السلام عليكم، أنا عارفة إن النشأة في ظروف معينة والآثار اللي نتجت عن أسلوب التربية وآثار التعرض للتنمر كلها أكيد هتحتاج وقت عشان تتغلب عليها وطبيعي إنك تحس بكل ده بعد اللي تعرضت له. إن شاء الله الخبراء يجاوبوك بإجابات أكثر تخصصًا، أنا بس عاوزة ألفت انتباهك لنقطة محددة. الناس اللي بتخاف من نظراتهم وبتتأثر بكلامهم، مين هم أصلًا عشان تعمل لهم اعتبار؟ حتى لو أهلك... ملهمش الحق إنهم ينتقصوا منك أو يقللوا من أي مجهود أو شيء بتعمله عشان تتطور نفسك وتكون بأفضل حال ممكنة. حقيقي، اسأل نفسك، ليه تعمل للناس مهما كانوا اعتبار وتخاف منهم ومن رأيهم فيك وكمان تحدد مسارك في الحياة على أساس تقييمهم أو سخريتهم أو أيًا كانت ردود أفعالهم. خليك فاكر حاجة واحدة، كلنا بشر. الناس اللي واضعهم في مكانة عالية ومخليهم مرايتك دول مجرد بشر، وأنت بشر ومفيش فرق بيننا غير بالتقوى والعمل الصالح. ** جرب تطلع فوق برج عالي قوي وبص للناس من فوق، هتلاقينا زي النمل حرفيًا.. يعني لو خرجت برا الكرة الأرضية فاحنا ذرات بالنسبة لكون ربنا. ** فكر فيها كده، الناس اللي بتخاف من نظراتهم وكلامهم، مجرد ذرات أمام ربنا. فمش دول اللي أخاف منهم وأعمل لهم اعتبار، أنت محتاج تشتغل على ثقتك بنفسك وتخليها هي رقم واحد وهي مرايتك بس، محتاج تعمل اللي انت عاوز تعمله من غير ما تهتم لرأي حد منهم مهما كانت درجة قربه. طالما مش بتعمل حاجة حرام أو تغضب ربنا يبقى طظ في أي شخص يعترض أو يسخر أو ينتقص. *** أرجو إنك تلاقي في فدني الدعم ونصائح الخبراء اللي تساعدك تحل مشكلتك نهائيًا وتلاقي طريقك لأنك أكيد تستحق الأفضل. ربنا معك.
العفو، بص هو خلاص اللي حصل حصل ومش هيفيد التحسر عليه، لا نلوم نفسنا على رضوخنا لقرارهم أو نلومهم على اختيارهم لنا أو كلامهم دلوقتي على اختيارهم ده... خليك في الواقع، إيه المفروض تعمله دلوقتي... هل قدرت تتأقلم مع كليتك؟ هل هي فعلا زي ما هم بيقولوا ولا أنت ممكن تنجز منها حاجة كبيرة.. برأيي أولا إن كل الكليات مهمة ومفيش حاجة قليلة أو تافهة، كلها مطلوبة بصورة أو أخرى ودورك تلاقي طريقك وإزاي تستفيد من دراستك عشان تبني وظيفة ومستقبل تستحقه، ثانيًا، حتى لو الكلية أنت مش متقبلها أو مش لاقي نفسك ممكن تشتغل أو تبدع منها فدلوقتي الإنترنت عليه كل شيء وتقدر تتعلم أي مجال أنت شايف نفسك فيه وتبدع فيه وتتفوق... وحاليًا فيه ناس شغالة وناجحة في مجالات كتير هم مكنتش دراستهم الجامعية... فأنت كل المطلوب منك، تشتغل على نفسك وارمي أي رأي أو كلام ورا ظهرك عشان تقدر توصل... أعتقد إجابة كوتش ياسمين فيها نصائح مفيدة جدًا فدرب نفسك واستعن بالله ولا تيأس وإن شاء الله توصل. بالتوفيق.
تم النشر الأربعاء، ٣٠ أبريل ٢٠٢٥
تسلمي والله يادكتور علي كلام حضرتك الفكرة كمان اني مكنتش عاوز ادخل الكلية اللي هما اختاروهالي انا اخترت كلية كنت مرتاح ليها نفسيا ومهيأ ليها نفسيا جدا فضلوا يحتقروها ويقللوا من شأني فيها زي هي صعبة ومش حلوة ويعقدوني بصراحة ودلوقتي جايين يقولولي ان كليتي دلوقتي اللي هما اختاروهالي مش لازمة و.. و... ف دي غلطة لن تغفر لهم
تم النشر الأربعاء، ٣٠ أبريل ٢٠٢٥
لعرض الإجابة في فدني اضغط هنا