هو فى حاجات من كلامك المعظم بيعملها وفى حاجات انتى فعلا لازم تغيريها ، زى مثلا المعظم مبيحبش الدراسة ،اه بالمناسبة أنا تالتة ثانوى ازهر ، أو زى الأوضة اللى كل ما أروقها الصبح تبوظ باليل دى كلها حجات عادية ، أنا كنت فى علاقة بصراحة مع وحدة حبيتها جدا جدا جدا بس الحمد لله فقت لنفسى وقلتلها لازم ننفصل اولا علشان حرام ثانيا لسا الوقت بدرى شوية حبتين طلعت اصلا هى كانت عاوزة تقولى كدة بس مجتش الفرصة ، الزيتونة انتى اللى ممكن تبقى شايفة الحجات اللى بتعمليها دى مش ممكن تتصلح وكدة بس بالعكس تقريبا معظمنا بيمر بالمرحلة دى واللى بيتبع طريق ربنا بينجو منو اه بينجو علشان الطريق دا كلو ضلال ، بجد نصيحة من اخوكى متزعليش على حد ،علشان لو ليكون نصيب كدة كدة اكيد هتتقابلو تانى بس بالحلال ، أما العادة دا موضوع أنا استحيى اتكلم فيه بس انا هقولك نصيحة ،اول حاجه لازم تعمليها تلغى المتابعة لأى مصدر او اى شخص لما بتشوفيه بيفكرك بيها ، تانى حاجه حاولى تلغى التلفون فترة من حياتك لأن معظم الحاجه دى من التلفون اصلا ، بعد كدة أنا آسف يعنى بس اتمنى الكلام يفيدك ،لما تجيلك الحالة دى غيرى مكانك روحى اقعدى مع حد لو مافيش حد ، فربنا اولى واحد تلجأي له اصلا ، أقولك حاجه تغير حياتك (قيام الليل) قيام الليل عمل معايا معجزات اسمعى بودكاتات دينيه للدكتور أحمد العربى مثلا ولا الشيخ سمير مصطفى فى كتير وابحث عن العلاج من العادة بالبودكاستات الدينية سيبك من العلم فى العادة بالزانة لأن العادة جزء كبير منها بتكون بسبب الشيطان ، بس انا خلصت كلامى اتمنى بجد تكونى استفدتى ولو بجزئ صغير ، وربنا يوفقك ويرفع عنك البلاء والهم والغم ويقربنا جميعا منو ، ويوفقك فى دراستك أنا وانتى 🙂 إدعيلى أنا وانتى بقا ، رسالة أخيرة انتى اقوى من الشيطان تقدرى تتغلب على الهم اللى هو سبب فيه بس علشان تتغلب عليه لازم تستعين بربنا ، والله العظيم انتى بنت زى الفل ونص كمان بس حاولى مش تفكرى كتير ، يا رب يا اللى مش عارف اسمك ايه 😂 تدخلى الكليه اللى نفسك فيها وانا كمان يا رب 🙂 قولى آمين بقا 🤎

السلام عليكم ، من وجهة نظرى انتى مش غلطانة بس انخدعتى فيه انصحك عليكى يعنى انتى غلطانة بس فى حتة انك كنتى معاه رغم انك كنت تقريبا عارفة نواياه لكن هو دخلك وانتى فى موقف ضعف فنفسك اتحكمت فيكى للأسف وكملتى معاه ، أنا مقدرش الومك كل اللوم وبردو مش كفاية عليكى انك عرفتى غلطك اى نعم الموضوع يعتبر تقريبا خلص فى اثر بس يعتبر خلص ، فلازم تتولى لربنا اللى مفكرتيش فيه ونسيتيه وانتى بتعملى الذنب ، بس عموما هو انسان حقير واستخدم الدين فى اعماله ، وعلينا كلنا مش انتى بس والله ، علينا ناخد بالنا ونحكى لحد قريب مننا يمكن أنا اعمى فيه يمكن لو حكيت لحد يرشدنى للصح ، اللى عليكى دلوقتي تروحى لأقرب حد من والديكى وغالبا هتكون الأم ،روحى وقليلها نفس اللى انت كاتباه وبرأى نفسك مش فيها حاجه يعنى كلنا بنغلط بس ربنا ساترها ، زعلتى من نفسك دا كان لازم بس دلوقتي خلاص الموضوع عدة نتخطاه بقا ، كل اللى هيحصلك بسبب الموضوع دا فهو من نفسك الأمارة بالسوء والشيطان فدايما اول ما تجيك الحالة دى اذكرى الله (ألا بذكر الله تطمئن القلوب ) وبس كدة وفك الله كربك ورزقك الله الطأنينة والسكينة اللهم آمين 🤲 🤎

والله يا اخت ندى قبل اى حاجه فأنتى بنت ب 100 راجل أنا مليش فى القانون فمقدرش أفيدك فى حتة زى دى بس اقدر اقلك اصطبرى وإن شاء الله هتلاقى العوض ممكن ربنا يعوضكى عن دا كلو بحاجة عظيمة لا مش ممكن بس اظن فى الله خير إن دا هيحصل فعلا ، ومتحمليش نفسك اى ذنب لأنك ملكيش اى علاقة ياللى حصل ولا كنتى تعرفى نوايا بباكى السيئة ، مش عاوز اعصيكى على مرات ابوكى بس متسبيش حقق المؤمن ليس بضعيف ربنا بيقول ( وإن عاقبتم فعاقبوا بمثل ما عوقبتم به ) وتكملة الآية ودى اللى أجرها أعظم عند الله بس دا اختيارى (ولإن صبرتم لهو خيرٌ للصابرين ) فلو الموضوع زاد عن حده لا عامليها زى ما بتعاملك ومتنسيش انتى الأساس انتى صاحبة البيت ازاى تخليها تتردكى منو واخر حاجه ولو إن فى كلام كتير بس اجمدي واحتسبي ذلك عند الله لغاية لما يجى ابن الحلال وإن شاء الله يعوضك عن دا كلو بس انتى اصطبرى بس ودايما خليكى مع الله يعنى ادعى ربنا كتير صلى قيام الليل اقرأى القرآن وكدة كل دا بيزيل الهم والحزم والبلال ، اخيرا وليس اخرا أنا مبقاش الكلام دا اشفاقا عليكى لو هنشفق فالإشفاق على ابوكى ومرات ابوكى أنا بقلك الكلام دا علشان كلنا نبقى فى محن ولازم يبقى فى كلام يسند الواحد يحفزو يديلو طاقة إيجابية فأتمنى أكون أفدتك ولو بشئ بسيط بالبسيط عند الله عظيم والسلام عليكم ورحمة الله وبركاته 🤎

