السلام عليكم ورحمة الله
انا شاب عندي 23سنة بعاني من الاتي
زمان وانا صغير كنت بعاني من التنمر من كل حد قريب مني وحاولت الانتحار لكن خفت اعمل خطوة زي دي اتربيت علي 3حجات
الخوف
عدم الثقة
القلق
احتقار الذات بأبشع وصف ليه
بعيط كل يوم وعاوز أموت والله العظيم نفسي اموت
ولما كبرت لسة كانت المشكلة موجودة
معرفتش اختار حاجه في حياتي كل حاجه كانت بالاجبار
تعرضت للرفض كتير من وانا صغير
ـــــــــــــــــــــــــــــــــــــــــــــــــــــــــــــ،،،،،
مابعرفش اشتغل او مش عارف اشتغل او خايف اشتغل انت معرفش ايه الاحساس اللي مسيطر حاليا بس ربنا مايوريكم نظرة المجتمع. ليا ازاي بجد لكن اللي بيعاير واللي بيتريق واللي بيبص نظرة ربنا مايوريها لحد واللي....... في كل مرة بكدب عشان اسكت صوت جوايا الكلام اللي بيتقالي قاتل ومميت وانا بقول الحمد لله وبقول كمان اكيد ربنا هيكرمني
كلام وحش اوى اوى والله بسمعه بقيت خايف اوري وشي للناس ولحد قرايبي وبقيت مكسوف ومخذول قدام نفسي وبعيط كل يوم
ناهيكم عن الناس اللي كل مابتشوفني وتحس ان حياتهم بقت عايشين في الجنة تريقة ومقارنة و.....
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
قلت اخد خطوة وابدأ احضر دراسات عليا واعوض اي حاجة لقيت ناس بتقولي شهادتك ملهاش لازمة مع إنها مؤهل عالي جيد جداً وشوف حاجة تنفعك ده مش وقت شهادات او تعليم كلام صعب عليا والله جدا وجارح
وانا بقول 3حاجات
حاضر
إن شاء الله ربنا هيجبر بخاطري
الحمد لله
يارب استرني فوق الارض وتحت الارض ويوم العرض عليك
اللهم احسن ختامي
السلام عليكم ورحمه الله وبركاته. ترببنا على حاجات كانت صعبه وتقيله آه ده حاجه مؤذيه نفسيا آه، ربنا يكون في عونك على كل المشاعر السيئه اللي انت بقيت متشبع بها على كل الكلام المحبط اللي انت بقيت متشبع بيه على كل الافكار اللي كانت طالعه حلوه وللاسف في حد سواها بالارض يعني ربنا يكون في عونك واحساسها صعب ووحش وتقيل، بس تعالى كده نسال نفسنا واحنا تشبعنا ليه؟ تشبعنا بالكلام هل عشان الكلام بيتقال كتير ولا عشان ممكن سبب ثاني؟ طب انا هقول لك مثال بسيط لو انا جبت حجر. من اي ماده بقى من الاسمنت من الطوب الحراري ايا كان؟ جبت جنبه سفنجة وبدأت أدلق ميه. وهنضيفه او ميه مش نظيفه يمكن ايه اللي هيحصل ساعتها هيحصل ايه للحجر ميه هتنزل فوق الحجر هتاخذ طريقها وتنزل على الارض الحجر هيفضل زي ما هو السفنجه يحصل فيها ايه السفنجه هتبدأ تشرب الميه هتاخد جزء والجزء الثاني هينزل، على قد ما السفنجه مليانه على قد ما هي مش هتقدر تاخذ اكتر ممكن صح مهما فضلت في ميه تاني لو هي خلاص اتملت على الاخر مش هتقدر تاخذ اكثر من كده. طب لو جيت عصاره السفنجه هتنزل ايه السفنجه هتنزل نوعيه الميه اللي اتحطت فيها وده اللي بيحصل معنا في كل الحاجات اللي بتتقال لنا طب السؤال هو ليه احنا بقى سفنجه ومش حجر وده السؤال اللي لازم انت تساله لنفسك انا ليه طول الوقت ده بتعامل على اني اسفنجه وعمال امتص امتص امتص ليه انا مش بصد زي الحجر ليه انا مش مش بخلي الميه تنزل من عليا على طول ومبمتصهاش اصلا انا ليه بعمل كده. المرحله الثانيه هتبقى مرحله الاستبدال ايه مرحله الاستبدال انا حاطط الناس اللي حواليا اللي هما بياثروا علي حاطتهم في مكان مهمه في حياتي لذلك بعرض عليهم افكاري لما بحب أعمل حاجه بروح ابلغهم باخد رأيهم انا لازم اعمل استبدال للشخصيات دي للاسف حتى لو كانوا الاهل فانا ضروري جدا ابدا اعمل لهم استبدال وارفض اني اصلا أسمع منهم فأنا كل الامور اللي انا هرتب لها انا مش هبلغهم بها هم هيشوفوني بس وانا بعملها وانا بنفذها الخطوات اللي انا باخدها انا مش حابب اني اخد رايهم فيها وهبدأ استبدلهم بأشخاص يكونوا اكثر درايه بالحاجه اللي انا عايزه اعملها دي وهكون عندي ثقه في رأيهم وفي شخصهم انهم يفهموا في الامر اللي انا عايز اتجه ليه ده وهاخذ بالرأي وهتحرك وانا كده هكون ببدأ ادخل مايه نظيفه والمايه نضيفه دي لو دخلت مش هتاذيني خالص لا ده انا حابب ان انا اشرب منها بس حتى لو شربت منها انا مش هابقى بغرق نفسي انا باخذ القدر اللي انا محتاجه بالضبط أتمنى اكون انبسطت لك الموضوع حاولت اساعدك ولو بخطوات بسيطه. ولو في اي حاجه تاني حابب تسال انا ان شاء الله اقدر افيدك على قد خبرتي إن شاء الله.
