أشعر أن حياتي واقفة حرفيًا والفشل يلاحقني في كل شيء، كيف أخرج من هذا الوضع؟

Question

انا بقالي فترة حياتي واقفة حرفيا كل ما أفكر في مشروع بيفشل وكل ما أقدم على شغل يقولولي لو فيه نصيب هنرد عليكي وطبعا مفيش رد مع اني اشتغلت فترة طويلة في مكان مهم وعندي خبرة محترمة وحالتي المادية بقت تحت المتواضعة ونفسيتي وحشة جدا بسبب الطريقة اللي مشيت فيها من مكان اديته سنين طويلة من عمري حاسة أن اليوم بيعيد نفسه مبقاش عندي شغف لحاجة والوحدة خلتني افكر كتير في افكار مؤذية ليا حاسة أن حتى أبسط الحاجات بتتعقد مجرد ما أفكر فيها مش عارفة أنقذ نفسي ازاي من الوضع ده وحاسة عمري بضيع على الفاضي لا قدرت أكون أسرة ولا قدرت أنجح في شغل ولا قدرت اكون فلوس اتسند عليها ومفيش حد قادرة احكيله عشان كل واحد فيه اللي مكافيه وخايفه اتقل عليهم باختصار مش عارفة ابدأ ازاي وقلة الفلوس مخلياني واقفة في مكاني وفقدت الشغف من كتر الرفض اللي اتعرضت له في حياتي سواء عاطفيا أو مهنيا وامي وحشاني اوي بقالي 20 سنة محرومة من حضنها انا عارفة أنها في مكان أفضل بإذن الله بس محتاجلها اوي الفترة دي

Accepted Answer

يابنتي انتي عليكي السعي والنتيجة علي ربنا وطالما المكان ده اترفضتي فيه سيبه وروحي غيره الشغل كتير والاماكن كتير بس اللي يدور ممكن تبدأي بشغل بسيط مثلا حياكة لو بتعرفي وبعدها اركبي السلم واحدة واحدة انتي وشغالة خياطة مثلا بعدها بفترة لا ترتحي في شغلك دوري علي كورسات كدا علي الانترنت انجليزي او كورسات برا اوفلاين واتعلمي البرمجة او غيره زي الجرافيك او الميديا ديزاين او التسويق وحاجات كتير هتلاقيها بس هتحتاجي لابتوب عشان تتعلمي وتتدربي علي الحاجات دي اتعلمي منها وبدأي ادربي عليها واشتغلي علي نفسك ومع الوقت هتشتغلي لما تكوني خلصتي وتعلمتي الكورسات دي هتلاقي شغل وانتي في البيت منها ومع شغل الحياكة شوفي وظيفه بعدها واتقدمي عليها لأنك بقيتي تمام انجلش هيقبلوا بيكي وبعدها ابدأي شغلك الخاص انتي واحدة واحدة هتيجي الموضوع ده ممكن ياخد منك سنة او سنتين علي حسب مقدرتك واستطاعتك عشان تكوني نفسك وخليكي مع ربنا وادعي واستغفري كتير وإن شاءالله يستجيب وهو دايما يستجيب انتي بس قولي انا بدأت ياربي فتقبل مني وسيبي بس انتي نفسك لي وصلي بانتظام وادعي في صلواتك كلها ومع قيام ليل ودعاء في الصلاة وخش وخشوع وده كله تضيع وتذلل وبعدها ربنا مش هيستجيب اطلاقا إن الله لا يرد عبده الذي دعاه تضرعا ورفع يداه أن يردهما صفرا خاليا فثقي فيه وزوري امك لانك لا تعلمي متي هتزريها الحقي نفسك وإن شاءالله خلال السنة او السنتين دول مع الاستمرارية والارادة والصلاة والدعاء والاستغفار هتكوني في مكانة علي بكتير وهتشوفي نفسك قبل ونفسك بعد هتكون في حته تانيه خالص والناس هتحترمك والشخص اللي كان مقلل منك هيطأ رأسه احتراما لكي وربما يشتغل عندك يوما ما لو تعملي شغلك الخاص خدي عهد علي نفسك وابدأي الحرب بالتوفيق ان شاءالله

Answer

بص يا اخي انت مش فاشل ولا حياتك واقفة زي ما انت فاكر انت بس شايل فوق طاقتك ومضغوط من كتر التفكير وده بيخلي اي حد يحس انه مش نافع وانه واقف في حياته رغم انه من جواه عنده قدرات وممكن يعمل احسن بكتير اول خطوة لازم تبطل تحاكم نفسك كل يوم وتفكك من فكرة انك لازم تنجح في كل حاجة مرة واحدة ربنا ما طلبش منك الكمال ربنا طلب منك السعي بس وانت واضح انك بتسعى وبتحاول وبتتألم وده في حد ذاته علامة ان لسه فيك خير ومش مستسلم الحاجات اللي عدت عليك سواء مواقف او خسارات او حتى فقد حد غالي دي مش معناها انك قليل ولا مش مهم بالعكس ربنا بيعدي عباده باختبارات علشان يطلع منهم احسن نسخة وعلشان يفوقوا لنفسهم ويعرفوا ان الطريق لسه طويل وممكن يتعدل في اي لحظة الفلوس مش معيار والوظيفة مش معيار والناس مش معيار اللي بينك وبين ربنا هو المعيار الحقيقي وده اللي هيفتحلك الابواب اللي انت فاكرها مقفولة انت محتاج تبدأ تهدي التفكير وتشتغل خطوة خطوة شوف حاجة واحدة بس عايز تصلحها وابدأ فيها وابعد عن جلد الذات وكره النفس لان ده اللي بيعطلك مش الظروف طول ما انت شايف نفسك قليل هتفضل واقف مكانك وطول ما انت شايف ان مفيش حد جنبك هتحس انك ضايع لكن الحقيقة ان ربنا معاك وبيشوفك وعمرك ما كنت لوحدك صدقني انت مش واقف في حياتك انت واقف نفسيا بس وده بيتحل لما تبدأ تهتم بنفسك شوية وتاخد خطوات بسيطة بس ثابتة وافتكر دايما ان ربنا ما بيضيعش حد لجأ له ولا حد قال يا رب وهو صادق

Answer

انا حاسه وعارفه انتي بتمري بإيه إحباط و اكتئاب و توتر و حيره و هم بس تعرفي حاجه ؟جربي تقربي من ربنا مش لازم بحاجات كبيره زي الصلاة والصوم ممكن بس تبدأي بالاستغفار كل ما تفتكري .. مجرد النيه انك عاوزه ترجعي لربنا دي لوحدها خطوه كبيره كمان عاوزاكي كل متحسي نفسك عاوزه تعيطي عيطي متكتميش جواكي مشاعر ده بردو هيريحك ... آخر حاجه حطي لنفسك طموح او هدف وحاولي توصليلو حتي لو موصلتلهوش دي مش نهاية العالم حاولي وجربي لحد متوصلي للحل اللي هيريحك وعلى فكره بالرغم من اني معرفش اسمك ولا شكلك ولكن انا متأكده انك هتقدري تطلعي من الحفره اللي انتي فيها وانا واثقه في انك مش هتضعفي قدام مشاعرك🙂‍↕️🫂

أشعر أن حياتي واقفة حرفيًا والفشل يلاحقني في كل شيء، كيف أخرج من هذا الوضع؟

نفسية

اجتماعية

سؤال من احد أعضاء فدني

تم النشر الأربعاء، ١٩ نوفمبر ٢٠٢٥

3 إجابة

3 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك