Ahmed Gouda

فكىه كويسه جدا بس لازم تحددي الأول انتي هتعمليه تطبيق ع الموبايل ولا ويندوز لان كل حاجه ليها طريقه وعشان تنشري التطبيق على جوجل بلاي بالنسبه للاندرويد بيحتاج حساب على جوجل ادسنس والأفضل تشتغلي على لاب توب لانه افضل في بناء التطبيق لغاية ما توصلي للفكره النهائية وبعدها تبدأي في تحميله ع الفون وغالبا هيكون عن طريق لينك

عليكم السلام ورحمة الله وبركاته أول حاجه اعملي بلوك وما تروحيش الصيدليه دي تاني أو وقت الشيفت بتاعه. ولو حاول يوصلك بأي طريقه تانيه ممكن تروحي لإدارة الصيدليه او صاحبها وتحكي له اللي حصل لان ما ينفعش انه يعمل كده لان دي بيانات العملاء ودي من أسرار العمل والأفضل اي موقف زي دا بعد كده ويطلب رقم عشان بيانات العميل يبقى اعطيهم رقم والدك واسمه لأننا بقينا في مجتمع ممتلئ بأشباه الرجال

لا طبعا العسل مفيد جدا لكن عسل نحل طبيعي واتاكدي من المصدر مايكونش مغشوش ودا الأفضل انك تتعودي تحلي بعسل بدل السكر سواء في مشروبات او حلويات ولو تقدري تاخدي كل يوم معلقة يبقى تمام جدا وأهم حاجه ابعدي عن الأكل المسبك والشرطه المخللات وربنا يشفيكي ويعافيكي ان شاء الله

وعليكم السلام ورحمة الله وبركاته خوفك وقلقك طبيعي عادي بس الصح انك تعرفيه وانتي خلاص الحمد لله عافيتي وبقيتي زي الفل وعمره المرض النفسي ما كان عيب ولا حرام اتكلمي معاه بصراحه وعرفيه ولو هو ما قدرش صراحتك دي وانك بتحكيله آهو ودا مش كذب ولا انك خبيتي عليه انتي اتكلمتي عادي لما افتكرتي. يبقى في الحاله دي انتي اللي تسيبي مش هو. ربنا يصلح حالكم إن شاء الله

شفاكِ الله وعافاكِ مفيش بأس ولا حاجه حاولي تظبطي الاكل وقللي نشويات يعني العيش والارز وهكذا والسكر والحلويات حاولي يبقى ليكي معلقتين سكر في اليوم واكثري من الخضار والفاكهة ونظمي مواعيد الاكل وبلاش تاكلي بالليل متأخر والأفضل اخر وجبه تبقى الساعه 7 او 8 ولو حسيتي بجوع بالليل تاكلي ذبادي أو طبق سلطه والصيام المتقطع لو تقدري واشتري شاي البقدونس والكرفس واشربي منه ولو تقدري من غير سكر يبقى افضل او التحليه بعسل ابيض والشاي دا هينزل الميه اللي في جسمك والرياضه أساسي جدا وخاصة المشي نص ساعة يوميا ولو تقدري تزودي يبقى تمام. وان شاء الله لو التزمتي هتحسي بالفرق لكن ما تتسرعيش لان مش كل جسم بيخس زي التاني يعني ممكن تخسي بسرعه او ببطئ حسب طبيعة جسمك بس الاكيد انك لو التزمتي هتخسي إن شاء

أنا أعمل بالتجارة ومرت فتره كان هناك ركود غريب في السوق وكان يمر اليوم او الاسبوع دون تحقيق عملية بيع او اتحصل على ربح ولو قليل حتى وجدت نفسي تتحدث بداخلي وتقول لماذا هذا الضيق في الرزق ، وأمسكت هاتفي وفتحت إحدى وسائل التواصل الاجتماعي فظهر أمامي مقطع ريلز قرآني بصوت جميل يرتل هذه الآية ( وَلَوْ بَسَطَ اللَّهُ الرِّزْقَ لِعِبَادِهِ لَبَغَوْا فِي الْأَرْضِ وَلَٰكِن يُنَزِّلُ بِقَدَرٍ مَّا يَشَاءُ ۚ إِنَّهُ بِعِبَادِهِ خَبِيرٌ بَصِيرٌ ) فوالله ما ان سمعت هذه الآية حتى ضحكت وقلت حقا يا الله أنزلت الرزق بقدر وانت عليم خبير بنا فاللهم أني رضيت بما قدرت وقضيت فأدهشني بما رزقت وأعطيت والحمد لله حقا على فضله وعظيم نعمه التي لا تعد ولا تحصى.

