انا حاسس ان انا مش عارف اعمل حاجه ومش عارف استغل الاجازه وانا مشترك في كورسات في برنامج ينفع وللاسف اني ما عنديش اللاب وكنت لسه هشتري لاب عشان ابدا اتعلم. بس في الاخر يعني في الاخر بعد كل ده بعدما اشتركت وقعدت اشوف الكورسات وسجلتها ومش عارف ايه؟ بعد بعد كل ده اكتشفت ان العيب فيه انا اصلا وان انا مش عارف اعمل ايه حاجه؟ يعني انا مش قاعد فوق الاجازه ولا عارف اعمل حاجه كل ما اخش حتى على الموارد البشريه اللي هو ازاي تنظم وقتك زد تتعامل مع التسامح بحس ان الحاجات دي ملهاش لازمه وتنظم وقتك يعني هنظم وقت اعمل فيه ايه مش فاهم انا مثلا عندي 24 ساعه هنام 8 هصلي في مثلا هاخد وقت عباده في اليوم اربع ساعات صلاة بقى وخمس فروض واذكار ومش عارف ايه كله كله على بعضه. وفي الاخر. وقلت برده بقيت اليوم. هكمل ان انا مثلا العب شويه ارفع عن نفسي وبعد كده تعلم جزء التعلم ده ما بعملهوش وبفضل قاعد على التليفون والوقت بيضيع هو بس الاربع ساعات يعني انا بقدر 12 ساعه من يومي في الهوا اربع ساعات صلاه ثمانيه نوم والباقي في الهوا ومش قادر اعمل ده ومشتت ومش عارف اعمل ايه اعمل ايه بقى؟
السلام عليكم، أنا شايفة إن فيه جلد ذات كتير وهو السبب في الإحباط وانعدام الرؤية للطريق. أنت بتسأل هنظم وقتي أعمل فيه إيه، وده معناه إنك مفيش أهداف واضحة عندك فمش شايف أهمية للوقت، أنت بتعمل حاجات كتير زي الصلاة والعبادات والنوم والنشاط على الموبايل أيا كان لكن كل ده عايم، مفيش مواعيد ثابتة تحكمك، طول ما اليوم مش متخطط له ولا متراقب وقتك بيروح في إيه هتلاقي اليوم بيعدي بسرعة ولا له لازمة وهتلاقيه يوم بيتكرر كل يوم وخلاص. ** كويس إنك اخترت كورسات وبدأت تدور على طريق تتعلم منه وعاوز تعالج مشكلة التشتت عندك وبتفكر تشتري لاب، كل دي خطوات كويسة لكن محتاجة توضع في إطار زمني وخطة مرنة ومنطقية. ** الصلوات كلها معتقدش تاخد ٤ ساعات حتى لو بتصلي بخشوع وبتصلي النوافل كمان. النوم، افهم الميكانيزم بتاعته عشان تنام كويس، ممكن علميا من ٤,٥ إلى ٧ ساعات ونصف... دورة النوم الكاملة بتستغرق ساعة ونصف لو الإنسان صحي بعد دورة كاملة بيصحى فايق، لو صحي قبل اكتمال الدورة هيقوم مش فايق وهيبقى نعسان طول الوقت حتى لو نايم ساعات كتيرة. ** اقعد مع نفسك وأنت لسه صاحي من النوم وفايق ومخلص صلاة وقرآن، مشروب ساخن، لو بتحب القهوة مثلا، اقعد في مكان هادئ وهات ورقة وقلم واكتب كل اللي عاوز تحققه وكل اللي عاوز تتعلمه (خاصة في الإجازة)، اعمل (brain dump) وفرغ كل أفكارك والفوضى اللي في دماغك عشان بعد كده ترتب كل ده وتضع أهداف وخطة منطقية تمشي عليها. ** في جلسة تانية هتجيب الورقة دي وترتب الاهداف اللي فيها حسب الأولوية، وفي الآخر تصفيهم لخمس أهداف وبعدين لتلاتة. كل هدف هتقسمه لأجزاء صغيرة وتضعها في إطار زمني. في المهام اليومية، مش هتقول هذاكر برمجة او اللغة الفلانية، لأ تبقى محدد هذاكر اول محاضرة من الكورس الفلاني أو الفصل كذا من اللغة. وهكذا. لما تبقى خطوات اليوم محددة بالأولوية والطاقة والوقت هتحس اليوم مثمر وكل يوم مختلف عن التاني. *** خطوة تانية مهمة جدا هتفيدك، راقب وقتك لأسبوع وسجل كل ساعة عملت فيها إيه، هتفهم بعدها يومك ماشي ازاي واستهلاكك للوقت والوقت المهدور قد إيه وهتحس بأهمية الوقت. وهتعرف تقلل الوقت المهدر بالانتظام على خطوات ثابتة حتى لو صغيرة. *** انصحك كمان تشوف على يوتيوب (نموذج عجلة الحياة المتوازنة) عشان يساعدك تحدد أهدافك وخطواتك بطريقة متوازنة ومن غير ما تعمل حمل تقيل على نفسك. ** طولت عليك بس أرجو اكون أفدتك، إذا عندك أي سؤال اكتب لي في التعليقات. بالتوفيق.🌺
