السلام عليكم ورحمه الله وبركاته
انا طالبه ف تالته ثانوى كنت شاطرة ومتفوقه السنين اللى فاتت ويطلع من الاوائل دايما
من شهر سته اللى فات وانا عندى اكتئاب ونفسيتى تعبانه ومشتته وتايهه جدا وم عارفه انا كنت عايزه ادخل ايه وعائشه ليه اصلا ودخلت في الدوامه دى
دماغى م قادرة تستوعب حاجه بحضر ف السنتر بركز بصعوبه ومشتته دايما وبطلع م فاهمه ف كل المواد
جسمى دايما بيوجعونى عايزه افضل نايمه م قادرة اتعامل مع حد و24ساعه ع الموبايل
اتطفيت قوى وكل احلامي اتبخرت وشغفى وحبى للمذاكرة اختفوا مشكله انى لما بقعد ع الكتاب م عارفه استوعب والكلام م داخل دماغى بقعد اعيط
بجد م عارفه اعمل خايفه اخذل نفسى واهلى انا أملهم الوحيد بجد م عارفه اعمل ايه ولا ابدأ من فين
م عارفه هلحق ولا لا ولا أجل بس م قادرة اعيد السنه دى تانى بس خايفه مجبش مجموع وابقى ضيعت نفسى
ياريت لو حد يفيدني ابدأ ازاى واعمل ايه
وكمان بنزل درس Eسنتر وبيضيع ساعتين ف المواصلات هل اقعد كله اونلاين ولا ايه
ازبك يا جميله معلش اتأخرت في الرد. اول حاجة بطلبها منك انك تهدي وبراحة علي نفسك اولا عايزه افهمك حاجة تالته ثانوي مش نهاية العالم. هيا سنه مهمة جدا بس دي حاجة مش تخوفك بل بالعكس تحمسك وتحفزك عشان ده السيبل اللي هيخليكي توصلي لحلمك والكليه اللي تتمنيها. تالته ثانوي لو خدتيها علي اعصابك مش هتعرفي تذاكري وانا بقولك من اللي عشته. لازم تكوني هادية فيها عشان تعرفي تفتحي كتاب اصلا طب ازاي تكوني هادية بانك تتوكلي علي الله ايوه بالضبط انتي هتذاكري وتعملي اللي عليكي علي اقصي مرحله وفي نفس الوقت انتي متوكله علي الله في الدرجة والنتيجة طيب خلينا ندخل في الكلام العملي دلوقتي تعملي ايه الفتره الجايه؟ احنا اخر ٣ شهور ودول لا اخفيكي اهم ٣ شهور في السنه كلها انا هديكي الروتين اللي كنت بحاول علي قد ما اقدر امشي عليه والحمدلله نفع معايا اول حاجة هتصحي الفجر مذاكره الصبح فيها بركه غير طبيعيه هتصحي تصلي الفجر وتقولي الأذكار وتقرائي صفحتين مش اكتر من القرآن انتي كده جهزتي نفسك حرفيا معنويا. المذاكره بقا. الفتره دي هتحتاج منك مجهود شويه لانك عايزه تراجعي وتحلي كتير. احسن حاجة تعمليها انك تحطي جدول محترم بس مبكونش جدول تعجيزي. لا جدول واقعي بالله عليكي عشان انا كنت بحط جداول تعجيزيه ويجيلي احباط . ابدائي ذاكري من الفجر لغاية قبل الظهر. انتي كده حرفيا كأنك اخدتي يومين تلاته من الايام العاديه. بصي انا كنت بذاكر لحد ما اخلص للجدول اللي انا عملاه كنت بخلص مثلا علي الساعه ٧. وبعدها اخد راحة لحد ما انام وهكذا الايام كلها مش عايزاكي تحطي نفسك في دوامه انا خذلت اهلي دي. انتي لسه قدامك فرصه وكبيره كمان عشان تلحقي وتلمي اللي فاتك اهدي وشوفي تالته ثانوي كطريق هيوصلك لحلمك مش حيطة سد قدام احلامك وربنا بيقول انا عند حسن ظن عبدي بي فانتي احسني الظن في الله وطبعا في نفسك انتي لو مش شاطره وصعبان عليكي نفسك مكنتيش هتحسي بالندم اصلا. انتي لسه زي مانتي بس الضغط مخليكي كده الضغط ده قوه جواكي بس انتي بتسعمليها ضدك بدل ما تكون في صفك افتكري الفتره دي هيحصل حاجة من الأتنين ناس هتستلم وتقول مش قادره وناس هتقوم حتي وهيا تعبانه وده اللي هيفرقكوا عن بعض في النتيجة خليكي من النوع التاني قومي ذاكري وانتي تعبانه وحاسه انك معندكيش طاقه عشان في اللحظه اللي بتبدائي فيها بتقولي انا ليه كنت خايفه ما الدنيا سهله اهي. الضغط بيكبر الامور ويحسسك ان الدنيا مقفله بس الحقيقه لو قسمتي وبدأتي واحده واحده هتلاقي الدنيا ابسط ما تخيلتي. انا معاكي شوفي انتي حاسه بايه وعايزه تقولي ايه وانا موجوده وبالتوفيق يا قمر وان شاء الله نشوفك في احسن مكانه❤️
تم النشر الثلاثاء، ١٤ أبريل ٢٠٢٦
مافيش حاجه اسمها شغفى وحبي للمذاكرة اختفوا اللى عنده حلم هيجري وراه حرفيًا ثانيًا بما انك تالته ثانوى اكيد عارفه مستر محمد عبدالجواد قال كل لما تتعبوا روح بُص فى وش بابا وماما مش هيهونوا عليك ابدًا شكلهم وتعبهم وهما مستنين منك تفرحيهم ويحصل العكس علشان كلمة (شغفي اختفى) ولو مش علشان حلمك علشان اهلك اللى عايزين يفرحوا بنتيجتك وجزئية انك هتلحقى تخلصي ولا لا فا اقولك بشهادة كل الناس اه اه اه هتعرفي شهرين كفاية ابدأى مع المراجعه وشدى حيلك وكمان فى ميزة مستر محمد صلاح منحة ادخلى فيها لعل وعسي يكون ليك نصيب لقدر الله ملحقتيش كليتك ولكن ارجعى عن فكرة التأجيل علشان زى ما حصل السنه دى هيحصل السنه الجاية وبصراحه مش كويس خالص تكونى لسه فى تالته و دفعتك اولى جامعه و جزئية الاونلاين ولا سنتر انصحك بعد ما تهدى وترجعى ل ربنا وتشكيله همك و ترجعى عن قراراتك الخطأ دى وتنوي نية جديدة بنفسيه وراحه جديدة بدون تضيع وقت خدى كل دروسك اونلاين ولكن دا مع الشخص اللى هيعتمد على نفسه وهيكون جدع بجد مش شخص هيرجع لكلام شغفى ضاع والكلام اللى مش له فايده دا استعينى بربنا وابدأي من جديد وكل المدرسين فى الوقت دا بيشرحوا المنهج من جديد انت مش محتاجه غير نفسيه كويسه ونية جديده واستعينى بربنا وفوّضي امرك ل ربنا وتوكلي عليه وانت والله هتخلصي وتراجعى وتكونى متطمنه كمان
تم النشر الخميس، ١٦ أبريل ٢٠٢٦
لعرض السؤال في فدني اضغط هنا