تم النشر الأربعاء، ٣٠ أبريل ٢٠٢٥
السلام عليكم، أنا عارفة إن النشأة في ظروف معينة والآثار اللي نتجت عن أسلوب التربية وآثار التعرض للتنمر كلها أكيد هتحتاج وقت عشان تتغلب عليها وطبيعي إنك تحس بكل ده بعد اللي تعرضت له. إن شاء الله الخبراء يجاوبوك بإجابات أكثر تخصصًا، أنا بس عاوزة ألفت انتباهك لنقطة محددة. الناس اللي بتخاف من نظراتهم وبتتأثر بكلامهم، مين هم أصلًا عشان تعمل لهم اعتبار؟ حتى لو أهلك... ملهمش الحق إنهم ينتقصوا منك أو يقللوا من أي مجهود أو شيء بتعمله عشان تتطور نفسك وتكون بأفضل حال ممكنة. حقيقي، اسأل نفسك، ليه تعمل للناس مهما كانوا اعتبار وتخاف منهم ومن رأيهم فيك وكمان تحدد مسارك في الحياة على أساس تقييمهم أو سخريتهم أو أيًا كانت ردود أفعالهم. خليك فاكر حاجة واحدة، كلنا بشر. الناس اللي واضعهم في مكانة عالية ومخليهم مرايتك دول مجرد بشر، وأنت بشر ومفيش فرق بيننا غير بالتقوى والعمل الصالح. ** جرب تطلع فوق برج عالي قوي وبص للناس من فوق، هتلاقينا زي النمل حرفيًا.. يعني لو خرجت برا الكرة الأرضية فاحنا ذرات بالنسبة لكون ربنا. ** فكر فيها كده، الناس اللي بتخاف من نظراتهم وكلامهم، مجرد ذرات أمام ربنا. فمش دول اللي أخاف منهم وأعمل لهم اعتبار، أنت محتاج تشتغل على ثقتك بنفسك وتخليها هي رقم واحد وهي مرايتك بس، محتاج تعمل اللي انت عاوز تعمله من غير ما تهتم لرأي حد منهم مهما كانت درجة قربه. طالما مش بتعمل حاجة حرام أو تغضب ربنا يبقى طظ في أي شخص يعترض أو يسخر أو ينتقص. *** أرجو إنك تلاقي في فدني الدعم ونصائح الخبراء اللي تساعدك تحل مشكلتك نهائيًا وتلاقي طريقك لأنك أكيد تستحق الأفضل. ربنا معك.
