أنا عايزة اتكلم ومحتاجة نصايح بجد
أنا بنت عندي 18 سنة اتعرفت على شخص من سنة بظبط وبقينا صحاب وعلطول بعدها ارتبطنا بعد شوية بدأ يظهر حاجات انو غير سوي زي انو يختفي من بيت اهلو بالايام بدون سبب أو زعل ولما يرجع يقول إن هو كان عايز يعرف هو فارق مع مين في الغياب ده
غير انو كان بيقلل من اي حد علشان يبقى هو الاحسن ومواقف كتير اصعب من بعض أنا وقتها مكنتش عايزة اسيبو بس عايزة نحل المشكله دي
كلمت وحده قريبتي هي معالجة نفسية وقلتلها كل التصرفات بتعتو وكل حاجه هو بيعملها وهي شخصتو انو عندو حاجة اسمها الشخصية السيكوباتية وهي قالتلي اني ممكن اخليه يتواصل معاها وهتساعدو في المشكله دي
أنا عملت كده فعلا وفتحتو في الموضوع براحة وهو خدها بهزر ومصدقش كلامي بعدها المواقف زادت ومبقتش استحمل ده وقلتلو نسيب بعض وبعدنا وبعدها بسبع شهور كلمني وقلي انو عرف قيمتي ومش هيغلط الغلطة دي تاني وقال انو بالفعل بدأ في العلاج النفسي
رجعنا ومن اول اسبوع لحظت انو مش بيدور عليا خالص لما جيت اتكلم معه في الموضوع ده قلي اني بجد مريضة ومحتاجة اتعالج واني مش عايزه يبقى عنو حياه ولا صحاب ولا أهل أنا حقيقي وقتها مكنتش مصدقة انو بيتكلم بجد وكلامو وجعني جدا وكمان قال انو هيبقي معايا في رحلات العلاج كأخ بس مش اكتر
بعدت وانا مكسورة بجد رجع بعدها بشهر اعتذر وقالي انو غلطان وانه عمل كده علشان يردهالي للاسف سامحتو ورجعت الاول كنا بجد مبسوطين وحياتنا بقيت شبه مثالية المهم جيه في يوم واعترفلي انو عمل علاقة مع وحده شات وقتها زعلت جدا وكنت في حالة انهيار بجد وهو بقى يلومني اني زعلانة ويقول لي دي مش خيانة ده انا بحافظ عليكي
طبعا بعد الموقف ده الثقة اتهدت حرفيا وبقيت بشوف تليفونو علطول هو كان عندو صحاب بنات وشباب كتير علاقتها كانت سطحية جدا وانا شفت ده بعيني حرفيا ما عدا وحده اتعرف عليها في السبع شهور غياب دول دي المفروض انها زي الباقي بس انا مكنتش عارفه ارتاحلها
أنا مش بتقبلهم كلهم بس دي مش مرتاحالها المهم في يوم قلتلو هات تلفونك مرضيش خالص ورفض جدا وقالي في نص الكلام اني لو شفت الشات بتاع البنت دي هعمل حوار عليه ورفض يوريني وقلب التربيزة وقالي انتي مش واثقة في نفسك ولا فيا ولما تبقي واثقة ابقي اوريكي
المهم روحت وقلتلو يا انا يا البنات اللي في حياتك أنا مش هبقي مرتاحة وهما معاك قالي أنا مش هقدر أبعد عنهم وانتي عارفاني وهما معايا ملكيش تتحكمي أكلم مين ومين لا وقلتلو ربنا يوفقكم مع بعض وبعدت
تاني يوم كلمني وقالي هعمل اي حاجة بس متسبنيش وخلينا ندي بعض فرصة قلتلو تمام المفروض اننا كنا بنتفق هنعمل ايه لقيتو بيقولي مش هيبعد عنهم وانو هيبقى يوريني التليفون ولو خرج معاهم هياخدني
أنا معجبنيش الكلام وقلتلو أنا مش هكمل ومتحاولش توصلي بأي طريقة علشان مش عايزاك وربنا يوفقك في حياتك بعيد عني وعملت بلوك بعدها بأيام لقيتو ارتبط وعايش قصة حب رهيبة أنا بقى خارجه من العلاقة دي تعبانة جدا وحاسة اني عندي امراض نفسيه كتير مش عارفه اعمل ايه ومش عارفه ارجع لنفسي حقيقة بقيت نسخة مطفية مني بعيط من غير ما احس وبنهار بجد من اقل نقاش مع حد
أنا كمان اكتشفت بعد ما سبنا بعض أن ده مكنش حب ده تعلق مرضي مش حب مكنش عندي حياه غيرو وعرفت أن من أساس الحب انو يبقى جزء من حياتي مش اني اخلي كل حياتي والتعلق ده كان لي هو وصاحبتي أنا مكنش عندي حد غيرو بتكلم معاه هو وواحده صاحبتي بعدنا عن بعض بدون سبب أنا بحاول اشغل وقتي بدراستي واقرأ كتب علم نفس وتطوير الذات واسمع بودكاست مفيدة بس مفيش حاجه عارفة تهون عليا أنا مش عارفة ارجع لنفس...
