السلام عليكم، متخلكيش حساسة تجاه كل كلمة ونظرة، واعرفي إن مش أي بنات مشيتِ معاها واتصاحبتم على بعض إنكم كده بقيتم أصدقاء وأنتِ عندهم بنفس الغلاوة والمعزة. الصداقة مرتبة ومكانة كبيرة مش كل الناس اللي هتقابليها في حياتك هتوصل لها ففرقي بين الأصدقاء اللي بيحبوا الشخص ويعتزوا به ويخافوا عليه من أي كلمة وتصرف وبين زمايل عاديين أو رفاق طريق. **** ممكن اللي أنتِ ماشية معهم حاليا بيحسوا بغيرة لما حد بيمدحك أو بيضايقوا إنك ظاهرة عنهم وبتلفتي انتباه الناس اللي بتقابلكم فبيوجهوا الانتقادات والنظرات دي. من كلامك حاسة إن سنكم صغير، فروقي كده واعرفي إنك لسه هتقابلي ناس كتير ونوعيات مختلفة من البشر وخليكِ مرنة أكتر عشان الحساسية الزائدة هتتعبك، واتعلمي تضعي حدود للناس في تعاملهم معك، أي حد يتخطى الحدود دي ويجرحك بكلمة أو ينتقص منك بكلمة أو نظرة ابعدي عنه واحفظي كرامتك وحدودك وإن شاء الله في طريقك بالحياة تقابلي ناس تقدرك وتحبك وتستحق صداقتك. ** لو كل أصحابك والبنات اللي بتمشي معهم دايما بيتعاملوا بنفس الطريقة فيبقى أنتِ محتاجة تراجعي أفكارك وطريقة اختيارك للأصحاب لأن ممكن فيه حاجة بتخليكِ تنجذبي لنوعية معينة من الأصحاب بيكونوا كلهم نسخة واحدة وبيعاملوكِ بنفس الأسلوب. تأني في اختيار أصحابك والناس اللي بتقضي معهم وقتك واختاري صحبة صالحة تعينك وابعدي عن أي حد يتعب نفسيتك أو يتجاوز حدوده أو حتى ممكن يكون صحبة سيئة بتبعدك عن طريق ربنا بأي تصرفات غلط. وربنا يوفقك ويرزقك الصحبة الصالحة إن شاء الله.💚💚
آمين يا رب، أنتِ وأنا إن شاء الله. بالتوفيق دايما. ❤️
تم النشر الأحد، ١ نوفمبر ٢٠٢٦
مرسي لذوقك جدا بعمل اللي انتي بتقوليه وبحاول فعل والحمدلله بحاول اني مضيقش لاني عرفه انهم مش قصدهم وكل انسان بيكون فغفله اوقات ومش لازم الكل يتقبل النصيحه انا حبيت اطلع كل اللي جوايه بس الحمدلله يارب انا وانتي وجزاك الله الف خير ربنا يزيدك علم يارب وييسرلك كل امورك ويجعلك من المحبوبين في الارض والسماء ويحعلك صالحه مصلحه ويكون عندك معلومات اكثر تنفعي بيه غيرك 💗💗🌷
تم النشر السبت، ٣١ أكتوبر ٢٠٢٦
ربنا يوفقك يا قمر ويبارك فيك وتطوري من نفسك أكتر وتكوني كل يوم أفضل من اليوم اللي قبله.❤️ بصي أي حد بينصح في الدين هتلاقي صحابه والناس بيقولوا له يا شيخ وكده فممكن ترفضي الكلمة بلطف وتصححي لهم إن كلنا مسلمين ومش لازم اللي ينصح في الدين يكون شيخ وبس، وممكن ترديها بهزار مثلا هو أنا أطول أو ربنا يسمع منك، ولو بتضايقك ممكن تقولي لهم إنها بتضايقك. وعادي كملي نصح وربنا يوفقك ويهدي بكِ، بس برضه خدي بالك امتى تنصحي وإزاي توجهي النصيحة عشان مش كل المواقف ينفع فيها النصح والدعوة وممكن تعمل حاجز بينك وبين اللي بتحاولي تنصحيهم وخليكِ مرنة وتوقعي برضه إن مش أي حد هتنصحيه هتيقبل النصح فمتحسيش إنك قصرتِ في النصيحة أو فشلتِ، أنتِ بتعملي اللي عليكِ وبتوجهي النصح مرة أو اتنين في الوقت المناسب وخلاص اللي قدامك له الاختيار. وجزاكِ الله كل خير. ❤️🌺