تم النشر الأربعاء، ٣٠ أبريل ٢٠٢٥
بص تعال نتفق أن الناس بتقول كلام سئ علشان تحبطك هما شايفين أن انت كويس فبيحاولوا يوجعوك وانت لو استسلمت لهم يبقى خساره بجد فحاول وانجح وقدم على دراسه عالية لان كتر ما هتسمع كلامهم انت مش هتستفاد ولا واحد% في حياتك كلام الناس ولا اي شيء ولا يلزمك في اي شيء الكلام دخله من اليمين طلعه من الشمال موضوع الثقه اقيف قدام مرايتك كده وقول انا قوي انا شجاع انا استحق الافضل انا افضل من اي حد انا قادر ان انا اكون احسن منهم هم شايفين ان انا كويس غيرانين مني علشان انا احسن منهم استمر وما توقفش ابدا تقرب من الله عز وجل وان شاء الله ان شاء الله هتكون احسن من اي حد وما تياسش حب نفسك نفسك هتحبك وهتبقى افضل وثقتك كبيره جدا ما تتوترش ابدا على اي موقف او على اي حاجه ما تركزش مع كلام الناس وركز مع نفسك هتكون الافضل دائما وابدا باذن الله وعلى قلبك السلام
تم النشر الأربعاء، ٣٠ أبريل ٢٠٢٥
يا أخي الكلام يطول ولكن باختصار انا من قرائتي ملاحظ ان عندك قابلية للتحسن ... لأنك واعي باللي بيحصل معاك وصادق مع نفسك .. في غيرك مش بيعترف بالمشكلة وبييقعد يقول ظلموني وهم السبب مبيقولش ابدا انا عندي خوف أو قلة ثقة لا طول الوقت الناس ظلموني فباختصار الحل هو انك تواجه نفسك وتصارحها بكووووووووول الاتهامات اللي ضدها ... اقعد مع نفسك واسمع أفكارك واجع كل الناس اللي في ذكرياتك واجع عائلتك وزملاءك القدامى وكل البشر اسمع شتايمهم وزعيقهم بكل ثبات وهدوء وابتسم لأن الحقيقة ان الصورة البشعة دي مش انت ... قل لي ايه الذنب العظيم اللي انت ارتكبته من ساعة ما ولدت .. مفيش .. اذن ده انعكاس لمشاعرهم الصعوبات ممكن تتراجع من خوفك من المواجهة لأنك حاسس انك بشع وغير آدمي فخايف تواجه الحقيقة الفوائد هتشوف الحياة بنظرة أفضل والعالم والناس اللي كنت بتخاف منهم وبينتقدوك هتشوفهم مجرد بشر متعصبين هتلاقي الدنيا كلها عندهم نفس مشاكلك وهتهدأ نفسية ولو شوية الطريقة كل يوم ١٠ دقائق تسمع الأصوات اللي بتحرقك يوميا خليها تتكلم واسمع بدون حكم وهتلاقيها مبالغة اصبر ومتتوقعش النتيجة من البداية الموضوع ده اسلوب حياة ورحلة عمر متطلبش النتيجة على طول فنفسك أرهقت سنين ومذاقتش طعم القبول والحب والدفء فطبيعي النتائج تتأخر الله موجود تذلل لله يكفيك عن حب الخلق أو التذلل لهم
تم النشر الأربعاء، ٣٠ أبريل ٢٠٢٥
وعليكم السلام ورحمة الله وبركاته، أخي العزيز، أشعر بمعاناتك وأتفهم مدى الصعوبات التي تواجهها. التنمر والرفض يمكن أن يكون لهما تأثير عميق على النفس، خصوصاً في مراحل الشباب. أريد أن أشجعك على التحدث مع شخص موثوق أو متخصص في الصحة النفسية قد يساعدك في معالجة هذه المشاعر والأفكار السلبية. ما تعاني منه ليس سهلاً، ويجب أن تعلم أنك لست وحدك. تذكر أن الخوف والقلق هما جزء من التجربة الإنسانية، لكن هناك طرق للتغلب عليهما. حاول التركيز على الجوانب الإيجابية في حياتك، حتى إن كانت صغيرة. كن متفتحًا لتعلم أشياء جديدة، واطلب الدعم من الأصدقاء الموثوقين أو أفراد العائلة. من المهم جداً أن تعطي نفسك الفرصة لاستكشاف خيارات جديدة والعمل على تطوير مهاراتك. الاستمرار بالتعلم يمكن أن يساعدك في بناء الثقة بنفسك. وبخصوص ما سمعته عن شهادة تعليمك، عليك أن تذكر لنفسك أن كل شخص له رحلة فريدة، وما يهم هو أن تواصل السعي لتحقيق أهدافك. حاول أن تبدأ بخطوات بسيطة ولا تثقل على نفسك بتحميلها المزيد من الضغوط. ربما يمكنك استشارة محترف لمساعدتك في وضع خطة لمستقبلك الأكاديمي والعملي. تذكر، الله سبحانه وتعالى معك، وادعُه دائماً ليجبر بخاطرك ويوفقك في جميع أمورك. تمنياتي لك بالتوفيق والسلام الداخلي.
تم النشر الأربعاء، ٣٠ أبريل ٢٠٢٥
لعرض السؤال في فدني اضغط هنا