تم النشر الأربعاء، ٢٤ يونيو ٢٠٢٦
أنا فاهمة تمامًا اللي بتمر بيه، الشعور بالتشتت والإحباط ده طبيعي لما الإنسان يكون عنده طموح وفي نفس الوقت مش قادر يبدأ أو يكمل. إدراكك إن "العيب فيك" ده خطوة مهمة، لأنه يعني إنك قادر تتحكم في الموضوع وتغيره بدل ما تلوم الظروف بس. خلينا نبدأ بخطوات عملية بسيطة تناسب وضعك دلوقتي. أول حاجة: متستناش اللاب توب عشان تبدأ. استخدم الموبايل مؤقتًا في مشاهدة الكورسات أو قراءة المحتوى، حتى لو مش مثالي. حدد هدف يومي صغير جدًا، زي "أشوف درس واحد بس كل يوم"، مش لازم تكمل الكورس كله مرة واحدة. ده هيخليك تحس بالإنجاز ويقلل التشتت. بالنسبة لتنظيم الوقت، متعقدش الأمر. قسم يومك لثلاث أجزاء رئيسية: وقت العبادة (الصلوات والأذكار)، وقت التعلم (حتى لو ساعة أو ساعتين)، ووقت الراحة أو اللعب. ابدأ بتخصيص ساعة واحدة ثابتة للتعلم بعد صلاة العصر مثلاً، وخلي الموبايل في وضع "لا تزعج" أثناءها. لو حسيت إن الوقت بيضيع، اكتب في ورقة أو مذكرة بسيطة: "النهاردة هعمل إيه بالظبط؟" ده هيساعدك تركز. تذكر إن التعلم نفسه عبادة لو نيتك خالصة، فمتحسش إن وقت العبادة بيضيع على حساب التعلم. جرب تبدأ النهاردة بخطوة صغيرة واحدة، ولو عايز أفكار إضافية ابحث عن أسئلة مشابهة على فدني عشان تشوف تجارب ناس تانية. أنت قادر تتغلب على التشتت ده خطوة بخطوة، وأنا هنا لو عايز تتابع.
تم النشر الاثنين، ٢٢ يونيو ٢٠٢٦
السلام عليكم ورحمة الله وبركاته 📍 أربـع ساعات صلاة!! أعتقد حتى لو بتصلي الـ خمس فروض في وقتها وقيام وسنن مش هتأخد أربع ساعات الله يثبتك اللهم آمين لو فعلًا بتأخد أربع ساعات عبادات! 1▪︎ أولًا أنت بتقول إنك مشترك في منصة ينفع ودي خطوة منظمة ومرتبة يعني محدد المنصة الـ هتتعلم منها 2▪︎ الخطوة الثانية أنت لأزم تحدد كورس معين من على المنصة وتبدأ الكورس هناك كتير جدًا لأزم تحدد تبدأ بـ إيه بالضبط وتستمر متنقلش على كورس تاني غير لو خلصت الأول. 3▪︎ جزئية تنظيم وترتيب الوقت ما هي الـ عوامل مساعدة لكن السر في التنفيذ لأزم أنت تبدأ وتنفذ يومك يبدأ بعد صلاة الفجر مباشرةً من غير فون ولو هتبدا بالفون أو الكورس المحدد يبقى تبدأ علطول من غير ما تتصفح أي قاعدة( اليوم الـ بيبدأ بتصفح يوم ضايع أصلًا من البداية ) حدد وجهتك ودا مش كلام مثالي لأزم تكتب الـ عليك كل يوم وتتابع التقدم هل أنت بتعمل الـ عليك 📍حاوط نفسك بناس ناجحة على الإنترنت أو أرض الواقع ناس تشاركك وتساعدك وتحفزك... لأزم تعرف إن الفون مش هيفيدك في حاجة ويكون عندك دافع أكبر تجاة أهدافك وتحدد أهدافك وتشتغل عليها وتتابع التقدم وتبعد عن أي حاجة بتسرق منك وقتك وجهودك أربع ساعات كل يوم بعد الفجر بعد 90 شوف هيحصل إيه؟ هتبني عادات كثيرة جديدة هتخلص على الأقل كورس كامل بالتطبيق ثبت ساعات شغلك على نفسك مارس هواياتك روح جيم
تم النشر الثلاثاء، ٢٣ يونيو ٢٠٢٦
اشتغل ف الاجازة مهم جدا لنفسيتك ولشخصيتك
تم النشر الاثنين، ٢٢ يونيو ٢٠٢٦
لعرض السؤال في فدني اضغط هنا