تم النشر السبت، ٣١ أكتوبر ٢٠٢٦
شكرا ليكي للمره الثانيه الحمدلله والله بحاول استمع واشوف اي حاجه فيه بصلحه وبتصلح مع فكره ان مفيش انسان كامل والانسان بيطور من نفسه اكثر واكثر انا انسانه بحاول الحمدلله اكون باي طريقه ايجابيه اه بعيط مش هقولك شويه لا ممكن يكون ايام بس برجع ثاني احاول لان عمرنه ده مش هيرجع ثاني احنا بنكبر بس مشكلتي كمان انا مش شيخه بس بحاول انصح صحابي عشان منجيش يوم القيامه الْأَخِلَّاءُ يَوْمَئِذٍ بَعْضُهُمْ لِبَعْضٍ عَدُوٌّ إِلَّا الْمُتَّقِينَ﴾ [سورة الزخرف: 67] فيما معني الاية او التفسير منكونش اعداء او الصحاب اللي مكنوش صالحين فلدنيا او كل حاجه بيعملوه معاصي هيجو يوم القيامه اعداء لبعض فا انا بحب انصحهم وفي بنات بيكوني كيوت ويفرحو بجد وبل بلعكس بيتجمعو حوليه وبيحبو يعمرفو اي حاجه بقوله عن الدين وبسبب ده وبفضل ربنا خليت احد من صحابي يسيب الموسيقي ويبدا ينتظم في صلاته ويصلي وهو نفسه اللي قلي وشكرني ربنا يصلحهم كلهم يارب مشكلتي اني في البعض بينادوني شيخه واي حاجه اقوله الشيخه وانا مش شيخه ده يريت والله بس بستكبر الكلمه اوي لاني مش كده عشان بس بنصحهم
تم النشر السبت، ٣١ أكتوبر ٢٠٢٦
العفو يا جميل، أنا أكبر منك بشوية حلوين... عموما عادي في سنك تقابلي بنات غيورة والعاطفة سابقاهم وهي اللي بتحركهم، فلما بيحسوا بغيرة من حد مش بيحكموا مشاعرهم وبيظهروا الغيرة حتى لو بطريقة جارحة. كويس إنك حاطة حدود للمعاملة، بس جايز أنتِ حساسة وبتعيطي من النقطة دي عشان أنتِ مهتمة برأيهم فيكِ وعاوزة يعاملوكِ بنفس اللطف والاحترام اللي بتتعاملي به معهم فلما مش بتلاقي كده بتتأثري. متلوميش نفسك على طريقة معاملتك الجميلة للناس أولا ولا تحسي بالذنب إن شخصيتك حساسة تجاه حاجة معينة، الحساسية من المواقف دي ممكن تقل بالتدرب تدريجيا وإنك تركزي على نفسك أكتر وتفهميها إن كلام الناس ورأيهم مش مهم ومش محتاجاه عشان أثق في نفسي، وناس كتير شخصيتها حساسة عادي فمتخليش دي مشكلة وتعاملي عادي ومتخليش مواقف زي دي تبعدك عن بقية الناس ولا تخليكِ تنعزلي ومتثقيش في نفسك. ممكن تبحثي على يوتيوب إزاي تقوي الشخصية الحساسة وهتلاقي نصائح تفيدك إن شاء الله. وربنا يوفقك. 💚
تم النشر السبت، ٣١ أكتوبر ٢٠٢٦
وعليكم السلام بجد شكرا ليكي ولذوقك بجد مش عرفه هل انتي كبيره ولا فقرابه سني بس واضح انك واحده عقله ونضجه وفهمه الحياه بصي انا بحب اتعامل مع الكل باحترام وكرامتي قبل اي حاجه وبخلي حدود اي حد يضايقني بقولهم لو سمحتم ده بيضيقني بس باجي عند الحاجات دي وبضايف وبعيط بحاول اني مش كل حاجه اعيط عليه بس مبقدرش دي حاجه فيه من وانا صغيره انا رغم سني 15 مش حاجه فنظر اي حد صغيره بس انا فاهمه الحياه كويس اوي بس البنات بجد صعبين ومش فاهمه ليه بيعملو كده
تم النشر السبت، ٣١ أكتوبر ٢٠٢٦
لعرض الإجابة في فدني اضغط هنا