ماذا يُفترض أن أفعل لأخرج من هذا الوضع؟

Question

انا من فتره حصللي موقف كده زي صدمه او خدت خبطه على دماغي من الدنيا وبدأت اراجع نفسي من الاول وجديد.. المهم اكتشفت حاجات كتير قوي عن نفسي مكنتش عارف عنها حاجه اكتشفت قد ايه انا أساس يعتبر مش عايش انا هربان طول الوقت ومش بطلع خالص برة معنديش صحاب خالص ولا مختلط بحد رغم أن انا مش كده وعندي رغبه اني اطلع واتصاحب وكده بس اكتشفت ان انا أساسا عندي مصيبه اكبر وهي أن انا كاتم جوايا حاجات كتير قوي ومش عارف اعبر عنها اساسا بس بدأت اني اكتب واحاول افهم نفسي واكتشفت أنه انا عندي اعراض Adhd بس طبعا مصدقتش . وبدأت ادور وافهم واكتشفت قد ايه انا اتعرضت كتير للإساءة والاهمال والأذى العاطفي والجسدي وانا صغير وقد ايه انا كنت مش مسموحلي اكون موجود واكتشفت رغبات عميقه قوي ف الاجتياج للحب والاهتمام والدعم وكل الحاجات اللي محصلتليش وانا صغير دي واكتشفت ليه انا خايف اصاحب حد لان المشكله اساسا عندي تقريبا في التعلق وانا اساسا رافض كل الناس وكل الحياه عشان خايف من الالم ده ..و واكتشفت كمان أن انا معظم حياتي كلها وانا بحاول اعدي اليوم وخلاص وعايش في بلاده وانعزال ولا مبالاه باي شئ وغير بقى السخريه والانتقاد والتريقه اللي كنت بسمعها من وانا صغير لحد م كبرت على حاجات كتير قوي انا ماليش ذنب فيها رغم أن شكلي مش وحش ولا عندي اعاقه معينه وحتى لو كده فده مش سبب يخلي حد يتريق على حد ربنا خالقه كده بس معظم الأوقات بيتريقوا على اي حاجه فيا وخلاص زي م يكون الدنيا كلها حالفه لتضايقني وتحسسني بنفس احساس الانفصال والاغتراب والعجز وكل المشاعر الوحشه دي المهم انا بدأت أحاول ادي لنفسي كل اللي انا محتاجه زي الاهتمام مثلا والدعم والدنيا كانت ماشيه تمام إلى حد ما... كنت كل يوم بكتب وكل يوم بكتشف احساس جديد غضب ...خيانه  . إحساس بالعجز . إحساس بالخوف من حاجات كتير المهم كل م كنت بكتب كنت بحس براحه واعدي واحس اني خلاص بقيت شايف كل اللي بيحركني او بقيت واعي بكل الضلمه دي بس كل يوم بحس اني بتعمق اكتر وابقى ف بعض الأحيان مش قادر افهم ولا اسيطر زي الاول بس أنا برضو مستمر ف الكتابه ومقتنع أن التغيير مش هيكون سهل وكنت صادق ف حاجات كتير مع نفسي ومكنتش بضلل نفسي وبتقبل الحقيقه اللي بشوفها ايوه كان عقلي بيقاوم وكل حاجه بس ف الآخر بستسلم لان مكنش في حل تاني المهم بعد فتره من ده وصلت لمرحله حسيت فيها المشاعر والاحتياجات دي بتظهر بشكل كبير قوي وبقيت حساس جدا جدا جدا جدا وخائف قوي قوي قوي وارق وكوابيس وخوف وتوتر حرفيا دخلت ف جحيم حتى الآن بقالي تلات شهور من بدايه هذا الجحيم مشاعر بقى كلها خوف وقلق واكتئاب وحسيت أن ده انهيار نفسي او اني مبقتش مستحمل استمر ومحتاج مساعده بس للاسف مفيش حد ف حياتي خالص عنده استعداد يقوم بالدور ده .. المهم انا بقالي تلات شهور بقى ف الجحيم ده وكل يوم بتعب اكتر اكلي قليل خالص مش بنام غير ساعتين واصحى تاني وانام ساعه واصحى وياريت بنام زي الناس بصحى على كوابيس وجربت ابعد عن البيت شويه بس برضو مفيش حاجه تغيرت وانا مش عارف اعمل ايه .. فياريت حد فاهم يقللي ايه اللي انا بمر بيه ده وايه اللي انا حصللي ده رغم أن في حاجات كتير ف الرحله دي اتغيرت بس انا حاسس انها رجعت تاني او مخاوف كتير تخطيتها بس حاسس انها رجعت تسيطر عليا تاني انا مش فاهم مفروض اعمل ايه