الافضل انك تتكلمي مع حد كبير والدك او عم او خال بتدخل في الموضوع دا ويفهموا غلطه وانك انتي عرضه وشرفه وما ينفعش يقبل اي اهانه ليكي مش ان هو كمان اللي يهينك واشرحي لامك السبب انك بتتجنبي الكلام معاه لانه المفروض يكون السند لكن هو أخلاقه سيئه وما ينفعش يتطاول عليكي بلسانه او بأيده وانتي كده صح حتى يتفهم خطأه ويرجع عن اللي بيعمله ويفهم ان كرامتك من كرامته وان مش من حقه يهينك او يجرحك بكلمة تخدش حيائك. وربنا يهديه ويصلح حاله

دا شعور طبيعي واحتياج طبيعي والبنت بطبيعتها عاطفية وتحب ديما تحس ان في سند ليها وانها في امان وفي سنك الأفضل تتكلمي مع والدك يكون هو السند والونس دا او انتي قربي منه على الاقل في الفتره دي لغاية ما ربنا يأذن والنصيب يجيلك لان ضغوط الحياه المسئولية اللي على والدك أكيد كتير وممكن بسبب الضغوط دي معندوش وقت يكون صاحب ليكي في الفتره الحرجه دي بقربي انتي منه وقربي من ربنا وصلي وادعي بالزوج الصالح. واحذري من انك تدوري على السند والونس دا في الانترنت ووسائل التواصل لان العواقب بتكون مؤلمة. وربنا يوفقك وييسرلك امرك ويصلح حالك ويريح قلبك ويرزقك الزوج الصالح عاجل غير اجل إن شاء الله.

وعليكم السلام ورحمة الله وبركاته أول حاجه هي ان التوبه تكون توبه حقيقيه وعشان وعالجي ذنب لازم تبعدي عن أسباب ارتكاب الذنب زي وقت الفراغ مثلا او تصفح الإنترنت او اي وسيله بتوصلك انك تعملي الذنب دا. مفيش حل سحري انك توقفي ذنب معين او عادة سيئة لكن احنا في مجاهده مع نفسنا لان ربنا خلق عندنا النفس أمارة بالسوء إلا من رحم ربي. تجنبي الوحده خاصة في وقت فراغك وتذكري ان ربنا شايفك وانتي بتعملي الذنب دا بس لما ترجعي لربنا وتكوني صادقة في نية التوبه ربنا هيقبل توبتك وهيساعدك ويقويكي تبقى اقوى من اي لحظة ضعف ممكن تخليكي تعصي ربنا. وربنا قال "لا تقنطوا من رحمة الله إن الله يغفر الذنوب جميعا". لكن المهم اننا نلحق نستغفر ربنا ونتوب. وربنا يصلح حالك ويرزقك التوبه والعفو والعافية وطهارة القلب والبدن.

السلام عليكم ورحمة الله وبركاته أولا فكرة الانتحار دي مدخل من مداخل الشيطان استغفري ربنا وابعدي الأفكار دي عن عقلك وكل ما تجيلك الأفكار دي استغفري ربنا وحاولي تصلي ركعتين هتفرق معاكي جدا. ثانيا مشاكل مع الأهل لازم تحاولي تحتويهم تقربي منهم ويبقى في تفاهم وتشوفي ايه أسباب المشاكل دي وهل السبب دا منك انتي ولا منهم وعالجي الأسباب تنتهي المشاكل. وربنا يصلح حالكم إن شاء الله

