السلام عليكم، متفهمة جدًا شعورك وصعوبة كل ده عليكِ وإن غصب عنك خاصة لما بتكوني لسه في سن صغير إنك تتأثري بالكلام السلبي خاصة لو من أقرب الناس لك. متقدريش تغيري الماضي طبعًا ولا تحذفيه كأنه محصلش لكن لازم تقفي مع نفسك وقفة حاليًا. ** دلوقتي أنتِ كبرتِ، مبقتيش الطفلة الصغيرة اللي سهل حد يتنمر عليها ويؤذيها نفسيًا. محتاجة تبصي لنفسك فعلًا وتعترفي إنك كبرتِ وقادرة تدافعي عن نفسك. عارفة الكلام سهل والتنفيذ صعب بس نفسك تستحق تجاهدي عشانها. ** ساعات الأذى من الغير مش عشان مشكلة مننا لكن منهم هم، ممكن غيرة، ممكن إحساس بالنقص داخل الشخص نفسه فبيخرجه على غيره، ممكن مشاكل نفسية بتخليه يؤذي اللي حوله. فأنتِ مش ملزمة تدفعي ثمن مشاكل الآخرين. أنتِ حللتِ مشاعرك ومشكلتكِ في الكلام المكتوب وباقي بس خطوات الحل. ** محتاجة تعترفي إن مفيش حد فينا كامل فعادي إنك تكوني مش كاملة، وطالما علاقتك بربنا كويسة فأي خلل ممكن يتصلح وبيدك توصلي للصورة اللي ترضيها لنفسك. مش عاجبك وزنك، غيري ده تدريجيًا، مش عشان الناس تقول عليكِ حلوة... عشان نفسك وبس. عشان أنتِ تستحقي تشوفي نفسك أفضل. أنتِ كبرتِ زي ما قلت، فبطلي تصدقي كلام الناس زي الأطفال الصغيرين... كلام الناس مش هو اللي يحدد أنا مين وموقعي في الحياة. ** دخلي أهداف صغيرة في حياتك وانسي الدنيا كلها واشتغلي بس على أهدافك كل يوم... خطوة خطوة، مع كل إنجاز صغير هتحسي بدفعة ثقة. كل ما تحسي إنك عايشة لنفسك وماشية في رحلة حياتك وعايشة فعلًا مش بس بتتنفسي عشان اليوم يعدي كل ما هتحسي إن حبك لنفسك بيزيد ورضاكِ عنها وكل ما هيقل تأثرك بأي كلام سلبي. خلي المراية اللي بتشوفي فيها نفسك هي عينيكِ أنتِ مش عيون الناس. ** الطريق صعب شوية بس زي ما قلتِ نفسك تستحق ده منك. ** انسي خالص الخطوبتين اللي فاتوا وانسي أي قرار غلط أخدتِه بسبب اللي مريتِ به... كل ده في الماضي وكان دروس وتعلمتِ منها. متدوريش على الحب برا قبل ما تلاقيه في نفسك عشان ده هيضرك ومش هتنبني عليه علاقة سوية وهتكوني دائمًا الطرف الخسران في العلاقات. ** أنصحكِ تبحثي على يوتيوب عن نموذج (عجلة الحياة المتوازنة) وتبدئي تصلحي جوانب حياتك خطوة خطوة وإن شاء الله توصلي لحياة سعيدة ومتوازنة هتخليكِ راضية عن نفسكِ. بالتوفيق إن شاء الله.
آمين يا رب، سعيدة إني قدرت أساعدك... بالتوفيق دائمًا.💚💚
تم النشر الاثنين، ٢٧ أكتوبر ٢٠٢٥
شكرا بجد كلامك فرق معايا كتير وان شاء الله هحاول اعمل اللي بتقوليه عليه وحاضر هبحث عل ي اليوتيوب ربنا يباركلك ويجبر خاطرك وربنا يهديهم ويصلح حالي وحالهم
تم النشر الاثنين، ٢٧ أكتوبر ٢٠٢٥
لعرض الإجابة في فدني اضغط هنا