السلام عليكم، أولًا صراحةً أنا محرجة إني هتكلم أو هرود على الرسالة عشان شايفة إن الشباب المفروض يقوموا بالدور ده، بس أنا مش محرجة من المشكلة بتاعتك بالعكس أنا شايفة جانب مختلف تمامًا.. بس بما إني قرأت الرسالة وصدقًا يعني تأثرت بيها جدًا جدًا فـ هقولك شوية كلام لعل وعسى يكونوا فيهم نفع أو تأثير، أولًا أنت شجاع جدًا جدًا تبارك الله عشان قدرت وعرفت تتكلم وتوضح مشكلتك وشايفة إن في أمل وأمل كبير جدًا جدًا إنك ترجع وتكون أقوى وأفضل من الأول!! وصدقني أنت ضحية بيت مش عارف يعني تربية الرجال فـ طبيعي جدًا تحاول تثبت نفسك حتى لو بطريقة خطأ، فـ هون على نفسك عشان أهلك وخالاتك هما السبب بس مش دي المشكلة دالوقتي، المهم أنت دالوقتي أنت قولت مشكلتك من الجذور وواضح جدًا إنك عايز تقوم من جديد وتكون نسخة أفضل وتبدأ حياة جديدة ولسة في فرص قدامك. أنا معنديش أي علم أو خطوات أقدر أقولك عليها بس أقدر أقولك في هنا أخصائين، وتقدر تتابع مع دكتور نفسي عشان حالتك النفسية، وبلاش تشوف نفسك وحش بالعكس أنت إنسان وأخطأت عادي أرحم نفسك وأنقذها وأديها فرص تقوم بلاش تجلد نفسك!! تابع مع دكتور..وبإذن الله تعالى هترجع أفضل حافظ على فروضك أقرأ كتب د. عماد رشا أعتقد قرأت فيها حاجة حرفيًا شبه قصتك بالضبط!! أرجع وأقولك أنت مش إنسان وحش وربنا سبحانه وتعالى قادر يخرجك من ألمك وتعبك النفسي بس أنت قول يا رب! الإستغفار حرفيًا كنز في ترك الذنوب أستغفر كتير وحط نية إنك تتوب كل يوم أستغفر في اليوم بقوة ذنوبك وإن شاء الله ربنا هيغفرها وعلى فكرة في مليون حل إلا الانتحار واليأس أوعى تيأس من نفسك وتوب وراجع... وعلى فكرة أنت إنسان قوي وكمان أنت لسة صغير وتقدر تبدأ من جديد وتحاول من جديد من دالوقتي خد خطوات وخطوات جدية بلاش تكون محرج مفيش أي إحراج ولما تتكلم مع أخصائي هيفهم مشكلتك وهيقولك ليها مليون حل يا بطل المهم أنت تبدأ من دالوقتي!! وتبدأ تملأ حياتك أنشطة وتروح جيم وتشتغل عشان تخرج من أوضتك المهم المسجد والدعاء والقراءة أنصحك برضو تسمع بودكاست وأسماء الله الحسنى وتعرف رحمة ربنا!! وصدقًا علاقتك بالله هي الـ هترجعك وتقويك!! حاول من جديد وأنت إنسان رائع وقوي حرفيًا أنت بطل ودا مش كلام وخلاص دا كلام حقيقي بجد أول ما قرأت الرسالة شوفتك حد بيحاول يكون أفضل
مساء الخير
تم النشر الجمعة، ٢٥ سبتمبر ٢٠٢٦
شكرا ليكي مره تاني من كل قلبي بس ممكن طلب صغير و هو تقوليلي ايه اول خطوه لازم اعملها عشان أخرج من الضلمه دي
تم النشر الخميس، ٢٤ سبتمبر ٢٠٢٦
فهمت أيوة، الجزئية دي بتأثر على النفسية وحتى فهم شخصيتك وخاصةً أنت كـ شاب في سن المراهقة بيكون عندك تساؤلات فـ وجود الأب مهم جدًا جدًا مش بس عشان أكل وشرب دا جزء لكن في أجزاء تانية زي ما أنت قولت إحتواء وكلام حتى مصاحبة كان لأزم يكون هو صديقك الأول والداعم الأول ليك، لكن عادي قدر الله وما شاء فعل ممكن تحاول أنت تعوض نفسك وتعرف إن ياما ناس عاشت من غير أب بس كانوا ناس قوية وعندهم أهداف وأحلام ودا إبتلاء ولأزم تحاول تكون أنت داعم لنفسك