قرأت كلماتك وكم هي مؤلمة أولا ابحثي بالفعل عن طبيب نفسي وحتى تجدي ذلك عليكي بالقرآن الكريم فهو شفاء من كل داء بإذن رب الأرض والسماء. احرصي على تشغيل الرقية الشرعية في غرفتك وحاولي ان تقتربي من الله بالصلاة والدعاء حاولي أن لا تجلسي بمفردك كثيرا وأن لا تتركي نفسك وحيده في وقت الفراغ. وأسأل الله عز وجل أن يريح قلبك وعقلك وان يوفقك للصواب إن شاء الله

عليكم السلام ورحمة الله وبركاته هو دا عادي لانك حابه الاستقلاليه لأنك كبرتي وبقيتي تعرفي تميزي الصح من الغلط والتدخل الكتير فعلا بيضايق بس دا مش معناه ان كل تدخل غلط ولكن كل تدخل من حد غير اهلك دا غلط انتي ليكي رأيك واستشارة ورأي الاب او الام او اخ كبير دا واجب عليهم وتأكدي ان كلهم أكيد بيتكلموا لصالحك انتي لكن كل شخص بيشوف الموضوع بطريقه مختلفه ومن وجهة نظره هو والصح أنك تفكري في رايهم قبل أي قرار منك لان احيانا او غالبا في بعض المواقف هما بيبقى ليهم نظره أوسع نتيجة الخبره. انتي اسمعي ليهم فقط وحاولي تتناقشي معاهم في أي امر وافهمي وجهة نظرهم في الموضوع وبعدها شوفي انتي مرتاحه لكلامهم ولا انتي عندك وجهة نظر تانيه واتناقشي برضوا في وجهة نظرك معاهم ودا بالنسبه لأهلك وليس لاي احد آخر انه يتدخل في حياتك غيرهم وربنا ييسر لك امورك ويوفقك لما يحب ويرضى

دا ممكن يكون فترة ضغط وارهاق واحيانا ممكن يبقى ليها سبب طبي زي نقص فيتامين د لانه بيزود الخمول والاحساس بالارهاق وحاولي تظبطي مواعيد النوم وحاولي تمشي على الاقل 20 دقيقه يوميا او تلعبي اي رياضه وغيري مكان المذاكره وابعدي عن الأكل اللي ممكن يسببلك خمول او انك تاكلي متأخر بالليل وتظبيط الساعه البيولوجية مع الوقت هتلاقي الخمول دا راح ان شاء الله

الرسول صلى الله عليه وسلم قال اذا جائكم من ترضون دينه فزوجوه وطالما هو اخلاقيا ودينيا كويس توكلي على الله والحياه مش الماديات فقط اهم حاجه ان الانسان يتقي ربنا فيكي. صلي استخاره اولا وبعدين فكري وقرري وأكيد لو من نصيبك ربنا هييسرله أموره لانه طالب الحلال والستر والعفه وربنا يصلح لكم حالكم إن شاء الله.

لو الحاجات الكتير اللي خانقاه انتي مش سبب فيها يبقى المفروض انتي تكوني اول حد تخففي عنه وتحاولي تسمعيه وتعرفي ايه الضغوط اللي عليه انما لو هو محسسك انك انتي السبب في كل دا وانتي مالكيش اي ذنب في دا وهو بيلومك انتي ديما يبقى دا تلكيك عشان عايز يبعد والصح انك تبعدي ودا الأفضل ليكي واعملي بلوكات زي ما هو عمل وانسي الموضوع دا وهو ربنا يصلح له حاله وانتي ربنا يعوضك بالاحسن وكفايه استنزاف في مشاعرك ِ

أول حاجه أقطعي كل العلاقات دي ونقطه ومن أول السطر وارجعي لربنا وقربي منه وابدئي من جديد وربنا قال فيما معناه لا تقنطوا من رحمة الله إن الله يغفر الذنوب جميعا. يعني مهما غلطتي واذنبتي صلي وما تقطعيش وابعدي عن أي علاقه مؤذيه او تستنزف مشاعرك ورجعي ثقتك بنفسك تاني هترجعي أحسن من الاول واعتبري اللي فات مرحله وعدت واتعلمتي منها كويس. وربنا يوفقك وييسرلك امرك ان شاء الله