اولا احمد ربنا انك ثانوية عامة مش زى حالاتى ثانوية أزهرية 😂 تانى حاجه مينفعش تقولى اموت نفسى أو الكلام دا ، حتى لو الدنيا خربت فحياتك مش لعبة ، بصى بقا يا اختى هبعتلك جدول نظمي وقت فيه وكدة وهتحطى الأولويات فى الاول والحاجات التانية فى الآخر الجدول دا على مدار الأسبوع وكل يوم قيمي نفسك يعنى مثلا انتى حاطة 3 مواد هتذاكريهم النهارده هتشوفى فى نهاية اليوم هل حققت المطلوب ولا لا وادى نفسك درجة وعلى الحال دا كل يوم فى آخر الأسبوع بقا قيمى مستواكى من 100 وإن شاء الله هتحسى بالتغيير ولو لسا مبدأتيش قدامك فرصة لسا بس المهم تبدأى وبالتوفيق إن شاء الله ، إدعيلى أنا وانتى بقا ماشى 🙈🙂 بجد خلى عندك امل كل حاجه بيد الله عز وجل ثقة فى الله وأجتهدى ولما تحسى أنك فاقدة التركيز صلي على النبي عليه الصلاة والسلام 🤎 وأقرئى قرآن وأقرى الأذكار وبس كده ، اتمنى تكون أفدتك والسلام عليكم ورحمة الله وبركاته

أولاً في ما شاء الله عليك بجد ،على انك قدرت اوصل لعلاج طبيعى مع معاملة اهلك ليكى ، فدا جزء إيجابى يتحسبلك بصراحة ، وبصراحة يا اخت فالأب والأم النهاردة عليهم ضغوطات كبيرة جدا ، لكن دا مش مبرر لتصرفاتهم ، لكن احنا تراعى دا بردو ، الأم والأب لازم علينا نرضيهم لغاية لما ربنا يسهل ويجى ابن الحلال 🙂 ، والله لولا أنك متدينة فمكنتيش هتقدري والمعنى اصح مكنش ربنا رزقى الصبر دا كلو (فصبرٌ جميل) وإن شاء الله ربنا هيعوضك عن صبرك دا إن شاء الله ، وبعدين احمد ربنا أن بباكى ومامتك موجودين ربنا يهديهم طول العمر ، أنا أتمنى امى ترجع وتضربنى بالجزمة ولا مأخذة وهيكون على قلبى زى العسل بس هذا قضاء الله وقدره ورتضين به والحمد لله ، الرسول صلى الله عليه وسلم فى معنى حديث بيقول العجيب أن واحد والده ووالدته موجودين ومش يدخلوه الجنة (رغم أنف من أدرك أبويه عند الكبر أحدهما أو كليهما فلم يدخل الجنة) او كما قال صلى الله عليه وسلم ، وبارك الله فيك وجعلك من الصابرين وزادك صبرا فوق صبرك وحلما فوق حلمك ، وفى الآخر ربنا يرزقك باين الحلال ويهون عليك إن شاء الله 😅 دمتم سالمين

وعليكم السلام ورحمة الله وبركاته ، تدخل في الموضوع على طول ، يا أختى الثانوية مش نهاية المطاف الثانية جزء من حياتك مش حياتك ، كل واحد فينا مكتوب رزقه ومستقبلو من قبل العالم ما يتوجد ، استعيذى بالله من الشيطان الرجيم وحصنى نفسك بالأذكار وأرقى نفسك واللى بيدخل فى طريق الله مبيرجعش خائب ابدا ،اقرأى قران صلى قيام الله ، تانى حاجه خدى كورسات فى مجال البرمجة مثلا او اى حاجه يعنى ،وخلى اللى حصلك دا قوة دافعة ليكى انك تجتهدى اكتر متخلهوش عائق قدامك ،واخيرا ربنا يوفقك ويصلح حالك ويبعد عنك أصحاب السوء ويرفع عنك الهم والبلاء والخزن ويدخل على قلبك السرور والفرح والسعادة اللهم آمين 🤲 🤎

أنا كمان فى تالتة ثانوى ازهر ، بصى قبل اى حاجه خلى عندك عزيمة وأمل وإصرار ، وأبدأى امسكى كل مادة اسبوع مثلا وحطى ليمت انك هتخلصى من الدرس كذا لكذا فى الأسبوع دا بس لازم تحطي ليمت لنفسك واعملى جدل وانا هبعتلك جدول تمام التمام ممكن بس ميكنش واضح شوية لأن هو pdf وانا اخدتو اسكرين 🙂 بس ماشى الحال يعنى ، وانا سامع انك عاوز تطلعى دكتورة فشدى ولا ايه 😂 المهم بعد ما تظبطى وقتك وكل حاجه تمام هتبدأى بالأولويات الاول حاجه كريتڤ جدا يعنى يعنى مثلا الفيزياء عندك مش احسن حاجه يبقى نخلى الفيزياء من الأولويات مع اننا بردو منهملش باقى المواد ، ولو انتى فى عام فالموضوع اسهل أما لو ازهر زى حالاتى هتبقى اصعب شوية بس انتى قدها وبس كدة وأدعى ربنا يكرمنا احنا الأتنين بقا ، وفى النهاية اللهم وفقنا لما تحب وترضى وارزقنا حفظا كحفظ المرسلين وفهما كفهم النبين ويسر لنا الصعب وانفعنا بما علمتنا وزدنا بك علما اللهم آمين اللهم آمين 🤲 🤎