تم النشر الخميس، ٢٤ سبتمبر ٢٠٢٦
الحقيقة هو الأب موجود بس كان بيجي من شغله متأخر و احنا نايمين و يمشي قبل ما نصحي و كمان لو في اجازه مكنش ربع ساعه بتعدي علينا غير و كلها مشاكل و خناق هو و والدتي ف يبعد يقعد في شغله شهر او اتنين و بعدين يتصالحوا و اول ما يرجعوا البيت يتخانقو تاتي و يبعد تاني و عجله و دائره لحد لما اتجوز و بعد خالص بس مش مآثر في اكل او شرب أو فلوس لكن في اي حاجه تاني ف هو مآثر و بجداره زي مشاعره زي أنه عمره ما قعد معايا ربع ساعه عمره ما حضني عمره ما نصحني أو علمني حاجه زي اي اب ما بيعمل مع ابنه و عمره ما عرف عني حاجه غير اسمي و كليتي و بيجي البيت من فتره لفتره مش بتكلم معاه أو ابص في وشه حتي عشان يحس و يقولي مالك حتي لكن بياخد بعضه و يمشي كأنه مفيش حاجه
تم النشر الخميس، ٢٤ سبتمبر ٢٠٢٦
ممكن سؤال معلش أنت أتربيت في بيت من غير أب؟ أو أب وأم منفصلين
تم النشر الخميس، ٢٤ سبتمبر ٢٠٢٦
الشكر لله إحنا هنا كلنا عشان نساعد بعض ونوصل لحل المهم تأخد قرار؟ وتبدأ
تم النشر الخميس، ٢٤ سبتمبر ٢٠٢٦
شكراً لانك انسانه بجد و كمان انسانه تمتلك قلب نضيف و كله رحمه
تم النشر الخميس، ٢٤ سبتمبر ٢٠٢٦
أنا إنسانة حقيقية...مش ai عامةً الـ ai هنا ذكية بس دي بس لكن الكل هنا بشر عادي😅
تم النشر الخميس، ٢٤ سبتمبر ٢٠٢٦
انا جديد هنا و خدت بالي أن في ai في الابلكيشن و بيرد علي الناس ارجوكي تقولي انك حقيقة مش ذكاء اصطناعي لاني شايف حضرتك بتكتبي كلام منسق جداً و بتشكيل الحروف و نقط في نهاية كلامك و فواصل و كده و ده من النادر أن حد يعمله حالياً اتمني اكون فاهم غلط وانك حقيقه بجد
تم النشر الخميس، ٢٤ سبتمبر ٢٠٢٦
وعلى فكرة الرحلة مش هتكون ساهلة بس أنت لأزم تحاول وتحاول تساعد نفسك وتخرجها وتساعدها وصدقًا لو حاولت من دالوقتي هتشكر نفسك بعدين إنك كملت وكنت قوي, حاول عشانك وأعرف إن ربنا كريم وواسع الرحمة والمغفرة ✨️
تم النشر الخميس، ٢٤ سبتمبر ٢٠٢٦
عشان مش من حق أي حد يحكم عليك بالذنب وإنك إنسان وحش ولأزم أنت أول حد متحكمش على نفسك وترحمها وتبدأ تستخدم مهارة التدوين وتستخدم اليوتيوب في محتوى نافع وهادف، وفي فرصة من دلوقتي بس أنت قرر وابدا وصدقني مهما قولنا رحمة ربنا واسعة واسعة جدًا جدًا جدًا
تم النشر الخميس، ٢٤ سبتمبر ٢٠٢٦
رغم كل التعليقات لكن انتي اول تعليق بجد كلامك جميل و اثر فيا و حسيت بجزء بسيط جدا من التفاؤل بس للاسف حزني دلوقتي اكبر من التفاؤل ده انا أصلا من ساعت ما كتبت الكلام ده و لحد ما بكتبلك التعليق ده دلوقتي و انا بعيط و مش عارف امسك نفسي و كمان مش عارف اشكرك ازاي انك قريتي كل كلامي و مقولتيش اي كلام تقليدي زي ما الناس كلها بتعمل بجد شكراً من قلبي
تم النشر الخميس، ٢٤ سبتمبر ٢٠٢٦
لعرض الإجابة في فدني اضغط هنا