بالنسبه لفترة الرضاعة الطبيعية هي مرحلة حساسة محتاجه رعاية نفسية وجسدية والاكتئاب في هذه الفترة سواء كان استمراراً لاكتئاب ما بعد الولادة أو حالة مستجدة هو أمر طبيعي وشائع ويحتاج لتعامل حكيم وفعال وممكن تستشيري فيه دكتورة النساء والتوليد أولا. وفي الغالب بيكون دا بسبب الارهاق والتعب وقلة النوم او النوم المتقطع فلازم تظبطي موضوع النوم وتحاولي تنامي لما ينام طفلك حتى لو الموضوع صعب بس مع التعود هتتظبط ودا هيقلل من التوتر عندك وحاولي يكون في حد يساعدك في شغل البيت والطفل عشان ترتاحي شويه. وحافظي على التغذيه الجيده لان نقص بعض العناصر زي فيتامين د أو B12 أو الأوميغا 3 احيانا بيزود أعراض الاكتئاب.

أهلنا ديما بيكونوا عايزين يشوفونا احسن من اي حد وهما بيفكروا من وجهة نظرهم فقط وانتي خدي كلامهم كنوع من التحفيز والدافع حتى لو مش عايزه طب بس اعملي اللي عليكي ونظمي وقتك وذاكري وفي النهايه هتدخلي اللي ربنا كاتبه ليكي حتى لو مش على هوى الاهل وكلية الفنون دي حاجه جميله جدا ومش شرط اني ابقى دكتور عشان اكون ناجح لان نجاحك مرتبط بحبك لمجالك ايا كان. نظمي وقتك وخلي هدفك النجاح والتفوق وكملي في الهوايه اللي بتحبيها وارسمي ونمي موهبتك مع المذاكره واتمنالك التوفيق ان شاء الله وتدخلي فنون جميله اللي كان نفسي ادخلها لكن قدر الله وما شاء فعل والحمد لله على كل اقداره وربنا يوفقك لما فيه الخير

ربنا خلق كل إنسان ليه مميزاته وكل واحد واخد حقه والحمد لله ومفيش بني آدم وحش وبني آدم حلو لكن كل واحد ربنا جمله بحاجه مختلفه والجمال جمال الأخلاق والروح اما جمال الوجه دا في لحظه ممكن يروح واما صاحبتك دي ما ينفعش تقولي عليها صاحبتك ولازم تقطعي علاقتك بيها وانتي لو دورتي حواليكي هتلاقي نعم ربنا عليكي لا تعد ولا تحصى. ماتسمعيش لكلام حد وماتهزيش ثقتك بنفسك وزي ما ربنا قال فيما معناه هذا خلق فأروني ماذا تخلقون. انتي جميله باخلاقك ودينك وتربيتك وعلمك.

اولا لازم تركزي في الحاله اللي كنتي فيها قبل ما يحصل دا يعني مثلا في اكل معين اكلتيه او في موقف معين بعدها بيحصل دا وفي وقت معين ولا اوقات مختلفه لان مش كل حاجه بتظهر في التشخيص الطبي من اول مره وممكن يكون الموضوع ضغط نفسي وانتي مش حاسه او في مشكله في المعده لكن مش ظاهره حاليا او حاجه عارضه بتيجي نتيجة خوف او قلق من حاجه معينه وممكن تغيري الدكتور لكن الأهم انك تركزي قبل ما تحصل الأعراض دي كان ايه حصل قبلها وان شاء الله خير ما تقلقيش.

خليكي في المشروبات الدافئه وعلى الريق نص كباية ماء دافئ مع معلقة عسل نحل طبيعي ونص ليمونه دا مفيد جدا لنزلات البرد ولو تقدري تتعودي عليه يوميا بيبقى وقايه من نزلات البرد. وفي أي وقت تحطي معلقة كركم ومعلقة عسل نحل طبيعي مع زيت حبة البركة طبيعي لو متاح أو رشة فلفل اسود مطحون بسيطه وقلبيهم وخديهم بالمعلقة وكمان القرفه و الجنزبيل تغليهم مع بعض وتخليهم بعسل نحل دا هيفرق معاكي جدا ودا عن تجربه شخصية واسأل الله العظيم رب العرش العظيم أن يشفيكي شفاءا لا يغادر سقما

