هون على نفسك.. محتاج تصبر لأن انت مبتلى لكن الابتلاء معناه إن ربنا لسه بيشتغل في حياتك، لسه بيشكّلك، لسه بيحضّرك لحاجة أكبر من اللي شايفها دلوقتي، وصدقني ربنا ما كانش غافل عن خطوة واحدة مشيتها ولا دمعة نزلت منك، ولا كان ساكت عن وجعك، بس ربنا سبحانه مش دايمًا بيخلّصنا بالطريقة اللي إحنا عايزينها، هو بيخلّصنا بالطريقة اللي تنجّينا بجد، إنت شفت أبواب كتير بتقفل عشان هي مش فيها اي خير ليك، بس ما شوفتش لسه الباب اللي ربنا مخبيه، واللي لو فتحهلك هتعرف إن كل اللي فات كان تمهيد مش إهانة﴿وَعَسَىٰ أَن تَكۡرَهُواْ شَيۡٔٗا وَهُوَ خَيۡرٞ لَّكُمۡ﴾، وربنا ما قالش إن الطريق هيبقى سهل، بس قال إن الوصول مضمون للي متمسّك بيه، ﴿إِنَّ ٱللَّهَ مَعَ ٱلصَّٰبِرِينَ﴾، ويعني مش سايبك لوحدك، يعني شايلك حتى وانت حاسس إنك واقع، يمكن أكتر حاجة تعبتك إنك حاسس إنك عبء، بس الحقيقة إن ربنا عمره ما خلق حد عبء، ربنا خلقك لرسالة حتى لو مش فاهمها دلوقتي، ، دايما خلي ف دماغك آيه ﴿فَإِنَّ مَعَ ٱلۡعُسۡرِ يُسۡرًا إِنَّ مَعَ ٱلۡعُسۡرِ يُسۡرٗا﴾، وكررها علشان تطمّن، علشان تفهم إن العسر ما بيجيش لوحده، دايمًا معاه يسر حتى لو مستخبي، إنت مش مُطالب تكون قوي طول الوقت، ربنا ما طلبش منك غير إنك ما تسيبش الباب، باب الدعاء، باب الرجوع، باب الأمل، ﴿قُلۡ يَٰعِبَادِيَ ٱلَّذِينَ أَسۡرَفُواْ عَلَىٰٓ أَنفُسِهِمۡ لَا تَقۡنَطُواْ مِن رَّحۡمَةِ ٱللَّهِ﴾، يعني حتى لو شايف نفسك قصّرت، القنوط ممنوع، لأن اللي ماسك أمرك مش بشر ولا ظروف ولا أوراق، اللي ماسك أمرك رب السما والأرض، والرزق مش بس فلوس، الرزق أمان، رزق فرصة، رزق ستر، رزق بداية جديدة، ﴿وَمَن يَتَّقِ ٱللَّهَ يَجۡعَل لَّهُۥ مَخۡرَجٗا وَيَرۡزُقۡهُ مِنۡ حَيۡثُ لَا يَحۡتَسِبُ﴾، من حيث لا يحتسب يعني من مكان عمرك ما فكرت فيه، وفي وقت كنت فاكره انتهى، إنت مطلوب منك دلوقتي حاجة واحدة بس: ما تقطعش الخيط اللي بينك وبين ربنا، حتى لو دعاءك جملة واحدة، حتى لو صلاة بتتسند فيها على تعبك، ربنا شايف صدقك، وبيهيّأ لك فرج على مقاس صبرك، وافتكر دايمًا إن ربنا ما بيكسرش حد علشان يضيّعه، ربنا يكسر علشان يبني منك شخصية قوية ويأخّر علشان يكرم، ويبتلي علشان يقرّب، يعني ولا حقك هيضيع، ولا دمعتك هتروح هدر، ولا وجعك كان بلا معنى، كمل، حتى لو خطوة بطيئة، كمل علشان اهلك ومش تيأس بالشكل دا، وعلشان نفسك، وعلشان اليوم اللي هتبص فيه ورا وتقول: الحمد لله إني ما استسلمتش. وكمان لازم تفهم إن التفكير في الانتحار أو الاستسلام للفكرة دي مش حل ولا مخرج، لأن اليأس نفسه ذنب، وربنا نهى عنه صراحةً، ﴿قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِ اللَّهِ﴾، يعني مهما وصلت لمرحلة سودا، مش ينفع تفكر في كدا لأن ربنا عمره ما قفل بابه في وش حد، وكمان ربنا قال بوضوح ﴿وَلَا تَقْتُلُوا أَنفُسَكُمْ إِنَّ اللَّهَ كَانَ بِكُمْ رَحِيمًا﴾، يعني ربنا وصف نفسه بالرحمة قبل أي حاجة، فإزاي تفكر تمشي من الدنيا وربنا لسه بيقولك أنا رحيم بيك، إنت مش ملك نفسك علشان تنهيها، إنت أمانة عند ربنا، ونفسك ليها قيمة حتى لو الناس ما شافتهاش، والوجع اللي إنت فيه ده مش علامة النهاية، ده علامة إنك لسه حي ولسه فيك نفس، وربنا ما بيحييش حد علشان يعذبه وبس، ربنا يحيي علشان يفرج ويعوّض ويجبر، ويمكن ربنا مأخر الفرج علشان لما ييجي ييجي كامل مش ناقص، فلو فضلت واقف ومكمّل، حتى وانت بتزحف، ده عبادة، وده صبر، وده جهاد حقيقي منك . ومن ناحية الدنيا والشغل، حاول تبص للحاجات اللي في إيدك دلوقتي مش اللي ناقصاك، أي شغل مؤقت حلال يمشي الحال مش عيب ولا يقلل منك، سواق على أي عربية حتى لو مش خاصة، توصيل طلبات، شغل مخازن، تحميل وتفريغ، أمن، عامل ورشة، صيانة بسيطة، أي حاجة تعتمد على الحركة والمجهود، ولو عندك موبايل وإنترنت دور على شغل أونلاين بسيط زي خدمة عملاء، إدخال بيانات، بيع بالعمولة، التسويق الإلكتروني، أو حتى تتعلم مهارة سريعة زي صيانة موبايلات، كهرباء، سباكة، تكييف، الحاجات دي دايمًا مطلوبة، ومش لازم تبدأ كبير، ابدأ بحاجة تمشي اليوم، وربنا يفتح بعدها، افتكر إن الرزق مش بييجي دفعة واحدة، الرزق درجات، وربنا قال ﴿وَقُلِ اعْمَلُوا فَسَيَرَى اللَّهُ عَمَلَكُمْ﴾، يعني المطلوب منك السعي، والنتيجة على ربنا، فقوم، وخد نفس، وما تسيبش الشيطان يقنعك إن الموت راحة، الراحة في الصبر، والنجاة في الاستمرار، وربنا أقرب لك من أي فكرة سودا بتجيلك، ولسه في العمر بقية، ولسه فيه دعاء هيستجاب، ولسه في باب مفتوح، حتى لو إنت مش شايفه دلوقتي. بس ربنا يوفقك ويقويك يعينك على الحمل دا☺️💗🌸
خيراً جزاك بمثلهِ أضعافاً مضاعفةً، يا رب يكون أفادك 🌸💗
تم النشر الاثنين، ١٢ يناير ٢٠٢٦
جزاك الله خير كلامك جميل جداا
تم النشر الاثنين، ١٢ يناير ٢٠٢٦
لعرض الإجابة في فدني اضغط هنا