أنا حياتي دايما متعثرة حتى في أبسط الأمور كل لما أحاول انتصر على مشاكلي ألاقيها أكبر مما أتخيل مش عارف ليه ربنا وضع كل المشاكل دي في انسان واحد لدرجة انه مش لاقي مخرج ولو لقيت مخرج بسقط في التاني
أنا شخصيتي معقدة جدا كاره حياتي وشكلي وصوتي وصورتي وكل شيء فاقد الثقة في أي حاجة وده سببه ان عندي الرهاب الاجتماعي وحب للعزلة والوحدة والوسواس القهري جزء من حياتي والكمالية بتفسد عليا كل شيء بعمله وده بيوصلني للاكتئاب
كل المشاكل دي موجودة عندي من صغري ولكن بحاول اتجاهلها وفكرت اني استغلها وانها ممكن تفيدني وبحاول من 6 سنين اني استغل حب العزلة ده اني اشتغل اونلاين ويبقى عندي بيزنس وأبقى معايا فلوس كتير على الاقل أبقى حققت شيء في حياتي
وقلت لنفسي ان دي ميزتي عن الاخرين ولكن اتصدمت بالصعوبة في كل شيء لأني دخلت كذا شغل أونلاين وكل ما أبدأ شيء اتركه من نصه بسبب ضعفي او اني مش قادر اواجه مشاكل البيزنس ومش قادر اعمل تسويق لنفسي واواجه الناس ولا عايز أطلع عالكاميرا بفيديو ولا حتى صوت بس ده حتى مجرد صورة بورفايل مش حاططها مع اني أنا أصلا شاطر في كذا مهارة من اللي اتعلمتهم خلال السنين اللي فاتت،
ومن أكثرهم أني بحب كتابة المحتوى زي الاعلانات وسكربت فيديو يوتيوب ودي طبيعتي لأني بحب التفكير كتير والتأمل وأطلع أفكار وأكتب كلام قوي وهكذا واتحمست لما شوفت فيديوهاتك عن المحتوى وعايز أطلع أتكلم عن كل ده وأقدم خبرتي وممكن شركة تعرفني تشغلني معاها بس مش قادر أعمل حاجة بسبب المعيقات دي كلها مع اني حاولت كتير من سنين التغلب عليها
وللأسف الكبير لو تركت العمل أونلاين تماما حتى الشغل على أرض الواقع مش قادر أشتغل فيه لأني مش قابل تماما ان شخص يعطيني اوامر لأني بحس اني قليل فمش بستمر في أي شغل للأسف يعني حياتي مغلقة من كل ناحية مش عارف أنا أعمل إيه
يا ترى ربنا هيطلعني من المحنة دي في يوم من الايام وياترى هيكون ازاي اتمني اليوم ده ييجي في حياتي أنا وصلت لقناعة فعلا انه ممكن يكون فيه انسان جاي عبثا وعبء على هذه الحياة ومش مفيد ولا هينفع تماما لأي شيء والانسان ده طلع أنا وأي شخص أخر يشبه حالتي كلنا أكيد عالة على البشر ومش هنقدر ننفع حتى أنفسنا
أنا نفسي وأمنية حياتي اني أنفع في أي حاجة في الدنيا دي ولو أني أبقى انسان بتكلم كويس بثقة في نفسي يعني أمور بسيطة ربنا حطها في الناس عادي وأنا بعاني للحصول عليها وأنا عارف إني شاطر في بعض الأمور بس أنا عاجز إني أخليها تخرج للنور يعني أنا مدفون بالحيا ومش عارف أخرج أفضل ما عندي بينما السيئين هما اللي قادرين يعملوا كده بسهولة
أنا كتبت الرسالة وأنا متأكد ان مفيش حد معاه الفانوس السحري اللي هيخلصني من كل مشاكلي ولكن أنا حبيت أحكي وافضفض لعل يكون في فرصة ان شخص يقولي كلام معين يغير حياتي محدش عارف بداية الخير فين يمكن يكون في أمل.
