حاليا انا داخله تالته ثانوي وكنت محتاره ادخل علمي علوم أو رياضه لاني مكنتش لسه عارفه كليه احلامي أو شغفي فين لحد ما كنت مياله للهندسه والرسومات واخترت بعدها علمي رياضه وحاليا انا متشتته اوي لاني مخدتش احياء قبل كده ودلوقتي انا سلمت ورقه الرغبات ومش عارفه اعمل اي دلوقتي
كليتي وهدفي في علمي رياضه اما حاسه ان الاحياء حلوه !! اعمل اي !!
أولاً، خليني أقولك إن اللي بتمرّي بيه طبيعي جدًا في سنك، وكتير من الطلبة بيحسوا بنفس التشتت ده لما يوصلوا لمرحلة تقديم الرغبات. إحساسك بالندم أو الشك بعد ما سلّمتي الورقة ده شائع، بس الحمد لله إنك لسه قادرة تفكري وتخططي. بما إنك سلّمتي ورقة الرغبات فعلاً، فالخطوة الأولى دلوقتي هي التحقق من إمكانية التعديل. في بعض السنين بيفتحوا فترة تعديل محدودة بعد التقديم، فلو لسه في فرصة روحي لمكتب التنسيق أو اسألي في مدرستك عن الإجراءات. لو مفيش تعديل، يبقى نركز على الإيجابيات اللي في اختيارك الحالي (علمي رياضة) ونبني عليها. فكري معايا: إيه اللي جذبك للأحياء دلوقتي بالضبط؟ هل هو فضول مؤقت بسبب إنك ماخدتيهاش قبل كده، ولا إحساس حقيقي إنك عايزة تتجهي لمجال زي الطب أو الصيدلة أو العلوم؟ قارني ده برغبتك الأصلية في الهندسة والرسم. لو الهندسة لسه بتثير حماسك أكتر، يبقى خليكي في مسارك واستغلي الوقت في تطوير مهارات الرسم أو البرمجة اللي هتفيدك في الكلية. نصيحتي العملية: صلي استخارة وادعي ربنا يوفقك للأفضل، ده هيديكي راحة نفسية. ابحثي عن كليات علمي رياضة اللي فيها جوانب إبداعية أو تصميم (زي هندسة العمارة أو التصميم الصناعي) عشان تحسي إن فيه تقاطع مع اهتمامك بالرسم. لو لسه عندك وقت قبل التنسيق النهائي، حاولي تتكلمي مع حد من السنين اللي فاتت دخلوا المجالين عشان تسمعي تجاربهم الحقيقية. أنتِ قادرة تتأقلمي وتنجحي في أي مسار تختاريه، المهم دلوقتي تركزي على الخطوة الجاية بدل ما تندمي على اللي فات. لو عايزة نتكلم أكتر عن خيارات معينة أو إزاي تطوري مهاراتك، أنا هنا.