Accepted Answer

انا فاهماك جدا عامة بس اللي بتمر بيه هيا مرحلة نضج لعقلك وبداية انك تفهم نفسك ...انا من حوالي ٤ سنين مريت بنفس الحاجه وفضلت سنه كامله مش فاهمه نفسي فشلت في كلل جوانب حياتي ومكنتيش بطيق اهلي ومكانش عندي ايي صحاب ولا معارف وكنت لسه بادئه مرحله جديده في حياتي مره وكنت سافرت بلد تانيه وحسيت اني تايهه ومش فاهمه نفسي ومحدش فاهمني ومكانش عندي اي حد اتكلم معاه وكان عندي adhd فوق ما تتخيل وده خلاني فاشله دراسيا جدااا واجتماعيا كانت حياتي عباره عن هروب لتخيلاتي ومكمتش عايشه الواقع وفجاه حسيت باللي انت حسيت بيه ولكن اول حاجه خرجتني من اللي كنت فيه اني بدأت اجبر نفسي على الانتظام في الصلاه وبعض العادات اليوميه البسيطه وادعي ربنا كتيير انو يوريني الصح فين وبعدين اتعرفت على صديقه واحده بس بدأت انفتح اكتر وحسيت ان في حاجات كتير اوي مكنتش اعرفها عن المجتمع وعن نفسي ومفهمتش نفسي اكتر غير لما قربت من الناس واحده واحده وبدأت افهم نفسي واحب نفسي واحده واحده وسبحان الله كل الحاجات اللي انا كنت كارهاها زمان بدات احبها وبدات احس اني فعلا كنت في حته ضلمه اوي اوي وكنت بشوف كل حاجه بطريقه سلبيه زي تصرفات اهلي واللي حوليا دايما كانت بتدمرني لاكن بعد ما بدات افوق ابتديت انضج اكتر وافهم انهم مكانوش ضدي ولا حاجه انا بس اللي مكنتش فاهمه نفسي كويس وكل ده بييجي واحده واحده بالقرب من ربنا والدعاء وبناء الصداقات وانا فعلا قبلها كنت في اكتئاب طويل ومخرجاش منو غير كده وبعدين ابتديت اقرب من اهلي اكتر واكتشفت ان المشكله كانت في نظرتي وقتها مش تصرفاهم وحاجات زي السخريه والتريقه هتبقا بالنسبالك بعدها بسيطه ومش هتهتم بيها اصلا بس الواحد وقت الاكتئاب كل حاجه بتاثر فيه وبتوجع ودلوقتي الحمد لله نفسيتي بقت احسن كتيير اه بتبوظ من وقت للتاني (ولازم تفهم ان ده طبيعي ) وبعدين برجع زي الاول وبقيت بحب نفسي اكتر بعد انتظامي في الصلاة واحاجات تانيه كتير كويسه ... وفي حاجه عن تجربه شخصيه بس معرفش ده مع كلو ولا ايه ..انا اكتشفت ان الاغاني عامل رئيسي جدا في الاكتئاب او الانغماس فيه وبتبعدك عن ربنا اكتر فلو كنت ببتسمع اغاني حاول تبعد عنها وده غير طبعا الجيم والرياضه والحاجات دي اكيد انت عارفها وكل ده مش هياخد منك ان شاء الله اكتر من ٦ شهور على ما تبدا تحب نفسك وتركز عليها وانتقادات الناس هتبقى مهمله بالنسبه ليك وتبني نفسك اكتر صدقتني دي بدايه اهم glow up هتعملو في حياتك وانت بدات اول خطوه وبدات تفهم نفسك انت قدها ان شاء الله اسفه طولت عليك 💗💗

Answer

مرحلة نضج و اكتشاف للذات ، طبيعي تحس بصدمة لما تكتشف ان كل اللي فات و الوجع اللي انت كنت عايشه كان سببه ان انت مش مفهوم و ان محدش كلف نفسه يثقف نفسه علشان يفهمك ، و انت كنت فاكر ان العيب فيك للأسف ، بس احنا مش وحشين لو بنتعامل مع الناس المناسبين لينا ، و دي الدايرة اللي لازم تحاوط نفسك بيها ، و يا صديقي انا موجود في اي وقت حابب ترغي او تتكلم ابعتلي و هسمعلك، و إن شاء الله نلاقي حلول سوا ، وبالتوفيق 😊

Answer

بصراحه مش عايزه افتي بس اللي فهمته انك غالبا فتحت مع نفسك مواضيع ومشاعر كتير اوي واوقات في حاجات جوانا لو فتحناها لوحدنا بتتبعتر في كل حته ونحس انها مسيطره علينا خصوصا لو انت بقالك كتير بتعمل ده وزي ما بتقول كل شويه تكتشف حاجه جديده، حاول تتكلم مع حد مش لازم عن كل حاجه يعني بس ع الاقل تسمع صوت غير دماغك لانه على كلامك بقالك كتير مع نفسك اوي او حتى تصاحب ناس جديده حتى لو معرفه سطحيه في الاول بحيث بس متكنش لوحدك اغلب الوقت و تخلي حياتك ماشيه برده بالتوازي متوقفهاش على قد ما تقدر لأن الحركه مهمه و لو الموضوع صعب اوي روح لدكتور لو تقدر

ماذا يُفترض أن أفعل لأخرج من هذا الوضع؟

نفسية

اجتماعية

اكتئاب

خوف

سؤال من احد أعضاء فدني

تم النشر الجمعة، ٢٧ مارس ٢٠٢٦

4 إجابة

14 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك