السلام عليكم، "كل متوقع آت" للأسف أنتِ بتهيأي عقلك ونفسك أصلا من الأول على نهاية معينة فبتخلي الظروف كلها تتجه لتحقيق النهاية دي. التعلق الشديد بشيء لاشعوريا بيؤدي إما لخسارة الشيء أو الشخص أو نفوره من الشخص المتعلِق ففكي التعلق وتعلمي التخلي، وحاولي تدربي نفسك على توازن مشاعرك ناحية أي شيء وفي كل علاقاتك بالناس، يعني لا تتعلقي قوي ولا تتخلي للنهاية، خليكِ وسط وتعاملي بطبيعية واتركي الأمور تاخد مجراها عادي. الخوف أصلا مش بيغير شيء مكتوب فكل اللي بتعمليه إنك بتفضلي خايفة لحد ما اللي أنتِ خايفة منه يحصل واحتمال ميحصلش وتفضلي عايشة في خوف وقلق طول الوقت وده شيء مش صحي. ****** الطبيعي إن الواحد لا ينظر لنفسه إنها أقل من حد فده شيء متجلديش عليه نفسك لكن التكبر محتاجة كل ما يراودك شعور الكِبر وتلاقي بتتصرفي بتكبر إنك تستغفري وتفكري نفسك إن الكبر حرام وإنه "لا يدخل الجنة من كان فيه قلبه مثقال ذرة من كبر" *** لكن برضه فرقي بين الكِبر (المرض القلبي) اللي هو زي ما في الحديث "بطر الحق وغمط الناس" واللي بيؤدي بكِ لسلوك التكبر على الآخرين وبين إنك تكوني بتتصرفي بثقة أو بتوقفي شخص عن تجاوز حدوده معك. فراجعي نفسك وشوفي هل أنتِ فعلا بتتكبري على اللي قصادك يعني بتعامليه باستحقار وتعالي وبتشوفي نفسك أحسن منه ولا بس بتتصرفي بثقة حتى لو مبالغ فيها، ومش بتسمحي لحد يعاملك بقلة أو يتجاوز حدوده. *** حاولي تشتغلي على عقلك الباطن وتعيدي برمجة الأفكار اللي بتدخليها له لأنه بينجحك في اللي بتقوليه وبيهيئك جسديا ونفسيا عشان الحاجة اللي قلتِها تحصل. طول ما بتقولي له أفكار سلبية هيفضل مركز عليها وبيؤكدها لك والوضع مش هيتغير وحتى لو المخرج والحل قصاد عينيك مش هيخليك تشوفيه. فغيري المدخلات عشان تلاقي نتيجة مختلفة إيجابية، ولو في أي وقت لقيتِ إن محتاج لمساعدة من مختصة سلوكية أو نفسية لا تترددي إنك تاخدي الخطوة دي. وربنا يوفقك.💚
لعرض الإجابة في فدني اضغط هنا