وعليكم السلام ورحمة الله وبركاته قبل اى حاجه ما شاء الله عليكى بجد يا رب يزيدك صبر فوق صبرك وبصراحة حياتك هي قصة نتعلم منها كلنا علشان كل واحد يرضى باللى فيه بس عموما انتى بنت بألف راجل بجد انتى ومامتك يعنى ما شاء الله عليكى استحملت اللى ناس كتير بتموت بسبب الحجات دى فأنتى لازم تعرفى انك superhero انتى ومامتك اقسم بالله أنا اصغر منك بسنة تقريبا وربنا يكرمك فى الأمتحانات ويا رب تدخلى الكليه اللى انتى عايزاها أو اللى ربنا كاتبهولك المهم شدى حيلك علشان تقدر تعوض مامتك وحتى انتى واخوكى عن المعلومات اللى عشتوها والله انتى كبرتى فى نظرى من كلامك انتى ومامتك يعنى ربنا يحفظكو وربنا يهدى بباكى واخيرا كلنا محتاجين حد يسمعنا بس وعن تجربة مش هتلاقى احسن من الله والله ايام ما والدتى اتوفت كنت يعنى مش اقلك ورغم حالتى مش لقيت حد جنبى فهيا ماتت من هنا وانا رحت اصلى من هنا والله قعدت حاولى ساعتين فى المسجد وحكيلت لربنا ودعيت لوادتى اللى هيا اصلا حياتى روحى قلبى كل حاجه كانت بالنسبالى بس سعتها بقا ربنا صبرنى وروحت كان مش فى حاجه والله من سعتها وانا مؤمن إيمان تام أن مش فى اى حد تحكيلو همك غير ربنا احنا ملناش غيره اصلا وبس كدة🙂🤍

قبل اى حاجه بنبدأ كلامنا بالسلام وبعدين يحلى الكلام 😂 أما بعد فالحمد لله انك منتظمة على صلاتك ، ودا مش ذنبك انك بتكلم حد من على النت وحبتيه كمان بس نقف هنا شوية لان دا مش حب دا مجرد معلش يعنى بس ممكن يكون محدش مهتم بيكى والشخص دا بيقولك كلام حلو وزى العسل فلقيتى معاه اللى انتى مش لاقيه فى الواقع فعقلك وهمك انك حبتيه بس فى الحقيقة دا مش حب طب عاوزة تلاقى صحاب مش هتلاقى احسن من ربنا ثم ممكن بقا تسنيم حمدى http://youtube.com/post/UgkxUcMPO91dveFbc6vdvX2Jjft8CHQdOJx4?si=g53lh3vwhAMVslxKدا لينك نادى البنات السرى أنا شفت المنشور وبعتو لأخواتى وانت اخت كمان فجربى ممكن تتعرفى على اصدقاء حلوين ومتدينبن كمان ومش كدة وبس ومعانا عرض الأربعون النووية مجانا https://forms.gle/fA9gBHd3As8v26Kn6 بنصحك بيه هتلاقى صحاب بردو متدينين وهيفدوكى وممكن تحكيلهم كمان يمكن حد يساعدك اكتر منى وحاولى تشغلي وقتك بس لأن معظم الذنوب بنعملها واحنا فاضيين اه وبنبدأ كلامنا بالسلام وممكن ننهيه بالسلام زى والسلام عليكم ورحمة الله وبركاته وربنا يرزقك بأصدقاء صالحين يأخذون بيدك إلى الجنة قولى آمين 🤲 🤍

خايفة انك مش تنحبى خلاص انصحك تاخدى رجل متدين من المسلمين لو حبك هتبقى اسعد وحدة فى العالم ولو مش حبك عمرو ما هيظلمك وهيعاملك حلو بردو وانسى اللى فات وعاوزة تتخلص من الماضى اشغلى نفسك انتى اصلا بتفكرى فى الماضى لما بتكونى فاضية ووالله شخصيتك امبين أنها جميلة لأن ندمك على فعل الذنب دا يدل على نقاء وطيبة قلبك أما خوفك أن ربنا يعاقبك فدا بقا بنصحك تدعى ربنا كتير بس وربنا هيستجيب إن شاء الله وممكن مثلا تسمعى برودكاست دينى للدكتور احمد العربى يعنى اى حاجه منها بتشغلى نفسك وفى نفس الوقت تستفيدى دينيا ولواستفدتى دينيا وتستفيدى من كل حاجه فى حياتك حرفيا فى دراستك فى زواجك فى اى حاجه بقا بس عليكى بطريق الإسلام والرجوع إلى الله وربنا هوا اللى بيقول (إن الله يحب التوابين ) وخلي بالك إن الله إذا أحب عبدا نادى جبريل, يا جبريل إني أحب فلانا فأحبه فيحبه جبريل فينادي جبريل في أهل السماء إن الله يحب فلانا فأحبوه فيحبه أهل السماء ثم يوضع له القبول في الأرض فيحبه كل أهل الأرض وبس كدة وربنا يسعدك دنيا وآخرة ويا رب يرزقك برجل صالح يصونك ويحبك وتبقى سعيدة معاه اى خدمة اهو 😉😂

وعليكم السلام ورحمة الله وبركاته يا اختي دا الطبيعي انك مش متأسسة كيمياء أو فيزيا يعنى انتى لسا هتدخلى اولى ثانوى بس عموما عاوزة تفهمي كيمياء بصراحة ارشحلك الأستاذ خالد صقر دا اصلا هيأسسك وهيفهمك وهتطلعى من الحصة بتعتو تحلي على طول مش محتاجة تذاكري تاني و أما الفيزياء ف الأستاذ محمد عبد المعبود هو فديوهات طويلة شوية بس بصراحة هيفهمك الدرس بنسبة كبيرة جدا أما الإنجليزي فدا مع الكل 😂 بس ممكن ادلك على مدرسين حلوين فى مثلا دليلك للإنجليزى أو The American English او دروس أون لين شوفى اللى بتفهمى منو وكملي معاه وبس كدة وبالتوفيق

