السلام عليكم، هو طبيعي نكون مختلفين عن بعض، احنا مش مفروض نكون نسخ واحدة. ففكرة اختلافك عن اللي بتعرفهم أو حتى اللي بترتاح لهم دي حاجة عادية متخليش الأمر حاجز كبير خاصة لو لقيت الأشخاص دول كويسين وهيكونوا صحبة صالحة لك. كمان مش مشكلة لو حد علق على الاختلاف، ليه بتاخد الأمر بمنحى سلبي؟ ممكن بيقول ملاحظة عابرة مش نقد سلبي أو رفض لاختلافك عنه. *** وفيه فرق بين الاختلاف والعيب، احنا ممكن نختلف في السلوك والكلام لكن فيه أساسيات وخطوط حمراء لو الاختلاف ده يمسها يبقى هنا نقف ونقيم الوضع. هل سلوكي يمس الخطوط دي وهل يؤذي الآخرين ولا هو ببساطة إن أنا مش شبههم؟ *** ممكن لو حد وجه لك الرأي ده بدل ما تسأل عموما ليه شايف كده أو إيه يخليه يقول كده خليك محدد واطلب منه يذكر موقف أو مثال عن الاختلاف اللي يقصده. ولو معرفش يحدد مثال فبلاش أنت تحكم على نفسك من مجرد تعليق عام ممكن ميقصدش أي شيء سلبي. *** الحل مش في البعد عن الناس، أنت ممكن تتدرب على مهارات التواصل الاجتماعي وتتطورها، وبما إنك قلت بتتكلم عن نفسك بشكل مفرط وده يمكن يضايق أشخاص مش بيحبوا الناس اللي دايما بتتكلم عن نفسها فممكن دي حاجة تتحل بالتدريب وإنك تمرن نفسك إنك تستمع أكتر. *** ومش لازم تتغير عشان ترضي حد أو تحافظ على علاقتك بحد، ممكن تبقى على طبيعتك وفي نفس الوقت تكون قريب من الناس، أنت مش مجبر على اختيار حاجة من الاتنين. *** الناس اللي بتشاركك نفس فكرك واهتماماتك موجودين أكيد بس محتاج تختار التواجد في أماكنهم، يعني لو لك هوايات معينة أو أنشطة تحب تمارسها ممكن تنضم لنوادي أو ورش أو تنزل مكتبات، هتلاقي الناس اللي شبهك وده هيقلل فجوة الاختلاف اللي بتقول عليها. وفي نفس الوقت تتابع حياتك عادي مع المختلفين عنك، ده هيعطيك نطاق أوسع من التفاعل الاجتماعي والتجارب الحياتية، الاختلاف بيثري الحياة عامة، هتتعرف على وجهات نظر مختلفة وأساليب حياة واهتمامامت مختلفة. فمتهربش واسمح للاختلاف بالتواجد في حياتك، وحاول تفرق برضه بين الملاحظات العادية والنقد الإيجابي وبين التعليقات الساخرة والأحكام الجارحة. خليك مرن أكتر، وكويس إنك مش بتتعلق بحد، لكن برضه بلاش تكون منعزل تماما، خليك وسطي في علاقاتك. وبلاش تحول اختلافك لنقمة وتكون حساس من ناحيته، ومع الوقت هتلاقي إنها مكنتش مشكلة ولا حاجة. وبالتوفيق.
العفو، أكيد الموضوع يضايق بس حاول متحللش كتير أو تقف عند كل كلمة، وخليك مرن، الكلام اللي مش يعجبك عديه كأنك مسمعتوش طالما أنت واضع حدود للناس في المعاملة فأي حاجة خلف الحدود دي حاول تعديها ومتركزش أو تشغل بالك بتحليل مقاصد اللي قالها... وأنت مش مضطر تغير حاجة في طبيعتك طالما متغضبش ربنا ولا تحاول تثبت صفة لحد أو تنفيها عنك... المهم أنت تفهم وتتقبل نفسك ومش مهم رأي حد بعد كده، واللي بيعزك ومهتم بك كشخص هيتقبلك رغم الاختلاف بينكم.
تم النشر السبت، ٣١ أكتوبر ٢٠٢٦
شكرا بجد على نصايحك انا مش بتضايق من ال بيعلق علي اختلافي احيانا في بعض الأوقات و لكن ال بيضايقني ان الشخص ال بيعلق مبيوضحش اي سبب الاختلاف دا اكتر كلمة ممكن تتقال و انا بجد كرهت الكلمة دي بسبب اني طيب الكلمة نفسها يقينا في زمان الواحد بيحسها شتيمه او بحس ال بيقولها يحسس الشخص انه لو كان طيب فعلا يبقا مثلا الشخص دا زي ما في خيالهم هوه هينفذلهم اي حاجه و يقدرو ياجو عليه براحتهم برضو زي ما هما عايزين دي ال وصلني من اغلبية الناس على الكلمة دي و انا الحقيقيه كرهتها مش لاجل الكلمة بل لاجل تعبيراهم و معني الكلمة عند البعض منهم علي الرغم انا مش كدا خالص و مسمحش ابدا لاي حد انه ياجي عليا او يجرحني و ال بيعمل كدا انا بشيله نهائيا من حياتي بعتبرة صفحة و اتقفلت
تم النشر السبت، ٣١ أكتوبر ٢٠٢٦
لعرض الإجابة في فدني اضغط هنا