تم النشر الخميس، ١١ يونيو ٢٠٢٦
بصي كل الناس في المرحله دي بتمر بالتشتت ده بالذات الي معندهمش هدف محدد فانت اقعدي مع نفسك كده مع كوبايه شاي وفكري هل انا عايزه طب ولا هندسه هل انا عاجبني اكتر قيمه الدكتور فالمجتمع وتخفيف الم وانقاذ حياه الناس ومكانتي ان كل الناس هتحترمني وتستشريني لاني دكتوره وهل هستحمل تعب المزاكره الي هيبعدني عن التجمعات والخروجات سنين وهفضل مضغوطه سنين ولا لا وهل انا حابه هندسه ومجالاتها سواء معماري ولا حسابات ولا ميكانيكا تخيلي نفسك مكان كل وظيفه بتعيشي يومها في المزاكره والفشل واقراي اكتر عن الودايف عشان تعرفي تتخيلي بصي الامر يرجعلك فلاول والاخر طبعا بس لو انا هنصحك انصحك انك تدخلي حاجه فالمجال الطبي لعده اسباب اولا مكانه كبيره جدا فالمجتمع كل الناس هتحترمك احترام كبير جدا وكل الناس هتستشيرك وتحتاجك ولما يقعو فمشكله صحيه انت اول حد هيجي فبالهم ثانيا انك هتخفيف الم انسان بيتعذب وممكن يفضل طول عمره يدعيلك ممكن تنقذي حياه انسان ومن احياها فكانما احيا الناس جميعا وكمان الدخل كويس جدا وعندك فرصه ممتازه لو ناويه تسافري فدي مجرد نصيحه مش اكتر لو انت حابه هندسه وعايزها طبعا خشيها بس فكري مع نفسك وان شاء الله توصلي لقرار وربنا معاكي
تم النشر الأحد، ١٤ يونيو ٢٠٢٦
صلي استخارة الأول وبعدها شوفي هل انتِ تقدري تغيري الورقة دي ولا لا.. لو هتعرفي تغيريها شوفي نفسك في ايه واختاريه شوفي الأول في للأولويات (حاجة نفسك تدخليها/ أو حاجة شغلها مناسب لكِ وفلوسه كويسة) لو مش عرفتي تحددي خلاص شوفي ايه المواد الأسهل لكِ ومش هتكوني مضغوطة نفسيًا وانتِ بتذاكريها أو بتعرفي تحليها كويس، هل انتِ بتحبي الأحياء والتشريح أو الذرات والفضاء وقوانين الفيزياء والحاجات دي ولا ليكِ في الرياضيات والقوانين الثابتة والهندسة وما تندميش على حاجة حصلت وما تقوليش لو حصل كذا كان هيحصل كذا.. لأنه مثلًا ممكن لو كنت دخلتي أدبي مثلًا كان زمانك عالمة آثار وبتاخدي فلوس.. بس ربنا سبحانه قدر لكِ انك ما تدخليش آداب عشان انتِ بالذات لو حصل لكِ كدة كان ممكن دينك يضيع مثلًا أو تكوني برا كل شوية وانت نفسك ترتاحي... فهو ربنا مقدر لكِ الخير بإذن الله وتوكلي على الله وهتُوَفقي بإذن الله وتعرفي نفسك في ايه💙 أنا في تالتة اعدادي مكنتش قادرة اذاكر لاني مش عارفة انا عايزة ايه هو انا مسلمة كله لله بس انا عنديش هدف فاختارت دار علوم واختارت اللي بعرف أحله أكتر وهو علم رياضيات ما انها بتدخل من كل حاجة وقلت ساعتها نفكر زي ما تيجي تيجي
تم النشر السبت، ١٣ يونيو ٢٠٢٦
لا الاحياء كويسة فى انك تحفظى وتفهمى بس اسئلتها بتجى صعبه اوى بامانة ومحدش بيقفلها وغير كدا شغفك فى الهندسة يبقي الفترة دى تاخدى كورسات رياضة وتحلى كتير علشان تدخلى فاهمة الاساسيات اللى خدناها باعدادى وثانوى علشان الرياضة تراكمية وربنا معاكى متقلقيش ومتفكريش فى اصحابك اللى دخلو علمى علوم ويقولك احسن ومش احسن خليكي بحالك وركزى ع هدفك اللى جاى تمام
تم النشر الجمعة، ١٢ يونيو ٢٠٢٦
طالما شغفك هندسه يبقي اختاري علمي رياضه، انا علمي علوم وبحب الأحياء لكن بحس ان الرياضه حلوه وزيك بردو عندي حلمين واحد علمي علوم والتاني علمي رياضه بس لقيت نفسي بألف في الرياضه واخترع حل محدش عمله وبينقصوني بسببه 🙂🙂فقررت ادخل علوم
تم النشر الأحد، ١٤ يونيو ٢٠٢٦
لعرض السؤال في فدني اضغط هنا