السلام عليكم، أولا ربنا يعينك ويقويك تعدي الابتلاء ده بسلام وتتخلص من السم اللي جواك بأقرب وقت. أنت محتاج تبرمج شوية أفكار في عقلك ونفسك عشان تقدر تتعافى من كل ده، أول حاجة، أنت كنت ضحية بسبب البيئة اللي لقيت نفسك فيها والظروف اللي دفعتك تاخد طريق مدمر في سن صغير. دلوقتي أنت كبرت، وبقيت عارف الصح من الغلط وعارف إنك في طريق مدمر لكن إدمانك غصب عنك بيدفعك تكمل، مشاعرك وإحساسك بالألم والندم وحتى القرف مفهومة لكن حاول تتفهم إن الإدمان اللي وصلت له أيا كان السبب اللي وصلك له هو إدمان سلوكي غير في كيمياء مخك وجسمك وملوش علاقة بتدينك أو أخلاقك. فبلاش تقرف من نفسك وتيأس منها، مش محتاج تتصالح مع الماضي أو الوضع الحاضر اللي ما زلت غارق فيه لكن على الأقل تفهم واسع لإصلاح الوضع. **** ثانيا، كل الناس بلا استثناء بترتكب ذنوب وممكن كتير يقعوا في خطايا أو يرتكبوا كبائر لكن التوبة تجب ما قبلها وربنا بيتقبل العبد مهما كان ذنوبه أو خطاياه طالما باب التوبة مفتوح والإنسان صادق وعازم على التوبة. فمحدش مننا له حق ينظر عليك أو يحتقرك أو يعايرك بمعاصيك وأنت نفسك لازم تتفهم نقصك وبشريتك. وافتكر، "والذين جاهدوا فينا لنهدينهم سبلنا" اليأس اللي أنت فيه وساوس من الشيطان عشان يخليك تكمل في نفس الطريق بحجة إنك خلاص ضعت وربنا عمره ما هيرضى عنك، وأنت باستسلامك للوضع بتسمح له ينتصر. استعن بالله وابدأ ومهما وقعت افضل عافر وارجع اقف وحارب. *** ثالثا، صلح فكرتك عن العلاج النفسي، مفيش حاجة اسمها إزاي رجل وهكشف نفسي وعيوبي قُدام حد. ربنا خلق لكل داء دواء، فبلاش تخلي الأفكار دي تمنعك من تحري العلاج أيًا كان المكان الموجود فيه. المعالج النفسي أو المختص السلوكي دوره يساعدك وميقدرش يحتقرك أو يسفه من مشكلتك وألمك ولا يخرج أسرارك، فخليك شجاع وخد الخطوة وخليك صادق مع المعالج وزي ما كتبت كل حاجة هنا اشرحها له حتى لو بأدق التفاصيل، ده دوره ومسؤوليته. ولو عاوز علاجك ينجح يبقى خليك صادق وفرغ كل السموم اللي جواك، لازم الصديد ده كله يخرج عشان تتعافى بسلام. *** رابعا، الأعضاء اللي قبلي تكلموا وحسب ما قرأت لك في تعليق أنت تابعت مع دكاترة قبل كده لكن خد بالك، لو كلنا أقسمنا لك إن التوبة بابها مفتوح وربنا هيتقبلك عادي وإن التغيير ممكن وأنت قادر تتخلص من الوباء ده ومش أقل من كل اللي تعافوا، إذا أنت مصلحتش الفكرة جواك وصدقت الكلام ده وتيقنته وكانت رغبة التغيير نابعة من جواك، كل كلامنا مش هيساعدك. كلامنا ممكن يوجهك ويعطيك إشارات للمخرج لكن إذا فضلت أسير نفسك وحبيس غرفتك كلامنا هيتنسي مع الوقت والإشارات هتتعامى عنها وترفض تمشي وراها. **** أنت لسه ٢١ سنة، لنفترض ربنا يديك طولة العمر في طاعته، عشت للسبعين ولا الثمانين، هتفضل خمسين ستين سنة حابس نفسك وشايف إن الدنيا انتهت بالنسبة لك؟ أنت لسه صغير والأوان مفاتش، ومهما كان اللي عملته ربنا غفار وحياتك لسه فيها بقية وأهداف أكبر تعيش لها. ناس كتير ارتكبت كبائر عظيمة ومع ذلك تابوا وأصلحوا فأبدا متفكرش إن الأوان فات إنك تكون زيهم. **** أنصحك جدا، اعمل ورد استغفار وحوقلة يومي، أكثر من الاستغفار وردد كتير (لا حول ولا قوة إلا بالله العلي العظيم) رددهم من قلبك وبصدق ويقين وأنت متيقن ومؤمن وحاسس بكل كلمة ومعنى لهم وإن ربنا وحده قادر يمدك بالقوة ويغير حالك. *** أرشح لك سلسلة من ٣ فيديوهات مهمة عن إدمان الإباحية 👇👇 الجزء الأول: متخربش مخك وحياتك بإيدك https://www.youtube.com/watch?v=WGgCY7dEvF8 الجزء الثاني: https://www.youtube.com/watch?v=_qMTk1Jy_Rw الفيديو الثالث: كيف يحدث التغيير؟ https://www.youtube.com/watch?v=sDBX7awuxrA **** كان فيه كلام كتير عندي بس أنا كده طولت عليك. أرجو تكون لسه محذفتش التطبيق وتقدر تشوف كلامي. وربنا يوفقك ويعافيك ويثبتك على الهداية إن شاء الله.💚
العفو، يا رب أكون أفدتك شوية. ممكن محاولتهم يخلوا إحساسك بالذنب والكره لنفسك يقل عشان شايفين إن دي البداية للتعافي، يعني عشان تساعدك نفسك لازم تبدأ تتقبلها وتتصالح مع نقصها وماضيها، معتقدش حد يقدر يساعد حد بيكرهه ويحتقره، أكيد نفس الشيء ينطبق على نفسك... لو بتحتقرها وتكرهها هتبقى مقتنع من جواك وفي عقلك الباطن إنها تستحق الدمار اللي هي فيه وتستحق تبقى في الجحيم وده هيخليك تغرقها أكتر في الإدمان والسلوكيات المدمرة عشان شايف إنها متستحقش تكون في مكان أنضف وشايف إنها لازم تتعافب، فاهمني؟ يعني كرهك واحتقارك لذاتك مدخلك في دوامة لانهائية من التدمير الذاتي، وكسرها هيبدأ من إنك تبدأ تتخلص من الكره والاحتقار وتتصالح مع الطفل اللي غلط زمان ومع نفسك البشرية الضعيفة وتاخد بيدها عشان تخرج من المستنقع ده ومتكملش تدمير لذاتك. ربنا خلقك لهدف سامي، وطالما لسه بتتنفس وبيعطيك فرصة كل يوم يبقى لسه لك غاية ولسه مفاتش الأوان على أي شيء. فاستعن بالله وابدأ وتيقن إنه (لا يكلف الله نفسا إلا وسعها) ربنا عارف إنك قادر تخرج من الابتلاء ده قوي بس المهم تساعد نفسك وتتيقن إنك قادر تتجاوز الابتلاء وإن نفسك تستحق الأفضل.
تم النشر السبت، ٢٦ سبتمبر ٢٠٢٦
بالعكس كلامك مش كتير أو حاجه بالعكس مستمتع جدآ و اسف لو تعبتك معايا بالنسبة لنقطه اني اتكلمت مع كذا حد و متحركاش من مكاني لاني مش عارف أخرج ازاي و لمين و ليه .. الحقيقة كلامهم كلهم جميل جدا بس هما معملوش حاجه غير انهم كانو بيحاولو يخلوا احساسي بالذنب و الكره لنفسي يقل
تم النشر السبت، ٢٦ سبتمبر ٢٠٢٦
لعرض الإجابة في فدني اضغط هنا