وعليكم السلام ورحمة الله وبركاته انت يا اخويا بتقول انك مسلم ف إزاى بتأمن بالأبراج دا شرك مش حاجه هينة يعنى لما حكاية انك عمال تقول على نفسك حجات سلبية فدا فى حد زاتو بيخليك سلبى انتى بتقول من الابتدائي وانت بتشتغل فدى حاجة حلوة يعنى لتساعد فى أمور البيت وغيروا وبعدين مش تقول أنا عندى وانا عندى وفى نفس الوقت مش تسمع للناس لأن الناس يا اخويا مش بتسيب الميت فى حالو فأن بس خليك إجابى وقرب من ربنا اكتر انت بس ناقصك حتة الدين دى جرب صلى مرة قيام الليل وادعى ربنا كدة ولا اشكيلو اللى تاعبك لأن ربنا اقرب حد لينا احنا مش بينا غيرو جرب اسمع برودكاست دينى للشيخ احمد العربى أو اسمع الشيخ سمير مصطفى ولا اسمع قران لشيخ انت بتحبو وكدة فاهم ونصيحة من اخوك الصغير فكك من كلام الناس ومش تخلى الشيطان يوديك ويجيبك ولازم تعرفى محدش بيعيش الحياة اللى بيتمناها ولازم تثق فى ربنا انو كاتبلك الأحسن ليك هوا مش هيضرك ابدا وربنا يفك عنك كربك ويوسع رزقك ويشرح صدرك ويغفر ذنبك اللهم آمين 🤲 🤍

وعليكم السلام ورحمة الله وبركاته اولا : انتى غلطتى لما رديتى عليه بس خلاص انتى رديتى وخلص الموضوع ليه بقا بتفتح معاه كلام كتير تانى ثانيا : انتى فتحتى معاه كلام كتير واتكلمتو كتير لدرجة انو اخد عليكى وبدأ يقلك حجات مش ينفع تتقال لو اتكلمتو مرة ولا اتنين بس فواضح جدا انكو اتكلمتو كتير وده ابو الغلط كمان ثالثا : ودى اهم حاجه أن دا حرام انتى بتقولى انك قلتي اللى عاوز حد بيدخل من الباب ايه بقا اللى وصلكى للمرحلة دى ونصيحة يا اختى لو لسا بتكلميه بطلى وركز فى امتحاناتك وحتى لو بعتلك تانى. اوعى وبحذرك اى عليه ممكن يكون فعلا طيب وابن حلال وممكن يكون فاضى ومش وراه حاجه فدخلك وعشمك بالجواز وكدة ومش تنسى اهم حاجه أن الموضوع دا حرام

يعنى جربتى كل حاجه ورحت لدكاترة كتير ومرحتيش للشافى المعارفى روحى لربنا اسأليه أن ابنك يرجع طبيعى ممكن دا يكون عين مش شرط يكون مرض طبى جربى وديه لشيخ يقرأ عليه قرآن ولا اقرأى عليه انتى وارقيه بالرقية الشرعية ربنا هوا المعالج وهوا الشافى والدكاترة دول اصلا لو فادوكى فهما سبب فى شفاء ابنك مش اكتر اما مين اللى يقدر يساعدك فهوا الله وربنا يشفيلك ابنك ويرفع عنو البلاء يا رب وآخر دعوانا أن الحمد لله رب العالمين والصلاة والسلام على سيدنا محمد وعلى اله وصحبه اجمعين ♥️

وعليكم السلام ورحمة الله وبركاته أنا مامتى متوفيه الله يرحمها وكنت متعلق بيها بطريقة فظيعة المهم هي متوفيه من سنتين وانا بجد كل يوم بتعلق بيها اكتر من اليوم إللى قبلو بس مش زعلان أنها ماتت علشان كنت واثق من ربنا إن هوا اختار الأحسن ليها ولينا فأنتى ثقى فى الله عز وجل وبدال ما توقف حياتك خلى فراقو قوة دافعة ليكى خليكى إيجابية وسيبك من اللى بقلك روحى لدكتور نفسى دا مش مرض ودا العادى انك تحزنى وتعيطى عليه. .... النبى صلى الله عليه وسلم لما فقد ابنه ابراهيم شالو وفضل يعيط فعادى يعنى ما عليكى غير انك تتقوى بالثقة بالله وتدعيلو بالرحمة وربما يرحمو هوا ومامتى وجميع المسلمين اموات وأحياء واتمنى اكون أفدتك

وعليكم السلام ورحمة الله وبركاته كلو بيبقى كدة فى أولى ثانوى بيبقى شادد حيلو وكدة علشان بقى بيقول أنا بقيت فى ثانوى ولازم أشد وكدة 😂 بس عموما اهم حاجه فى اى مذاكرة عدم التراكمات يعنى مش تراكمى اى درس أنا تنظيم الوقت ف دا على حسب دروسك يعنى مثلا هتروح المدرسة وهتيجى على الساعة 2 وهتروحى درسين على الأقل فى اليوم فكدة ممكن ترجعى البيت على خمسة مثلا هتنامى شوية وهتذاكرى بالليل أنا ازهر باخد أقل يوم 4 دروس بس مش بروح المعهد بس المهم انتى اى كان معاكى وقت كبير وقت الكبير على فى أيام عندك ممكن مش تاخدى فيها دروس ففى الحالة دى انتى ممكن مثلا تراجع اللى اخدتيه مراجعة سريعة كدة وشدة حيلك أما احسن مدرسين ففى الأستاذ خالد صقر دا فى الكيمياء دا بالنسبالى احسن مدرسه كيمياء أما فى الأحياء عند الأستاذ الدكتور أحمد الجوهرى وفى برضو الأستاذ الدكتور محمد ايمن بس بصراحة أنا بفهم أو شايف نفسى مع احمد الجوهرى بس انتى جربى الأتنين وفى فى العربى الأستاذ محمد صلاح أنا ازهر فمعرفش كتير عن العربى وكدة بس انا سمعت كذا فديو للأستاذ محمد صلاح بصراحة حاجه روعة هيشد شوية هيهور شوية مش هتحسى بملل وبس دا اللى اعرفو اتمنى لكى النجاح والتوفيق وشدى حيلك اولى صعبة شوية بس مش تخافى هتعدى عادى وتقنية ساهلة موت أنا فى تانية على فكرة ومنقول لتالتة إن شاء الله بس كنت باخد دورس تالتة من وانا فى تانية فأنا بقلك تالتة دى هتحسيها ولا حاجه طالما انتى شادة ولو مستكترة الخمس مواد احنا عندنا 19 مادة 🙂 فيعنى حاجه مملة بطريقة فظيعة وبس كدة