حب في أسبوعين ومن غير ماتشوفوا بعض دا مش حب دا مجرد وقت فراغ احنا في السوشيال ميديا كل واحد بيظهر بشخصية لطيفه ومحبه لكن في الواقع انتوا ما تعرفوش بعض ولا طباع وعادات بعض ولا حد شاف التاني في وقت غضب او في موقف معين مفيش حب بيتولد خلف الشاشات بسهوله ونصيحه من أخ ليكي انهي الموضوع وركزي في مستقبلك ومذاكراتك لان دا هو اللي الباقي ليكي وهو الصح والحب والنصيب هييجي وقته بس مش سوشيال ميديا وحرام عليكي تضيعي مجهودك وتعب اهلك معاكي في دراستك عشان الحب الوهمي دا وربنا يصلح حالك ويوفقك لما يحبه ويرضاه

وعليكم السلام ورحمة الله وبركاته طبعا الكثير منا او الكل مر بهذه الفتره ولكل منا سبب يختلف عن الاخر او ربما مشابه له وكل واحد ليه قدره على التحمل وربنا بيعطي كل شخص على قدر طاقته وقوة تحمله وبالنسبه لشخصي انا كنت اتعامل مع كل محنه على أنها منحه وأؤمن دائما أن كل هذا قدر ومكتوب وأن البلاء لاختبار الصبر والإيمان وان الله اذا احب عبدا ابتلاه وأؤمن دائما بمقولة ( كل مُرّ سيمُر ) ولا شك تمر علينا لحظات ضعف ويأس لكن كنت دائما عندي يقين ان الله لطيف بعباده و أن الله يريدنا ان نلجأ اليه ونتحدث معه في الصلاه وفي الدعاء والحمد لله بعد كل محنه وكل بلاء نخرج منها افضل من الاول واقوى واوسع في المعرفه واقرب إلى الله. والحمد لله دائما وأبدا

عليكم السلام ورحمة الله وبركاته يا اختي الفاضله خوفك الشديد جعل عقلك ينشغل بفكرة وجود النمل ويبدأ عقلك في رصد أي حركة صغيرة أو نقطة سوداء وتفسيرها فوراً على أنها نملة وعلى العكس في المنزل باقي أفراد الاسره عقلهم مشغول وبعيد عن فكرة وجود النمل والحل اولا نظفي المكان بخل ابيض لان ريحة الخل بتقطع الريحه اللي في المكان وبيتجمع عليها النمل ولو في اي شقوق في الحوائط حاولي تغلقيها وثانيا شغلي قرآن في المكان سورة البقره او الرقية الشرعيه والمداومه على اذكار الصباح والمساء لأنها نها تبعث السكينه والهدوء وتطرد الشعور بالقلق

احيانا الحب الزياده بيتحول لغيره لكن مش منك دا غيره عليكي يمكن انتي بعيده عن امك حاولي تقربي منها وافتحي معاها اي موضوع ووصلي ليها انك انتي كده لأنها هي اللي مربياكي وانك جمالك من جمالها واخلاقك من اخلاقها يعني فهميها انك عارفه ومقدره فضلها عليكي وان لولا وجودها مكنتيش انتي هتبقي موجوده.. الام مش بتكره لكن حبها بزياده بيتحول لخوف شديد حتى من عيون أقرب المقربين تصرفاتها دي كلها ممكن تكون خوف عليكي ابدأي انتي بالكلام الحلو والمدح ومهما قابلته بصد كملي وحده وحده هيتشال الحاجز اللي بينكم وهتشوفي بنفسك الحب في عنيها وتحسيه في افعالها وربنا يباركلك فيها ويحفظها ويصلح حالكم

