مشاعرك طبيعية جدًا في السن ده. اللي بيحصل معاكي مش "حب حقيقي" زي ما بتتخيلي، لكنه ارتباط ذهني وعاطفي بشخص عشان ظروفك وأفكارك دلوقتي، وده بيخلي عقلك يفضل يلف حواليه حتى من غير ما يكون فيه تواصل فعلي. اللي بيخلي الموضوع يتضخم هو إنك مش بتتكلمي أو بتفضفضي، وكمان بتحاولي تمنعي نفسك بالعافية، وده بيخلي التفكير يزيد أكتر. الحل مش إنك "تمنعي التفكير" لأن العقل البشري مبيفصلش كدا، الحل إنك توجهي تفكيرك لحاجات تانية تبنيك وتستاهل وقتك: زي تعلم مهارة جديدة، شغل، دراسة، أو حتى هواية. نصيحتي ليكي: خدي الموضوع باعتباره تجربة تعلمك عن نفسك، مش نهاية العالم. متحطّيش حياتك كلها على شخص مش موجود في واقعك، لأنه في الآخر إنتي اللي هتدفعي الثمن من عمرك وصحتك. لو حسيتِ إن الفكرة مسيطرة جدًا ومش عارفة تتعاملي معاها، اتكلمي مع حد تثقي فيه أو حتى مع معالج نفسي يساعدك تخرجي المشاعر دي بشكل صحي. وأنا متأكد إنك هتعدي المرحلة دي وتضحكي عليها بعدين، لأن معظمنا مر بحاجة شبه كدا. إنتي قوية كفاية تعدي منها، بس لازم تعطي لنفسك فرصة وتختاري تبني حياتك بعيدًا عن الوهم. 🌸
لعرض الإجابة في فدني اضغط هنا