السلام عليكم، بصي أنا عارفة الموضوع أكيد صعب بس انتي محتاجة تبرمجي عقلك على التجاهل التام وإنك تكوني مرنة... لأن دي مش أول المشاكل اللي ممكن تواجهيها في حياتك ولا الموقف المعقد الوحيد اللي ممكن يقف قصادك مستقبلا... طول ما احنا عايشين بنواجه وممكن تقابلنا أزمات... هتدخلي كلية وهتتخرجي وتشتغلي هتواجهي ناس ومشاكل فلازم تتعلمي ازاي تذاكري وتشتغلي رغم الأزمات. أكيد هتحتاجي تبذلي جهد بالأول لحد ما تبقى عادة عندك إنك تركزي في المطلوب منك حتى لو الدنيا بتولع حولك... طالما هم مش بيبذلوا معك جهد أو يوفروا لك الجو اللازم لدراستك فاقعدي مع نفسك وفهميها إنك وهي وحدكم في الطريق ده وإن العزلة هي الحل الوحيد دلوقتي. اتكلمي معهم مرة أخيرة وفهميهم إن اللي بيحصل بيأثر عليك وإنهم لو استمروا بنفس الطريقة ميحاسبوكيش على النتيجة بعد كده... بعدها اقعدي مع نفسك وهاتي ورقة وقلم وفرغي كل الأفكار السلبية والمخاوف من عقلك عشان الفوضى اللي جوا دماغك تهدى وتعرفي تشوفي الوضع كويس وتلاقي المخرج. حاولي بس متضغطيش على نفسك من ناحية النتيجة والتوقعات ولا إن الثانوية هتحدد مصيرك ولا الكلام ده كله... ده هيؤثر عليكِ بالسلب.. ركزي دلوقتي تعملي اللي عليكِ حتى لو العالم بيضرب يقلب من حولك... الثانوية آخر حاجة محتاجاها هي القلق والضغط النفسي فاهدي كده خالص... وخليكِ أنانية دلوقتي وكل تركيزك على نفسك وملكيش دعوة بمشاكل أهلك ولا تصرفاتهم. مع المذاكرة طبعا ركزي على الصلاة والدعاء يوميا وألحي على ربنا بالدعاء... لو انتي مسلمة اقرئي سورة البقرة كل يوم حتى لو هتقسميها على ٣ أيام، هتفرق كتير معك وربنا هيزيد البركة في يومك ويوفقك إن شاء الله.
شكراً لكلامك بجد ❤️
تم النشر الثلاثاء، ٣١ مارس ٢٠٢٦
لعرض الإجابة في فدني اضغط هنا