دي مش مشكله ولا حاجه انتي بس محتاجه تنظيم وقت وهدوء نفسي وكويس انك عندك نفس لوامه وانك اتكلمتي دا بدايه حلوه للتغيير اولا الصلاه لازم ترجعي ليها لفضلها العظيم في الهدوء النفسي والسكينه وكان الرسول صلى الله عليه وسلم يقول أرحنا بها يا بلال يعني احنا بنهرب من كل الضغوط للصلاه موضوع الكسل دا احساس بالذنب وخمول ناتج عن العاده ومن وقت الفراغ لكن مع تنظيم يومك وتقليل وقت الفراغ هترجعي وحده وحده وخدي الموضوع زي عند مثلا يعني تحسي نفسك هتضعفي قولي لا قومي صلي كانك بتكلمي شيطانك او نفسك انا لما كنت احس ان الصلاه ثقيله واقول اصلي بعد شويه او لما اصحى كنت اقول لا بالعند في الشيطان هقوم اصلي أما الدراسه فكل دا نتيجه لان عقلك مستسلم للخمول وغير قادر على استقبال اي حاجه.. ابدأي وحده وحده في الصلاه والمذاكرة وربنا ييسرلك امورك وان شاء الله ترجعي احسن من الاول

لو الاتفاقات اختلفت اعملي اللي انتي متفقه عليه بس لان دا جشع وناس كل همها الفلوس وكأنهم اشتروا الموظفين بفلوسهم انتي فلوسك بتاخدها على مجهودك واي حاجه بتعمليها زياده سواء تصوير او طباعه طالبي بحقك فيها ولو المشكله بس في إنك ما رنتيش على الناس دي كملي عشان محدش يبقى ليه حجه دا لو المقابل يستاهل لو الخصم ضعيف خليكي عند رأيك ولو معاكي حد تاني لازم يبقى رايكم كلكم واحد

أولا صلي استخاره وربنا يهديكي للصالح ان شاء الله ثانيا لو لقيتي نفسك مش مرتاحه ماتوافقيش لأنك انتي اللي هتتجوزي وانتي اللي هتعيشي والمشكله الاكبر ان جواز القرايب بيبقى في مشاكل في الجينات ودا بيعمل مشاكل احيانا للأطفال كل شئ قدر ومكتوب لكن احنا بنحاول نعمل اللي علينا والأفضل انك تتجوزي حد نفس متعلم عشان أولادك وعشان ما يبقاش في اختلاف أفكار يمكن اهلك يكونوا شايفين الموضوع ماديا على اساس انه مسافر لكن الفلوس مش هتعمل حاجه لو كرهتي العيشه او حصلك مشاكل مع أمه او اي حد تاني صلي وفكري وقرري واتمسكي بقرارك وربنا يهديكي للصالح ان شاء الله

انتي لسه مش زيها لانك حاسه بتأنيب الضمير ونفس لوامه يعني عندك القابليه للتغير وعندك الفرصه انك تعيدي حساباتك تاني وخديها هي كنموذج معاكس ليكي وما تبقيش انتي النموذج المشايه ليكي أعملي الصح وصلحي كل اللي انتي حاسه انه فسد من علاقتك بالمجتمع اللي حواليكي عيشي بنفسك وكوني زي ما انتي عايزه نسخه فريده مش شبه حد. كل إنسان ربنا خلق فيه ما يميزه عن غيره خليكي ديما في المكان اللي انتي حابه تكوني فيه خليكي الصوره الجميله اللي انتي عايزه تحسيها من الناس اي حاجه شايفه انها مش شبهك ما تعمليهاش واي طاقه سلبيه خرجيها انتي لسه بخير وجواكي خير واجهي كل صفه سيئة بعكسها وكل كذبه بصدق وارضي الله اولا ترضى عنك الناس وربنا يوفقك ويسعدك ويريح بالك وقلبك

وعليكم السلام ورحمة الله وبركاته اولا اعملي CV كويس واكتبي فيه كل أعمالك كسابقة أعمال وارفعي شغلك على in drive وانشري اللينك بتاعك في صفحات مهتمه بمجالك وثانيا سجلي حساب في موقع اسمه خمسات هتختاري مجالك والخدمه اللي بتقدميها ودا ممكن يجيبلك شغل اونلاين مع ناس او دور نشر في مصر والوطن العربي ثالثا اقرأي في مجالك كتير وخدي كورسات أونلاين ونمي مهاراتك وما تيأسيش وحاولي مره واتنين والف وشغلك اللي هيميزك وعلى اد تعبك هتلاقي المقابل ان شاء الله وتذكري إن الله لا يضيع أجر من أحسن عملا. وبالتوفيق والسداد إن شاء الله

