بصراحه مش عايزه افتي بس اللي فهمته انك غالبا فتحت مع نفسك مواضيع ومشاعر كتير اوي واوقات في حاجات جوانا لو فتحناها لوحدنا بتتبعتر في كل حته ونحس انها مسيطره علينا خصوصا لو انت بقالك كتير بتعمل ده وزي ما بتقول كل شويه تكتشف حاجه جديده، حاول تتكلم مع حد مش لازم عن كل حاجه يعني بس ع الاقل تسمع صوت غير دماغك لانه على كلامك بقالك كتير مع نفسك اوي او حتى تصاحب ناس جديده حتى لو معرفه سطحيه في الاول بحيث بس متكنش لوحدك اغلب الوقت و تخلي حياتك ماشيه برده بالتوازي متوقفهاش على قد ما تقدر لأن الحركه مهمه و لو الموضوع صعب اوي روح لدكتور لو تقدر
بجد ربنا يعينك علي الاذى ده من رأي حاول تهدى شوية و تبطل التفكير الزائد ده حتى ولو لفترة صغيرة ترتاح من الضغط النفسي ده حاول تقفل الفون ساعة قبل النوم و اسمع قرآن بصوت هادي يعني ممكن ترتاح شوية من الكوابيس دي و حاول تشغل نفسك ب اي حاجة بتحبها هواية مثلا او رياضة تحاول تسيطر شوية علي المشاعر السلبية دي اصل الفراغ او الوقت الفاضي اكتر حاجة هتأذيك و بعدين واحدة واحدة تحاول تفهم نفسك كويس فاهمني
تم النشر السبت، ٢٨ مارس ٢٠٢٦
اه طبعا جريت واكتر حاجه كنت بحلم بيها انه حد بيجري ورايا واحلام تاني غريبه قوي بحس أن انا عايش ف الحلم ومفيش بيني وبينه حاجز بصحى الاقي نفسي فاكر الحلم اكنه حقيقه ..وفي احلام تاني ليها علاقه باللي تسببلي ف أذى ..وبصراحه الموضوع مقرف ومزعج وبحس بالاذى ده ف جسمي
تم النشر السبت، ٢٨ مارس ٢٠٢٦
حقيقي قلبي معاك الموضوع صعب جدا بس محاولتش تعرف ايه سبب الكوابيس دي يعني مثلا تكتب الحاجة اللي بتتكرر كتير في احلامك و اعرف سبب الكوابيس دي
تم النشر السبت، ٢٨ مارس ٢٠٢٦
اولا شكرا لذوقك ..ثانيا انا مش تايه او مش في حاجه ضائعه مني انا بس مش عارف ايه اللي بيحصل ده او نهايته ايه يعني وكل اللي خايف منه أنه يودني ف حته مش كويسه بس ..والفكره أن انا عارف انا حاسس بايه بس مستغرب أن انا ف بدايه الموضوع كنت قادر التغلب على كل المشاعر الوحشه والخوف وكل الاحتياجات بس كل شوية احس اني بغرق اكتر بس... لاكن انا عملت كل حاجه تطلعني من ده لان انا بقالي فتره كبيرة مش اسبوع ولا اسبوعين لا دي فتره كبيرة قوي كمان ...ف انا مستغرب أن التغيير اللي حصل ده ليه اختفى فجأه وليه وصلت للمرحله دي بس
تم النشر السبت، ٢٨ مارس ٢٠٢٦
حقيقي هو انا معنديش حل قاطع بس انا فاهماك و حاسة بيك و بجد اللي وصفة صعب جدا و ربنا يعينك الشعور بالوحدة قاتل و انك تكون مش مفهوم احساس صعب جدا و الاسوء من ده التقليل من مشاعرك بس قرب من ربنا مش قصدي انك بعيد عن ربنا بس انا كنت تايهه زيك بس اكيد مش للمرحلة دي ربنا معاك و بجد مفيش راحة بعد انك تفرش سجادة الصلاة و تعيط لربنا و تشتكيله عيط و قول كل اللي جواك و بعدها متفكرش في حاجة والله صدقني واحدة واحدة هتحس براحة غير طبيعية و لما تسيب كل حاجة لربنا هو مش هيسيبك صدقني و انا ان شاءلله هدعيلك تعدي المرحلة دي علي خير
تم النشر السبت، ٢٨ مارس ٢٠٢٦
إن شاءالله..شكرا ليكي ❤️
تم النشر السبت، ٢٨ مارس ٢٠٢٦