وعليكم السلام ورحمه الله وبركاته أنا برضو فى تانيه ثانوى ، صراحه أنا بستفاد من شرح المدرسين اللى على النت جدا وممكن ساعات افهم منهم اكتر من المدرسين اللى مثلا فى السنتر أو غيرو فده لازم ا ول حاجه لانك مثلا لو احتجتى سؤال او مسأله هتسألى الأستاذ وبرضو فى واجب وانتى مظبطه نفسك على مواعيد الدرس زى مثلا عليكى درس عربى بكره فبتذاكرى النهارده أما لو هتعتمدى على النت بس بده مش حل مثالي لانك ممكن تكسلى أو مش ممكن دا اكيد فنصيحه ارجعى للدروس تانى وهليكى برضو متابعه على النت مش شرط تشتركى ممكن تسمعى من اليوتيوب كفايه ودى اصلا مش مشكلتك وحده لأن كلو كده بدون مبالغه إلا من رحم ربى ويا رب توصلى للى بتتمنيه وتجيبى أعلى الدرجات أنا وانتى وكل الطلبة يا رب

وعليكم السلام ورحمه الله وبركاته. بصى انتى لازم تخرجى فى اى مكان فى تجمعات وحاولى تكونى صداقات اكتر وسيبك من التلفون علشان التلفون ده سبب كبير فى الحالة اللى انتى فيها والموضوع مش صعب خدى الموضوع عادى وطلعى اللي جواكى فى اى مكان وفى اى نقاش وفى اى تجمع ومش تخافى من ردة فعل الناس أو الانتقادات اللى هتعود على ردك مثلا ،.....اهم حاجه لازم تطلعى برا البيت وحاولى بقدر الإمكان تسيبى التلفون لأكبر وقت ممكن أنا كنت بعانى من الحالة دى وانا صغير بس الحمد لله دلوقتى مش اقلك بدليل انى بقدم نصيحة ليكى 😁 دا حتى بعد ما تخلصت من موضوع الرهاب الاجتماعى ده حسيت انى كنت اهبل لان الموضوع عادى خالص ويا رب اكون فدتك بحاجه وبتمنى ليكى تتخلصى من الفترة دى لإنها إن شاء الله فترة وهتعدى .

بصى أنا مش اكبر منك بكتير عندى 17 سنة بس ممكن أفيدك بصى اول حاجه لازم لازم لازم تتعلمى اللا مبالاه بس بالطريقه الصح تمام يعنى مامتك دعت عليكى عدى الموضوع ومش تفكرى كتير ابوكى قالك كلمة مش عجبتكى ردى عليه بأدب وطنشى بعد كده من الآخر كبرى دماغك ولو مش لاقيه حد يسمعك فأحكى لربنا اللى فى قلبك وعيطى وادعى وكل حاجه وادعى أن ربنا يهدى والديك أما موضوع اختك ده فأدعيلها برضو وزى ما قلتلك علشان تعرفى تكملى لازم تكبرى دماغك مش كل ما حد يقلك كلمة تعبطى لا ابدا محدش يستاهل دمعة تنزل من عينك وبعدين عمرك مش عدى ولا حاجه دا انتى لسا فى تانيه ولا تالته إعدادى يعنى لسا قدامك الوقت كبير ولسا قدامك فرص كتير اشتغلى على نفسك وان شاء الله هتحققى اللى نفسك فيه . وآخر حاجه فكرة الأنتحار دى شليها من دماغك خالص اول حاجه لأنها حرام تانى حاجه فى بنت كويت زيك ولسا عندها 14 سنة وفى بدايت عمرها تفكر فى الأنتحار حتى لو كان ايه الظروف اللى بتمرى بيها اوعى تفكرى فالأنتحار 🤍🤍🤍 اه نسيت اقلك لما تطلعى دكتورة بإزن الله ابقى اكشفى عليا ببلاش ماشى 😂😁😁 بهزر هدفعلك 10 جنيه

علشان نبقى صرحة فده اصلا مينفعش ربنا قال وادخلوا البيوت من أبوابها لو عاوز يشوفك يجيب امو ويجى أما مش امو تقول ابعتيلى صورة معلش يعنى بس قيمتك اكبر من انت تنعرضى على اى حد كده دا بالظبط أكن واحد ميعرفكيش بيقولك ابعتيلى صورتك بس فى حالتك دى امو اللى بتقولك وفى الآخر هتورى الصوره لابنها فنصيحة من اخ متبعتيش لحد صور حتى لو كانت امو لأنها هتوريهالو ده اكيد . ونصيحة كمان صلى صلاة استخارة قبل ما تقرر هترفضى ولا لا يمكن ربنا يبعتلك بشرى تدل أن ده عريس حلو وربنا يرزقك بزوج صالح يحفظك .

اولا الحمد لله على اللى انت فيه شوف انت كنت فين وبقيت فين والدين يمحو ما قبله من الإلحاد أو الكفر أو غير ذلك وربنا قال (إن الله يحب التوابين ) وانت الحمد لله ندمت وتبت وإن شاء الله ربنا معاك أما حكاية انك مش حاسس بالإيمان فى قلبك فحله بسيط وهوا كتر قراءة القرآن وسماعه وتدبر آياته وسماع قصص الصحابه والتابعين وقبل ما تسمع قصص الصحابه اسمع عن النبى صلى الله عليه وسلم وإن شاء الله ربنا هيدخل الإيمان فى قلبك وقلبى إن شاء الله ،اه والدعاء والله عليك بالدعاء وقيام الليل هتفرق معك جدا وأعمل الطاعات حتى لو مش كنت حاسس بيها لأن عدم الإحساس بالإيمان هوا الشيطان والنفس السوء لها دور برضو فأنت حاول تغيظ الشيطان بطاعة الله وربنا يثبتك على الإيمان التام بالله أنا وأنت وجميع المؤمنين يا رب العالمين 🤲 🤍

اولا شكلك مش متعلق بالله لانك مش بدأت كلامك بالسلام . بس هقولك على خطوات هتفيدك لو هتنتظم عليها . علشان تترك المعاصر ففى شوية حجات لازم تفكر فيها الاول وانت بتعمل المعصيه . 1_افتكر أن الله شايفك وكلم نفسك وقللها مشبتستحى من الله 2_افتكر انك ممكن تموت وانت بتعمل المعصيه . 3_حاول تصلح علاقتك مع الله من بقا قرأت القرآن والانتظام فى الصلاة وكده . دول الحجات الأساسية لو عملتهم أن شاء الله ربنا هيرفع عنك ولو مش عملتهم فحاول كل مره وتوب يا اخويا حتا لو انت عارف نفسك اللى انت هترجع للذنب ده تانى بس توب لأن الله يحب التوابين وحاول مره واتنين لغايت لما الشيطان يتعب ومش عد يوسوسلك تانى .

والله يا اخت انتى جايه تسألى السؤال ده فى الشتا 😁 بس تمام ماشى ،انا هقترح عليكى وانتى شوفى بقا . لما تيجى تفكرى فى الاكل فكرى فى حاجه تانيه اشغلى نفسك بحاجه تانيه . وخلى حد يمنعكى لما يلاقيقى بتاكلى كتير يعنى مثلا خلى بباكى أو مامتك تمنعك من العشا تقلك مش فى عشا مثلا النهارده ومره ورا مره انتى اصلا هتبقى اتعودتى انو مفيش عشا . وحاولى تنظمى أكلك يعنى لو بتاكلى فى الفطار رغيفين خليهم رغيف ونص فى الاول وبعد اشويه خليهم واحد بس ، اه والفطار مهم جدا لازم تفطرى وحاولى تأخرى الغدا لمثلا بعد العصر بشوية بحيث انك مش تجوعى بالليل للدرجه . اخر حاجه أنا عارف ان الموضوع صعب وبذات الجو برد والناس بتاكل كتير بس افتكرى مثلا مثلا صحابك اللى اتريقو عليكى وافتكرى كم الإهانات اللى تعرضتيلها بسبب التخمة وإن شاء الله هتخسى وهتبقى زى الفل اهم حاجه العزيمة لو فى عزيمة فعلا هتحققى انجازات كبيره فى وقت قصير

وعليكم السلام ورحمه الله وبركاته هي طويلة بس حاولى تكملى هتفرق معاكى اولا وقبل أي حاجة انتى ميه ميه انتى تفكيرك لوحده تفكير وحده طموحة تفكير بنت مسؤولة فأنا أحب اشكرك على ده أما بقى حكاية المذاكرة وكدا فده عند الكل بس الفرق أن فى ناس بتعدي المرحله دى وبتتعب وفي ناس بطول علشان تعديها وبعدين انتى بتقولي انك كنتي شاطره في الابتدائي وقبل ما اكمل مفيش حد خايب الفرق فى واحد بيذاكر وفى واحد بيطنش وعلى فكره أنا لسا في تانيه ثانوي وعرفت أعدي المرحله دى هقلك ازاي اولا أنا بصلي الحمد لله وانا بطبيعتي بحب السهر فقلت أنا هذاكر شوية وساعة ما أزهق أقوم اصلى قيام الليل مثلا ركعتين ولا حاجه وارجع اذاكر تاني ولما أزهق أروح أصلي ركعتين كمان وهكذا ولو الموضوع ده مش هيجيب معك نتيجة فشوفي الحاجه اللي بتريحك وافتكري أن اللي انتي هتذاكريه النهارده مش هتذاكريه بكره وبعدين انتي لسا صغيره لسا في ايدك تبقي الاولى في كل حاجه وعلى فكرة موت الواحد هو المقارنه بحد زميله أو كده يعني متقارنيش نفسك بحد خليهم هما اللى يقارنوا نفسهم بيكي وانا بقول لك الكلام ده علشان أنا في مرحله من المراحل كنت بشوف نفسي أن زمايلي أحسن مني مع اني كنت بطلع الاول دايما ولغاية السنة اللي فاتت كنت أنا أعلى درجه والأول كمان و حطي هدفك قدامك وافتكري انك عاوزه واستعيني بالله والله لو استعنتي بالله هتفرق معاكي جامد واسأل مجرب ولا تسأل خبير وآخر حاجة بتمنى تحققى حلمك بس اوعدينى لما تفتحى عياده تعرفينى وتكشفى عليا ببلاش 😁 اه يلا تصحبكى السلامه

أنا شايف انك مش غلطانه بل انتى بنت محترمه وربنا يحفظك ويبارك فيكى ويخليكى لمامتكى وأخواتك وانا مش عارف انتى كنتى بتسامحيه ازاى وده يدل على أن فترطكى سليمه وقلبك ابيض وصافى وحتا لو كنتى تعرفى بموضوع أن هوا ممكن يتحبس أو لا بده حقق وحق اخواتك م ليها دعوه حاجه وزى ما انتى قلتى لو هوا كان بيديلنا حقنا كامل مش كنا طلبنا اكتر يبقا انتى قرارك كان صح ومش تندمى على حاجه لان الندم مش هيغير الواقع ولا هيغير القدر ومش تطلبى المساعده منو اطلبى المساعده من الله وثقى بالله إن شاء الله ربنا معاكى 🤍

ده يا أختى غلطك انتى من الاول اصلا ما بنى على باطل فهو باطل وده حرام فطبيعة يعمل كده ايون هوا راجل مش كويس بس انتى كان مفروض تصديه من الاول كان لازم تقوليلو مش بكلم حد لو عاوزنى ادخل البيت من بابو واقفلى معاه لأن فى شباب الايام دى كتير جدا بتلعب بالبنات أنا ولد وفاهم ده كويس وعلشان كده بنصحك اى حد يدخلك صديه مش تقولى طريقه غير طريق الحلال قال تعالى (وادخلوا البيوت من أبوابها) ومش تبعتيلو تانى انتى اكرم واعز من أن تبعتيلو رساله كرامتك تروح فيها وغير كده هعرف انك بنت ساهله معلش يعنى وآسف بس والله أنا بشوف كل بنت لكنها اختى فبتعصب من كده واعتذر على الطريقه