السلام عليكم و رحمة الله و بركاته أولا إحنا كبشر مش المفروض نعترض على حكمة ربنا ف أي وضع و المفروض نقول الحمد لله [ لَا يُكَلِّفُ اللَّهُ نَفْسًا إِلَّا وُسْعَهَا] يا هندسة محتاج تدرك معنى الآيه دي بعمق ، استحاله بلاء ييجي فوق طاقتك..! أنا فاهمه إحساسك و إنك بتحب العزلة لإن أنا كمان كدا و يمكن اكتر منك.. بس مجتش قولت على نفسي عاله و استحاله انجح ولا اساعد غيري.. لو كنت قولت كدا لنفسي مكنش زماني بساعدك دلوقتي ولا بحاول اساعد غيرك في البرنامج.. أول خطوة محتاج تاخدها هي إنك تحب نفسك بصدق و تحب كل تفصيلة فيك.. لإن المشكلة دي هي اللي أدت لباقي المشاكل مش العكس ف لازم تركز فيها أولا قبل كل شيء . و مهـم تعـرف! متبقاش واقف في مكانك و تسأل أنا مش بتقدم ليه ولا تنتظر الوقت المناسب عشان تِظهر من نفسك و تطورها ، لو فضلت مُنتظر منغير محاولة عمرك هيضيع و هتفشل.. ثروتك الحقيقة هي عمرك ، لازم تبدأ و تاخد خطوة جد ، حتى لو خطوات بسيطة تساعدك مشكلتك الأساسية هي إنك عايز كل حاجه تحصل منغير صبر ، و السبب اللي بيخليك كل متقوم تقع تاني هو إنك بتاخد خطوة كبيرة فجأة و ده غلط تماماً.. هل ينفع شخص يفضل يتفرج على لعيبه كورة و ينزل يلعب في الملعب في ماتش كبير و ينجح؟ استحالة لازم يتمرن و يلعب في نادي أقل و هيكبر مع الوقت.. أنتَ حاطط نفسك مكان الشخص ده و منتظر لما تنزل تلعب في الملعب تنجح و أنتَ متمرنتش.. لما تاخد خطوات بسيطة جداً هتبقا احتماليه نجاحك فيها أعلى ، و لما تنجح فيها هتديك دَفعة قوية و طاقة تدخل على الأكبر منها .. هتنتقل من مرحلة صغيرة-متوسطةـ كبيرةـ بعدها يبقا عندك تمَكُن تـام و كل ده هيحصل مع تدريب و مش هتحس بالصعوبة اللي أنتَ حاسس بيها دلوقتي دخلت الشغل فجأة و عايز تعمل بيزنس كبير ف لما وقعت ف أول مشكلة استسلمت..! لإنك دخلت نفسك في مكان كبير فجأة و أنتَ عارف انك عندك رهاب إجتماعي،، خطواتك البسيطة اللي هتساعدك في التواصل كورس اونلاين يكون لايڤ مع اشخاص قليلة ممكن أصلا تبدأ ب كورس تواصل و تعامل في كورسات بتعلمك ازاي تكسب ثقة اللي أمامك و تقدر تتكلم وسط ناس كتيرة .. بس التطبيق مهم يا بشمهندس! اتعامل بكلام قليل رسمي حتى لو محفوظ مع اللي قدامك، من الحاجات اللي هتساعدك في ده جداً هو المشاركة في إطعام مساكين ، توزيع عصير على الفطار للناس و ما شابه.. كل ده مفهوش أي تواصل أبدا كله عبارة عن ابتسامة و دعوة بسيطة للي قدامك "كلام محفوظ" ذي مقولتلك ، هتلاقي الناس نفسها بترد عليك بشكل لطيف يحببك في التعامل جداً لو شايف ده مش مناسب ف ذي مقولتلك خد درس لايڤ مع عدد قليل أسمع عن ناس كان