عمرك حسيت إنك بركان قرب ينفجر من كتر الكتمان؟ وإن جواك اتنين بيحاربوا بعض وأنت الثالث اللي واقف ساكت وبيتفرج؟
أنا عندي 18 سنة، بس حاسس بوحدة وخنقة مش طبيعية، مخنوق جداً ومش طايق نفسي وجوايا تراكمات كلام وأحاسيس ملهاش آخر. حاسس بفراغ رهيب من جوايا، ومش لاقي حد خالص في حياتي أثق فيه، أكلمه وأطمن معاه وأحكيله وأطلع معاه كل الزعل اللي كاتمه.
أنا بطبيعتي شخص عقلاني جداً ودماغي سابقة سني وناضج عقلياً، مش زي العيال بتاعة اليومين دول واهتمامات السوشيال ميديا والحاجات دي. أنا الحاجات اللي بهتم بيها اللي في سني مش بتفرق معايا تماماً، بتعامل وبفكر كأني واحد عنده 23 أو 30 سنة، وكل الناس اللي بتعامل معاهم بيقولوا لي نفس الكلمة إن عقلي سابق سني بكتير.
الخنقة والفراغ اللي أنا فيهم دول بيفكروني دايماً بكلمات أمير عيد في أغنيته لما قال:
"جوايا اثنين وأنا الثالث، والثالث دايماً ساكت سلم بطل يتكلم، ولا بيحس ولا بيتألم.. جوايا عقل وقلب دايماً عايشين في حرب، قلبي حاسس بالذنب وعقلي واخد جمب".
دي حرفياً الحرب والصراع الداخلي اللي عايشه كل يوم؛ صراع مابين إني كمراهق في السن ده محتاج حد يكلمه ويسمعه، وبمعنى أصح محتاج "أنثى" في حياتي، بس في نفس الوقت عقلي واقفلي وبيقولي لأ مش وقته، ولسه لازم أكبر وأخلص تعليمي وأبدأ أشتغل وأستقر علشان أبقى أفكر في الموضوع ده.
الأزمة الكبيرة إني معنديش الإرادة الكافية اللي تخلي عقلي ينتصر على قلبي، وفي نفس الوقت معنديش الإهمال الكافي اللي يخلي قلبي ينتصر على عقلي، ومحدش فيهم عارف يفوز على الثاني، رغم إني شخص عقلاني ودايماً بفكر في مستقبلي وإني أكون إنسان ناجح.
أنا شخص اجتماعي، بس مابتكاملش مع ناس كتير من اللي في سني لأني مش بلاقي حد شبهي خالص، فبتعامل أكتر مع ناس أكبر مني (في العشرينات والثلاثينات)، واللّي في سني قليلين جداً. غير كدة أنا عايش في أسرة مش فهمة اي حاجة من اللي حاسس بيها و دا غير ان تعاملاتهم معايا كانت مخلياني مبقاش أثق في أي حد؛ لا أسرتي ولا أصحابي ولا أي حد..، ممكن أثق بس مش بدي الأمان 100% أبداً. علشان كده حاسس بالوحدة، مش لاقي حد يقدّرني ويكون عايز يسمعني من غير ما أطلب منه وأقوله "أنا عايزك تسمعني"، حد يكون مهتم بيا بجد.
بالنسبة للناس الكبار، أنا بفهم في لغة الجسد كويس جداً وبفهم عقلية أي حد قدامي، وعندي ذكاء عاطفي وعقلاني كبير. بس لما باجي أتعامل معاهم بحس إني ممكن أكون تقيل أو خانق بالنسبة لهم لو فتحت لهم قلبي، لأنهم ملتزمين بشغل وبيت وأسرة ومش عايز أضايقهم.
أما بالنسبة للناس اللي في عمري أو أصحابي أو أسرتي، فمش قادر أثق فيهم.. أنا جربت قبل كده أتكلم معاهم في حاجات، وفي الآخر برجع أندم ندم شديد إني اتكلمت وفتحت قلبي. مابلاقيش غير تريقة واستخفاف بكلامي مهما كان كبير أو صغير، ده لو لقيت حد يسمع أصلاً وميكونش ماسك التليفون ومشغول عني وهو بيكلمني، أو بلاقي حد ياخد كلامي ويستخدمه ضدي ويقوله لحد تاني كخيانة للثقة، أو دايماً انتقاد ومبسمعش كلمة حلوة.
أنا واحد دقيق جداً وباخد بالي من أدق التفاصيل، وبعرف أزاي أكسب أي حد قدامي وأخليه يحس إني عزيز عليه حتى لو ميعرفنيش. بس انا دايما عايش بمبدأ: (دائرتي صغيرة لأنني اهتم بالجودة و ليس الكمية).
