السلام عليكم، جميل إن يبقى لك أحلام وطموحات وعندك رغبة في تحقيقها وتغيير حياتك للأفضل، بس عاوزة أنبهك لحاجة، بلاش الصور المبنية على اللي بتشوفيه في التليفزيون أو السوشيال ميديا، ساعات بيعطوا صور غير حقيقية أو مثالية زيادة والميديا بتلعب بطريقة ما على عقولنا عشان تسوق لنا أفكار أو منتجات معينة. احلمي وفكري في المستقبل اللي عاوزاه لنفسك لكن بصورة واقعية عشان متحسيش بإحباط لو الصورة غير الواقعية في دماغك متحققتش على أرض الواقع. *** وخلي بالك إن التغيير وتحقيق الأهداف بياخد وقت وبيتطلب جهد وصبر عشان تشوفي النتيجة، فمترسميش أهداف وتستعجلي إنها تتحقق في نفس الوقت وبسرعة فتملي أو توقفي لما تلاقي النتيجة اللي عاوزاها لسه محصلتش. *** اكتبي أهدافك كلها على ورق وبعدين رتبيها حسب الأولوية وركزي على هدف هدف... بلاش تزودي على نفسك أكتر من هدفين. وقسمي أهدافك لأجزاء صغيرة ومراحل زمنية عشان تقدري تقيسي تقدمك وتحددي إذا خططك محتاج أي تعديل وتكافئي نفسك مع كل إنجاز. *** أقترح عليكِ تشوفي (نموذج عجلة الحياة المتوازنة) ده بيساعدك تعملي تقييم لجوانب حياتك المختلفة وتشوفي إيه أوجه القصور في كل جانب وتبدئي تضعي أهداف تحسين كل جانب وتاخدي هدف هدف تشتغلي عليه. ده كورس بيشرحها، وممكن تتابعي صاحبة القناة هتفيدك في الإنتاجية والتخطيط إن شاء الله. https://youtube.com/playlist?list=PL9qj2CGqAHHH2OZCzkiKTLzd2YQQe6pEm&si=DDTctTRD7HWsVVqj وتدرجي وامشي خطوة خطوة. "قليل دائم خير من كثير منقطع" والأهم من كل ده استعيني بالله وإن شاء الله يوفقك لكل ما فيه الخير لكِ. بالتوفيق. 💚💚
مفيش تعب ولا حاجة يا قمر، لو عندك أي سؤال اكتبي لي وإن شاء الله أحاول أفيدك قد ما أقدر. ❤️
تم النشر الاثنين، ٢ نوفمبر ٢٠٢٦
طولى براحتك دا لما صدقت حد يفهمني ...وببطل كلام مع AI عشان اتجننت تقريبا ف شكرا ولله تاعبة حضرتك معايا
تم النشر الاثنين، ٢ نوفمبر ٢٠٢٦
ممكن تكوني من النوع متعدد الشغف ونفسك تعملي حاجات كتير في نفس الوقت وده على فكرة ممكن يشتتك أكتر عن المذاكرة ويشتتك كمان بين الأهداف وهيعطلك بسبب إحساس إن مفيش وقت ومش عارفة تبدئي بإيه ولا إيه وتبدئي إزاي وامتى... ده عن تجربة. الحل كله في تحديد أولوياتك وإنك تعرفي إن مش هتقدري تعملي كل حاجة في نفس الوقت. فشوفي إيه أكتر حاجة متقدريش تضحي بها وملحة وضرورية في الوقت الحالي.. الحاجات الباقية ممكن تنتظر. زي ما قلت، المذاكرة رقم واحد عشان تجيبي مجموع يخليكِ حرة في التنسيق إن شاء الله وتختاري الكلية اللي تشوفيها أنسب لك. بعد كده شوفي باقي الأهداف ورتبيها من الأهم فالمهم. ممكن تاخدي هدف أو اتنين جنب المذاكرة. لو مثلا عاوزة تحفظي قرآن... متتقليش على نفسك إنك تحفظي صفحة مثلا وبعدين تلاقي نفسك وقفتي لما لقيتِ نفسك مضغوطة... لو قلتِ هحفظ آية واحدة كل يوم بعد صلاة الفجر هيكون أفضل من إنك تحطي هدف كبير ومتلزميش به. شوفي بعدها إيه أهم هدف بعد الاتنين دول ولو اتبقى له وقت في اليوم حتى لو عشر دقائق بس اعمليه. بعد الثانوية إن شاء الله تلاقي وقت أكبر عشان تعملي كل اللي عاوزاه. اختصارا عشان طولت. 😅 الحل مع تعدد الشغف والأهداف هو تحديد أولوياتك وتقسيمها لأجزاء صغيرة، والخطوات الصغيرة كل يوم.
تم النشر الاثنين، ٢ نوفمبر ٢٠٢٦
طب معندكيش افكار حاجات اعملها دلوقتي بقول مثلا مذاكرتي واحفظ قرآن بحس ان نفسي ف حاجات كتير بس معنديش وقت
تم النشر الاثنين، ٢ نوفمبر ٢٠٢٦
العفو، بالتوفيق دايما. 💚
تم النشر الاثنين، ٢ نوفمبر ٢٠٢٦
بالنسبة إنك في ثالثة ثانوي حاليا، وحتى لو ملكيش طموح في كلية معينة فالأولوية دلوقتي إنك تعطي أكبر جزء من وقتك وجهدك للدراسة وخصصي وقت أقل لهواياتك أو المهارات اللي عاوزة تتعلميها أو التخطيط بصورة أفضل لأهداف اللي تبدئي تركزي عليها بعد الثانوية. خدي بالك إن ساعات التفكير بكثرة في أهداف وإنجازات بيكون نوع من التسويف والهرب من مسؤولية المذاكرة، فحددي إذا كان فعلا ده نوع من التشتت ولا لأ وإذا كان بيعمل لك تشويش ويعطلك عن الدراسة حاليا فيُستحسن تكتبي كل الأهداف وتسجليها بنية إنك ترجعي لها في الوقت المناسب وتركزي جهدك على المذاكرة وممكن في الوقت الفاضي أو اللي بتروحي فيه عن نفسك بين جلسات الدراسة تمارسي فيه الهوايات أو تتعلمي مهارة ولو حتى عشر دقائق كل يوم.. مع الأيام هتلاقيكِ فعلا مشيتِ جزء كبير من غير ما تحسي.
تم النشر الاثنين، ٢ نوفمبر ٢٠٢٦
شكرا لحضرتك جدا وان شاء الله استفاد
تم النشر الاثنين، ٢ نوفمبر ٢٠٢٦
لعرض الإجابة في فدني اضغط هنا