لا مفيش حاجه رجعت زي الاول ولا حاجه لا تقلق بجد انت بس عشان تايه الفتره دي ولعل وعسى ده كله تأهيل لمرحله احسن وتلاقي في الآخر اللي انت عايزه بجد المهم استمر في حياتك ومحاولاتك، وفي ناس هنا قالو كلام جميل كتير ربنا يقويك وتعمل بيه وتطلع من الفتره دي اقوى بإذن الله
تم النشر السبت، ٢٨ مارس ٢٠٢٦
انا فاهم.كلامك وانا فعلا بحاول أطبقه وانا حاولت اني مطلبش المساعده بس حسيت اني كده بحمل نفسي فوق طاقتها وبصراحه لاقيت اني اكتر حاجه محتاجها هي اني اتواصل مع حد واني احكي بس حاولت كتير مع اللي حواليا بس الموضوع تفاقم بسبب أنهم مش واعيين ومش فاهمين حاجه ..بس انا بلف ف دائره مفرغه دائما مش عراف أنا محتاج ايه ولا عايز ايه ولا ايه اللي انا فعلا محتاجه كل يوم بلاحظ من كتاباتي اللي بكتبها من زمان حتى الآن أن السؤال اللي بيتكرر كل يوم هو انا محتاج ايه او انا عايز ايه ف حياتي وللاسف كل يوم الاجابه بتختلف وبحس اني بلف ف نفس الدائرة..رغم اني ف الرحله دي كنت بدأت اتغير فعلا وحاجات كتير تغيرت أولها اني قطعت كل علاقتي مع اللي بيأذيني ويستغلني وغير كده كنت عارف احط حدود ف فتره من الفترات بس دلوقتي كل التغيرات اللي حصلت دي وكل حاجه حسيت أن انا بنيتها ف الفتره دي حسيت انها اتهدت تاني واني معملتش حاجه مش عارف بقى ايه تفسيره ده بس حاسس ان الموضوع بيتفاقم كل يوم عن اللي قبله من كوابيس وخوف وارق وقلق طول الوقت وبخاف الموضوع ينتهي بيا نهايه مش كويسه .....واخر حاجه كنت حاسس بيها من بدايه الحفره اللي وقعت فيها دي اني كنت بحس ف الليل بوحده شديده قوي وكنت بعيط كل يوم وزي م يكون طفل مستني أمه تطبطب عليه وقد ايه كنت حاسس ان انا طفل مفتفد امه وحاسس أنها مش موجوده مع انها عايشه وكنت حاسس ان انا لوحدي وكنت محتاج حد جمبي والاحساس ده بصراحه مؤلم قوي قوي بس دل قت يبقى انا حاسس بحاجات كتير قوي والمشاعر والأفكار السلبيه دي كلها موجوده مره واحده حتى اللي قدرت اتخطاها واسمها وافرغها واتعامل معاها حاسس ان كل حاجه رجعت اكتر واقوى من الاول
تم النشر الجمعة، ٢٧ مارس ٢٠٢٦
اولا بجد اوقات ناس كتير بتقلل من حد مش لانها شايفاه قليل لكن زي ما قلت يمكن هما مش فاهمينك اصلا ولا حاولوا انا مقدره الموقف ده بس خلاص هما مش الاساس اللي مش فاهمك مش مهم عادي ومتغيرش من اسلوبك خليك على طبيعتك هيجي وقت الدنيا هتختلف كتير بس كمل رحلتك متوقفش تحاول تفهم نفسك وهيجي وقت هتلاقي ناس هما اللي عايزين يقربو ويفهموك بس وقتها متخافش وسيبهم يدخلو حياتك وبالنسبه للتعلق فهو صعب طبعا بس بجد وانت بتتكلم وبتحكي وصلت لايه مع نفسك فدي حاجه مش سهل حد يعملها واما تبقي اقوى اصلا مش هيفرق معاك الناس زي الاول اوي فعادي ناس تدخل وتخرج المهم كله بموده واحترام وحاول بس تركز في حياتك ومتوقفهاش على قد ما تقدر وبإذن الله مع الوقت تستقر وتبقى احسن ووقتها هتقدر تستغل الحاجات الكويسه اللي جواك
تم النشر الجمعة، ٢٧ مارس ٢٠٢٦
هي اهتماماتي مش المشكله الاساسيه لان اكيد في حاجات مشتركه أيوة بس الفكره ف الفجوه الكبيرة اللي بيني وبين اي حد جربت اني اتعرف عليه او ف العلاقات عامه انا سهل جدا افتح مواضيع واهتم باي حاجه بس صعب اللي قدامي يفهمني وصعب يفهم انا عايز ايه وبروغض مش دي هي المشكله الأكبر المشكله الأكبر أن انا عندي حاجه غلط ف التعلق انا اكتر حاجه محتاجها هي التواصل او اني احس بأمان مع اي حد واحكيله واتكلم معاه .بس للاسف مفيش امكانيه أن انا اروح عند معالج نفسي وكل اللي حاولت اتكلم معاهم هما اساسا سبب مباشر أو غير مباشر للي انا فيه ..ده غير اني كل م اتعرفت على اللي حاسس بيه وكل ما راجعت الماضي اكتشف أن أقرب الناس ليا للاسف هما السبب وقطعت علاقتي بناس كتير كانت بتستغلني وبتتلاعب بيا وتستغل أن انا بتعاطف بسرعه وهما هما نفس الناس اللي بيتتريقوا عليا ..انا عمري م عرفت اشكي لحد ولا اعبر عن نفسي كل أما اتكلم عن نفسي او احب اعبر عن رأي كله يضحك وساعات ناس بتقولي احنا بنضحك عشان انت دمك خفيف وناس كتير فعلا بتقولي كده ناس معرفهمش لاكن ده ضايقني مفرحنيش ولا حاجه لاني حسيت أن عمري م حد هياخد كلامي جد ولا حد هيفهم او هينتبه للي بقوله حتى لو انا بعبر بطريقه فكاهيه يعني وده خلاني اكره نفسي وأكره اني دمي خفيف وبقيت اشوف ده أن انا بعمل كده عشان اجذب الانتباه وان ده جزء مش اصيل فيا او عشان اكون محبوب بس للاسف كل م اتكلم او اعبر عن حاجه كله يضحك ومبقتش بتكلم خالص وخايف اتكلم ف موضوع زي ده سواء مع صديق أو قريب او اي حد لدرجه اني ضيعت كتير من العلاقات اللي ناس كتير كانت عايزة تقرب مني بس انا كنت بخاف ..ف انا أساسا بخاف اتكلم ف المواضيع العاديه م بالك بقى ب اني اشكي مشكله نفسيه .... ودائما بيحسسوني أن انا فيا حاجه غلط او غير معترف بيا او ماليش وجود رغم اني ساعات بحس أني اذكى منهم وشايف اللي هما مش شايفينه وده يخليني انقطع من جوايا ما احس ان في شخص تاني جوايا كنز من المواهب وبيهتم بحاجات كتير بس مش قاظر يستغلها ولا عارف اساسا أنه يحس أنه موجود
تم النشر الجمعة، ٢٧ مارس ٢٠٢٦
طيب انت ايه اهتماماتك يمكن اما تشترك مع ناس في حاجه بتحب تعملها تبقى الدنيا اسهل ويبقى في لغة حوار حتى لو في اطار محدد بس، وكنت هقترح عليك برده لو تقدر انزل انشطه تطوعيه عن تجربه حاجه زي دي بتفرق و لحد بس ما تعدي الفتره دي لاني حاسه برده جسمك بيطلع حاجات كتير بسبب الفتره اللي كنت فيها بتكبت جواك ف يمكن اما تنزل يهدى شويه
تم النشر الجمعة، ٢٧ مارس ٢٠٢٦
للاسف انا عملت كده وحاولت اطلع برة اللي انا فيه واصاحب لاكن الموضوع بيتعقد اكتر ورغم أن كتير قوي حاولت اتصاحب على ناس وافتح انا مواضيع وابادر بكل حاجه لاكن للاسف بحس بوحده اكتر واحس اني مش مفهوم من الناس واني مش مهم واني مش متشاف ولا حد عايز يصاحبني رغم أن انا ممكن يكون ده بيتهيألي بس انا مش عارف اتخطاه او مش عارف اغير ده وللاسف الموضوع اتقلب ضدي لان حاجات كتير كنت خايف منها حصلت زي اني اكون موجود بس حاسس اني مش موجود وزي م اكون بتكلم ومحدش فاهمني ولا تارغ أنا بتكلم على ايه .ده غير أن اهتماماتي غيرهم خالص وغير كل اللي حاولت اتعرف عليهم
تم النشر الجمعة، ٢٧ مارس ٢٠٢٦
لعرض الإجابة في فدني اضغط هنا