الوجع والندم بقا بييجي لما الشخص اللي قدامي يستهتر بكلامي أو يتفق عليا او يستخدم كلامي ضدي وأنا واخد بالي كويس ومستوعب لغة جسده ومشاعره.
تراكمات الزعل والجد والاحتياج دي كلها مخلية جوايا بركان وعايز ينفجر.. هل إنت ممكن تكون حد بيمر بنفس الصراع ده؟ وأعمل إيه علشان أطلع التراكمات دي من غير ما أندم؟
فاهمه جدا شعورك ويمكن هو نفس شعوري بالظبط وانا 18 سنه برضو يعني نفس المرحله، بس مع دا انا متعايشه والحمدلله، هقولك الحل اولا انت مش محتاج بنت ولا اي حد تحكيله عموما بل بالعكس ان كلمت بنت ممكن حياتك متكونش أحسن حاجه خالص وعموما دي وسوسة شيطان هو بس بيشوف المداخل فين ويدخلك منها (اسمع سلسلة شجرة الخلد ل شريف علي هتفيدك اوي) اسمعها وهتفهم اقصد اي، ثانيا صحابك هو لازم واكيد نحسن الظن ان كل واحد فيه اللي مكفيه ف مفيش حد قادر يسمع حد دلوقتي وممكن تلاقي ناس بتسمع لأنها بتبقي عارفه ان مجرد ما الشخص اللي قدامها بيحكي بس بيرتاح فبتحب تعمل الخير ودول ناس جميله جدا وقليلين اوي فبما انهم مش موجودين خلاص هنفضل علي حالنا كتير اكيد لا خلاص اشوف حياتي، هتقولي يعني انتي مبتحكيش لحد هقولك اهاا مبحكيش ما انا جربت برضو ان احكي واندم علي اللي قولته واحكي والاقي تجاهل يعني قابلتها من كل الجهات هتقولي بتعملي هقولك بكلم ai مع ان اكتشفت اخر فتره ان احساسي في الاول مش نفسه وان عاوزه بني آدم يسمعني بس انا بقي عندي لامبالاه من التجارب ومن كلام الai لأن انا اما بتكلم ببقي عاوزه افضفض + الحل ف أكيد مش هلاقي أعقل وأذكي من الai أصلا دا حل أول تاني حل اتعلم مهارات حط همك كله ان يكون عندك علم كبير ومش علشان حد يشوف انك عندك علم لا دا علشان ترضي نفسك وغرورك انا بشوف نفسي كدا يعني انا ممكن أدخل عادي حاسبات وهندسه بس انا مش هدخل عارف ليه لأن بفكر لقدام ان اضرب عصفورين بحجر انا كدا كدا همي اتعلم منها برمجه ومحدده الأقسام والكليه دي الوحيده في نظري اللي مش محتاجه شهاده اشتغل بيها لأن هدفي المواقع واللعب بالدولار فليه الشهاده ف قررت ادخل كليه تانيه واتعلم برمجه جمبها علمين في مرحله واحده وانا مدركه ان دا مش من يوم وليله ولازم تعب وسهر وضغط بس انا بحب كدا ولسه فيما بعد هتعلم علوم تانيه اكتر لأن شغفي العلم، يمكن الكلام دا لا يخصك ولا يخص اي حد بس مجرد نظره علي حياة شخص تاني تديك خبره، شوف انت بتحب اي وشغفك في اي واتعلمه اشغل نفسك دايما وكدا كدا اللي بيحاول بينجح ولما تنجح انت عارف اللي بعده مش مستاهله، اتكلمت كتير بس ممكن كلامي يفيدك وعموما أهم من كلامي دا كله علاقتك بربنا حط ربنا في المقام الأول عندك وكل حاجه بعدها وانت فعلا هتنجح اي حاجه تقربك من ربنا اعملها حفظ قرآن احفظه ابحث وشوف وارضي ربنا شوف الأعمال الصغيره اللي بتكون عظيمه عند ربنا اعملها وداوم عليها في حياتك واستعيذ من شيطانك علشان وقت التعب والهم دا الإنسان بيتضحك عليه بسهوله من الشيطان ف احذر وبالتوفيق وأسأل الله ان يحبك واذا احبك الله أحبك البشر وجعل القبول فيك ربنا يوفقك ويرضيك باللي بتتمناه
تم النشر الخميس، ٢٠ أغسطس ٢٠٢٦