السلام عليكم ورحمه الله وبركاته أنا لسا طالب ازهرى بس ممكن افيدك .. بصى بدالك فكرتى فإنك مش بتصلى ولا بتقرأى قران مثلا فده بذات نفسو حاجه حلوه خالص ومش شرط حد يدعمك من صحابك لازم تبدأى بنفسك وربنا هيساعدك إن شاء الله كل ما عليكى هتنتظمى فى صلاتك لو مش منتظمه وحاولى تدعى كتير اوى وحاولى تقاومى الشهوه طب لو لقيتى نفسك مش هتقدرى اشغلى نفسك قومى اعملى اى حاجه حتا لو انتى مش عاوزه تعمليها أو غيرى المكان يعنى لو الاوضه قومى اقعدى فى الصاله وسيبى التلفون وإن شاء الله هتبقى زى الفل وانا معاكى وانا مريت بموضوع الشهوه ده والحمد لله اتعافيت منو الحمد لله حمدا كثيرا طيبا مباركا فيه اللهم ساعد هذه الفتاة على تخى محنتها وطهر قلبها للإيمان وعلقها بك يا رب العالمين 🤲 🤍

بصى يا جميل والله الدنيا احسن من كده ومش مستاهله دمعه تنزل منك وعادى يعنى كل الامور اللى انتى بتقوليها دى بتحصل اصلا مع اغلب الناس كل اللى عليكى انك ترجعى لربنا وتدعى كتير اوى وتصلى فروضك كامله لو كنتى مقصرة فيها وتصلى قيام الليل وفضفضى لربنا على اللى مزعلكى أو اللى. مضايقاكى وان شاء الله ربنا يوفقك ويرفع عنك

وعليكم السلام ورحمه الله وبركاته دى ما تسمى بالنكسه وده أمر بيحصل عادى مش تخافى وانتى قدها واقدود كل ما عليكى انك هتعمل كل يوم حاجه صغيره وكل يوم تكبرى الحاجه دى يعنى مثلا احفظى فى اليوم نص صفحه وبكره صفحه وكده فاهمه ومثلا لو تكاسلتى أو كده استعيذى بالله من الشيطان الرجيم وافتكرى أن ده شيطان هوا اللى مانعك وحاولى تصديه أنا كمان كنت كده على فكره والحمد لله رجعت زى الاول واحسن كمان اه صح وعليكى بالدعاء وان شاء الله ربنا يرفع عنك وعنا يا رب

بصى اكيد الدنيا مش سهله واحمدي ربنا انك عندك ام حتى لو بتزعقلك أو حتى بتتضربك لو جربتى شعور فقد الام والله صعب وبعدين خدى كل المواضيع ببساطه بمعنى خلى عقلك كبير ومش كل موقف تضايقى أنا لما كنت فى عمرك كنت زيك كده بس لما اخدت الموضوع ببساطه وطبلت للكل ده هوا اللى نفع وحتى لو مش هما عاوزينك قولي لهم لا انا على قلبكم ومش تبقى كده يعنى خليكى قوية كده وان شاء الله ربنا يهدى اهلك ويهدينا جميعا .

اسمع للآخر وقرر، أنا لا أفتي بس ده شيطان وهوا اللي وصلك لكده، فالحل انك تقرب اكتر من ربنا يعنى مثلا ممكن تصلى قيام الليل والضحى ولو فرص قدامك اكتر اعمل وعليك بقرآءة القرآن وسورة البقرة لازم وطبعا سورة الإخلاص والقلق والناس (المعوذتين) ولو بتسمع اغانى فلازم تبطل وربنا إن شاء الله هيرفع عنك ويثبتك على دينك. اه صح عليك بالدعاء، النبى صلى الله عليه وسلم كان بيدعى ويقول "يا مقلب القلوب ثبت قلبي على دينك" فأنت كمان ادعي وربنا يثبت قلوبنا جميعا على الإسلام.

هي عندك من الصغر مشكلة التلعثم دى ؟

مش بتنقاس كدة على حسب حال الزوج

اللهم امين 🤎

عادى يسطى بس انصحك تروح لدكتور تظبط اكلك حاول تخس كدة الموضوع مش عيب ولا فى حاجه بس هي المشكلة أن دا ممكن مع مرور الوقت يتسبب لا قدر الله فى امراض

NOTEBOOKLM

الشكر لله 🤎

الشكر لله 🤎 إن شاء الله مش هنساكى بالدعاء

ما المشكلة انك بنت قصدى موقفك ضعيف شوية فبتبقى الحالة اصعب بصى حاولى تكلمى امك تحكيلها دا كلو ممكن تتأثر وتاخدك معاها حاولى تعملى اى حاجه والطيابة بتعتك دى اركنيها على جنب دلوقتي واتكلمى مع بباكى وقليل معنش مستحملة واتصعبنى عليه اعملى اى حاجه والله لو اعرفك شخصيا كنت جبتك عندنا فى بيت العيلة ، ربنا يفك كربك و يرفع عنك البلاء يا رب ادعى يا ندى ادعى اكتير ادعى الدعاء بيغير القدر والله حسيت فى لحظة انك اختى وفى الحالة دى إنتى فعلا اختى 🤎

معظمنا كدة متخافيش 😂😂

القرآن الكريم علاج لكل شئ داوم عليه وستجد الإعجاز وعليك بقيام الليل واطلب من الله أن يبعدك عن الشهوات وأدعيلى معاك 🙂 أنا حافظ لكتاب الله وختمته بفضل الله لكن ربَّ دعوة اخ لأخيه تكون خير من دعوته لنفسه

الشكر الشكر لله 🤎

ربنا يبعد عنا الحرام كلنا ،اسف على الطريقة

اللهم امين 🤎

اللهم امين 🤲🤎

معظمنا تايه مش لوحدك يعنى 😂 بس دا بسبب أننا بعاد عن ربنا أنا متأكد لو قربنا من ربنا الهم والحزم دا هينزاح

استنى هدعيلك ، الله لا يوفق اى علاقة حرام تدخلى فيها ، العلاقة اللى أولها لاترضى الله نهايتها لن ترضيكى

التعامل مع السن الصغير دا أمر مش سهل فلازم نتعامل بحكمة شوية مش بالضرب الرسول صلى الله عليه وسلم عمره ما ضرب ولا مد يده الكريمة على أحد وعلم الأمة بأكملها ، فمثلا خديه بالسياسة ، وكل طفل ليه نقطة ضعف كدة بيجى منها خشيلو من النقطة دى

قبل كل هذا فهذه العلاقة حرااام بمعنى انك لازم متكلمناش خالص سواء كانت ظروفك سامحة او لا وافتكر العلاقة اللى أولها حرام او بمعنى اصح العلاقة إلى. اولها ميرضيش ربنا نهايتها مش هترضيك .