نصيحه ولك أن تقبلها او ترفضها في الوقت الحالي الأفضل بدلا من وضع الفلوس في البوسطه او البنوك هو انك تستثمرها في حاجه احسن لان قيمة الفلوس بتقل الفوايد فيها شبهة ربا يعني مثلا انت لو حطيت 10 آلاف هتاخد مثلا نسبة وليكن 40 ٪ فوايد ودا مش موجود اصلا يعني ال 10 آلاف في السنه هجيبلك 4 آلاف وفيها شبهة حرمانيه بنسبه كبيره ووقتها هتكون قيمة الفلوس نفسها قلت الأفضل اشتري ذهب لان دا الأستثمار الناجح حاليا ولو مبلغ كبير يبقى افضل شئ ليك العقارات

انتي صح انك فكرتي تتكلمي وتتعافي ودا كويس جدا وما تقلقيش من اي حاجه ابعدي بس عن وقت الفراغ وانك تبقي لواحدك اشغلي نفسك باي رياضه بتحبيها او نشاط او هوايه بتحبيها والتزمي بالصلاه وقربي من ربنا وخليكي ديما على وضوء وابعدي عن أي حاجه بتسبب لك اثاره سواء كلام او صور او فيديو واعملي ورد قرآني يومي والتزمي بيه هتلاقي نفسك بتبعدي عنها وحده وحده وان شاء الله تتعافي وترجعي احسن وربنا يوفقك ويسعدك ويفرح قلبك

الأفضل انك تبعدي وتنهي العلاقه دي لان انتي من حقك يبقى ليكي شريك حياتك انتي بس ودا حب مؤقت وقد يكون إعجاب فقط أو فتره مؤقته والحب دا او الإعجاب دا عمره قصير وانتي فكري في حياتك انتي ليه تبقى رقم 2 وليه زوجه تانيه وانا هنا مش ضد الزواج الثاني أو التعدد لكن كل بنت بتبقى عايزه شريك حياتها ليها هيا بس ودا حب مش انانيه

ربنا خلقنا للعباده واعمار الأرض وربنا خلق لكل حد حياته كامله وقال "لكل أجل كتاب" يعني ميعاد متحدد ربنا بس اللي يعرفه وقال "لا يكلف الله نفسا إلا وسعها" يعني كل واحد ربنا أعطى ليه على اد ما يقدر يتحمل وكل ألم او وجع بنمر بيه ليه ثواب عند ربنا زي كأنك في كليه وعندك ماده صعبه جدا في ناس بالنسبالها سهله وانتي بالنسبالك صعبه اوي بس لازم تتعاملي معاها وتحاولي عشان تنجحي فيها الفكره كلها هنا في الصبر والتوكل والتقرب من ربنا لان الأفكار دي مهلكه والدنيا هي الامتحان اللي بنعدي منه للآخره وربنا قال "لقد خلقنا الإنسان في كبد" يعني تعب ومشقه لكن النتيجه في النهايه في الجنه التي فيها ما لا عين رأت ولا أذن سمعت ولا خطر على قلب بشر وربنا قادر على كل شيء وقادر يغير حالك من حال إلى حال في لحظه لكن اللي انتي فيه اختبار ولذة النجاح في الصبر قربي من ربنا وادعي وربنا يصلح حالنا جميعا ويرزقنا راحة البال والسكينة والاطمئنان

الشعور بالخوف الدائم والإحساس بأنك مراقب هو تجربة مرهقة للغاية ومؤلمة نفسياً. من المهم أن ندرك أن هذا النوع من المشاعر له أبعاد متعددة، سواء كانت مرتبطة بضغوط حياتية، أو حالات نفسية، أو حتى عوامل بيئية. حاولي تبعدي عن أي ضغوط او توتر وممارسة الرياضة وتجنب إرهاق العقل في التفكير واقناع النفس بأنك بأمان والأهم هو التقرب إلى الله تعالى

