السلام عليكم، أنا متفهمة مشاعرك جدًا والأثر النفسي اللي حاساه بسبب تصرفات أهلك معك، بس خلينا نقول برضه إن احنا لما بنكون صغيرين ولما نبدأ ندخل في سن عاوزين يكون لنا فيه رأي خاص وعاوزين يكون لنا حريتنا ومساحتنا الشخصية بنحس إن كل حاجة الأهل بيقولوها تحكم خانق وإنهم عاوزين يمشونا على مزاجهم، في مرحلة ما لما نكبر وننضج ونكون في مكانهم ممكن قوي نعمل زيهم مع أولادنا أو حتى نفهم هم كانوا بيعملوا إيه بالضبط. الأهل أكيد تصرفاتهم بتكون نابعة من مسؤوليتهم ووجهة نظرهم للصح والغلط، يعني شايفين لبس معين مينفعش يتلبس، أصحاب معينين مينفعش تمشي معهم لأنهم مثلًا مش مناسبين أو مش كويسين أو عارفين عنهم حاجة مش مطمنين لها أو شايفين لهم تأثير سلبي على سلوك أولادهم ودراستهم، يشوفوا مثلا إن لازم تصاحبي فلانة عشان شايفينها كويسة وبتذاكر وهيكون تأثيرها كويس عليكِ. التصرفات الخانقة بتكون في الغالب نابعة من فهمهم هم للمسؤولية وبتتأثر طبعا بتربيتهم هم والنشأة اللي نشأوا عليها فممكن ميقدروش يوصلوا اهتمامهم ده وخوفهم بطريقة صح فيبان إنهم بيتحكموا ويخنقونا. وممكن قوي ده يترك أثر سلبي على النفسية زي ما بتقولي حصل معك. حتى كلام مامتك عن جسمك ممكن تكون فاكرة إنها كده بتقول لك بصي لنفسك واهتمي بجسمك عشان يتحسن وتلاقي فرص كويسة بعد كده للزواج، طبعًا مش صح أبدًا، لكن في الآخر ده فهمهم للتربية. **** طيب إيه العمل دلوقتي؟ اللي حصل حصل، هل هنفضل واقفين مكاننا نقول أصل تربية أهلي عملت فيا كدا؟ الحل إننا نخرج من دائرة (الضحية) ونبدأ نشتغل على نفسنا بحيث حتى لو مفيش دعم من اللي حوالينا نكون احنا اللي بنصنع حياتنا وسعادتنا. ممكن تشوفي الفيديو ده هيفيدك في النقطة دي https://www.youtube.com/watch?v=8xO-FS0IJKs&t=1205s&ab_channel=dr_AsmaaElkady بالنسبة للصلاة والصوم، جميل إنك مواظبة عليهم وربنا يثبتك على طاعته وحسن عبادته. واظبي عليهم لكن ضيفي حاجة مهمة جدًا... الخشوع والنية. العبادات لما بنعملها برتابة وآلية ومجرد حركات وجوع وعطش مش بيكون لها أثر في التغيير، لازم يكون القلب والروح جوا العبادة. الصلاة حاولي قدر الإمكان يكون فيها خشوع واستحضار لوقوفك بين يديّ الله، الصوم كمان جددي نيتك منه وابذلي جهدك تبعدي فيه عن أي معاصي أو سلوكيات تجرح الصوم. وهكذا مع كل عباداتك، خلي قلبك وروحك حاضرين عشان تشوفي الأثر بعد كده. ** استعيني بالله وثقي بنفسك وابدئي أنتِ التغيير عشان نفسك حتى لو كل العالم حولك مش مساعد. بالتوفيق إن شاء الله.
تمام، هو نفس الشيء بس بطريقة معكوسة... بعض الأهل تربيتهم مختلفة وأفكارهم مختلفة فشايفين لبس معين مش مناسب من وجهة نظرهم.. فيه أهالي مثلا منفتحين زيادة ولو بناتهم بس حبوا يغطوا شعرهم (مش حتى يلبسوا حجاب شرعي) بيعملوا مشكلة ويرفضوا... فالأهل عامة بيبقوا شايفين أفكارهم هي اللي صح وعاوزين أولادهم يكونوا زيهم.. وسواء ده صح ولا غلط فاحنا نتفهم النقطة دي وكمان نقيس أفكارهم على ميزان الشرع لو صح نوافقهم لو غلط وحرام نعمل اللي ربنا قال عليه ونحاول نفهمهم بهدوء... إن شاء الله حد من الخبراء الأسريين هنا يفيدك في نقطة التواصل مع الأهل وإزاي تتفاهمي معهم... ربنا يهديكم لبعض ويوفقك في حياتك.
تم النشر الخميس، ٥ يونيو ٢٠٢٥
بالنسبه للبس ماما بتلبس بنطلون وهي خارجه انا بلبس الخمار ولبس واسع
تم النشر الخميس، ٥ يونيو ٢٠٢٥
لعرض الإجابة في فدني اضغط هنا