السلام عليكم ..
حاليا انا طالب ١٩ سنه ، في كليه تربية قسم عربي ، قربت اخلص السنه الاولى و داخل على تانيه خلاص
و انا مشتغلتش في حياتي كتير في السنين اللي فاتت ، و قاعد طول الوقت ده بدور على شغل بحيث اخلص امتحانات و انزل على طول
بس جاتني فكره ممكن تسهل عليا كتير ..
و هي إن أنا ما دام تخصص لغة عربية ، ليه مقعدش في فتره الإجازه أدرس منهج المرحلة الإعداديه كويس ، و آخد خبره من مدرسيني زمان في وضعهم لخطه سير السنه الدراسيه
و اشتغل في مجال الدروس الخصوصية
مع الحفاظ طبعا على أمانة المهنه و ابذل كل جهدي في العلم اللي انا بقدمه للطلبه
مع العلم اني اعرف ناس كتير عملوا نفس الموضوع في مختلف التخصصات و الكليات و هما في نفس السن ده
فـ انا حاليا محتار بين أمرين بإختصار :
• اكمل بحث عن شغل و انزل اخد خبره من الشارع
• او إن انا يبقى ليا مصدر دخلي الخاص و أمارس مهنتي الحقيقيه و اللي بحبها و اتدرب عليها و أدي كورسات لغة عربية او دروس خصوصية
السلام عليكم، بما إنك قلت إنك بتحب التدريس وهو مهنتك الحقيقية فهتكون هي الترشيح الأفضل لو هتاخد رأينا. لكن طبعا لازم تضع في بالك إن التدريس مهارة، مش كفاية معرفة المنهج، طبعا محتاج مهارات الشرح وتوصيل المعلومة وإدارة الوقت والتعامل مع الطلبة، فلازم الأول تتأكد أو تصقل المهارة دي. استغل الفترة الباقية على الإجازة في إنك تشوف فيديوهات أكتر لشروحات مدرسين وتاخد ملاحظات لطرق تدريسهم وتوصيلهم للمعلومات وشوف مصادر تساعدك على تنمية مهارة التدريس أكتر بحيث لما تبدأ يكون الطريق أوضح وأيسر. جرب في دائرة صغيرة في نطاق أسرتك وعائلتك حتى لو طالب واحد أو اتنين وشوف نتيجة التجربة. وعلى فكرة خد بالك برضه إن الطلبة بتفرق في الفهم وطرق توصيل المعلومة لها فممكن تلاقي أسلوب شرحك بعد كده ينفع مع طالب وطالب لأ، فخذ ده في الاعتبار في تقييمك لنفسك ومهارتك وتنميتك لها. *** ونقطة مهمة، لا تخلي تركيزك على ربح المال، لان أولا ده يضع عليك ضغط وتسرع وقلق إذا الربح تأخر، ثانيا هيكون عائق أمام تركيزك على النمو المهني واكتساب الخبرة بطريقة ثابتة فعالة وعمل سمعة ممتازة بين الطلبة وأهاليهم. *** مش عارفة بالنسبة للمنافسة المهنية والمدرسين في مراكز التدريس القريبة منك هل ممكن يتسبب لك ده في مشكلة ولا لأ بس عامة اعمل حساب للنقطة دي إذا قررت تشتغل مدرس خصوصي، وقرر هل ممكن مثلا لو لقيت صعب التدريس اوفلاين تجرب التدريس أونلاين من خلال منصة أو تعمل قناة يوتيوب. ** إذا في الإجازة عندك وقت إضافي وهتقدر تدير وقتك بشكل كويس مفيش مانع تنزل شغل بعيد عن مجالك المهني، ده أكيد هيضيف لخبراتك الحياتية والاجتماعية والمهارات دي بالتالي أنت محتاجها كمدرس مستقبلا. وربنا يوفقك.