في تطبيق دولينجو جميل

🤍🤍

اللهم آمين ولك بالمثل وشكرا لذوقك الراقي

يبقى خلي بالك من نفسك وخلي التعامل بينكم في أضيق الحدود وتجنبيه على اد ما تقدري وربنا يحفظك ان شاء الله ويهديه ويصلح حاله

يبقى الأفضل يكون في إجراء قانوني منك انتي ووالدك ضده لانه ممكن يكون بيتعاطى اي شئ وتحت تأثير دا يأذيكي او يأذي اي حد في البيت والموضوع مش محتاج سكوت ولازم تحرك وبسرعه

يبقى حاولي انك ماتكونيش سبب في ضغوط وطالما انتي قلتي في التعليقات ان اهلك عارفين وكل حاجه في النور يبقى سبيه يهدى وشوفي هيعمل ايه وطالما هو مضغوط لو مش قادره تخففي عنه الضغوط دي ماتكونيش انتي كمان سبب ضغط عليه وربنا يصلح حالكم أن شاء الله ويوفقكم لما يحب ويرضى

العفو ربنا ييسرلك امرك ان شاء الله

ماهو ريحة الخل نفاذه ودي بتبعد النمل والحشرات وتمنعي دا بانك تحاولي تشغلي عقلك عن الموضوع دا وخاصة وقت النوم واستبدلي فرش السرير والمخده بلون غامق عشان مهما ركزتي العقل ما يرصدش اي حاجه ووحده وحده هتلاقي العقل بتتغير درجة تركيزه مع الجانب النفسي والروح من القرآن والأذكار دا اساسي جدا

جرب تفتحه على جهاز ما سجلتش منه دخول من قبل وادخل كانك لسه بتفتح حساب جديد برقم جديد

كنت مسجل دخول من جهاز واحد ولا اكتر من جهاز؟

الافضل تروح أقرب مكتب ليك وتسأل واعتقد ممكن يكون في أنظمة بدون فوايد او ادخل على موقع البريد نفسه هتلاقي كل التفاصيل عليه

هو للأسف في العصر اللي احنا فيه دا إحساسك صح وكلنا مراقبين بالتكنولوجيا اللي حوالينا وكل البرامج اللي بنديها إذن للصور والكاميرا والمايك بيبقى عندها الفرصه انها توصل لينا لكن احنا بنتعامل مع الوضع دا على انه بقى واقع وحقيقه وبنحافظ على اد ما نقدر وخوفنا من المراقبه بقى عادي ودا اللي انتي تقنعي نفسك بيه ان حتى لو في مراقبه دا بقى عادي ودا بقى عند مليارات من المستخدمين للتطبيقات فيجب انك ما تفكريش في الوضع دا لان التفكير الكتير يزود الخوف ويعملك قلق وتوتر وخوف من كل حاجه وزي ما قلتلك اشتغلي نفسك باي نشاط ياخد تفكيرك او رياضه او اي حاجه بتحتاج منك تركيز وابعدي تفكيرك عن فكرة انك مراقبه طول الوقت

فاهمك بس هل انتي قراتي او شفتي قبل كده اي حاجه عن الهاكر واختراق الهواتف او اي اخبار عن الأمن السيبراني؟

دا حاجه زي الرهاب الاجتماعي والحل انك تواجهي كل دا وفرغي كل الخوف اللي عندك في الكتابه فضفضي بكل حاجه على الورق وواجهي الكاميرا بانك تفتحيها وسجلي فيديو اتكلمي فيه وبعدين شوفيه تاني وحولي الخوف دا لحب واستخدميها في التصوير صوري اي حاجه عندك زي جمله في كتاب او معلومه او السما في وقت الغروب او منظر طبيعي او اي حاجه بتحبيها اما الضغوط حاولي تبعدي عنها على اد ما تقدري او تعاملي معاها على أنها دروس تتعلمي منها انك ما تكرريش دا في حياتك المستقبليه وابعدي عن الأفكار السلبيه

كملي وأهتمي بالبحث أكتر والتعلم أكتر وكلما زادت معرفتك كانت فرص العمل اكتر