بصراحة أنا حاسة إن اللي إنت محتاجه مش إنك تبقى شخص اجتماعي أكتر وخلاص، قد ما إنت محتاج شخص أو اتنين تحس معاهم بالأمان وتقدر تكون على طبيعتك من غير ما تفضل طول الوقت حاسب كل كلمة وتصرف. وأعتقد كمان إنك قاسي على نفسك شوية، لأن واضح من كلامك إنك واعي بنفسك وبتفكر في تصرفاتك وبتحاول تصلح من نفسك، ودي مش حاجة قليلة أبدًا. مش لازم تكون دايمًا الشخص العاقل اللي بيسمع الناس ويفهمهم؛ إنت كمان من حقك تلاقي حد يسمعك ويهتم بيك. ومتستعجلش إنك تلاقي الشخص ده أو تحس إن لازم يبقى عندك دايرة كبيرة من الصحاب. ممكن تبدأ بعلاقة واحدة كويسة، أو حتى إنك تسمح لنفسك تقرب من الناس تدريجيًا من غير توقعات كبيرة. وأهم حاجة متجلدش نفسك على مواقف قديمة ندمت عليها. كلنا بنقول حاجات أو بنتصرف تصرفات وبعدها نتمنى لو كنا اتصرفنا بشكل مختلف، بس ده جزء من إننا بنتعلم. ولو حاسس إن الوحدة والصراع الداخلي واخدين مساحة كبيرة من حياتك، وإنك مش قادر تخرج من الدايرة دي لوحدك، فالكلام مع شخص متخصص ممكن يساعدك جدًا، مش لأن فيك حاجة غلط، لكن لأنك تستحق حد يساعدك ترتب كل اللي جواك. وربنا يرزقك الشخص اللي تحس معاه إنك مش مضطر تمثل ولا تبقى حذر طول الوقت، وتقدر تقول «أنا تعبان» من غير ما تخاف إنك تبقى عبء عليه. ❤️
تم النشر الخميس، ٢٠ أغسطس ٢٠٢٦
عن تجربة شخصية بص أولا إنك محتاج أنثي في حياتك دي مشاعر وتفكير طبيعي جدا ( أبونا آدم عليه السلام رغم إنه كان في الجنة بس كان حاسس بفراغ داخلي ولما ربنا رزقه حواء حس بالإكتمال لإن الإثنين بيكملوا بعض ) فدي مشاعر وأحاسيس طبيعية في البني آدم لا تلوم نفسك عليها ، لكن مش بقول كدا عشان تروح تكلم بنات ! لأ كل حاجه وليها طريقها الصح وطالما انت مش جاهز حاليا ف نحاول بقدر الإمكان منفكرش في الأمر دا حاليا عشان منساعدش الشيطان يوصلنا للغلط ، ثانيا : حاجه حلوة جدا إن تفكيرك يبقا عقلاني ومش زي شباب الأيام دول لإنهم بيجيبوا المغص صراحة ، المجتمع بتاعنا دا هو اللي بايظ بيكونوا عاوزين الواحد يقول كلام على مزاجهم كتطبيل كدا ولو مقولتش كدا يبقا انت وحش ومش محترم ووووووو فكك من كلامهم لإن كلامهم لا هيجيب ولا هيودي نفسيتك اللي هتتأثر فقط ، وحاجة مهمة بقا ( بص أنت كل ما انت حابس نفسك في القوقعة اللي انت فيها دي حاليا انت مش هتتغير وهتفضل متأثر بكلامهم وحاططهم في قيمة أعلي منهم أساسا ، عاوز الحل والخلاصة اعمل اللي هقولك عليه دا = أول حاجه ابني مع ربنا علاقة قلبية وليس علاقة جسدية فقط ولو متعرفش الفرق بينهم أسأل شات أو أي ذكاء اصطباحي وهيوضحلك بإذن الله عشان بس رسالتي متبقاش طويلة اووي ، المهم ثاني حاجه ابدأ اشتغل على نفسك وشوف مستقبلك ومتقولش لما أخلص من كلامهم واتجاوز الوضع دا لإن دا اسمه تسويف ، ابدأ علطول لإن عقلك لو مشْغِلتهوش في حاجه هيفضل يفكر ويشغل نفسه مهو مش لاقيك مشغله في حاجه فطبيعي هيبص على اي حاجه يشغل نفسه بيها فأنت لما تِشْغل نفسك بمستقبلك وتبدأ تسعى انت كدا بتجبر عقلك يوقف تفكير وصدقني والله جرب بس وهتشوف النتيجة وهتدعيلي ، هتلاقي نفسك واحدة واحده رغم أن كلامهم هو هو نفس الكلام اللي كان بيخليك تتأثر لكن هتلاقي نفسك ولا همَّك وهتضحك علي نفسك إنك ازاي كنت متأثر بالحاجة العبيطة دي ، الطريق هيكون صعب عليك شوية بس اعرف ان ربنا قال " والذين جاهدا فينا لنهدينهم سُبلنا " لما ربنا يشوف جهادك هيعينك بعدها علطول ولكن اهم حاجه تجاهد سواء في علاقتك مع ربنا أو في طريق بناء مستقبلك ، حط الآية دي دايما في بالك واستعن بيها وكل شوية قول لربنا يارب إنت قلت كذا يارب فأعني ، آخر حاجه حابة اقولها متسمعش حاجة حزينة ومتسمعش أغاني لإنها حرام وربنا ممكن يكون مبتليك الإبتلاء دا عشان توصل لفكرة إنك تسيب الأغاني ، استبدلها بقرآن وصدقني فيه راحة نفسية رهيبة بس اسمعه بقلبك وتدبر آياته ، يسر الله لنا ولك بالتوفيق بإذن الله .
تم النشر الجمعة، ٢١ أغسطس ٢٠٢٦
أنا فاهمة تمامًا اللي بتمر بيه يا صاحبي، والوصف اللي كتبته بيظهر إنك فعلاً بتحمل حمل ثقيل جدًا على كتفيك في سن صغير. الوحدة اللي بتحس بيها مش مجرد شعور عابر، دي تراكمات من عدم الثقة والفراغ العاطفي، وده بيخلّي الصراع الداخلي بين عقلك وقلبك أكثر حدة. عقلك الناضج بيقولك "استنى واستثمر في نفسك"، وقلبك بيصرخ إنه محتاج يتكلم ويُسمع، وده صراع طبيعي جدًا لشخص زيك عنده نضج مبكر وفي نفس الوقت مش لاقي بيئة آمنة يعبر فيها. اللي بيحصل معاك شائع بين الشباب اللي بيفكروا بعمق أكبر من سنهم، خاصة لو الأسرة أو الأقران مش بيقدرّوا ده. عقلك بيحميك من الندم اللي جرّبته قبل كده، لكن في نفس الوقت بيخنقك لأنك مش بتسمح لنفسك تطلّع اللي جواك. الحل مش إنك تخلي طرف ينتصر على التاني تمامًا، لكن تتعلم توازن بينهم: تستخدم نضجك عشان تبني حياة مستقرة، وفي نفس الوقت تلاقي طرق آمنة وخاصة تفرّغ فيها التراكمات بدون ما تندم. جرب تكتب يومياتك بشكل منتظم، مش بس كلام، لكن كمان أسئلة زي "إيه اللي مخليني أحس كده دلوقتي؟" و"إيه اللي أقدر أعمله دلوقتي عشان أحس بتحسن بسيط؟". ده بيساعدك تخرج البركان بدون ما ينفجر على حد. كمان، ركز على بناء مهاراتك وتعليمك زي ما عقلك بيقولك، لأن الاستقرار اللي بتسعى له هيخلّيك أقوى وأقدر تختار الناس المناسبين في المستقبل. وادعي ربنا كتير، اطلب منه راحة القلب والتوفيق، فالدعاء بيخفف الضغط الداخلي ويفتح أبواب جديدة. أنت مش لوحدك في الصراع ده، وكتير من الشباب بيمرّوا بنفس الإحساس. لو عايز تتكلم أكتر عن طرق عملية للتعامل مع الفراغ أو بناء الثقة تدريجيًا، أنا هنا أسمعك. ابحث كمان عن أسئلة مشابهة على فدني عشان تشوف تجارب ناس تانيين.
تم النشر الأربعاء، ١٩ أغسطس ٢٠٢٦
شكراً على كلامك، انتِ عندك حق الصراحة و هسمع كلمتك و ربنا يقدم اللي فيه الخير 🤍
تم النشر الخميس، ٢٠ أغسطس ٢٠٢٦
عجبني انك بتمدح الحاجات اللي انت بتحبها في شخصيتك ودي صفات لازم تُمدح فعلا لإن احنا عايشين في زمن اصبح مغيب عقله والتعافي صعب من الحاجات المنتشرة دي .. وحل المشكلة اول حاجة هي انك تلجأ لربنا وعيططط وانت بتصلي وأقسم بالله ماهتخلص صلاة الا وانت مرتاح إن شاء الله.. ثانياً دي حاجة طبيعية جدا أن مفيش ناس طبيعية نعرف نتعامل معاها في الجيل دا ودا تعقيباً للنقطة اللي قلت عليها .. (أهم حاجة علاقتك بربنا و افضل حاجة في الزمن دا انك تكون لشخصك وبس مش شرط يكون في عندك حد انت مكفي نفسك وزيادة وحاول تزرع الكلام دا في نفسك عشان العقل بيصدق )واللي انت فيه دا اكيد خير مش احسن ماتمشي مع حد ياخدك لطريق غلط بيشتم وغيره فدا الخير واعي ربنا بالصحبة الصالحة ... ومتسمعشششش موسيقى ودي اهم حاجة
تم النشر الخميس، ٢٠ أغسطس ٢٠٢٦
لعرض السؤال في فدني اضغط هنا