عندها نفس المشكلة و ازاي حلتها .. ياما هتلاقي ناس على يوتيوب بتتكلم عن إزاي تصلح ثقتك بنفسك و تحسِّنها [ عن نفسي بصدق عمري محبيت حياتي و أدركت قيمتها غير لما بدأت أتعلم علوم شرعية و أعرف عن ديني اكتر و متأكدة ١٠٠٪ إن ده الحل الوحيد لمشاكل البشرية كلها..] قال تعالى: [وَأَن لَّيْسَ لِلْإِنسَانِ إِلَّا مَا سَعَىٰ (39) وَأَنَّ سَعْيَهُ سَوْفَ يُرَىٰ (40) ثُمَّ يُجْزَاهُ الْجَزَاءَ الْأَوْفَىٰ (41) وَأَنَّ إِلَىٰ رَبِّكَ الْمُنتَهَىٰ (42) وَأَنَّهُ هُوَ أَضْحَكَ وَأَبْكَىٰ (43) وَأَنَّهُ هُوَ أَمَاتَ وَأَحْيَا] خليك مُدرك أساس وجودك في الدُنيا يا بشمهندس هو إنك "تسعى" حتى لو فشلت ، هي دي الدُنيا في الأصل مفيش حد بينجح منغير عثرات و مفيش حد بينجح منغير ميقع و يحس ب ضعف بس بيستعين بالله و يقوم تاني ،، قال النبيﷺ :[لا تَزولُ قَدَمَا عَبْدٍ يومَ القيامةِ، حتَّى يُسأَلَ عن عُمُرِه؛ فيمَ أفناه؟ وعن عِلْمِه؛ فيم فعَلَ فيه؟ وعن مالِه؛ من أين اكتسَبَه؟ وفيم أنفَقَه؟ وعن جِسمِه؛ فيمَ أبلاه؟] ف على الأقل لما الله تعالى يسألك عن عمرك فيما افنيت و عن شبابك فيما أبليت تقوله يا رب انا كنت بسعى للكسب بالحلال و بحاول اساعد اللي حواليا.. "تموت و أنتَ بتحاول و تسعى أفضل مليون مره من انك تموت مستسلم لوساوس الشيطان و مضيع حياتك".. قال تعالى: [إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ] ف أبدأ و اسأل الله الإعانة بدلاً من السخط على اقداره تعالى ، و أحمده إن جعل لك "مأوى" من الأساس تنعزل فيه بأمان . ادعي ربنا بصدق و صلي و اشكيله عشان هو الوحيد اللي هيقدر يعينك و يغيرلك كل ده فإنه تعالى [ إِنَّمَا أَمْرُهُ إِذَا أَرَادَ شَيْئًا أَن يَقُولَ لَهُ كُن فَيَكُونُ] و مش كل متقع يبقا عندك سوء ظن في الخالق لإنك كدا مش هتفلح ، ادعي و خليك متيقن انه هيساعدك قال تعالى: [أَنَا عِنْدَ ظَنِّ عَبْدِي بِي، وَأَنَا مَعَهُ حِينَ يَذْكُرُنِي، إِنْ ذَكَرَنِي فِي نَفْسِهِ، ذَكَرْتُهُ فِي نَفْسِي، وَإِنْ ذَكَرَنِي فِي مَلَإٍ، ذَكَرْتُهُ فِي مَلَإٍ هُمْ خَيْرٌ مِنْهُمْ، وَإِنْ تَقَرَّبَ مِنِّي شِبْرًا، تَقَرَّبْتُ إِلَيْهِ ذِرَاعًا، وَإِنْ تَقَرَّبَ إِلَيَّ ذِرَاعًا، تَقَرَّبْتُ مِنْهُ بَاعًا، وَإِنْ أَتَانِي يَمْشِي أَتَيْتُهُ هَرْوَلَةً ]. فمهما كان الهَم اللي أنتَ فيه محدش هيقدر يساعدك و يطلعك منه إلا اللي خلقك.. [وَإِنْ يَمْسَسْكَ اللَّهُ بِضُرٍّ فَلَا كَاشِفَ لَهُ إِلَّا هُوَ وَإِنْ يَمْسَسْكَ بِخَيْرٍ فَهُوَ عَلَى كُلِّ شَيْءٍ قَدِيرٌ] استعن بالله و أبدأ يا هندسة و بالتوفيق يا بطل في رحلتك!
