السلام عليكم، ربنا يعوضك خير ويقويكِ تتخطي اللي مريتِ به. هو الأكيد إن ربنا عدل... اللي ظلم هيتحاسب على ظلمه واللي اتظلم ربنا هيرد له حقه. الأب طبعا مسؤول أمام ربنا عن أولاده (كلكم راع وكلكم مسؤول عن رعيته) إذا الأب قصر في حق أولاده أو ظلمهم فربنا هيحاسبه على ده وإن شاء الله ربنا هيعوضك عن أي أذى مريتِ به. لكن متفضليش شاغلة بالك بالكيفية. مش مهم إزاي وامتى ربنا هيعوض... اللي عند ربنا مش بيضيع. ** المهم دلوقتي إنك متسمحيش للماضي إنه يفضل متحكم في حياتك إلى ما لانهاية. فيه وضع لقيتِ نفسك فيه، خلاص مش مهم اللي فات، المهم أخرج منه وميفضلش فوق كتافي مانعني أواصل تقدمي في الحياة. لازم تتابعي مع مختص يساعدك تتخلصي من التروما اللي عندك لو مش هتقدري على ده لوحدك. أنا عارفة موضوع الحرمان من شيء ما صعب وإنك بتدوري على تعويض للحرمان ده تحديدًا لكن افتكري إن ناس كتير جدا عاشت نفس الحرمان لظروف مختلفة وإن حياتنا كبشر لازم فيها نقص في جانب. هتلاقي غيرك محروم من حاجة هي عندك والعكس، فمتخليش دي مشكلة ترهقك نفسيًا وتزيد من الحواجز اللي بتمنعك عن الحياة اللي تستحقيها. وأعتقد إن دخول الجنة كاف يعوض عن أي حرمان في الدنيا، وساعتها مش هتفكري أصلا نوع العوض اللي كنتِ عاوزاه بالتحديد. فربنا يجعلنا وإياك من أهلها إن شاء الله.
لعرض الإجابة في فدني اضغط هنا