آسفة اني طولت عليكم
السلام عليكم، أنصحك ترجعي تقرأي الكلام اللي أنتِ كاتباه فوق كأنك واحدة تانية خالص مش صاحبة المشكلة وفكري بحيادية إزاي هتنصحي البنت اللي كتبت الكلام ده لو هي بتحكيه لك. لما تفصلي نفسك عن المشكلة وتخرجي براها وتبصي عليها كأنها مشكلة حد تاني هتعرفي تشوفي الطريق للخروج منها. *** راجعي اللي حصل وشوفي الأخطاء اللي كان مفروض متعمليهاش عشان دي كلها دروس حتى لو قاسية ومؤلمة فهي في الحقيقة دروس غالية لازم تحفظيها عشان متكرريش الخطأ وتدخلي في علاقات مؤذية زي دي وتتأني بعد كده في اختيار شريك حياة سوي نفسيا. واتعلمي، إن بلاش أي علاقات غير رسمية تاني حتى لو قابلتِ الشخص الصح. ** وبلاش تاني تمشي بمبدأ (I can fix him) من البداية واضح إنه غير سوي وقريبتك أكدت لك لكن أنتِ استمريتِ رغم كل العلامات الحمراء وصدقتِه ووثقتِ وممكن فكرتِ هتقدري تصلحيه وده أكبر خطأ البنت بترتكبه لما ترتبط بسايكو أو باد بوي. *** والحمد لله إنك أدركتِ إن ده كان تعلق مرضي، لكن مش معنى ده إنك مريضة نفسيا فتغرقي نفسك في دائرة الإحباط والانطفاء النفسي وكل الوهم اللي معيشة نفسك فيه حاليا. أنتِ مش مريضة ومش ضعيفة أو فيكِ مشكلة مستحيلة ولا حياتك انتهت. ** بلاش تغرفي نفسك بنفسك وتحسسيها بالعجز وتسمحي لإنسان مريض إنه يأثر فيكِ ويدمر لك حياتك بالشكل ده، أنتِ كده بتسمحي له ينتصر في اللي عمله وكان ناويه من اول مرة قرب منك أو من المرة اللي رجع فيها عشان يتعمد إيذائك وينتقم منك بكلامه إنك مريضة نفسيا. *** اقعدي مع نفسك كده وفوقيها وفكريها إن اللي أنتِ عايشة فيه دلوقتي معناه إنك سمحتِ له يحقق اللي هو عاوزه. هل نفسك مش غالية عليكِ ولا تستحق؟ صدقيني أنتِ أقوى من كل ده وتستحقي أفضل من كده فاكسري الدائرة دي وارجعي لربنا ولنفسك. وربنا يوفقك للي فيه الخير. 💚💚
تم النشر الأحد، ١ نوفمبر ٢٠٢٦
شوفي اختي، اولا أحمدي الله انه ابعدك عن هذا الشخص، لانه كان ممكن يئذيكي فإنت خرجتي من العلاقة بأقل ضرر فينا نقول. التعلق الي عم تشعري فيو طبيعي ولكن مش دائم، استعيني بالله واشغلي نفسك بطاعته واستغفري ربك لانه العلاقة كانت اصلا لا تجوز شرعا، انت بإيدك تسترسلي بالافكار والذكريات او تصدّيها وتشغلي نفسك، ومع الوقت رح تنسيها، اهم اشي انه ما تضعفي وما ترجعي للعلاقة انت حاليا ببر الأمان. ادعي ربنا يرزقك الزوج الصالح والأرزاق الحلوة والنجاحات والمشاعر الحلوة بما يرضيه الله كريم
تم النشر الأحد، ١ نوفمبر ٢٠٢٦