تم النشر الخميس، ٢٩ يناير ٢٠٢٦
أنت مش لوحدك في الإحساس ده، ودمش معناه خالص إنك "عالة" أو عبثي – بالعكس، ربنا سبحانه وتعالى ما خلق حد عبث، زي ما قال في القرآن: "أَفَحَسِبْتُمْ أَنَّمَا خَلَقْنَاكُمْ عَبَثًا" (المؤمنون:115). الابتلاء ده اختبار، وأنت شاطر وموهوب زي ما وصفت نفسك، بس الموانع دي بتغطي الضوء شوية. خلينا نلاقي مخرج عملي خطوة بخطوة، عشان نطلع أفضل ما عندك للنور. أولاً: غير النظرة لنفسك (من منظور إسلامي وعملي) الابتلاء مش عقاب : ربنا بيختبر الصابرين، وأنت صابر 6 سنين! قول "حسبي الله ونعم الوكيل" كل يوم، وادعي بصدق: "اللهم ارزقني التوفيق والثبات". الصبر هيغير حياتك، مش الفانوس السحري. أنت مش ضعيف : الرهاب الاجتماعي والوسواس والكمالية مش "ضعف"، دول تحديات نفسية شائعة، وفي ناس كتير نجحوا رغمها. الكمالية بتفسد؟ قاعدة 80/20: اعمل 80% كويس وابدأ، مش 100% مثالي. ثانياً: خطة عملية لمهاراتك (ابدأ صغير عشان العزلة ميزتك) أنت شاطر في كتابة المحتوى، سكريبتات، إعلانات – دي ذهب! مش لازم تطلع على الكاميرا أو صوتك دلوقتي: ابدأ مجهول : اكتب مقالات أو سكريبتات للتوظيف الحر (ghostwriting) على منصات زي Upwork أو خمسات أو مستقل. حدد بروفايل بدون صورة شخصية (صورة رمزية بس). ابدأ بمشروع واحد صغير: اكتب إعلان واحد النهارده واعرضه بـ50 جنيه. تسويق بدون وجه : استخدم AI زي ChatGPT عشان تولد صور بروفايل احترافية مجهولة، واكتب بوستات قصيرة على LinkedIn أو Reddit عن "نصائح كتابة سكريبتات" بدون ذكر نفسك. الناس هتجيلك لوحدها. للشغل الأوفلاين : لو عايز، ابحث عن كتابة محتوى لشركات (freelance writing) بدون مقابلة وجه لوجه – كل حاجة إيميل. خطوة يومية صغيرة : النهارده، اكتب سكريبت فيديو واحد (5 دقايق) واحفظه. بكرة، شاركه مجهول على يوتيوب بدون صوتك (voiceover AI). خلال أسبوع، هتلاقي تقدم. ثالثاً: للثقة والاكتئاب تذكر إنجازاتك : اكتب 3 حاجات نجحت فيها (حتى لو صغيرة زي "اتعلمت مهارات كتير"). اقرأها كل صباح. روتين يومي بسيط : صلاة + قراءة صفحة قرآن + مشي 10 دقايق لوحدك (مش اجتماعي). ده هيبني ثقة تدريجياً. لو عايز تغلب الرهاب : ابدأ بكلام مع نفسك أمام المراية 1 دقيقة يومياً: "أنا شاطر، وربنا معايا". أنت مش مغلق من كل ناحية – الباب مفتوح من كتابتك! ربنا هييسر لك إن شاء الله، بس الخطوة الأولى عليك. جرب الخطة دي أسبوع وقلي إيه اللي حصل. في فدني، ابحث عن أسئلة مشابهة هتلاقي إجابات كتير مفيدة. ولو عايز استشارة متخصص، روح على https://www.fedni.net/experts – في خبراء نفسية وتطوير ذاتي هيساعدوك أكتر.
تم النشر الأربعاء، ٢٨ يناير ٢٠٢٦
تقبل نفسك زي ما هي .
تم النشر الجمعة، ٣٠ يناير ٢٠٢٦
لو لاحظت كلامي أنا موضوعي مش نجاح بس لا ده فشل في حتى أبسط شيء عن أي انسان يعني مش طالع من الدنيا دي بميزة واحدة واضحة
تم النشر الأربعاء، ٢٨ يناير ٢٠٢٦
يعم انت مش أول واحد تفشل ولا أول واحد تنجح .. بمعنى نجحت ولا فشلت فمش نهاية العالم لأنك مجرد واحد من مليارات ... القصد انك هدي جلد الذات وعيش على طريقتك مش على طريقة النجاح والإنجازات اللي الناس بترسمها (الكلام ده للشخص اللي جلد الذات عنده عالي .. مش للكل .. لأن في ناس صفر ضمير محتاجين نلومهم مش نخفف عليهم)
تم النشر الأربعاء، ٢٨ يناير ٢٠٢٦
لعرض السؤال في فدني اضغط هنا