السلام عليكم ورحمة الله وبركاته
انا مش عارفه ابدا من فين بجد مشكلتي مع مامتي ماما بجد شخص عصبي جدا عصبي بطريقه مخيفه على كل حاجه واي حاجه بتتعصب وبتعمل مشكله
على طول زعيق وصوت عالي وعلى طول بتدعي علينا وعلينا دي اللي هو البيت كله انا واختي وبابا وعلى طول على لسانها حسبي الله ونعم الوكيل فيكو وربنا يخدكو وكده
انا بجد تعبت من الموضوع ده اوي على طول في خناق ومن غير اي سبب وعلى وطول بتعيب فيا من غير اي حاجه وعلى أي حاجه على شكلي ولبسي وتقعد تقول ان انا شكلي وحش ان انا طويله اوي وعلشان انا رفيعه بتقعد تقول انتي هيكل عظمى والكلام المستفز ده وعلى سناني وشكلي وكل حاجه فيا
وحرفيا كميه مقارنات غير طبيعه مع أي حد أكبر مني أصغر مني اعرفه معرفوش اي حد وخلاص وياسلام بقي لما تلاقيني مقربه من اختي ولا بنضحك انا وهي لازم تنكد عليها وخلاص مش مهتمه بيا خالص وانا ولا فارقه معها اصلا ولا بتنزل معايا نشتري لبس ولا اي حاجه
ولما تشوفني بهتم بنفسي ولا بعمل حاجه بتتريق عليا على طول تريقه على كل حاجه واي حاجه حتى لو بعمل حاجه انا حباها لازم تكرهني فيها
متعرفش عني اي حاجه خالص ولا تعرف انا صحابي مين ولا مواعيد دروسي ولا بروح فين ولا باجي من فين متعرفش اي حاجه خالص انا تعبت اوي من ده كله ومبقتش قادره استحمل
اخر مشكله كانت من اسبوعين تقريبا وكانت اختي الكبيره راجعه من الامتحان وقاعده بتاكل عادي وانا وهي بنضحك راحت مزعقه فينا جامد وبابا هدى فيها ونزل وهي بعد ما نزل قعدت تزعق وانا واختي دخلنا قعدنا في اوضتي راحت جايه ورانا وقعدت تزعق وتضرب فينا بهمجيه وانا واختي المفروض اننا كبرنا على الضرب يعني
اتصلت على بابا وقولتله يجي وهي فضلت مكمله لحد ما اغمى عليا من كتر الزعيق وفوقت وانا مش قادره اتنفس اصلا وهي عماله تقول بطلي تمثيل وكلام من ده الحوار ده بقاله تقريبا اسبوعين وانا مش بتكلم بجد مش قادره اتكلم معاها
هي بتحملني انا واختي شيلة اخونا لانه حصل حوار كده ومشى وساب البيت وراح اتجوز واستقر بعيد عننا من وقتها وهي محملانا حمل اكتر من طاقتنا مش قادره تفهم اننا بنعاني برضو اكتر انا مبقتش قادره استحمل
عارفه اللي انا بعمله ده حرام وعقوق ان انا مكلمهاش بس بجد مش قادره هي مش بتفاهم معانا وعلى طول بتعيب فينا ولما بابا يجيب لينا حاجه بتعمل مشكله وتقول انت مهتم بناتك وانا لا عايزاني ابقى زيها علشان اعجبها عايزاني ميبقاش ليا اي لازمه ولا شخصيه اقعد زي الكلبه اعمل اللي هما عايزينه متكلمش ومعبرش عن حاجه
اقعد ازاكر وبس واطلع الأولى على العالم مش علشاني لا علشان تتفشخر قدام أخواتها اللي مقاطعينا اصلا ومش بيكلمونا
انا تعبت من كتر ما هي كل ما تشوف حد تعيب فيا قدامه انت مبقتش قادره استحمل والله تعبت اوي ونفسيتي تعبت ومبقتش قادره