وإياكم 🤍

الثقة بالنفس والخوف ومثل هذه الأمور بتروح مع تكرار الشئ كذا مرة أنا مثلا إمام للناس بصلى بيهم يعنى . فى أول مرة دخلت اصلى كنت متوتر وخايف حتى رجلى قعدت تخبط فى بعضها 😂 بس فى المرة التانية كنت احسن بنسبة مش كبيرة ومرة فى مرة عنت بصلى اصلا فى اى حتة حرفيا بالناس فالموضوع محتاج صبر وتكرار أما الثقة بالنفس فدى تحتاج للشجاعة ولو انتى مش شجاعة حاولى تتغلبى على خوفك ويعنى مش نهايت العالم لو غلطتى قدام الناس وثقى فى ربنا احسن 😂

الندم حلو بس الأهم الفعل طلعة الموضوع من دماغك انتى فى تالتة ثانوى لسا يعنى مش رحتى بعيد ولا حاجه لو مش هوا مش اتقدملك فيعنى مش هتقف عليه واللى أولو حرام نهايتو مش هتبقى سعيدة فنصيحة من اخوكى الصغير بالمناسبة اصغر منك بسنة والله بنصحك تبعدى عن الموضوع دا وتبطلى تفكير فيه علشان مش تندمى بعد كدة وشدى حيلك مش تعبانة طول السنة ويجى واحد الله اعلم نيتو ايه يبوظ مستقبلك وربنا معاكى

روحى لشيخ يرقيكي رقية شرعية أو خلى حد من أهل بيتك يرقيكى ممكن يكون مش مرض نفسى إنما لبس من الشيطان هذا والله اعلم ويا رب يفك عنك

ما يمكن مضغوط فى الشغل ومش لاقى وقت خالص وبعدين ممكن تتكلمى معاه بصراحة وتحكيلو عن اللى انتى كاتباه ومش تتعاملى معاه ببرود ممكن هوا فعلا مضغوط وعاوزك جنوبو والله اعلم بردو

دى فعلا حقيقة لا وهتحسى كمان أن صحابك مش مهتمين بيكى أو فى صحاب اصلا نسيوكى نصيحة منى فرقى بين الرفيق والصديق الرفيق إلى. معاكى فى الدرس مثلا كدة أما الصديق إلى. بجد معاكى فى كل حياتك يسأل عنك لما تغيبى وكدة

انتى مش عندك حاجه دى بس الناس إلى. مش عدت تنطاق😂

اه صح مش تشدى جامد فى الاول هتهنجى فى الأخر شدى بس اللى هوا ايه على القد كدة

يعنى بصراحة مش عارف اقلك ايه انتى بنت مجتهدة ومحترمة وتستاهلى كل خير أنا على فكرة كنت داخل متحمس وكدة حتى طلعت الأول على المعهد وكنت فعلا بذاكر بجد

الشكر لله

اه صح لما تتعاملى مع الناس خليكى على طبيعتك لأن اللى بيحب حد بيحبو بعيوبه وبمميزاته. 🤍🤍

الشكر لله والله يا اختى ما حد يستاهل دمعه تنزل منك عليه غير ربنا فأنتى طنشى وانا اسف لانى مش عارف انصحك أو اقدم ليكى حاجه غير كده يا رب يهدى اهلك ويا رب تطلعى من الأوائل فى تالته إعدادى

خلاص يا اختى خليكى انتى المحفزه لنفسك وبدال هما مش مقدرين قيمتك فأنتى عامليهم حلو برضو وانا عارف انها بتبقى صعبة لما تيجى من اقرب الناس بس ده قدرك ويمكن ده اختبار ليكى جربى لو مش كنتى مثلا بتصلى انتظمى فى الصلاة وارجعى إلى الله وادعى الله اكتير وبصى خليكى انتى اللى بتشجعى نفسك لما حد يحبطك أو يقلك كلام يوجعك طنشى وشجعى نفسك ومش تخافى من تالته إعدادى بس انتى سد على نفسك وإن شاء الله هتعدى وانتى شكلك بنت طيبة وقلبك ابيض فبلاش بالله عليكى موضوع العايط ده .

اللهم آمين

انتى فى سنه كام وانا هقتىح عليكى مدرسين اونلاين شرحهم جميل .

الشكر لله

الشكر لله وحده ويا رب يرزقك بزوج صالح يحفظك ويصونك ويراعى ربنا فيكى

بصى يا اخت لو انتى شايفه نفسك لو كملت معاه هتنضرى جامد لا سبيه من دلوقتي اصل الجواز ده مش سنة ولا اتنين لا فأنتى اضمنى نفسك من دلوقتي وقولى لأهلك ومش تخافى هتخافى من ايه اصلا دا لما ابوكى يكون موجود بيهددك فمبالك لما يعنى ربنا يطول فى عمر بباكى بس يعنى لو بباكى مات انتى متخيله كمية الآزى اللى هتشوفيه

من الآخر لو العلاقه دى حرام فواجب انك تنهيها أو لو حلال فلازم تسأليه وتتأكدى منو ولو قلك زى ما انتى بتقولى يبقا انتى اللى متشتته أو عندك وسواس فلازم تهدى كده ولا ايه

حاولى تتعامل معاه بذكاء ومش تشدى معاه كتير يعنى لو الموضوع ينفع تعديه عديه ولو مش ينفع تعديه فقوليلو بس بذكاء ولو هوا عصبى فخديه على قد عصبيتو فاهمانى طبعا

دى يا باشا ديدان فى المعده ولا م تروح تحلل وهتتأكد من كلامى

مش مهم دايت ولا حاجه المهم انك تحافظ فى الاكل ومثلا لو كنتى بتتعشى فتبطلى عشا ولو يعنى جعتى ممكن تاكلى سلطه وبردو حاولى مش تزودى فى الغذى وان شاء الله هتخسى وهتبقى زى الفل والعسل كمان