انا كنت بحب واحد بقى لي اربع سنين تمام. وانا من كتر حبي ليه كنت ممكن بجد ما اتخلاش عنه ما سبوش في موقف ابقى جنبه في اي حاجه. مفيش وقت سبته فيه؟ وكنت دايما جنبه. بدات بعد كده المشاكل تحصل بيننا. ومشاكل كبيره. ولقيته بيتحول وقت الزعل وبيعمل لي معامله مش كويسه وكان بيخوني كتير وبيكلم عليا بنات كتير. بس انا كان من جوايا انا بحبه وحاسه ان انا حياتي هتتغير لما اكون معي لان انا عندي مشاكل مع اهلي وما بعرفش اطلع اللي جوايا مع حد الا لما بكون قريبه منه جدا. وجينا في يوم حصلت منه مشكله كبيره وبعدنا عن بعض. ودي المره الوحيده اللي تعرفت فيها على حد. وهو والشخص ده كانوا يعرفوا بعض. فالشخص ده لما اتعرف عليا. الشخص ده لما اتعرف عليا قال لي ان هو هيقابلني عشان نتعرف على بعض وفعلا اتكلمنا واتقابلنا وقت قليل بس اتكلمنا عن شخصيه بعض والحاجات كل واحد محتاجه في علاقته التاني وكده واتفقنا. وارتبطنا. قعدنا اربع ايام بنتكلم. وبعدها. ابتدى يظهر في حياتي تاني الشخص اللي عرفته من اربع سنين. فالشخص اللي انا كنت لسه متعرفه عليه اتضايق. وقال لي انه مش متاكد من مشاعره ناحيتي. يا ريت نفضل صحاب لحد ما يتعود عليا ويحس انه فعلا عايز يرتبط بيا وعشان ما يسبنيش في يوم من الايام. فانا يومها. مع انهم كانوا اربع ايام بس فضلت اعيط كتير قوي وحسيت اني اتكسرت من جوايا وزعلت. وفضلت افكر كتير. وبعدها بعد عني. وانا من ساعتها وانا مش عارفه انسى ومقضيه بقى لي ثلاث شهور ايامي كلها عياط وزعل مع اني رجعت للشخص اللي انا كنت عارفاه من اربع سنين بس حسيت ان حبي له قل وما بقتش عايزه اهتم بكلامه. ولا اهتم لبعده عني ولا اهتم لاي حاجه؟.
طب انا اقول لك ايه اللي مزعلك الحقيقه يعني اللي مزعلك انت زعلانه على نفسك؟
تم النشر الأربعاء، ١٧ أبريل ٢٠٢٤
انتي ولا حبيتي ده ولا ده ..! انتي بس عندك احتياجات بتحاولي تعوضيها علشان انتي محرومة منها من اهلك.. الشخص بتاع ال 4 سنيين انتي مذكرتيش فيه ميزة، انتي بس محتاجه تتكلمي معاه وتحسي ان فيه حد معين بيسمعك، علشان اهلك مش بيوفروا الجزء ده ليكي. مفيش حد هيحب حد وهو فيه كل الصفات اللي قولتيها. بيعاملك وحش، بيخونك .. وانتي مازالتي عادي ومكملة معاه .. رغم انك عارفه انه مش كويس. بس مكملة علشان تحسي ان فيه حد معاكي. الا اساسا مكنتيش سبتيه .. وعادي عرفتي واحد بعده .. وكانت الدنيا تمام، لحد ما الشخص التاني اختفى. بالنسبة للشخص التاني، انتي مزعلتيش عليه ولا حاجه، انتي زعلانه علشان حسيتي انك اتخذلتي للمرة التانية، وان رغم اللي بتقدميه مفيش ولا شخص قدم ليكي اي حاجه. ف انتي ولا حبيتي الاول ولا التاني. اللي تعمليه بقى وتكوني جدعة بجد لو عملتيه فعلا.. تعرفي قيمة نفسك كويس اوي، وتبطلي تضيعي وقتك ونفسيتك ف العلاقات دي .. اللي الوصف بتاعها (علاقات محرمة). علاقات غير شرعية لا ترضى الله، واكيد كمان مش هترضى اهلك. بلاش تستنزفي روحك اكتر من كده، واهتمي بنفسك وشوفي صحبة صالحة .. واتعلمي حاجات تفيدك .. افضل.
تم النشر الأربعاء، ١٧ أبريل ٢٠٢٤
ابعدي عن الاتنين خالص انتي دلوقتي متلخبطه الي قعدتي معاه 4 سنين مينفعش تقعدي معاه يوم تاني بدل كان بيخونك و بيكلم عليكي كتير و مشاعرك اتغيرت ف ابعدي و ادي نفسك وقت و ريحي. دماغك فيها و اهتمي ب حياتك و نفسك و ضيعي وقتك في اي حاجة
تم النشر الأربعاء، ١٧ أبريل ٢٠٢٤
هو اللي سابك ٤ سنين وقدر يعيش ويكمل حياته عادي رجع ليه دلوقتي؟ انتي عندك كام سنة؟ وقتك بتقضيه وتستغليه في ايه؟ انتي محتاجة تفهمي نفسك الاول وتحددي صفات الشخص اللي تقدري تقولي انه انسان مناسب للارتباط بيكي ويستحق مشاعرك ووقتك. الفكرة مش انك ترتبطي باي حد يدخل حياتك وتعلقي نفسك بيه. قبل ما تقدمي وقت واهتمام ومشاعر لحد، المفروض تشوفي الاول هو قادر يقدملك ايه؟ شخصيته عاملة ازاي؟ اخلاقه؟ هيعاملك حلو ولا لا، جد في ارتباطه بيكي ولا بيتسلى. اللي عرفتيه في ٤ ايام دا لحق يقدملك ايه عشان تقعدي ٣ شهور تعيطي عليه؟ هو مشي ونسي وكمل حياته واكيد اتعرف على بنات تانية.. واللي رجع بعد ٤ سنين رجع ليه؟ وهيعمل ايه عشان يثبتلك انه بيحبك وعايز يكمل حياته معاكي؟ انتي شايفة انه شخص مناسب ليكي؟ ولا بتملي فراغ وقتك ومشاعرك؟ انتي محتاجة تعالجي تعلقك السريع بالناس، وتحددي مين وامتى يستحق يدخل حياتك ومين لأ.
تم النشر الأربعاء، ١٧ أبريل ٢٠٢٤
لعرض السؤال في فدني اضغط هنا