يا بنت الناس اللي انتي فيه ده مش حب ده تعلق مرضي وشخص لعب بدماغك وطلع عينك نفسيا لغاية ما خلاكي تحسي انك قليلة وانك انتي العيانه وهو زي الفل وهو اساس العبث كله والبعد عنه راحة بال وفترة وهتعدي وهتنسيه بس اصبري على نفسك وادئي صفحة جديدة واهتمي بدراستك ونفسك وسيبيكي من الهري ده كله عشان تستاهلي حد يقدرك ويحافظ عليك بجد مش يدوس عليكي.. فأول حاجة اقطعي اي باب اتصال بيه نهاي وتعملي بلوك في كل حتة وما تدخليش تشوفي اي حاجة تخصه ولا تتابعي أخباره وتاني حاجة تشغلي وقتك بجد مش مجرد كلام وتنزلي تشتغلي أو تكتفي بدراستك وتروحي كورسات أو تمارين رياضية تخرجي فيها الطاقة السلبية دي عشان مخك ما يفكرش فيه. ثالت حاجة تدعمي نفسك بنفسك وتقولي كل يوم أنا كويسة واستاهل الاحترام والتقدير وما تسمحيش لأي حد يحسسك إنك قليلة أو مريضة زي ما هو عمل معاكي ورابع حاجة تقربي من أهلك وصحابك الكويسين اللي بيحبوج بجد وابعدي عن أي حد بيجيبلك طاقة سلبية أو بيفكرك بالماضي وخامس حاجة تصبري على نفسك وما تستعجليش الشفاء لأن جرح التعلق المرضي بياخد وقت على ما يلتئم ومع الوقت والنسيان هتلاقي نفسك بقيتي أحسن بكتير وبترجعي لطبيعتك وأحسن من الأول. وجد والله ربنا يحفظك ويوفقك لما يحب ويرضى
تم النشر الأحد، ١ نوفمبر ٢٠٢٦
أنا آسفة جداً إنك مريتِ بكل ده، وأقدر كم الوجع والخذلان اللي بتحسي بيه دلوقتي. اللي حصل مش سهل على أي حد، خاصة في سن 18 سنة، وإنك قدرتِ تدركي إن العلاقة دي كانت تعلق مرضي مش حب حقيقي ده خطوة كبيرة وشجاعة. الشخص ده كان بيستخدم أساليب تلاعب واضحة، زي الاختفاء والتقليل من الآخرين والخيانة ثم اللوم عليكِ، وده مش سلوك سوي أبداً، وإنكِ قررتِ تبعدي مرتين كان قرار صحيح رغم صعوبته. عشان تتعافي من الخذلان والوحدة، ركزي على إعادة بناء هويتكِ بعيداً عنه. ابدئي بخطوات عملية زي تخصيص وقت يومي للدراسة والقراءة اللي بتعمليها فعلاً، لكن أضيفي ليها تأمل في الدروس المستفادة من التجربة دي، مثل أهمية الثقة بالنفس والحدود الشخصية. في الإسلام، الصبر والتوكل على الله هما مفتاح الشفاء، فادعي ربنا يشفي قلبكِ ويبعد عنكِ كل ما يؤذيكِ، وتذكري إن قيمتكِ مش مرتبطة بأي شخص آخر. حاولي تبني روتين يومي يشمل أنشطة تعزز شعوركِ بالاستقلال، زي ممارسة هوايات جديدة أو تعلم مهارات تساعدكِ في مستقبلكِ الدراسي أو المهني. الإحساس بالأمراض النفسية اللي بتوصفيها طبيعي بعد علاقة سامة زي دي، وده مش يعني إنكِ مريضة، بل إنكِ بتمري بمرحلة شفاء. استمري في البحث عن نصائح مشابهة على فدني عشان تشوفي تجارب تانية وتاخدي منظور أوسع. أنتِ أقوى مما تتخيلي، ومع الوقت والجهد هترجعي لنفسكِ أقوى وأكثر توازناً. لو عايزة تتكلمي أكتر، أنا هنا.
تم النشر الأحد، ١ نوفمبر ٢٠٢٦
لعرض السؤال في فدني اضغط هنا