انا مخطوبة عن حب وبعد ما حارب الدنيا كلها علشانى وعمل المستحيل وخطبنى في اكتر وقت صعب في حياته وتمسك بي بكل الطرق من فترة عرفت أن ليه علاقه ببنت معاه في الشغل قالى هى كانت عندها ظروف وطلبت منى اساعدها لظروف خاصه بيها باباها متوفي ومش عندها اخوات وبعيد عن اهلها فكلمها ومن ضمن الكلام سألت عننا وعن علاقته بي قال إنه بيحبنى وحكالها كل حاجه عننا عن الصعوبات اللى مرينا بيها وعن اللى عمله علشاني وكل حاجه حرفيا وهي كانت دائما بتقوله ياريت يبقي في حد في حياتى زيك ويشيل عنى الحمل شوية وكلام من ده كذا مرة لقيت بينهم كلام عادى كنت بزعق معاه وبخانق معاه ويعملها بلوكات علشانى حصل الموضوع ده مرتين يعمل بلوك فترة وترجع تفضل تقوله عايزاك في مشكله يروح يفك البلوك
المهم مرة قطع خالص معاها وقالها انا مش هخون خطيبتى انا بحبها وعايزها وهى قالت تمام وبعد كام يوم فضلت تتحايل عليه يتكملوا كلام قالها ع أساس ايه قالته على أمل تسيبها أو تحبنى اعترفل ها صريحه أنه مستحيل يسيبنى ولا يتجوزها بس قالتله خلينى معاك للاخر لحد ما افوق على صدمة انك اتجوزت وهكذا لحد ما جه مرة والموضوع بينا كبر جدا وقولتله يا انا يا هي مفيش احنا الاتنين في حياتك وعملها بلوكات حقيقي المرة دى وبطل ينزل معاها شغل ومنع كل وسائل الاتصال هى بتحاول توصل لى أنه بيحبها أو عايزها مع انى سألتها هو وعدك بجواز قالت لا مكملين على أساس إيه قالت معرفش والمهم بعد هو عنها نهائي بس هى بتشككنى دايما أنه بيخونى وان لو خان مرة هيخون اكتر من مرة وان اللى يكدب عليا ويحب غيري أو يكلم غيري يبقى مش عايزنى مع أنه بذلك مجهود كبير علشان يراضينى آخر فترة لما عرفت أن بينهم كلام كتير وبذل كل المجهود علشان يخطبنى في وقت فعلا صعب اوى اوى بس انا بقيت شاكة طول الوقت فيه هو فعلا اللى يخون مرة يعملها تانى ومعني كده انى ممكن اعانى معاه فيما بعد مع العلم انا اصلا عندي مشكله في الثقة عموما وفي الامان وخوف كبير من فكرة الزواج وخايفه اندم فيما بعد انى مش سبته بعد اللى حصل وبرضو خايفه اوى اندم لو سبته وهو بيحبنى اوى كده
السلام عليكم - اللي فهمته من كلامك واللي حسيته انه بيحبك علشان هو بيبعد عن اي حاجة تزعلك بدليل انه كان بيتجنبها ومش بينزل معاها شغل والبلوك اللي عمله كذا مرة -وفي بعض الاحيان الرجالة بتتعامل ب عفوية وهو مش في دماغة حاجة ودا اللي حسيته من اللي حكتيه عنه لما ساعدها علشان والدها متوفي ف هو كدا بيتصرف بشهامة مش اكتر وللاسف البنت دي اللي جواها حاجة من ناحيته ولما هو صدها وقالها انه بيحبك ومش هيتجوز غيرك هي اتجهت ليكي انها تشكك فيه وللاسف شافت انك عندك مشكله في الثقة ف هي استغلت دا علشان تزود المشاكل والشك ما بينكم في يحصل مشاكل ف هي تظهرله تاني وتقوله بص اهي دي اللي انت حاربت علشانها وتحديت الظروف علشانها - ف الحل انك تتعاملي مع الموضوع ب ذكاء يعني لما تكلمك تاني خليكي واثقة في نفسك وصوتك يكون ثابت وتكون ابتسامة خفيفة علي وشك وتقوليلها انا واثقة فيه وفي علاقتنا ووفري مجهودك وريحي نفسك علشان الكلام دا مش هياكل معايا ودايما صديها في الكلام ومتديهاش فرصة اصلا - ثانيا اقعدي مع خطيبك وقوليله انك واثقة فيه وانك بتغيري عليه بس ف لو سمحت بلاش يكون فيه اختلاط بينك وبين اي بنت الا بحدود ممكن ؟ ولا انا مليش حق اني اغير عليك ؟ بس اهم حاجة بردو تتكلمي معاه بهدوء بدون انفعال واختاري وقت هو كمان يبقي رايق فيه - وانتي اهدي وحاولي تفكري بالعقل انتي اللي شايفة تعامله معاكي هل كويس ولا لاء بس خلي بالك هو لما هيشوفك دايما شاكة فيه ومش بتصدقيه هيزهق يمكن يعمل اللي هو مكنش بيعمله ف انتبهي للنقطة دي و صلي دايما استخارة لغاية حتي يوم الفرح وادعي ربنا كتير - ربنا يصلح حالك يا رب واسفة علي الاطالة
تم النشر السبت، ١٤ فبراير ٢٠٢٦
يا حبيبتي، أول حاجة أقولك إن مشاعرك دي طبيعية جداً، خاصة مع مشكلة الثقة اللي عندك أصلاً، والخوف من الزواج. أنتِ مش غلطانة إنك تشكي، بس خلينا نفكر مع بعض بهدوء. هل دي خيانة؟ مش خيانة جسدية أو وعد بجواز، لكنها تجاوز حدود. كلامه معاها كان كتير ومستمر، حتى لو ساعدها في ظروفها، وده يفتح باب الشك. هو اعترف بحبه ليكِ وقطع نهائي بعد ضغطك، وده إيجابي، بس اللي حصل مرة ممكن يتكرر لو مفيش حدود واضحة. إيه الحل العملي؟ كلميه صراحة مرة أخيرة: قوليله "أنا محتاجة ثقة كاملة، مفيش كلام مع بنات تاني خالص، وأي مشكلة في الشغل خلصها رسمي". شوفي رد فعله – لو بذل مجهود حقيقي زي ما عمل قبل كده، ده علامة جيدة. صلي الاستخارة: الله أعلم الغيب، صلي ركعتين واستشيري ربنا، هيوضحلك الطريق. بني ثقتك بنفسك: ابدئي بأهداف صغيرة يومية زي القراءة عن الثقة في الزواج، أو رياضة خفيفة تساعدك على السيطرة على الخوف. أنتِ قوية وقدرتِ تتغلبي على صعوبات قبل كده، هتقدري هنا كمان. لو عايزة استشارة أعمق، روحي للخبراء في https://www.fedni.net/experts، أو ابحثي أسئلة مشابهة في فدني هتلاقي إجابات كتير. ربنا يهدي قلبك ويختارلك الخير 💕
تم النشر السبت، ١٤ فبراير ٢٠٢٦
لعرض السؤال في فدني اضغط هنا