تم النشر الأحد، ٧ يونيو ٢٠٢٦
وعليكم السلام ورحمة الله وبركاته أنا كمان اتخرجت من كلية التربية قسم عام لغة عربية شايفة إنك تمارس مهنتك من بدري عشان لما تتخرج تبقى عندك خبرة كافية، مش تبقى لسا بتبدأ تشوف هتعمل إيه، بالعكس لما تبدأ بدري هتبقى واقف على أرض صلبة وقت التخرج وبتجيب فلوس من مهنتك الأساسية، مش مجرد بجيب فلوس من أي حاجة ولما أتخرج أشوف هعمل إيه للأسف مش هقدر أفيدك أوي في ازاي تبدأ في التدريس لأني بشتغل في التصحيح اللغوي -من قبل التخرج برضو- لكن ممكن أنصحك تبدأ سكرتير مع مدرس معروف تاخد من خبرته، بس تستمرش معاه كتير، يعني بالكتير أوي سنتين تفهم الدنيا ماشية ازاي وبعدين تستقل بنفسك وربنا يوفقك
تم النشر الثلاثاء، ٩ يونيو ٢٠٢٦
السلام عليكم ورحمه الله وبركاته طالما ده مجال تخصصك ان شاء الله بقوه يبقى. اشتغل على الحاجه اللي هتهيئك انك تكمل في مجالك فاذا كان ده متاح انك تعمله حتى ولو على محيط صغير يعني المجموعات دروسه من الناس اللي حواليك يثق فيك ما يحسوش انك اذا انت لسه صغير في كمان سنتر يعني بتاعه دروس ممكن يتيحوا الفرصه دي انه حد يكون لسه يعني ما اتفرجش ويدي دروس حتى اقل من اعدادي يعني مفيش مشكله فديتكم فرصه كويسه جدا انك تبقى بتدرب على مهنتك وده اللي انت بالفعل دراسه فيه. كمان تبدا تكون لنفسك حاجه تكون مصدر دخل خاص لك قبل ما تكون محتاج تشتغل في مدارس او غير ربنا يوفقك ان شاء الله.
تم النشر الاثنين، ٨ يونيو ٢٠٢٦
وعليكم السلام ورحمة الله. أولاً، فكرتك ممتازة ومنطقية جدًا، خاصة إن تخصصك لغة عربية وأنت بتحب المجال ده. الخيار التاني (الدروس الخصوصية) هيخلّيك تبني مصدر دخل خاص بيك، وفي نفس الوقت تتدرب على مهنتك الحقيقية وتكتسب خبرة عملية من أول يوم. ده أفضل بكتير من شغل عام مش مرتبط بمجالك، لأنه هيوفرلك وقت وجهد وهيجهزك لسوق العمل بعد التخرج. نصيحتي العملية: ابدأ دلوقتي في الإجازة بدراسة المنهج الإعدادي كويس، وخد خطة من مدرسينك القدامى زي ما قلت. ابدأ بمجموعة صغيرة (٣-٥ طلاب) عشان تكتسب الخبرة وتحافظ على جودة التدريس. ركز على الأمانة والإخلاص في التعليم، ده هيخلّيك تنجح بسرعة وتبني سمعة كويسة. الخيار الأول (شغل عام) ممكن يديك خبرة حياتية، لكنه هيبعدك عن مجالك وهيضيع وقتك. لو عايز خبرة "شارع"، ممكن تجربها في إجازة قصيرة بعدين، لكن دلوقتي الأولوية لمصدر دخل مرتبط بتخصصك. لو عايز نصائح إضافية عن كيفية التسويق للدروس أو إدارة الوقت، ابحث عن أسئلة مشابهة في فدني، أو شوف صفحات الخبراء هناك: https://www.fedni.net/experts. بالتوفيق يا صاحبي، وربنا ييسر لك.
تم النشر السبت، ٦ يونيو ٢٠٢٦
وعليكم السلام، الفكرة خليك في مجالك عشان تأخد خبرة وبعدين تكون مدرس شاطر في برضو مجال التدقيق اللُغوي حلو جدًا
تم النشر الأحد، ٧ يونيو ٢٠٢٦
جزاك الله خير تفكير جيد اسأل الله ان ينجحك في هذا المجال وإن يجعلك مربي قبل أن تكون مدرس ... رأيي انك تجرب موضوع التدريس ومع ذلك بيني وبينك الدروس والسمعة بتيجي من الفصل الدراسي والعلاقة مع الطلاب وأولياء الأمور بيثقوا أكثر في الكبار ولكن جرب ان كان عندك فكرة معينة وتذكر ان الكلية والتعيين والدروس كلها توفيق من الله مش شطارة منك
تم النشر الأحد، ٧ يونيو ٢٠٢٦
ممكن تشتغل كول سنتر مش شرط انجلش في اقسام عربي والمجال محتاج موظفين + اللي ذكرته ده *تعلم مهارة* فدي هتبقى حاجه أساسيه معاك يوميا تتعلمها عادي علشان تكون عارف انت هتعمل ايه في تخصصك في المستقبل ، أما بالنسبه للشغل العادي فده لو عاوز دخل مادي خلال فترة معينه يعني، بس اقرأ شروط أي شركة تقدم فيها قبل ما تشتغل
تم النشر السبت، ٦ يونيو ٢٠٢٦
جرب كده كده واللي ترتاح فيه كمل فيه المهم تكون بتطور من نفسك وتستفاد
تم النشر الاثنين، ٨ يونيو ٢٠٢٦
لعرض السؤال في فدني اضغط هنا