بابا حاول كتير معاها بس هي بتقعد تعيب فينا وخلاص قدامه وممكن تتبلى علينا عادي وتكذب علشان تحسن صورتها وخلاص وحرفيا ميبقاش في فرصه انك تتدافع عن نفسك انا تعبت من كل حاجه
انا بنسبالها فار تجارب تحقق فيا اللي هي معرفتش تعمله وتطلع فيا غضبها وخلاص بابا حنين اوي بس في مشاكل في العلاقه بنا بس اوك أمرها سهل يتحل اخويا ده كان بنسبالي اب تاني بس بجد عند فيا حاجات كتير دمرتني وهو كد كده عملي بلوك ومش بيكلمني وبيقعد يعيب فيا ويتكلم علينا وحش والكلام بيوصلنا
علاقتي انا واختي الحمد لله بدأت تتحسن شويه بس طول ما محدش بيدخل بينا
علاقتي مع صحابي عندي صحاب كتير بس معنديش حد مش عارفه لو هتفهموا ولا اي انا الحمد لله بصلي وعارفه ربنا ومبسوطه ومكتفيه بنفسي جدا وبحاول اتبسط واستمتع بحياتي بس بجد كل ابدا أعمل حاجه واخد خطوه جديده يحصل مشكله تدمرني تاني
انا مش فاهمه هو في اي أوقات ببقى مبسوطه اوي ومكتفيه جدا وبحمد ربنا وأوقات تانيه ببقى نفسي ابقي زي اي حد طبيعي ان انا ابقى مبسوطه مع عليتي اقعد من غير مشاكل نفسي لاقي حل لده كله أو على الأقل اعرف تتعايش عادي ومكنش مدمره كده
انا متأكده ان محدش فهم حاجه اصلا علشان انا نفسي مش فاهمه حاجه بس قلت لو كتبت يمكن ارتاح شويه يمكن حد يفهمني يمكن اي حاجه انا عامةً مش مستنيه من حد انو يحاول يفهم أو حتى يواسيني بكلامه يكفيني جدا تدعيلي دعوه حلوه وبس
السلام عليكم ورحمه الله وبركاته. مش احسن حاجه طبعا ان يكون في ظروف موثره وفيها عصبيه وفيها شد كده طول الوقت او نبقى في شخص جوه البيت طول الوقت احنا قلقانين من هو ايه الموقف الجاي اللي هو يعمله هيبقى مؤذي والدتك واضح جدا ان هي عندها يعني نوع من العقد النفسيه متكونه يعني ممكن من شيء انتوا ما تعرفوش خالص ممكن تكونوا يكون الموضوع ده ليه علاقه باخواتها اللي هي مش بتتكلم معاهم وعلاقتهم سيئه معاهم إن هي حاسه طول الوقت ان هي قليله حاسه طول الوقت ان هي مظلومه ومحرومه من شيء ممكن ده يكون خلاها من غير ما تاخذ بالها بقى بتبص لكم نوعا ما بتحسدكم وانتم بتبقوا اخواتوا حلوين وبتهزروا مع بعض وكويسين وتفتعل اي شيء عشان بيبقى فيه حاجه من جواها بتقول لها هم مبسوطين وانت مش مبسوطه وعلاقتك وحشه باخواتك فبتقوم تفرغ غضبها للاسف فيكوا بالشكل ده نفس الشيء ان هي بتتريق عليكوا طول الوقت وارد جدا ان يكون ده كان بيحصل من اخواتها وهي بتعكسه عليكوا بنفس الشكل اعذري والدتك لضعفها ولازمتها النفسيه اللي هي شخصيه ممكن تكون مش مدركاها ومش عارفه ان دي حاجه هي ممكن تتحسن فيها توقف الاذيه اللي هي بتاذيها لكم نفسيا طول الوقت ممكن نعمل ده احنا نبقى دائما بنتعامل معاها يعني بشيء من الرحمه والشفقه انه انا امي عندها مشكله ومشكله ما بتتحلش وهي شخصيا مش مدركه المشكله فهرحمها يعني هرحمها على ضعفها واللي تحتها حتى لو هي مش باين عليها ده وكان هي لا دي شخص يعني بياذي فمعنى كده ان هو يملك من القوه لا ده