السلام عليكم، أنا مقدرة مشاعرك وقد إيه صعب اللي مريتِ به، بس صدقيني الانتحار مش حل خالص ولا مهرب. أنتِ مفكرة إنه مهرب أو حتى مفكرة إنك ملكيش لازمة في الحياة فليه تفضلي عايشة وده غلط أكبر. لو ملكيش لازمة ربنا مكنش خلقكِ أصلا. كل الحكاية إنك مشوشة ومعمية عن رؤية أهميتك ولازمتك في الحياة بسبب الصعوبات اللي حصلت لك. *** تفكيرك في الانتحار واستسلامك للاكتئاب ده معناه إنك بتسمحي لكل الناس اللي أذتك إنها تنتصر عليكِ. هل تفتكري هيزعلوا ولا يحسوا بندم على اللي عملوه لو انتحرتِ؟ هم نسيوا الأذى اللي سببوه لك وتابعوا حياتهم وأنتِ بتسمحي لهم يكملوا انتصار عليكِ حتى وهم مش بيعملوا حاجة. *** جربي تشغلي نفسك في أهداف تشتغلي عليها كل يوم، مارسي رياضة ولو عشر دقائق، ارسمي ولا حتى شخبطي، انزلي غيري جو وملكيش دعوة بأي حد يقابلك ولا يحاول يكلمك، طنشي وكملي طريقك. ** جربي تمارسي عادة الامتنان. هاتي نوتة جميلة واكتبي فيها كل يوم ٣ حاجات على الأقل بتشكري ربنا عليها، إنجازات ولو صغيرة عملتِها في يومك أو حاجة فرحتكِ مهما كانت بسيطة. لو فكرتِ وبصيتِ حولك وفي نفسك، صدقيني هتلاقي ربنا منعم عليكِ بحاجات ممكن ناس كتيرة محرومة منها بس أنتِ مش واخدة بالك بسبب الحزن والوجع اللي أنتِ فيه. جربي كده واستعيني بالله. ** أنتِ لسه صغيرة وقُدامك الحياة فاستغليها واعرفي ربنا خلقك ليه وعيشي عشان ربنا مخلقكيش عبثا. ** لو هتحتاجي تتابعي مع مختصة ابقي ادخلي على قائمة الخبراء في فدني واختاري خبيرة وتواصلي معها عن طريق حجز استشارة، وممكن تشوفي الخط الساخن للدعم النفسي الخاص بالأمان العامة للصحة النفسية وعلاج الإدمان ( ١٦٣٢٨ ) ده مجاني تماما. واستعيني بالله وإن شاء الله تتخطي الابتلاء ده وتكوني أفضل. بالتوفيق💚💚
لعرض الإجابة في فدني اضغط هنا