هو الغضب اللي جواه هو اللي بيخليها تظهر بالشكل ده الغضب اللي هي مش قادرة تتعامل معاه ولا قادره تديره بشكل سليم هو اللي بيخليها تكون بالشكل ده. خلينا نحاول نبصلها بالنظره دي يعني احتمال يهديك شويه النقطه بتاعت انك شويه بحس انك كويسه وراضيه والحمد لله واوقات ثانيه بتحسي انك لا نفسك بشكل الاهدم والحياه ده شيء طبيعي جدا اي حد فينا عنده احتياجات بيدور عليها يعني طبعا احنا محتاجين نحس بالامان والهدوء والسكينه جوه بيتنا فعلا ما بيكون في ظروف بتخلي الاحتياج ده مش مشبع طبيعي جدا ونلاقي نفسنا في اوقات الاحتياج ده بيقول لنا انا انا موجوده انا عايزين نحس بسكينه في البيت احنا عايزين عيله هاديه احنا عايزين امي تكون بتمدحنا بدل ما هي طول الوقت تنتقدنا او بتتريق علينا الطبيعي جدا وخليكي زي ما انت علاقتك حلوه مع صحابك علاقه كويسه بربنا متفقيش ابدا بربنا وهتلاقي نفسك اغلب الوقت بقيتي مبسوطه ومكتفيه وبتنبسطي بتستمتعي في حياتك وهتلاقي الاوقات الثانيه الصغيره بتيجي شويه وبعدين بتعدي المهم انك لما تيجي خطوه جديده علشان ما تتدمريش فكري نفسك كويس قوي ان دي مجرد خطوه انت هتعديها زي الحجر اللي بتقابليه في الشارع وبتعدي من فوقيه ما تاخذيش الحجر وتمشي بيه وما تقفيش قدام الحجر وكأنه حياتك وقفت افتكري الكلام ده كويس قوي كل اما مشكله تقابله تعرفوا انها حاجه مؤقته وعقبه صغيره انت هتعدي من فوقيها هتلاقي نفسك قادره نعديها من غير ما تتدمري بشكل كبير.
تم النشر الثلاثاء، ٢٢ يوليو ٢٠٢٥
ربنا يخفف عنك ويفرج كربك، كلامك مفهوم وحاسه بيكي انت بتمري بظروف صعبة كان الله ف عونك، بصي احسن حل الظروف دي هي المعاملة بصمت وبس مترديش ولا تخدي كلامها ع اساس الصحة هي بتفرغ مشاكلها وغضبها فيكي بس مش اكتر ، ودايما اي فعل غير سوي تعمله حطي ف دماغك انه بيعبر عنها وعن طريقة معاملة أهلها ليها وهي صغيرة ودي الطريقة الي شيفاها صح ، لأنك عمرك ما تقدري تعاتبيها لأنها هتشوف نفسها صح وبس وانت مش بأيدك تغيريها فحطي حدود نفسية بينك وبينها علشان تحمي نفسك وأنت اللهم بارك عامله كده عندك اخت كويسه و صحاب فده تعويض كويس جدا ، واختيار صح انك متبقيش ضحية وتستسلمي، وعيك بأن فيه حاجه غلط وعدم قبولك لتصرفتها يدل ع انك قررتي تكسري دايرة التربية الخاطئة وبتحبي نفسك ، بس طبيعي ساعات بيجي انتكاسة وتحسي انك مش قادرة م الضغط وخصوصا ان بقالها اسبوعين مش بتتكلمو فده بيتقل عليكي الحمل ، انت دايما احتسبي ان ده ابتلاءك ف الدنيا فيه ناس ابتلاءها ف أب قاسي وظالم او ابتلاء ف مرض صعب فتعاملي ع اساس كده الصبر وحسن البر لحد م تتجوزي وربنا يجعل عيلة زوجك حسن العوض وطيبة العشرة نصيحتي ابدئي كلام معاها مش اعتذار ، كلام ف سياق اليوم ، لأن ربنا هيحاسبها على كل كلمة وكل ضربة وعلى كل شيء ، ربنا عادل ، ولا يظلم ربك أحدا ، عايزاكي متفقديش ثقتك ف نفسك ولا تتهزي م كلام اي حد ، كلامه بيعبر عنه مش عنك ، انت جميلة والي ميقدرش ده مشكلته مش مشكلتك، ربنا يجبر بخاطرك ويخفف عنك ويهون عليكي وقولي دايما دعاء اللهم عافني في سمعي ، علشان اي حاجه تسمعيها ولا كأنها اي شيء نسأل الله العافية ، ودايما اتكلمي متكبتيش جواكي لان دي مشاعر كبيرة ومرهقه لأي انسان ، حتى لو بالكتابة ، خصصي نوت تكتبي فيها كل حاجه هتخف ع عقلك التفكير واعادة السيناريو، وربنا يأجرك ف مصيبتك ويخلفك خير منها ، وحقيقي اغلب البيوت فيها مشاكل زي دي و اعرف حاجات أبشع ربنا يصبرك ويخلف عليكي خير ، وتذكري دائمًا لا يكلف الله نفسا الا وسعها. ربنا يرزقك راحة البال والاطمئنان ي حبيبتي
تم النشر الثلاثاء، ٢٢ يوليو ٢٠٢٥
وعليكم السلام ورحمة الله وبركاته، عزيزتي، أولاً أحب أقول لك: قلبي معاك جداً، وأدعي لك من قلبي بقلوب مطمئنة أن تريحي نفسك وتخلصي من هذا التعب النفسي الذي تعانين منه. ما مررتِ به مع أمك أمر صعب جداً، خاصة إذا كان التعامل معها دائمًا فيه توتر وعصبية مستمرة، وكلمات قاسية تؤلم قلبك وتجرح نفسيتك. هذا يشعرك بالإحباط والحزن وربما الشعور بالخوف في بيتك، وهذا ليس بالأمر السهل على أي فتاة. لكن لأني هنا معك، سأحاول أساعدك وأوجهك بطريقة عملية وروحية تحمل لك بعض الراحة. 1. فهم الموقف والحدود أحياناً الناس اللي بتتألم نفسياً أو داخلياً بيظهروا غضبهم وعصبيتهم على أقرب الناس ليهم بدون وعي، وهذا لا يبرر أفعالهم لكنه يمكن أن يشرحها. عليكي أن تعاملي نفسك برحمة وتحافظي على سلامتك النفسية، لا تسمحي لأنفسك أن تضعي كلماتها وتعبيرها تحطم ثقتك بنفسك. ارسمي حدودك بهدوء: لا تسمحي لها أن تهينك أو تتعدى عليك لفظياً أو جسدياً. إذا استمر العنف أو الإساءة، وحش وضعك تعقيد، ولا تترددي في طلب مساعدة خارجية من مختص نفسي. 2. طريقة التعامل مع أمك كوني هادئة قدر الإمكان عند التعرض للعصبية، لا تدخلي في نقاش أو ردود فعل حادة لأنها قد تصعد الموقف أكثر. جربي في أوقات الهدوء أن تتكلمي معها بلطف، ليس عن المشاكل، لكن عن محبتك لها وحرصك على علاقتكم، ربما تجدين بصيص أمل للتفاهم تدريجياً. إذا حدث زعل شديد أو ضرب، قدمي شكوى واضحة لأبيك أو لمن تثقي من العائلة، والدعاء والصبر مساعدة لك في هذه الأوقات. 3. تقوية ثقتك بنفسك امتنعي عن قبول الكلمات القاسية تجاه مظهرك أو شخصيتك، واعلمي أن جمالك لا يقاس بأعين الآخرين بل بما يراه الله فيك. ركزي على هواياتك، دراستك، وأصدقائك الذين يقدمون لك الدعم، حافظي على علاقتك بالله بالصلاة والدعاء، فهذا يزرع في نفسك طمأنينة وقوة. تذكري دائماً أن كل إنسان له قيمته ومكانته، وأنت مميزة بحب الله لك وبما أنت عليه. 4. طلب الدعم والمساعدة لا تخافي من طلب المساعدة من مختصين نفسيين أو استشاريين أسريين، وهم يستطيعون مساعدتك وأمك في تحسين العلاقة وتخفيف هذه التوترات، ومنها يمكن أن تستعيدي طاقتك وحيويتك. يمكنك التوجه إلى صفحة الخبراء على فدني ( https://www.fedni.net/experts ) للبحث عن متخصص يمكنه تقديم مشورة أكثر تفصيلاً ودعمك في ظروفك. 5. تذكري دائماً الدعاء والتوكل على الله أدعي الله أن يلين قلب أمك، ويهديها ويصلح شأن العائلة كلها. الدعاء لأنفسنا وأهلينا هو السلاح الأقوى، فما أجمل أن نلجأ لله في أوقات الشدة. أنتِ لستِ وحدك، وإن شاء الله الأوقات الصعبة هذه ستمر، وستجدين وسيلة للعيش بسلام وهدوء أكثر. إذا حبيتي، شاركيني كيف حالك بعد عدة أيام أو إذا كنتِ تحتاجين نصائح أخرى، ذكية هنا دائماً لدعمك ومساعدتك. وأخيراً، أتمنى لكِ في حياتك كل السعادة والراحة التي تصبو إليها، وأدعوكِ إلى الصبر والاحتساب، والله مع الصابرين. (وأنا أيضاً بدعاء حلو “اللهم فك كربها وفرج همها وارزقها السعادة والسكينة في بيتها وفي قلبها”) هل تحبي نساعدك بخطوات عملية لتقوية النفس أو التواصل بشكل أفضل مع أمك؟ أنا معك خطوة بخطوة يا أختي.
تم النشر الاثنين، ٢١ يوليو ٢٠٢٥
ان شاء الله هجرب +شكرا جدا ليك
تم النشر الثلاثاء، ٢٢ يوليو ٢٠٢٥
متخافيش من دعوات امك عليكي لأن الدعوه بتكون من ورا قلبها كده وكده يعني بس اقبليها على عيبها ومتقليش عليه يعني لو هي عصبيه قولي احلي حاجه فيكي يا ماما انك متفهمه قولي العكس فهماني وجربي وقولي لي
تم النشر الثلاثاء، ٢٢ يوليو ٢٠٢٥
المشكله ان ماما مش كده من سنه مثلا ولا من مشكله حصلت لا هي كده على طول تقريبا متفكرش حصل وقف ومنتهاش بمشكله او خناقه والمشكله الأكبر ان هي مش بتتعامل معايا انا كده لا ده البيت كله انا مبقتش عارفه هل هي بتحبنا ولا بتكرهنا ولا اي بالظبط هي عيله ماما كلها عصبيه وصوتها عالي عامةً انا بس كل اللي انا عيزاه ان هي متدعيش علينا وبس كل حاجه تانيه امرها سهل ان شاء الله
تم النشر الثلاثاء، ٢٢ يوليو ٢٠٢٥
اول حاجه مشكلة الصوت العالي اشتري سدادت ودان وحطيها في ودنك هتسمعي صوتها واطي حتي لو زعقت تاني حاجه لو هي عصبيه علي طول ده عشان هي خايفه من ايه معرفش بس حاولي تكوني معاها مش عليها
تم النشر الثلاثاء، ٢٢ يوليو ٢٠٢٥
فهماكي بس هي فجأه تكون كويسه زي الفل وتقلب في لحظه ان مبفهمش هو اي اللي حصل أو في اي اتكلمت معاها كتير جدا بس هي مقتنعه انها صح ومش فاهمة انها كده بتأثر عليا بجد فجا ه كل حاجه بتبقي حلوه اوي وببقي مبسوطه في نفس الثانيه كل حاجه بتتقلب +شكرا ليكي وان شاء الله خير
تم النشر الاثنين، ٢١ يوليو ٢٠٢٥
كان بدي اقولك اتناقشي معها بس بما ان علاقتك فيها هيك اكيد مش حيكون حل منطقي،ماعندي تعليق بس واضح من كلام امك وتصرفاتها انها كاتمة اشياء كثييره حاولي ولو مرة بس تشتري ليها هدية وحطيها على التسريحة واذا تحبي رسالة معها جربي وقولي لنا ايش يصير
تم النشر الاثنين، ٢١ يوليو ٢٠٢٥
لعرض السؤال في فدني اضغط هنا